Túmúnú Seni án ewe Tefil Kewe Ssár!

“Sü seni ewe särin Tefil mi liapeniir.”​—2 TIM. 2:26.

IFA USUN KOPWE PÉLÚWENI?

Ika ka kan ákkápii aramas, ifa usun kopwe pwisin etittinok?

Met sia káé seni pwóróusen Pilatus me Petrus ren ach sisap fang pokiten niwokkusiti aramas me sóssót?

Ifa usun sipwe tongeni túmúnúkich seni ewe sókkun mengiringir mi kon ssenúk?

1, 2. Ikkefa án Satan kewe minen ssár sipwe káé lón ei lesen?

 EWE Tefil a achocho an epwe liapeni néún Jiowa kewe chón angang. Ese usun ewe chón elliapa man a kan nieló liapan, nge i a chék mochen pwe ié ewe a liapeni epwe féri letipan.​—Álleani 2 Timoty 2:24-26.

² Emén chón elliapa man a tongeni áeá ssár are chúnnúmei pwe epwe liap. Eli epwe féri pwe ewe man epwe towu seni ikewe a op ie pwe epwe mecheres le liapeni ren efóch selin chúnnúmei. Are a tongeni áeá eú ssár mi monoló seni ewe man. Ewe Tefil a pwal áeá ekkena esin ssár ren an epwe liapeni néún Kot kewe aramas. Ika sise mochen Satan epwe liapenikich, mi lamot sipwe mammasa me aúseling ngeni ekkewe minen éúréúr mi álisikich le esilla ia a nóm ie án Satan kewe minen ssár. Lón ei lesen, sipwe pwóróus wóón ifa usun sipwe túmúnúkich seni úlúngát me lein án Satan kewe ssár a fen áeá le elliapa néún Kot kewe aramas. Ikkeei: (1) sókkun fós sise nemenifichi, (2) niwokkusiti aramas me sóssót, me (3) sókkun mengiringir mi kon ssenúk. Ewe lesen mwirin ei epwe pwóróus wóón pwal ruu án Satan kewe minen ssár.

KUNUELÓ EWE EKKEI MI KKÚ REN EWE SÓKKUN FÓS SISE NEMENIFICHI

3, 4. Met a tongeni fis ika sise nemeni napanapen ach fós? Áweweei.

³ Ekkewe man mi nónnóm le wélúwél ra meefi núkúnúkéch. Nge ewe chón elliapa man eli epwe keni och kinikinin ewe wélúwél pwe ekkewe man repwe towu seni ar kewe leenien op me sú. Iwe a tongeni liapeniir. Lón án Chón Kraist we mwichefel, pwiich kewe ra meefi núkúnúkéch. Lón kapas áwewe, ewe Tefil a mochen epwe akkú ekkei lón ewe mwichefel pwe pwiich kewe repwe towu seni. Iwe, a tongeni liapeniir. Ifa usun sia tongeni álisi án Satan ei angang nge sise tepereni, iwe a pwal liapenikich?

⁴ Ewe chón káé James, a áweweei pwe chénawach a usun  chék ekkei. (Álleani James 3:6-8.) Ika sise nemeni chénawach are napanapen ach fós, lón kapas áwewe sia tongeni akkú eú ekkei lón ewe mwichefel. Ifa usun epwe fis ei mettóch? Ekieki met a tongeni fis: Lón eú mwichefel, a apio pwe emén a poputá le regular pioneer. Sárin ewe mwich, rúúemén chón afalafal ra pwóróusfengen usun ewe apio. Emén a pwapwa ren án pwiich na a wiliti regular pioneer me áneánei pwe epwe sópwéch lón an angang. Nge ewe emén a ekiekingaw me erá pwe eli a pioneer pún a mochen itetekia lón ewe mwichefel. Ié me lein ekkeei rúúemén chón afalafal ka mochen chieneni? A ffat ika ié a tongeni akkú eú ekkei lón ewe mwichefel ren napanapen an fós.

