“Upwe Nonnom Remi”
“Upwe Nonnom Remi”
“Chómmóng repwe achocho le etittina, iwe ewe sile mi enlet epwe lapóló.”—TAN. 12:4, NW.
IFA USUN KOPWE PÉLÚWENI?
Lón ach ei fansoun, ifa usun aramas ra tongeni kúna “ewe sile mi enlet”?
Ifa usun a ‘chómmóngóló’ chókkewe mi etiwa ewe enlet?
Ifa usun ewe sile mi pwúng a “lapóló”?
1, 2. (a) Ifa usun sia silei pwe Jesus a nónnóm rech lón ei fansoun me epwe pwal nónnóm rech lón mwachkkan? (b) Me ren Taniel 12:4, met epwe fis lupwen ekkóch aramas repwe káéfichi án Kot we kapas?
ANCHANGEI pwe ka nónnóm lón Paratis. Iteiten óm pwáátá lesossor, ka meefi péchékkúl me pwapwaiti ewe mineféén rán. Kese meefi metek me ese chúen wor óm semmwen. Óm tufichin kúna, rongorong, neni, meefi me fáreni ra unuséch. A watte óm péchékkúl, ka pwapwaiti óm angang, a chómmóng chiechiom me esap chúen wor met ka lólilen ren. Ikkeei ekkewe feiéch kopwe tongeni kúna atun án Kot we Mwú epwe nemenem wóón fénúfan. Ach we King, Jesus Kraist, epwe ngeni aramas ekkeei feiéch me asukuler usun Jiowa.
2 Lón ena fansoun, Kot me Néún we repwe álisi ekkewe mi tuppwél pwe repwe asukula ekkewe ekkóch usun Jiowa. Pwúngún pwe Jiowa me Jesus ra fen ákkálisi Chón Kraist mi tuppwél ar repwe asukula aramas. Me mwen án Jesus feitá láng, a ereni néún kewe chón káé: “Upwe nonnom remi.” Weween epwe sópweló le álisiir. (Álleani Mateus 28: 19, 20, Ewe Kapasen God.) Ren an epwe péchékkúleló ach lúkú án Jesus kewe pwon, sipwe nengeni án Taniel we oesini a makkeei lón Papilon 2,500 ier lóóm. Iei makkeian ei mi weneiti ach ei fansoun: “Chómmóng repwe achocho le etittina, iwe ewe sile mi enlet epwe lapóló.” (Tan. 12:4, NW) Ei oesini a pwáraatá pwe chókkewe mi etittina me káéfichi ewe Paipel repwe angei feiéch mi amwarar ren ar kúna ewe sile mi enlet me pwúng usun án Kot we Kapas. Ei wokisin a pwal apasa pwe “ewe sile mi enlet epwe lapóló.” Chókkewe mi kúna ewe sile repwe etiwa me áiti ngeni aramas. Pwal och, epwe suuk ngeni aramas wóón unusen fénúfan ar repwe káé usun ekkeei pwóróus mi enlet. Iei sipwele nengeni ifa usun ei oesini a fen pwénúetá. Ei mettóch epwe apéchékkúla ach lúkú pwe Jesus a nónnóm ren néún kewe chón káé lón ei fansoun me Jiowa epwe apwénúetá meinisin an kewe pwon fán iten mwachkkan.
CHÓN KRAIST MI LETIP WENECHAR REPWE KÚNA “EWE SILE MI ENLET”
3. Met a fis mwirin málóón ekkewe aposel?
3 Ewe angangen chón rikiló aposel Paulus a oesini usun, a poputá mwirin chék málóón ekkewe aposel me a mwittir chéúló usun mwittirin sáán ngeten en ekkei. (Föf. 20:28-30; 2 Tes. 2:1-3) Ren fitepúkú ier, “ewe sile mi enlet” ese nóm ren pwal mwo nge ekkewe mi erá pwe iir Chón Kraist. Inaamwo ika ekkewe néúwisin lamalam ra erá pwe ra lúkú ewe Paipel, nge ra asukula aramas “aitien ekewe anün rochopwak [chónláng mi ngaw]” ekkewe pwóróus mi chofona mi eitengawa Kot. (1 Tim. 4:1) Ina popun, lap ngeni aramas rese silei ewe enlet usun Kot. Nge ra fen káit ekkewe afalafal mi chofona ren choweán, mi wor úlúmén Kot lón emén, mi wor ngúnún aramas ese tongeni máló, me ekkóch aramas ra kek lón ekkein ell tori feilfeiló.
