Káé Seni án Kot we Kapas

Ifa Usun Féfférún Ekkewe Chónláng A Kkúú Manawach?

Lón ei lesen a wor ekkewe kapas eis eli ka fen eáni me epwe áit ngonuk ia kopwe tongeni kúna me ie pélúwer seni noum Paipel. Chón Pwáraatá Jiowa repwe pwapwa le pwóróus ngonuk usun pélúwen ekkeei kapas eis.

1. Ié ekkewe chónláng?

Ekkewe chónláng ra nónnóm lón láng. Napanapen manawer a tekia seni napanapen manawen aramas. Ewe Kot mi enlet, a pwal nónnóm lón láng, nge i a fératá ekkewe chónláng me mwen an féri fénúfan. (Hiop 38:4, 7; Mateus 18:10) Fite fite million chónláng mi tuppwél ra pwellifeili Jiowa.​—Álleani Kölfel 103:20, 21; Pwärätä 5:11.

2. Ekkewe chónláng ra álisi aramas?

Ekkewe chónláng ra álisi emén mwán mi pwúng itan Lot. A nóm lón ewe telinimw mi fen kapwúngúló me ren Kot an epwe kataló pokiten féfféringawen ekkewe aramas. Rúúemén chónláng ra éúréúra Lot me an we famili ar repwe sú seni. Ekkóch ra meefi pwe ewe kapasen éúréúr eú chék kapasen urumwot, iwe ra tunaló. Nge Lot me néún kewe fépwúl ra kúna manaw pokiten ra aúseling ngeni ewe kapasen éúréúr Kot a tiinaato me ren ekkewe chónláng.​—Álleani Keneses 19:1, 13-17, 26.

Me ren ewe Paipel, ekkewe chónláng ra ákkálisi aramas lón ei fansoun ren ar emmweni angangen chókkewe mi tuppwél le afalafala ewe kapas allim usun ewe Mwúún Kot. (Mateus 24:14) Lón ena kapas allim, a pwal kapachelong eú kapasen éúréúr. Ena kapasen éúréúr a usun chék ewe kapasen éúréúr ngeni Lot, esap minen urumwot. A feito seni Kot me ren ekkewe chónláng.​—Álleani Pwärätä 1:1; 14:6, 7.

Kot a tongeni néúnéú ekkewe chónláng le apéchékkúlakich lupwen a torikich sóssót. A néúnéú emén chónláng le apéchékkúla Jesus.​—Álleani Lukas 22:41-43.

Ekiseló chék, Kot epwe néúnéú ekkewe chónláng lón pwal eú napanap le nieló ekkewe aramas mi ngaw mi efisi riáfféú. Ina met epwe atoto ngeni aramas meinisin ewe ngaseló mi echipwér.​—Álleani 2 Tesalonika 1:6-8.

 3. Ifa usun féfférún ekkewe chónláng mi ngaw a kkúú manawach?

Aramas ra féfféringaw ren ar álleasolapa Kot, iwe, a pwal ina usun lón láng, chómmóng chónláng ra ú ngeni Kot. (2 Petrus 2:4) Ewe ákkáeménún me leir, Satan, ewe Tefil. I me néún kewe chónláng mi ngaw ra kan otupu aramas.​—Álleani Pwärätä 12:9.

Satan a ákkáeá ekkewe mwúún aramas mi nemenemengaw, sopai mi solá me ekkewe lamalam chofona le etipetipa aramas me erikiireló seni Kot. Ina minne, Satan i populapen pwúngúngaw, féfférún akkachofesá, me riáfféú, ekkeei mettóch ra áweiresi aramas.​—Álleani 1 Johannes 5:19.

4. Ifa usun ekkewe chónláng mi ngaw ra otupu aramas?

Satan a fen otupu chómmóng aramas ren ewe afalafal pwe a wor och mettóch a towu seni ekkewe mi máló nge a tongeni fós ngeni aramas. Iwe nge, me ren ewe Paipel ekkewe mi máló rese chúen tongeni féri och mettóch. (Än Salomon Afalafal 9:5) Nge ekkewe chónláng mi ngaw ra kan otupu aramas ren ar nikáppirú leúwen attonger kewe mi máló. (Aisea 8:19) Ra otupu ekkóch ren ekkewe sou awarawar, sou oesini me sou pwee mi lóngólóng wóón angangen rong, me ekkewe sou kútta esissil wóón fúú. Án Kot we Kapas a éúréúrakich ach sipwe ti senikich ekkena sókkun féffér. Ina minne, sipwe péútaaló pisekich kewe mi riri ngeni angangen rong me ekkewe chónláng mi ngaw.​—Álleani Tuteronomi 18:10, 11; Föför 19:19.

Ika sia tongei Jiowa, esor popun sipwe niwokkusiti ekkewe chónláng mi ngaw. Lupwen sia káé án Kot we kapas me apwénúetá minne a apasa, sia ú ngeni ewe Tefil me arap ngeni Kot. Jiowa a kon péchékkúl lap seni ekkewe chónláng mi ngaw. Néún kewe chónláng mi tuppwél ra tongeni apéchékkúlakich lupwen sia osupwangen álillis.​—Álleani Kölfel 34:7; James 4:7, 8.

Ren pwal ekkóch pwóróus, ppii sópwun 10 lón ei puk, Met ewe Paipel A Wesewesen Apasa?, férien Chón Pwáraatá Jiowa.