5. Met mi lamot sipwe féri ika sia mochen kunu ewe ekkei mi kkú ren ewe sókkun fós sise nemenifichi?

⁵ Ifa usun sipwe kunu ewe ekkei mi kkú ren ewe sókkun fós sise nemenifichi? Jesus a erá: “Ekewe kapas ra towu seni awemi iei somwen lelukemi.” (Mat. 12:34) Akkomw, sipwe etittina masouen letipach. Mi lamot sipwe túmúnúkich seni ekkewe memmeef mi efisi ach sipwe eáni ekkewe esin fós mi ámeteki letipen aramas. Áwewe chék, lupwen sia rongorong pwe emén pwiich a achocho ngeni eú wis lón ewe mwichefel, sia mwittir lúkú pwe a féri pwe a mochen apwapwaai Jiowa, are sia fen ekiekingaw pwe i a chék ekieki pwisin feiéchún? Ika sia kan ekieki pwe pwiich kewe ra chék angang ngeni Jiowa pokiten pwisin feiéchúr, iwe, sipwe chechchemeni pwe ewe Tefil a pwal eáni ena esin tipimwáál ngeni Hiop, néún Kot we chón angang mi tuppwél. (Hiop 1:9-11) Itá sisap ekiekingaw ngeni pwiich na, nge sipwe fen etittina ewe popun a ina usun ach ekiek. A wor popun mi pwúng sia eáni ena esin ekiek? Are letipach a fen tipetipeló ren ewe ekiekin koput mi chéú lón ekkeei ránin lesópwólóón?​—2 Tim. 3:1-4.

6, 7. (a) Ikkefa ekkewe popun eli sia tongeni ákkápii aramas? (b) Met sipwe féri ika aramas ra kapasingaw ngenikich?

⁶ Ekieki pwal ekkóch popun eli sia tongeni ákkápii aramas. Eú popun, eli sia mochen aramas repwe ingeiti ach kewe féffér, iwe ren ach ákkápii, usun itá sia pwáraatá pwe kich sia múrinné seni ekkewe ekkóch. Are eli sia ákkápii pokiten sia mochen amasésénóói ach mengiringir ren ewe mettóch itá úrúrún wisach ach sipwe féri, nge sise fen féri. Ese lifilifil ika sia ákkápii aramas pokiten ach lamalam tekia are lólówó, are pokiten sia meefi núkúnúkúngaw ren pwisin lamotach, nge epwe chék tongeni efisatá watteen feiengaw.

⁷ Eli sia meefi pwe a wor popun mi pwúng sia ákkápii aramas. Eli ra fen ekinasa letipach ren met ra apasa. Nge ika ina, ese pwúng ach eniwili ngeniir met ra féri pwe epwe chék alapaaló ewe osukosuk me álisatá án ewe Tefil angang, nge esap án Kot. (2 Tim. 2:26) Sipwe fen áppirú met Jesus a féri. Lupwen aramas ra kapasingaw ngeni, “esap pwal pölüeni lon kapas mi  ngau . . . nge a anomu an apilükülüköch won Kot ewe soukapwüng mi eäni pwüng lon kapwüng.” (1 Pet. 2:21-23) Jesus a lúkúlúk pwe Jiowa epwe wisen áwena minne a mwáál, lón ewe napanap a mochen me ewe fansoun mi fich. A lamot sipwe pwal eáni ena esin lúkúlúk wóón Kot. Lupwen sia eáni ekkewe esin kapas mi apéchékkúl, sia álisatá ewe kinamwe me tipeeú lón ach we mwichefel.​—Álleani Efisos 4:1-3.

SÚ SENI EWE SSÁREN NIWOKKUSITI ARAMAS ME SÓSSÓT

8, 9. Pwata Pilatus a apwúngaló pwe Jesus epwe ninniiló?

⁸ Emén man mi tup lón eú ssár ese tongeni an epwe chúen pwisin nemeni ia a mochen mwékútúló ie. Ika emén a fang pokiten a niwokkus me ewe etipetip fán echchimw a kúna, iwe, esap chúen kon lien nemeni manawan. (Álleani Än Salomon Fos 29:25.) Sipwe nengeni pwóróusen rúúemén mwán ra fang pokiten etipetip fán echchimw me ar niwokkusiti aramas, iwe sia tongeni káé eú lesen seni.

