Ié ewe Chón Aúselinga Iótek?

IKA mi wor emén Chón Aúselinga iótek, ese mwáál i ewe Chón Fératá mettóch meinisin. Itá ié me lúkún ewe Emén mi fératá tupwuen aramas epwe silei ekiekum? Itá ié me lúkún i epwe aúselinga iótek me awora osupwangen aramas? Nge, neman kopwe ekieki, ‘Mi pwúng ai upwe lúkú pwe mei wor emén Chón Fératá?’

Chómmóng aramas ra ekieki pwe án emén lúkú pwe mei wor emén Chón Fératá, epwe wewe ngeni pwe esap lúkú met pekin science (pekin káé napanapen mettóch) lón ach ei fansoun a fen ánnetatá. Nge ese pwúng ena ekiek. Ekieki mwo ekkeei pwóróus fan.

◼ Eú repotun 1,646 senseen science kkanoto chék seni ekkewe 21 sukul tekia mi iteféúló lón Merika, a apasa pwe ina epwe chék órun 550 ra filatá ei kapas, “Use lúkú Kot” pwe repwe áweweei ekiekiir.

◼ Ren enletin, chómmóng me lein ekkewe sou áák ra lúkú pwe mei wor emén Kot.

Pisekin Pwáraatá pwe mi wor Emén Chón Fératá

Itá sipwe lúkú pwe mei wor emén Chón Aúselinga iótek nge esor pisekin pwáraatá? Ese fókkun pwúng. Ese pwúng ewe ekiek pwe lúkú a wewe ngeni ach sipwe etiwa eú lúkú inaamwo ika esor pisekin pwáraatá. Iei met Paipel a apasa usun weween lúkú: “Sia alletätä ekewe mettoch sia apilüküni, sia pwal silei usun mettoch mi wor sisap tongeni küna.” (Ipru 11:1) Áwewe chék, sise tongeni kúna ewe ásepwál nge sia kúna pwe ekkewe irá ra mwékútúkút ren ewe ásepwál, iwe sia lúkú pwe mi wor ásepwál. Pwal ina usun, inaamwo ika sise tongeni kúna ewe Chón Aúselinga iótek, nge sia tongeni káé ekkewe pisekin ánnet mi kawor pwe epwe alúkúlúkúkich pwe mi wor emén mi aúselinga iótek.

 Ia sia tongeni kúna me ie pisekin ánnet pwe mi wor Kot? Sipwe chék nennefetál. Ewe Paipel a áweweei: “Ewer, iteiten imw aramas ra aüetä, nge Kot ewe mi aüetä mettoch meinisin.” (Ipru 3:4) Ka tipeeú ngeni enletin ena pwóróus? Neman atun ka ekieki kókkótéchún unuselapen láng me fénúfan, poputáán manaw, mesemesekkisin napanapen fénúfan, me tupwuen aramas, ka ekieki pwe mi wor emén mi tekia lap seni aramas.

Masouen fénúfan resap tongeni unusen áiti ngenikich usun Kot. Ach nennengeni ekkewe pisekin ánnet pwe mi wor Kot ren férian kewe, a usun chék ach rongorong ipweipwen emén lúkún eú asam mi éppúng. Ka silei pwe mi wor aramas ikena ie, nge ié na? Ren óm kopwe silei, mi lamot kopwe suuki ewe asam. A pwal ina usun ach sipwe esilla Ewe Emén mi fératá mettóch meinisin.

Ewe Paipel ina ewe asam ngeni ewe sile usun Kot. Atun ka suuki ena asam me káé ekkóch me lein ekkewe oesini mi tichik me pwénútáár, kopwe kúna pisekin ánnet pwe mi wor Kot. * Nge lap seni ena, pwóróusen féfférún Kot ngeni néún kewe aramas a pwáraatá enletin napanapen ewe Chón Aúselinga iótek.

Ifa Napanapen ewe Chón Aúselinga Iótek?

Ewe Paipel a pwáraatá pwe ewe Chón Aúselinga iótek i emén kopwe tongeni sissilei. Ewer, i ewe emén mi tongeni rongorong ngonuk me weweituk. Ekkeei kapas ra alúkúlúkúkich: “Ewe mi auseling iotek! Fituk meinisin epwe feilo  reom.” (Kölfel 65:2, TF) A aúselinga iótekin chókkewe mi iótek ngeni fán lúkú. Me a wor itan. Ewe Paipel a apasa: “[Jiowa] a rongorong ngeni än ekewe chon pwüng iotek, nge esap afäli ekewe aramasangau.”​—Än Salomon Fos 15:29. *

A wor ren Jiowa memmeef. I “ewe Koten tong” me a meefi “pwapwa.” (Kölfel 104:31, TF; 2 Korint 13:11, TF) Iei met Paipel a erá usun meefien Kot atun a kon chéúfetál minne mi ngaw, “letipan a pwal fokun weires.” (Keneses 6:5, 6) Ese pwúng ewe ekiek pwe Kot a efisatá riáfféú pwe epwe sótuni aramas. Ewe Paipel a apasa: “Ese fokun tufich ngeni Kot pwe epwe föri föför mi ngau.” (Hiop 34:10) Iwe nge, neman kopwe ekieki, ‘Ika pwe Kot i ewe Chón Fératá mi lapalap, pwata a mutatá an epwe sópwósópwóló riáfféú?’

Jiowa a ngeni chón fénúfan ewe tufichin pwisin filatá, me a áiti ngenikich och mettóch usun Kot. Esap pwe sia aúcheani ach tufichin pwisin filatá ifa usun sipwe áeá manawach? Nge chómmóng aramas ra áeámwáálli ar tufichin pwisin filatá me efisatá riáfféúr me riáfféún ekkewe ekkóch. Iwe, iei ewe mettóch mi lamot sipwe ekiekifichi: Kot epwe áwesaaló riáfféú, nge sap minne epwe angei seni aramas ar tufichin pwisin filatá. Ifa usun? Sipwe pwóróus wóón lón en lesen mwirin ei.