4. Seni ewe ier 1870, ifa usun eú mwichen Chón Kraist a poputá le kútta ewe pwóróus mi enlet lón Paipel?
4 Iwe nge, seni ewe ier 1870, órun fáik ier me mwen poputáán “ekewe ränin lesopolan,” eú kúkkún mwichen Chón Kraist mi letip wenechar lón Pennsylvania, Merika, ra mwichfengen pwe repwe káéfichi ewe Paipel me kútta “ewe sile mi enlet.” (2 Tim. 3:1) Ra pwisin eita ngeniir Chón Káé Paipel. Esap iir “ekewe mi tipachem me silelap” Jesus a fós usun pwe resap tongeni kúna ewe sile mi enlet. (Mat. 11:25) Nge iir ekkewe aramas mi tipetekison mi enletin mochen féri letipen Kot. Ekkena Chón Káé Paipel ra álleaniéchú, ekilonei me pwóppwóróusfengen wóón ewe Paipel, me ra tingor án Kot emmwen. Ra alélléfengeni ekkewe sókkópaten wokisin lón Paipel me káé makkeien ekkóch aramas mi pwal kútta ewe enlet lón Paipel. Ekis me ekis, ra weweiti ekkewe pwóróus mi enlet mi fen monoló lón fitepúkú ier.
5. Met popun ekkewe Chón Káé Paipel ra féri ekkewe chékúkkúnún taropwe itelaper The Old Theology?
5 Ekkewe Chón Káé Paipel ra fókkun pwapwa ren minne ra kákkáé, nge rese lamalam tekia usun. Ra weweiti pwe ekkeei pwóróus mi enlet ra fen chék nónnóm lón Paipel, iwe, rese einga pwe ra kúna och pwóróus minefé. (1 Kor. 8:1) Nge, ra féri ekkewe chékúkkúnún taropwe itelaper The Old Theology (Minne Ra Lúkú Lóóm) pwe epwe álisi ekkóch le silei usun ekkewe pwóróus mi enlet lón Paipel. Me ren ena The Old Theology, Na. 1, minen April 1889, pekin taropwe 32, ewe ákkáeúin taropwe a álisi aramas le káé ewe Paipel pwe repwe tongeni péútaaló “meinisin eérenien aramas mi chofona” me etiwa án Jesus me néún kewe aposel afalafal mi enlet.
6, 7. (a) Ikkefa ekkewe pwóróus mi enlet Chón Pwáraatá Jiowa ra fen káé seni ewe ier 1870? (b) Ikkefa ekkewe pwóróus mi enlet ka fókkun pwapwaiti le káé?
6 Seni ewe ier 1870, Chón Pwáraatá Jiowa ra fen káé chómmóng pwóróus mi enlet mi amwarar. * Ekkeei pwóróus mi enlet esap chék och pwóróus mi tichik me echchipwang, nge ra amwarar me ámmeseik pún ra tongeni amúrinnéló manawach, atoto ngenikich pwapwa me ápilúkúlúkéch. Repwe álisikich le silefichi Jiowa, ach we Kot mi tong, me weweiti letipan. Ra áweweei ié ewe Jesus, met popun a feito me máló, me met a féfféri iei. Ekkeei pwóróus mi aúchea ra álisikich le weweiti ewe popun Kot a mutatá ekkewe mettóch mi ngaw, popun sia máló, ifa usun sipwe iótek me ifa usun sipwe tongeni wesewesen pwapwa.
