Pwata ewe Chón Aúselinga Iótek A Mutatá Riáfféú?

EKKÓCH aramas ra tipemwaramwar ika mi wor Kot inaamwo ika ra iótek. Pwata ra tipemwaramwar? Neman pokiten ra kúna chómmóng riáfféú wóón ei fénúfan. En mi pwal ekieki pwata Kot a mutatá riáfféú?

Itá Kot a fératá aramas pwe repwe iei usun, weween, resap unuséch me repwe kúna riáfféú? Sise tongeni súféliti emén kot mi tipeni pwe aramas repwe riáfféú. Ekieki mwo ei: Ika ka ingeiti me katol efóch mineféén chitosa nge ka kúna pwe a ta lepekin, itá kopwe ekieki pwe ewe chón féri ena chitosa a féri pwe epwe ina usun? Aapw! Kopwe ekieki pwe ewe chón féri a féri pwe epwe “unuséch,” nge mi wor emén, are och mettóch a atai.

Pwal ina chék usun, atun sia ingeiti kókkótéchún me napanapéchún masouen fénúfan, nge sia pwal kúna kkótongawan me án aramas nemenemengaw mi angawaló manawen aramas, iwe met sipwe ekieki? Ewe Paipel a áiti ngenikich pwe Kot a fératá ewe áeúin pean pwúpwúlú pwe repwe unuséch, nge mwirin ra pwisin atoto feiengawer. (Tuteronomi 32:4, 5) Iei ewe kapas allim, pwe Kot a fen pwonei pwe epwe fférsefál minne a ta, weween pwe epwe aunuséchusefáli aramas mi álleasochis. Nge pwata tori iei Kot ese apwénúetá minne a pwonei?

Pwata Kot A Mutatá Riáfféú Tori Iei?

Pélúwan a weneiti ewe kapas eis ika ié itá epwe nemeni aramas meinisin. Jiowa ese fókkun tipeni pwe aramas repwe pwisin nemeniir. Nge, i epwe néúr Sou Nemenem. Ewe Paipel a apasa: “Aramas resap püsin nemeni manauer, resap pwal tongeni akota mine repwe  föri.” (Jeremaia 10:23) Nge solapan pwe ekkewe popun aramas ra filatá pwe repwe ú ngeni án Kot nemenem. Pokiten ar féfféringaw, ra wiliti aramas mi tipis. (1 Johannes 3:4) Mwirilóón, a péút seniir unuséchúúr me ra efisatá feiengaw ngeni pwisin iir me mwirimwiriir kewe.

Ren fitu ngeréú ier, Jiowa a mutatá án aramas repwe pwisin nemeniir, me uruwo a ánnetatá pwe esor án aramas tufich le féri ena. A pwári pwe meinisin mwúún fénúfan ra efisi riáfféú. Esor me leir a amóeló maun, ipweri allúk, pwúngúngaw, are semmwen.

Ifa Usun Kot Epwe Aéchúsefáli Minne a Ta?

Ewe Paipel a pwonei pwe ekiseló chék Kot epwele atoto eú otot minefé me pwúng. (2 Petrus 3:13) Epwe mumutá ngeni chókkewe chék mi pwisin filatá le pwáraatá ar tongei Kot me ekkewe ekkóch, ar repwe nonnom ikena ie.​—Tuteronomi 30:15, 16, 19, 20.

Ewe Paipel a pwal apasa pwe lón ewe “ranin apung” mi mwittir waroto, Kot epwe asopwaló riáfféú me chókkewe mi efisatá. (2 Petrus 3:7, TF) Mwirin, Jesus Kraist, ewe Sou Nemenem mi kefilitá me ren Kot, epwe nemeni aramas mi álleasochis. (Taniel 7:13, 14) Met epwe pwénúetá ren án Jesus nemenem? Iei alón Paipel: “Ekewe chon tipetekison repwe fanüeni ewe fanü o pwapwaäsini ar feiöch me kinamwe mi somwola.”​—Kölfel 37:11.

Jesus, ewe King lón láng, epwe aéchúsefáli minne a ta, kapachelong semmwen, chinnap me máló. Ina mwirilóón án aramas ü ngeni Jiowa, ‘ewe popun manau meinisin.’ (Kölfel 36:9) Jesus epwe echikaraatá meinisin chókkewe mi etiwa an we nemenem fán tong. Ikkeei án Paipel kewe pwon repwe pwénúetá fán an nemenem:

◼ “Esap wor eman chon ewe fanü epwe apasa pwe a samau.”​—Aisea 33:24.

 ◼ “[Kot] epwe talüpwasei chönün mas seni won meser meinisin. Esap chüen wor mäla ika letipeta ika kechü ika cheuch, pun ekewe mettochun lom ra morola.”​—Pwärätä 21:4.

Ach silei pwe Kot epwele apwénúetá an pwon le asopwaló riáfféú meinisin, a aururukich. Iwe, sia tongeni lúkúlúk pwe a aúselinga ach kewe iótek inaamwo ika a mutatá riáfféú ren och fansoun.

Kot a tongeni aúselingok, pwal mwo nge óm kewe memmeef mi fiti metek me eletipechou. Me a mwétéres le kúnók le pwapwaiti ewe manaw atun meinisin óm kewe tipemwaramwar me weires repwe móróló.