⁹ Ewe kepinaan Rom itan Pontius Pilatus, a silei pwe esor tipisin Jesus ina popun ese mochen efeiengawa. Pilatus a pwal mwo nge apasa “esap wor och mine ei mwän a föri an epwe tipisin mäla.” Iwe nge, a chúen apwúngaló pwe Jesus epwe ninniiló. Met popun? Pokiten a niwokkusiti ekkewe aramas. (Luk. 23:15, 21-25) Ekkewe aramas ra eriáni Pilatus an epwe féri mocheniir me ra púchér me apasa: “Are en kopwe angasala ätei, kosap chiechien Sisar!” (Joh. 19:12) Eli Pilatus a niwokkus pwe ika a angasaaló Kraist, iwe epwe péút seni wisan we kepina are fen ninniiló. A fang fán ewe sóssót me a féri minne ewe Tefil a mochen.

10. Met popun Petrus a amamesini Kraist?

¹⁰ Ewe aposel Petrus, emén me lein ekkewe Jesus a kon chiechi ngeniir. Ese sáw le esilei ngeni aramas pwe Jesus ewe Messaia. (Mat. 16:16) Petrus a amwéchú an tuppwél lupwen ekkóch chón káé rese weweiti och mettóch Jesus a apasa, iwe ra likitaló. (Joh. 6:66-69) Me lupwen ekkewe chón oputa Jesus ra aresini i, Petrus a úttawu néún we ketilas pwe epwe túmúnú néún Masta. (Joh. 18:10, 11) Nge mwirin, Petrus a niwokkusiti aramas me amamesini Jesus ren an erá pwe ese mwo nge sissilei Jesus Kraist. Lón chék ekis fansoun ena aposel a tup lón ewe ssáren niwokkusiti aramas. A péút seni an pwora le féri minne mi pwúng me an tuppwél ngeni Jesus.​—Mat. 26:74, 75.

11. Ikkefa ekkewe sókkun sóssót eli sia tongeni fiu ngeni?

¹¹ Mi lamot Chón Kraist meinisin repwe fiffiu ngeni ekkewe mettóch mi sótuniir le féri minne Kot a oput. Néúch kewe pos lón ach leenien angang are pwal ekkóch aramas repwe sótun eriánikich ach sipwe chofona are féri tipisin lisowumwáál. Ekkewe chón sukul repwe kúna sóssót seni chiener kewe mi eriániir ar repwe chúri lón test, katol sasingin kapasingaw, ún suupwa, áeá sáfeien opuchopuch, ún sakaw are féri féfférún lisowumwáál. Iwe, met a tongeni álisikich le sú seni ekkeei sókkun ssár, ach niwokkusiti aramas me pwal ekkewe etipetip mi echchimwakich le féri minne Kot a oput?

12. Ikkefa ekkewe lesen sia tongeni káé seni Pilatus me Petrus?

¹² Ikkefa ekkewe lesen sia tongeni káé seni Pilatus me Petrus? Ese kon lien watte án Pilatus sile usun Kraist. Nge a silei pwe esor tipisin Jesus me a wor lamotan. Pilatus ese tipetekison me ese tongei ewe Kot mi enlet. Ina popun, a mecheres án ewe Tefil epwe nemeni i le féri letipan. Nge ren Petrus, a tongei Kot me a nóm ren ewe sile mi enlet. Nge a wor ekkewe atun a niwokkusiti aramas, kkuf ren sóssót, me ese mirititi pwisin an kewe apwangapwang. Me mwen án Jesus ares, Petrus a sikásini ren an erá: “Ikamwo ir meinisin repwe likitukela, ngang üsap fokun likituk.” (Mark. 14:29) Ika Petrus a lúkúlúk wóón Kot, usun ewe soumakken kélfel, iwe epwe fen mmolnéch ngeni ekkewe sóssót epwele tori. Ena soumak kélfel a kélú: “Üsap niuokus, pun ewe Samol mi Lapalap a nom rei. Met aramas repwe tongeni föri ngeniei?” (Kölf. 118:6)  Lón ewe sáingolóón pwinin án Jesus manaw wóón fénúfan, a uwei Petrus me rúúemén néún kewe aposel ngeni ewe málámál Ketsemane. A tingorer ar repwe nenneló, nge Petrus me ekkewe rúúemén aposel ra annut. Lupwen Jesus a féngúniir, a erá: “Oupwe mamasa o iotek, pwe ousap turutiu lon sosot.” (Mark. 14:38) Nge Petrus a annut sefál me mwirin a ttur lón sóssót me niwokkusiti aramas.