7 Iei sia tongeni weweiti ekkewe oesini mi “monomon” lón fite fite ier, nge lón ei fansoun sópwólóón ra pwéppwénútá. (Tan. 12:9) Chómmóng ekkena oesini ra mak lón ekkewe puken Kapas Allim me lón puken Pwáraatá. Áwewe chék, Jiowa a fen álisikich le silei met a fen fis lón láng nge aramas rese tongeni kúna. Sia silei pwe Jesus a wiliti King, a fis maun lón láng me Satan a kóturutiw wóón fénúfan. (Pwär. 12:7-12) Kot a pwal álisikich le weweiti weween ekkewe mettóch sia tongeni kúna, áwewe chék ren maun, chchechin fénú, málapalap, lengita, me án aramas féfféringaw mi efisi “weires” lón ach ei fansoun.—2 Tim. 3:1-5; Luk. 21:10, 11.
8. Ié ewe a atufichikich le weweiti ewe enlet?
8 Iei alón Jesus ngeni néún kewe chón káé: “Feiöchün chokewe mi küna mine ämi oua küna. Pun üpwe ürenikemi, pwe chomong soufos me king ra mochen küna met ämi oua küna, nge resap tongeni. Ra pwal mochen rongorong met ämi oua rongorong, nge resap tongeni.” (Luk. 10:23, 24) Pwal kich sia fókkun kilisou ngeni Jiowa Kot ren an atufichikich le “küna” me “rongorong,” are weweiti ewe enlet. Sia fókkun kilisou ren an áeá an we manaman mi fel, pwe epwe álisikich le unusen weweiti ewe enlet! (Álleani Johannes 16:7, 13.) Iwe, itá sisap ménúki aúchean ewe enlet me lamoten ach sipwe áiti ngeni aramas.
“CHÓMMÓNG” RA ETIWA “EWE SILE MI ENLET”
9. Ifa ewe etiwetiw a mak lón ewe Watch Tower minen April 1881?
9 Arapakkan ruu ier mwirin poputáán peresin ewe Watch Tower, minen fán April 1881, a mak eú pwóróus lón itelapan, “Sia Osupwangen 1,000 Chón Afalafal.” Ena pwóróus a etiwa chókkewe mi tongeni awora esopw ar fansoun are fen lap seni pwe repwe afalafal me wiliti pioneer. Repwe feiló ekis meinisin me kútta ekkewe Chón Kraist mi letip wenechar mi tongei Kot, nge rese silei ewe enlet. Iwe, repwe asukuler ewe enlet usun Kot me ewe Paipel.
10. Met chómmóng aramas ra mochen féri mwirin ar álleani ewe etiwetiw fán iten 1,000 chón afalafal?
10 Pokiten ekkewe Chón Káé Paipel ra mirititi pwe mi lamot Chón Kraist mi enlet repwe esilefeili ewe kapas allim, iwe, ra etiwa ekkewe ekkóch le afalafal. Lón ena fansoun mi chék wor fitepúkú aramas ra fiffiti án ekkewe Chón Káé Paipel kewe mwich, ina popun ese kon lien chómmóng mi etiwa ewe etiwetiw usun met ra fen áneánei. Nge chómmóng mi álleani ewe puk are chékúkkúnún taropwe ra esilla pwe ra fen kúna ewe enlet, me ra mochen álisi aramas. Áwewe chék, lón ewe ier 1882, iei makkeien emén seni Iurop, lón London, ewe mi fen álleani ewe Watch Tower me eú kúkkún puk, férien ekkewe Chón Káé Paipel: “Kese mochen áiti ngeniei ifa usun me met upwe eáni afalafal pwe ewe angang mi pin epwe pwénútá, ewe Kot a tipeni an epwe fis.”
11, 12. (a) Met ekkewe pioneer ra achocho ngeni? (b) Ifa usun ekkewe pioneer ra fératá ekkewe mineféén mwichefel?
