Úpéchékkúl me Túmúnú Seni án Satan Kewe Ssár!

“Üpöchökül ngeni än ewe Tefil angangen otuputup.”​—EF. 6:11.

IFA USUN KOPWE PÉLÚWENI?

Ifa usun néún Jiowa chón angang epwe túmúnú pwe esap ttup lón ewe ssáren tongen pisek?

Met a tongeni álisi emén Chón Kraist mi pwúpwúlú le túmúnú seni ewe tipisin lisowu lúkún pwúlúwan?

Met óm ekiek, ikkefa ekkewe feiéch epwe torikich ika sia úpéchékkúl ngeni ewe ssáren tongen pisek me tipisin lisowumwáál?

1, 2. (a) Met popun Satan a oput ekkewe mi kepit me ekkewe ‘ekoch sip’? (b) Ikkefa án Satan kewe minen ssár sipwe pwóróus wóón lón ei lesen?

 SATAN EWE TEFIL a oput aramas, ákkáeúin chókkewe mi angang ngeni Jiowa. A mammaun ngeni ekkewe mi kepit ra chúen nóm wóón fénúfan. (Pwär. 12:17) Ekkena Chón Kraist mi emmweni ewe angangen afalafala ewe Mwú fán pwora, ra pwáraatá ngeni aramas pwe Satan, i ewe sou nemenemen fénúfan. Ewe Tefil a pwal oput ekkewe ‘ekoch sip,’ ekkewe ra álisi ekkewe mi kepit lón ar angang, me ra eáni ewe ápilúkúlúkún manaw esemuch. (Joh. 10:16) A péút seni Satan ena ápilúkúlúkún manaw esemuch, ina popun a fókkun song. Satan, i chón koputach, ese lifilifil ika kich emén me lein ekkewe mi kepit are ekkewe ekkóch siip. A mochen liapenikich.​—1 Pet. 5:8.

² Ren an epwe féri ena, Satan a ákkáeá sókkópaten minen ssár. A achocho le achunaló aramas pwe resap silei ewe pwóróus allim me epwe monoló seniir an kewe minen ssár. Nge ewe Tefil a pwal liapeni ekkóch me lein chókkewe mi fen etiwa ewe pwóróus allim usun ewe Mwú. (2 Kor. 4:3, 4) Ewe lesen mwen ei a áiti ngenikich úlúngát án Satan kewe minen ssár, (1) sókkun fós sise nemenifichi, (2) niwokkusiti aramas me sóssót, me (3) sókkun mengiringir mi kon ssenúk. Iei sipwele pwóróus wóón pwal ruu án Satan kewe minen ssár, me ifa usun sipwe túmúnúkich seniir. Ikkeei, tongen pisek me ewe sóssótun án emén lisowu lúkún pwúlúwan.

TONGEN PISEK, EÚ SSÁR MI AMOPU ARAMAS

3, 4. Ifa usun aúrekin ei fénúfan a tongeni emmwen ngeni tongen pisek?

³ Lón eú me lein án Jesus kewe kapas áwewe, a fós usun eféú pwikil mi mworetiw lein iráfélúfél. A áweweei pwe emén a tongeni rongorong pwóróusen ewe Mwú  “nge öürek usun manauen ikenai me pwapwan wöün fanüfan ra amopu ewe kapasen Kot, pwe esap tongeni ua.” (Mat. 13:22) Tongen pisek, ina eú ssár chón koputach we Satan a ákkáeá.

⁴ A wor ruu mettóch a tongeni “amopu ewe kapasen Kot.” Áeúin, “öürek usun manauen ikenai,” are lólilen ren tufichin manawach. Lón ei “fansoun weires,” a chómmóng mettóch sipwe osukosuk ren. (2 Tim. 3:1) Epwe tongeni weires ach sipwe mééni met sia osupwangan ren mémmongun are esor néúch moni pún ese wor ach angang. Ka pwal tongeni lólilen usun mwachkkan me pwisin eisinuk, ‘Epwe naf nei moni lupwen upwe chinnapeló nge use chúen tongeni angang?’ Ekkóch aramas ra achocho pwe repwe pisekisekiló pún ra ekieki pwe watteen néúr moni epwe anúkúnúkéchúr.

