Arap Ngeni ewe Chón Aúselinga Iótek

CHÓMMÓNG mi erá pwe ra lúkú Kot rese tongeni awora eú popun mi núkúchar usun ar lúkú. Rese pwal mwo nge áweweei pwata fán chómmóng ekkewe lamalam ra ngaw are pwata Kot a mutatá riáfféú. Ra chék iótek ngeni emén Kot rese sissilei.

Iwe nge, en ka tongeni arap ngeni Kot. Ka tongeni ámááraatá óm lúkú wóón óm weweiti usun Kot pwe ina met epwe amwékútuk le tongei me aúcheani i. Lúkú mi enlet a lóngólóng wóón ekkewe pisekin ánnet. (Ipru 11:1) Ika ka káé ewe enlet usun Kot, ka tongeni silei i me fós ngeni i usun emén chiechiom. Ekieki mwo pwóróusen ekkewe ekkóch mi piin iótek me lóóm inaamwo ika ra tipemwaramwar pwe mi wor emén Kot.

◼ Iei alón Patricia, ewe sia fós usun lón ewe áeúin lesen. “Eú rán, ua nóm lein chienei kewe, ina epwe engol atun ra poputá le fósfengen usun lamalam. Ua ereniir usun eú fansoun emén Chón Pwáraatá Jiowa a chuurikem lón imwem we, nge ra pwóróusfengen me semei we ese lúkú pwe mi wor Kot, nge ua towu. Emén chienei kewe a erá: ‘Neman, Chón Pwáraatá Jiowa ra pwúng.’

“Iei pwal alón emén chienei kewe, ‘Pwata sise fiti ar kewe mwich pwe sipwe pwisin silei?’ Iwe ina met aua féri. Inaamwo ika aua tipemwaramwar usun met aua rongorong, nge ekkóch me leim aua sópweló le fiti mwich pokiten chék ekkewe Chón Pwáraatá Jiowa ra fókkun chiechiéch.

“Iwe nge, lón eú Ráninfel, ua rong eú mettóch mi siwili ai ekiek. Ewe chón afalafal a áweweei pwata aramas ra riáfféú. Esap mwo fán eú ua aúcheani pwe lepoputáán aramas ra ffér lón eú napanap mi unuséch, nge tipis me máló ra poputá ren emén mwán, mwirin a achéúfetálei ngeni aramas meinisin. Ewe chón afalafal a pwal áweweei pwata án Jesus máló a lamot pwe epwe eliwinato ngeni aramas met a péút seni ewe áeménún mwán. * (Rom 5:12, 18, 19) Ua kerán chék weweiti meinisin. Ua ekieki pwe ‘Mi wesewesen wor emén Kot mi chúngúkich.’ Ua sópweló le kákkáé ewe Paipel. Mwirin ua meefi pwe ua tongeni iótek ngeni wesewesen emén, ina ewe áeúin fansoun a fis lón manawei.”

◼ Iei alón Allan, ewe sia fen pwóróus usun lón ewe áeúin lesen. “Eú rán, Chón Pwáraatá Jiowa ra chuurikem lón imwem, me pwúlúwei we a etiwer pokiten a mochen aúseling met ra apasa usun manaw esemuch wóón fénúfan. Ua song. Ina popun, ua panaló pwúlúwei we lón  ewe kitchen me likitaló ekkewe Chón Pwáraatá lón ewe ruumw, me ereni, ‘Kete tiparoch. Kese tongeni lúkú ekkena mettóch!’

“A pélúweni: ‘Iwe ika ina feiló ánnetatá ngeniir pwe iir mi mwáál.’

“Enlet use tongeni ánnetatá och mettóch. Nge, ra fókkun kirekiréch me ra likit ngeniei eú puk usun poputáán manaw, are mi wor emén mi fératá manaw ika manaw a pwisin fisitá. A fókkun fataffatéch án ewe puk áweweei me a pwal wor chómmóng pisekin ánnet, ina popun ua filatá le káé usun Kot. Ua poputá le káé Paipel ren ekkewe Chón Pwáraatá, me mwirin ua weweiti pwe met Paipel a apasa a kon sókkóló seni meinisin met ua piin ekieki usun lamalam. Atun a lapóló ai sile usun Jiowa, ua poputá le tichiki ai iótek ngeni. Mei wor ekkóch napanapei rese kon éch, ina popun ua iótek ren álillis. Ua fókkun meefi pwe Jiowa a pélúweni ai kewe iótek.”

◼ Iei alón Andrew seni Britain. “Inaamwo ika a péchékkúl ai lúkú me ua pwapwaiti pekin science nge ua chék lúkú ewe afalafal pwe manaw a pwisin fisitá pokiten chék ekkóch aramas ra erá pwe a pwúng. Ren ekkewe mettóch  meinisin mi ngaw ra fiffis, a efisi ai use mochen lúkú pwe mi wor Kot.