11 Lón 1885, mi wor órun 300 pioneer. Minne ra achocho le féri lóóm a chék léllé ngeni met sia achocho ngeni ikenái. Ra mochen féraaló néún Jesus Kraist chón káé. Nge napanapen ar angang a sókko seni ach ikenái. Fán chómmóng sia kan káé Paipel ngeni emén me emén. Mwirin sia etiwa an epwe fiti án ewe mwichefel kewe mwich. Nge me lóóm, ekkewe pioneer ra káé ngeni kúmiin aramas. Ra anéúnéú ngeniir puk me etiwa chókkewe mi pwapwaiti pwe repwe mwichfengen ar repwe káé ewe Paipel. Ren ar féri ena, ra fératá ekkewe mineféén mwichefel are ekkewe ra kér ngeniir class [kúmi].
12 Áwewe chék, lón 1907, eú kúmiin pioneer a kútta lón eú telinimw chókkewe mi fen néúni ewe puk Millennial Dawn (Poputáán ewe Engeréú Ier). * Iwe mwirin, ra etiwer ngeni eú mwich lón Ráninfel, epwe fis lón imwen emén me lein ekkewe mi pwapwaiti le káé. Lón ena Ráninfel, emén pioneer epwe eáni ewe afalafal usun Otaen Kot Seni Lóóm, nge epwe fis unusen rán. Lón pwal ewe Ráninfel mwirin, epwe pesei ekkewe chón fiti mwich ar repwe sópweló le mwimmwichfengen iteitan. Lón 1911, pwiich kewe ra pwal sótuni eú napanapen féraaló chón káé. Nime me walimén pwiich kewe ra sái me eáni afalafal lón sókkópaten leeni lón Merika me Canada. Ra makkeei iten ekkewe aramas mi fiti mwich mi pwapwaiti le káé, me pwal ar address. Mwirin, ra akkóta ekkeei aramas lón eú me eú kúmi pwe repwe mwichfengen lón imwen ekkewe aramas. Ren ei napanap, ra fératá ekkewe mineféén mwichefel. Lón 1914, mi wor 1,200 mwichefel wóón unusen fénúfan án ekkewe Chón Káé Paipel.
13. Ifa ewe pwóróus ka kúna pwe a kon amwarar lón ewe angangen afalafal?
13 Ikenái, a wor órun 109,400 mwichefel wóón unusen fénúfan, me órun 895,800 pioneer. Arapakkan walu million aramas ikenái ra etiwa “ewe sile mi enlet” me apwénúetá lón manawer. (Álleani Aisea 60:22.) * A fókkun amwarar ei mettóch, pún Jesus a fen oesini pwe chómmóng aramas repwe oputa néún kewe chón káé. A erá pwe aramas repwe eriáfféúr, kalapuser, pwal mwo nge nireló. (Luk. 21:12-17) Inaamwo ika Satan, néún kewe chónláng mi ngaw, me chómmóng aramas ra sótun aúkaló ewe angangen afalafal, nge néún Jiowa kewe aramas ra sópweló le féraaló chón káé me a fókkun uwaéch ewe angang. Ikenái ra afalafal “won unusen fanüfan,” seni ekkewe fénú mi fókkun pwichikkar ngeni ekkewe mi fókkun pattekich, wóón ekkewe chuuk, fénúpéén, telinimw me ekkewe fénú mi chókúkkún aramas wóón. (Mat. 24:14) Pokiten chék án Jiowa álillis, iwe ra tongeni féri ei angang.
EWE SILE MI ENLET A “LAPÓLÓ”
14. Ifa usun ewe sile mi enlet a lapóló ren álillisin néúch kewe puk?
14 Ewe sile mi enlet a fen lapóló pokiten chómmóng ra afalafala ewe kapas allim. A pwal lapóló ren álillisin ekkewe puk. Lón July 1879, ekkewe Chón Káé Paipel ra peresei ewe áeúin puk itan The Watchtower. Lón ena fansoun, a iteni Zion’s Watch Tower and Herald of Christ’s Presence. Ekkewe Chón Káé Paipel ra mééni eú kompeni an epwe peresei 6,000 kapiin ena puk lón fósun chék Merika. Charles Taze Russell, ewe a chék 27 ierin lón ena fansoun, a filitá pwe epwe emmweni makken ena puk me nimmén mwán mi ásimaú ra kan wisen makkeei pwóróus pwe masouan. Ikenái, a peres 42,182,000 kapiin The Watchtower iteitan lón 195 fósun fénú. Iei ewe nampa eú puk (magazine) mi inet wóón unusen fénúfan, nge ewe nampa ruu ina ewe puk Awake! Sia peresei 41,042,000 kapiin Awake! iteitan lón 84 fósun fénú. Pwal och, iteiten ier a peres 100 million puk me Paipel.