5. Ifa usun “pwapwan wöün fanüfan” a tongeni otupukich?

⁵ Jesus a fós usun pwal eú mettóch, ina ewe otuputupun “pwapwan wöün fanüfan.” Ei mettóch fengen me ewe aúrekin manaw ra tongeni ssareikich le tongei pisek. Ewe Paipel a erá: “Moni a pwal alisi aramas.” (SalAf. 7:12) Weween pwe moni a tongeni álisikich lón ach osupwang, nge esap eú alen mirit ach achocho pwe sipwe wéúéchúló. Chómmóng ra kúna pwe lapólóón ar achocho le ochukuchukatá pisekiir, pwal ina lapólóón ar mwéchúló lón ewe ssáren tongen pisek. Nge ren ekkóch, wéúúr a pwal mwo nge wiliti néúr masta.​—Mat. 6:24.

6, 7. (a) Met epwe tongeni fis lón óm leenien angang epwe tongeni efisi óm kopwe mochen pisekisekiló? (b) Met emén Chón Kraist epwe ekieki lupwen a suuk ngeni le áwattelóói an fansoun angang?

⁶ Eli kese fen tepereni nge ka poputá le mochen pisekisekiló. Áwewe chék, ekieki met a tongeni fis: Noum we pos a erenuk: “A wor eú pwóróus mi apwapwa! Ach ei kompeni a pwal angei eú contract. Weween eli kopwe angang watteen fansoun ren fitu maram, nge kopwe lúkúlúk pwe epwe watteeló peioffum.” Epwe met meefiom ren ei pwóróus? Pwúngún pwe a mmen lamot wisom le atufichi osupwangen óm famili, nge esap chék ina wisom. (1 Tim. 5:8) A pwal wor ekkóch mettóch a lamot kopwe ekieki. Epwe ifa úkúkún watteen ewe fansoun kopwe angang? Óm angang epwe áweiresi óm angang ngeni Kot me eppeti óm fiti ekkewe mwich me atai óm fansoun famili fel?

⁷ Ekieki menni a fókkun lamot ngonuk. A lamot ewe watteen moni, are óm ririéch ngeni Jiowa? Kopwe úkútiw le akkakkomwa óm angang ngeni Kot pokiten óm mochen áwattelóói noum moni? Ka tongeni kúna ifa usun tongen pisek epwe kkúú manawom ika kese túmúnú óm me án óm famili ririéch ngeni Jiowa? Ika ka nóm lón ei esin  osukosuk, ifa usun kopwe úpéchékkúl me túmúnúk pwe ewe tongen pisek esap amopuk?​—Álleani 1 Timoty 6:9, 10.

8. Ikkefa ekkewe pwóróus lón Paipel repwe álisikich le etittina ifa usun sia manaweni manawach?

⁸ Ika sise mochen tongen pisek epwe amopukich, mi lamot iteitan sipwe etittina napanapen ach manaweni manawach. Sisap usun Esau, ewe a aúcheangawa án Jiowa kewe pwon. (Ken. 25:34; Ipr. 12:16) Sisap pwal usun ewe mwán mi pisekisek, ewe Jesus a etiwa an epwe améméló pisekin kewe meinisin, fang ngeni ekkewe mi wéúngaw, me tapweló mwirin. Ese féri minne Jesus a ereni, nge “a feilo fän letipeta, pun wöün a fokun chomong.” (Mat. 19:21, 22) Wéún kewe ra usun eú ssár mi ssárei i, iwe a péút seni ewe feiéch mi wachemwuk an epwe tapweló mwirin Jesus, ewe mwán mi lap seni meinisin! Mi lamot sipwe pwal túmúnú pwe ete péút senikich feiéchún wisach usun néún Jesus chón káé.

9, 10. Me ren ewe Paipel, epwe ifa ach ekiek usun mettóchun aion?