13. Ifa usun sipwe fiu ngeni ewe sóssótun ach sipwe féri mettóch mi mwáál?

¹³ Pwóróusen Pilatus me Petrus a tongeni áiti ngenikich pwe ren ach sisap niwokkusiti aramas, mi lamot ngenikich sile, tipetekison, mirititi ach apwangapwang, me tongei me niwokkusiti Jiowa. Ika ach lúkú a lóngólóng wóón ewe sile mi pwúng, sia tongeni pwora le fós ngeni aramas usun ach lúkú. Ei mettóch epwe álisikich ach sisap niwokkusiti aramas. Mi lamot sisap ekieki pwe kich mi fókkun péchékkúl, nge sipwe tipetekison le mirititi pwe a lamot ngenikich án Kot manaman pwe sipwe pworacho ngeni sóssót. A lamot sipwe iótek fán iten án Jiowa we manaman. Ach tong ngeni Kot, itá ina met epwe amwékútúkich le álleasochisi an kewe allúk me eitéchúoló itan we. Mi lamot sipwe ammolnatá fán iten ekkewe sóssót mwen repwe torikich. Áwewe chék, a lamot sipwe iótekfengen me néúch kewe me álisiir ar repwe ammolnatá pwe repwe silei met repwe féri lupwen chiener kewe repwe etipetiper le féri och féffér mi mwáál.​—2 Kor. 13:7. * (Ppii ewe pwóróus fan.)

TÚMÚNÚ SENI EWE SSÁREN SÓKKUN MENGIRINGIR MI KON SSENÚK

14. Met ewe Tefil a mochen ach sipwe meefi usun ekkewe tipis sia féri lóóm?

¹⁴ Fán ekkóch, ewe chón elliapa man epwe eitiwatá och popun irá are eféú faú mi féúmmong áwenewenen ewe al ekkewe man ra kan pwereló ie. Iwe, epwe emmeia ewe sáán me ika emén man a purei iwe epwe pich me turutiw wóón me chounaló. Ika a kon ssenúk ach meefi mengiringir pokiten ach tipis, sipwe tongeni meefi pwe usun itá efóch popun irá are eféú faú a chounikichetiw. Lupwen sia ekieki usun ach féffér mi mwáál, eli sipwe meefi pwe sia “fakkun pekusulo o chöpöpelo.” (Álleani Kölfel 38:3-5, 8, TF.) Satan a mochen ach sipwe lúkú pwe Jiowa esap tongeni úméúméch ngenikich pokiten a kon watte ach tipis, me ese fókkun ki rech ach sipwe apwénúetá an kewe allúk.

15, 16. Ifa usun kopwe ti sonuk ewe ssáren meefi sókkun mengiringir mi kon ssenúk?

¹⁵ Ifa usun kopwe ti sonuk ewe sókkun ssár mi chounuketiw? Ika ka fen féri och tipis watte, mi lamot kopwe mwittir chásefál ngeni Kot. Chuuri ekkewe elter me kútta ar álillis. (Jas. 5:14-16) Achocho úkúkún óm tufich le áwena minne ka mwáál wóón. (2 Kor. 7:10, 11) Kosap lichippúng ika ka fen kúna apwúng pwe fen ina esissillan pwe Jiowa a tongeok. (Ipr. 12:6) Kopwe úppos pwe kosap liwiniti ekkewe mettóch ka fen féri mi emmwenuk ngeni ena tipis. Mwirin óm aier me poputásefál le féri minne a apwapwaai Kot, kopwe lúkúlúk pwe a wesewesen tongeni omusaaló óm kewe tipis ren án Jesus Kraist we asorun méén kepich.​—1 Joh. 4:9, 14.