15. Ia sia angei me ia ewe moni sia néúnéú le peresei néúch kewe puk?
15 Ei angang a fókkun watte nge monian a chék feito seni ekkewe monien asor. (Álleani Mateus 10:8.) Ekkewe chón business lón pekin peres ra ingeló pokiten ra silei pwe liwinin ekkewe mwesin, taropwe, ink, me pwal ekkóch pisek a fókkun mémmong. Emén pwiich mi wisen mééni pisekin peres fán iten Petel a apwóróusa: “Ekkewe chón business mi feito katol ach leenien peres ra máirú ren ifa usun sia tongeni mééni ekkewe mwesinen peres minefé mi tufichin peresei chómmóng puk, ren chék álillisin ekkewe monien asor. Ra pwal ingeiti ekkewe chón angangen Petel, iir mi chék kúkkún ieriir, me ra pwapwa.”
SILE USUN KOT EPWE OURALÓ FÉNÚFAN
16. Met popun Jiowa a féri pwe “ewe sile mi enlet” epwe lapóló?
16 Jiowa a fen féri pwe “ewe sile mi enlet” epwe lapóló pokiten letipan pwe “aramas meinisin repwe küna manau, repwe pwal silei ewe let.” (1 Tim. 2:3, 4) Jiowa a mochen aramas repwe silei ewe enlet pwe repwe tongeni fel ngeni i lón ewe napanap mi pwúng me kúna feiéch. Ren ewe angangen afalafal, a fen amwichafengeni eú kúmiin Chón Kraist mi kepit mi tuppwél. A pwal ikkionfengeni “eu mwich mi fokun chocho” seni “sokopaten mwich, ainang, mwü me kapas meinisin,” iir kewe mi eáni ápilúkúlúkún manaw esemuch wóón fénúfan.—Pwär. 7:9.
17. Chómmóngólóón chón fel mi enlet a pwáraatá met?
17 Seni ekkewe 130 ier ra ló, chóchóón ekkewe chón fel mi enlet wóón unusen fénúfan a wesewesen chómmóngóló. Ei mettóch a fókkun pwáraatá pwe Jiowa me Jesus Kraist, néún we King mi filitá, ra nóm ren néún Kot kewe aramas wóón fénúfan ren ar ekkemmweniir, túttúmúnúúr, akkakkótaéchúr, me akkasukuler. Jiowa a apwénúetá an we pwon pwe epwe álisi chómmóng aramas ar repwe kúna ewe enlet lón ach ei fansoun. Iwe sia tongeni lúkúlúk pwe epwe pwal apwénúetá an kewe pwon fán iten mwachkkan. “Ewe fonu epwe ne ureno ren tipachemen ewe SAMOL ussun chok an ewe mataw ureno ren konik.” (Ais. 11:9, KG) A ifa me watteen ekkewe feiéch epwe tori aramas lón ena fansoun!
^ Ren pwal och pwóróus, kopwe katol ekkewe DVD itelaper Jehovah’s Witnesses—Faith in Action, Part 1: Out of Darkness and Jehovah’s Witnesses—Faith in Action, Part 2: Let the Light Shine.
^ A pwal iteni Studies in the Scriptures (Káéén Ekkewe Taropwe mi Pin).
^ Ppii Ewe Leenien Mas, minen October 1, 2002, pekin taropwe 29, par. 16.
[Sasing lon pekin taropwe 14]
Ekkewe Chón Káé Paipel lóóm, iir aramas mi tipetekison mi enletin mochen apwénúetá letipen Kot
[Sasing lon pekin taropwe 15]
Jiowa a aúcheani óm achocho le achéúfetálei “ewe sile mi enlet” usun i