⁹ Ren ach sisap kon lien aúreki mettóchun aion, mi lamot sipwe aúseling ngeni án Jesus ei kapasen fén. A apasa: “Iei minne ousap öürek o apasa, ‘Meta sipwe mongö?’ ika ‘Meta sipwe ünümi?’ ika ‘Meta sipwe üföüf?’ Pun chokewe resap silei Kot ra chök ekieki usun ekei metoch. Iwe, Sememi lon läng a silei pwe oua osupwang ren ekei metoch.”​—Mat. 6:31, 32; Luk. 21:34, 35.

¹⁰ Ika sise mochen ttup ren ewe ssáren wéún fénúfan, sipwe eáni án Akur ekiek, ewe sou makken Paipel a erá: “Kosap mut ngeniei ai upwe mweleleló are upwe kon pisekisekiló. Ngeniei minne chék ua osupwangan.” (SalF. 30:8, Contemporary English Version) Akur a weweiti lamoten moni fán iten tufichin manawan, nge a pwal weweiti otuputupun wéún fénúfan. Mi lamot sipwe mirititi pwe aúrekin manaw me otuputupun wéún fénúfan ra tongeni atai ach ririéch ngeni Jiowa. Ika sia kon aúreki mettóchun aion, iwe, eli esap chúen wor ach fansoun, péchékkúl, are mochen akkomwa ach angang ngeni Kot. Ina minne, sipwe túmúnúkich seni án Satan ssáren tongen pisek!​—Álleani Ipru 13:5.

EWE SÓSSÓTUN ÁN EMÉN LISOWU LÚKÚN PWÚLÚWAN A USUN EÚ PWANG MI MONOLÓ

11, 12. Ifa usun emén Chón Kraist a tongeni ttur lón ewe ssáren lisowu lúkún pwúlúwan lón an leenien angang?

¹¹ Ika ekkewe chón chúnnúmei ra mochen liapeni emén man mi péchékkúl, fán ekkóch ra ttu pwang lón ewe al ikewe ia ekkewe man ra kan pwer ie. Ra kan pwénúeló ewe pwang ren chéén irá, amúch me pwúl. Eú me lein ekkewe sóssót Satan a kan áeá mi fókkun manaman usun chék ena minen ssár, ina ewe tipisin lisowumwáál. (SalF. 22:14; 23:27) Ekkóch Chón Kraist ra fen turulong lón ena minen ssár pokiten ra pwisin atolonger lón och mettóch mi ámecheresi ar repwe féri tipis. Ekkóch Chón Kraist mi pwúpwúlú ra ttur lón tipisin lisowumwáál lupwen ra poputá le sani emén me lúkún pwúlúwer.

¹² Án rúúemén sanifengeniir a tongeni poputá lón óm leenien angang. Lap ngeni ekkewe mwán me esopwun chóchóón ekkewe fefin mi ttur lón tipisin lisowumwáál, a fis ren chiener kewe chón angang. Ika en mwán mi lamot kopwe soun angangfengen me ekkewe fefin, are ika en fefin mi lamot kopwe soun angangfengen me ekkewe mwán? Ika ina, ifa usun óm chiechi ngeniir? Ka ámmeef ngeniir pwe oua chék chiechi lón angang me esap pwal wor och me lúkún? Áwewe chék, eli emén pwiich fefin a pwóppwóróus ngeni emén chienan chón angang mwán, iwe, a kon chiechi ngeni me poputá le uwawu meefian usun an osukosuk ren pwúlúwan we. Are emén pwiich mwán a chieneni emén fefin lón an angang. Iwe epwe ekieki: “A aúcheani meefiei  me nefotofot ngeniei lupwen ua fós. A pwal súfélitiei. Amwo itá a ina usun pwúlúwei we!” Ka tongeni kúna ifa usun ekkeei Chón Kraist ra tongeni tolong lón efeiengawen tipisin lisowumwáál?