“Iwe nge, fán ekkóch ua ekieki: ‘Ika mi wor emén Kot lón láng, iwe ua mochen weweiti weween manaw. Pwata a kon chómmóng atai allúk me maun?’ Lupwen ua nóm lón osukosuk, fán ekkóch ua iótek ren álillis, nge use silei ié we ua fós ngeni.

“Iwe mwirin, emén a ngeni pwúlúwei we eché chékúkkúnún taropwe férien Chón Pwáraatá Jiowa, itelapan: Ei Otot Epwe Nonnomelo? Wesen ina ewe kapas eis ua ekkekieki fán chómmóng. Ena taropwe a efisi ai ekieki usun ewe Paipel, ‘Itá mi lamot upwe silei pélúwen ena kapas eis?’ Lupwen ua ló kukkunou, emén a ngeniei eú puk, The Bible​—God’s Word or Man’s? * Lupwen ua mirititi pwe Paipel a tipeeú ngeni pekin science mi enlet, ua meefi pwe a lamot upwe alapaaló ai silei Paipel. Ina popun, lupwen emén Chón Pwáraatá Jiowa a etiwaei le káé Paipel ren, ua tipeeú ngeni. Atun ua weweiti met Jiowa a tipeni, iwe ua meefi pwe ua silei pwe i wesewesen emén, ua tongeni fós ngeni lón iótek nge esor pinepinan.”

◼ Iei alón Jan seni Britain, emén mi mááritá lón ewe lamalamen Pirostan. “Likótuputup lón lamalam me chéúfetálin riáfféú a efisi ai fangetá lón pekin lamalam. Ua pwal towu seni sukul tekia me ua poputá le kitar me kél fán iten moni. Ina atun aua chufengen me Pat. I a mááritá lón lamalamen Katolik me aua léllé pwe ause chúen lúkú pekin lamalam.

“Ám me chienem kewe mi towu seni sukul mi sani le káé usun ekkewe lamalamen Étiwen fénúfan, aua nóm lón eú imw ese chúen wor aramas mi nonnom lón. Lukenipwin aua kan fókkun pwóppwóróusfengen ren fitu, fitu awa usun weween manaw. Inaamwo ika ám me Pat ause lúkú Kot, nge aua meefi pwe mi wor och ‘manaman mi efisi manaw.’

“Mwirin ám mwékút ngeni efengin England lón fénúen Britain ren ám aupwe kút ám angangen sou kél, a uputiw néúm we át. Eú pwin a semmwen, me use tepereni nge ua iótek ngeni ewe Kot use lúkú. Ekiseló mwirin ám riri me Pat a patapateló, me ua sú fán néúm we ménúkol. Ua pwal ióteksefál fán iten álillis, ika mi mwaren wor emén a aúseling. Use silei nge Pat mi fen pwal féri ena.

“Lón chék ena rán, rúúemén Chón Pwáraatá Jiowa ra fichifich wóón asamen Pat we me áiti ngeni ekkóch kapasen fén mi álilliséch seni Paipel. Pat a kériei lón phone me eisiniei ika ua mochen fiti i le káé Paipel ren ekkewe Chón Pwáraatá. Mwirin aua káé pwe mi lamot aupwe rechisterini ám pwúpwúlú, ren ám aupwe apwapwaai Kot. Usun itá a fókkun weires pun ese núk ám riri.

“Aua mochen alapaaló ám silei usun pwénútáán án Paipel kewe oesini, popun ekkewe riáfféú me weween ewe Mwúún Kot. Ekis me ekis aua mirititi pwe Kot a ekiekikich me aua mochen féri alón. Iwe aua apwúpwúlú. Ewe tipachem seni án Kot Kapas a álisikem le túmúnú néúm kewe úlúmén. Aua meefi lúkúlúk pwe Jiowa a aúselinga ám kewe iótek.”

Pwisin Etittina ewe Pisekin Ánnet

Chókkewe mi mak pwóróuseer lón ei lesen, me fite million aramas, ra kúna likótuputupun lamalam chofona me ra mirititi pwata Kot a mutatá riáfféú. En mi kúna seni pwóróuseer kana pwe ar angei ewe wewe mi pwúng lón ewe Paipel a alúkúlúkúúr pwe Jiowa mi aúselinga iótek?

Ka mochen etittina ekkewe pisekin ánnet pwe mi wor Kot? Chón Pwáraatá Jiowa ra pwapwa le álisuk le káé ewe enlet usun Jiowa me ifa usun kopwe arap ngeni ewe Chón “Aüselinga iotek.”​—Kölfel 65:2.

[Ekis Pwóróus lón pekin taropwe 10]

“Atun ua weweiti met Jiowa a tipeni, iwe ua meefi pwe ua silei pwe i wesewesen emén, ua tongeni fós ngeni lón iótek nge esor pinepinan”

[Sasing lon pekin taropwe 9]

Lúkú mi enlet a lóngólóng wóón ekkewe pisekin ánnet me án emén silei ewe enlet usun Kot