¹⁶ Ekkóch aramas ra chúen meefi mengiringir ren ar kewe tipis a fen musoló. Ika en emén me leir, chechchemeni pwe Jiowa a omusaaló tipisin Petrus me pwal ekkóch aposel inaamwo ika ra likitaló Jesus lón ewe atun a fókkun lamot ar repwe álisi. Jiowa a pwal mwo nge omusaaló tipisin ewe mwán a fen katowu seni ewe mwichefel pokiten an féri tipisin lisowu mi érúkééi ekkewe aramas, nge a aier mwirin. (1 Kor. 5:1-5; 2 Kor. 2:6-8) A mak lón Paipel pwóróusen chókkewe mi féri tipis mi fókkun chou nge Kot a omusereló pokiten ra aier.​—2 Kron. 33:2, 10-13; 1 Kor. 6:9-11.

17. Met ewe méén kepich a tongeni féri fán itach?

 ¹⁷ Jiowa epwe omusaaló me esap chúen chechchemeni ekkewe tipis ka fen féri ika kopwe aier me enletin lúkú pwe epwe úméúméch ngonuk. Ka ekieki pwe ese naf manaman án Jesus asorun méén kepich pwe Jiowa epwe omusaaló óm kewe tipis? Ika ina usun óm ekiek, iwe kopwe ttur lón eú me lein án Satan kewe ssár. Satan a mochen ámmeef ngonuk pwe ese naf ewe méén kepich fán iten omusomusen tipis meinisin. Iwe nge, chón féri tipis ra tongeni unusen kúna omusomusen ar tipis ika ra aier. (SalF. 24:16) Óm lúkúlúk wóón ewe méén kepich a tongeni oturu sonuk ewe chou ka meefi ren ewe mengiringir mi kon ssenúk me apéchékkúlok le angang ngeni Kot ren unusen letipom, ekiekum me manawom.​—Mat. 22:37.

SIA SILEI ÁN SATAN KEWE MINEN SSÁR

18. Ifa usun sipwe túmúnúkich seni án Satan kewe minen ssár?

¹⁸ Satan a chék mochen liapenikich pwe sipwe féri letipan ese pwal lifilifil menni ssár a ssárakich lón. Pokiten sia silei án Satan kewe minen ssár, sia tongeni túmúnúkich seni an liapenikich. (2 Kor. 2:10, 11) Sisap ttur lón an kewe ssár ika sipwe iótek fán iten tipachem pwe sipwe tongeni likiitú fán sóssót. Iei makkeien James: “Nge are eman leimi a osun tipachem, epwe tüngor ngeni Kot, iwe, i epwe fang ngeni, pun Kot a fangafangöch ngeni aramas meinisin, nge esap laleiti eman.” (Jas. 1:5) Ika sia mochen Jiowa epwe etipachemakich pwe sipwe tongeni likiitú, mi lamot sipwe féri ach pwisin káé Paipel iteitan me manaweni manawach me ren ewe Paipel. Ekkewe puk mi kawor me ren ewe mwichen chón angang mi alúkúlúk me tipachem, ra áiti ngenikich usun án ewe Tefil kewe minen ssár me álisikich le túmúnúkich seniir.

19, 20. Met popun sipwe oput minne mi ngaw?

¹⁹ Iótek me káéén Paipel ra tongeni álisikich le apéchékkúlaló ach tongei minne mi éch. Nge a pwal lamot sipwe káé le oput minne mi ngaw. (Kölf. 97:10) Sia tongeni ti senikich mochenia, ika sia ekieki met pwúnúngawan. (Jas. 1:14, 15) Mi lamot sipwe káé le oput minne mi ngaw me tongei minne mi éch. Iwe, ekkewe minen ssár Satan a sótun ssáreikich ren resap tongeni lukiikich pún sia oputer.

²⁰ Sia fókkun kilisou ren án Kot álisikich pwe Satan esap tongeni liapenikich lón an kewe minen ssár! Jiowa a áeá an we manaman mi fel, an we Kapas, me an we mwicheich le selánikich “seni ewe mi ngau.” (Mat. 6:13) Lón ewe lesen mwirin, sipwe káé ifa usun sipwe túmúnúkich seni pwal ekkewe ruu ssár Satan a fen áeá me ra fókkun sópwéch le liapeni néún Kot chón angang.

[Sasing lon pekin taropwe 24]

Ewe sókkun fós sise nemenifichi a tongeni poputááni osukosuk are akkú ewe ekkei lón mwichefel

[Sasing lon pekin taropwe 27]

Ka tongeni oturu sonuk ewe mengiringir mi kon ssenúk a chounuk