13. Ifa usun emén epwe tongeni poputá le sani emén me lúkún pwúlúwan we lón ewe mwichefel?

¹³ Án emén sani emén lúkún pwúlúwan, a pwal tongeni poputá lón ewe mwichefel. Iei met a wesewesen fis ngeni eú pean pwúpwúlú. Daniel me pwúlúwan we Sarah, iir regular pioneer. * Daniel a erá pwe i ewe sókkun elter mi chék etiwa meinisin angang ra ewisa ngeni lón ewe mwichefel. A káé Paipel ngeni nimmén alúwél, me úlúmén leir ra papatais. Pwiich keei mi kerán papatais ra osupwangen án emén epwe aururuur. Nge pokiten Daniel a kon osukosuk ren chómmóngun wisan lón ewe mwichefel, fán chómmóng Sarah a wisen aururuur. Iwe, a pwal lamot ngeni Sarah án emén epwe áfánni i me néún Daniel kewe chón káé ra ákkáfánni. Ena mettóch a wiliti eú ssár mi efeiengaw. Iei alón Daniel: ‘Ren fite maram pwúlúwei we a kan áeá an péchékkúl le álisi ekkewe ekkóch, iwe, a poputá le apwangapwangoló lón pekin lúkú me memmeef. Lón ena atun, use pwal túmúnú i, iwe ei mettóch a emmwen ngeni feiengaw. Pwúlúwei we a ttur lón tipisin lisowumwáál ren emén me lein ekkewe alúwél ua káé ngeniir. Ren ai fókkun osukosuk use meefi pwe a fen apwangapwangoló án Sarah ririéch ngeni Jiowa.’ Ifa usun kopwe ti ssenúk ena sókkun feiengaw?

14, 15. Met a tongeni álisi ekkewe Chón Kraist pwúpwúlú le ti seniir ewe tipisin lisowu lúkún pwúlúwer?

¹⁴ Ren óm kopwe túmúnúk seni ewe tipisin lisowu lúkún pwúlúwom, mi lamot kopwe ekiekiéchú weween óm kopwe tuppwél ngeni pwúlúwom. Jesus a erá: “Mine Kot a rifengeni esap wor eman aramas epwe mwütifeseni.” (Mat. 19:6) Kosap fókkun ekieki pwe wisom lón ewe mwichefel a kon lamot seni pwúlúwom. Ika oua kan ikkimufesen me pwúlúwom pokiten och angang ese lamot, ámi ririin pwúpwúlú epwe tongeni ngawóló. Iwe, kopwe tongeni kúna sóssótun tipisin lisowu lúkún pwúlúwom.

¹⁵ Ika en emén elter, mi lamot kopwe túmúnú ewe mwichefel. Aposel Petrus a erá: “Oupwe tümwünü ewe mwichen sip Kot a ngenikemi, pwe oupwe foleniir ren unusen letipemi, . . . nge esap me lükitipemi. Oupwe föri ämi angang, sap fänäsengesin ämi chök mochen angei liwin, nge seni wesewesen ämi mochen föri ewe angang.” (1 Pet. 5:2) Kosap túmúnúngaw ngeni chón ewe mwichefel. Nge kosap kon lien angang weires lón wisom wisen elter nge túmúnúngaw lón wisom ngeni pwúlúwom we. Ese pwúng óm kopwe ákkálisi chón ewe mwichefel me túmúnúngaw ngeni pwúlúwom we leimw. Ena mettóch epwe efeiengawa ámi pwúpwúlú. Daniel a erá, “Itá esor popun kopwe kon osukosuk lón wisom kewe lón mwichefel, nge túmúnúngaw ngeni pwisin óm famili.”

16, 17. (a) Met Chón Kraist mi pwúpwúlú ra tongeni féri lón ar leenien angang an epwe affata ngeni meinisin pwe resap pwal sani emén lúkún pwúlúwer? (b) Apwóróusa ekkóch pwóróus lón néúch kewe puk mi tongeni álisi Chón Kraist le ti seniir ewe tipisin lisowu lúkún pwúlúwer.

¹⁶ Ekkewe Leenien Mas me Awake! ra ur ren kapasen fén mi múrinné mi álisi ekkewe Chón Kraist pwúpwúlú le ti seniir ewe tipisin lisowu ngeni emén lúkún pwúlúwer. Ewe Leenien Mas minen December 1, 2006, a awora ei kapasen fén: “Kopwe tümünük seni met epwe efisatä om sani pwal emön lon om leenien angang are ese lifilifil ie. En mi tongeni poputä le sani emön pokiten ämi angangfengen ren chommong awa. Itä mwän pwüpwülü me fin pwüpwülü repwe affata ren lapalaper me ar fos pwe resap sani emön lükün pwülüwer. Emön a mochen pwe epwe  manaueni ewe manau mi fich ngeni Kot esap etiwa än aramas ekkekieki ussun i ren sokkun pwomwen inisin are kapas are ren üfan are foutan ese fich ngeni chon Kraist. . . . A mürinnö om kopwe isetiu woon om chepelin angang sasingin pwülüwom me nöüm kewe. Ekkena sasing repwe ächema ngonuk me ekkewe ekkoch ussun iö kewe ka tongeer. Kopwe apposa letipom pwe kesap ameef ngeni aramas pwe ka mochen rongorong ar kapasen ämichimich are pwe ka pwal mwo nge ekis sani ena esin fos.”

¹⁷ Ewe pwóróus itelapan “Fori Om Pupulu Pwe Epwe Eu Ririfengen mi Nomofoch” lón Ewe Leenien Mas minen, January 1995 a wor eú kapasen éúréúr usun án emén akkanchangei an lisowu ngeni emén me lúkún pwúlúwan. Ena pwóróus a pwal erá pwe ika ka eáni ekkeei sókkun anchang mi limengaw, epwe emmwenuk le féri tipisin lisowumwáál. (Jas. 1:14, 15) Ika ka fen pwúpwúlú, epwe éch ika en me pwúlúwom we oupwe álleani ekkewe pwóróus mi weneiti ena itelap. Jiowa, i ewe Chón Poputááni kókkótun pwúpwúlú, me ena kókkót a pin. Ámi awora fansoun le pwóróusfengen me pwúlúwom we usun ámi pwúpwúlú, epwe pwáraatá pwe oua aúcheani ekkewe mettóch mi pin me ren Kot.​—Ken. 2:21-24.

18, 19. (a) Met pwúnúngawen án emén féri ewe tipisin lisowu lúkún pwúlúwan? (b) Ikkefa feiéchún óm akkamwéchú óm tuppwél ngeni pwúlúwom?

¹⁸ Ika ka meefi pwe ka mochen poputá le chiechiéch ngeni emén lúkún pwúlúwom, kopwe ekieki met pwúngúngawen lisowumwáál. (SalF. 7:22, 23; Kal. 6:7) Chókkewe mi féri tipisin lisowumwáál ra eletipengawa Jiowa. Ra pwal ámeteki letipen pwúlúwer kewe me pwal pwisin iir. (Álleani Malakai 2:13, 14.) Nge kopwe fen ekieki ekkewe feiéch epwe tori chókkewe mi akkamwéchú liméchún féfférúr. Kopwe eáni ewe ápilúkúlúkún manaw esemuch, me pwal pwapwaiti ewe sókkun manaw mi fókkun múrinné lón ei fansoun, kapachelong eú mwelien letip mi limeliméch.​—Álleani Än Salomon Fos 3:1, 2.

¹⁹ Iei alón ewe sou makken kélfel: “Chokewe mi aücheani om allük ra fokun kinamwe. Esap wor och ra tongeni chepetek ren.” (Kölf. 119:165) Ina minne, kopwe tongei ewe enlet me ‘fakkun nengenifichi usun om fefetal, esap usun ekkewe aramas mi tiparoch, pwe usun ekkewe mi tipatchem’ lón ekkeei rán mi ngaw. (Ef. 5:15, 16, TF) Ekkewe al sia fetál wóón ra ur ren sókkópaten án Satan kewe minen ssár a áeá pwe epwe liapeni néún Kot kewe chón fel mi enlet. Iwe nge Jiowa a fen ngenikich mettóch meinisin mi lamot pwe sipwe tongeni “üpöchökül” me túmúnú pwisin kich pwe sisap tup lón án Satan kewe minen ssár.​—Ef. 6:11, 16.

[Sasing lon pekin taropwe 29]

Kosap mut ngeni tongen pisek an epwe amopuk me atai óm riri ngeni Jiowa

[Sasing lon pekin taropwe 32]

Ika ka núesik are etiwa án emén núesik ngonuk a tongeni emmwenukolong lón tipisin lisowu lúkún pwúlúwom