Káé Seni Án Kot We Kapas

Itá Kot Epwe Awora Eú Mwú Epwe Nemeni Unusen Fénúfan?

Lón ei lesen a wor ekkewe kapas eis eli ka fen eáni me epwe áit ngonuk ia kopwe tongeni kúna me ie pélúwer seni noum Paipel. Chón Pwáraatá Jiowa repwe pwapwa le pwóróus ngonuk usun pélúwen ekkeei kapas eis.

1. Pwata aramas ra osupwangen eú mwú?

Lón ach ei fansoun, aramas ra kúkkúna chómmóng osukosuk mi fiffis wóón unusen fénúfan. Lón ekkóch fénú, lape ngeni aramas ra osupwang me riáfféú. Nge lón ekkewe ekkóch, chómmóng aramas usun a wor rer met mi lap seni ar osupwang. Ika a wor eú chék mwú wóón unusen fénúfan, iwe, a tongeni einetéchú mettóchun fénúfan.​—Álleani Än Salomon Afalafal 4:1; 8:9.

2. Ié sia tongeni lúkúlúk wóón pwe epwe nemeni fénúfan?

Chómmóng aramas ra oput an epwe wor emén chék sou nemenem, pún ese wor emén aramas mi wor an lipwákéch. Ese wor emén, aramas meinisin repwe tipeeú ngeni. Iwe pwal eú, atun aramas ra eáni péchékkúlen nemenem, fetál ngeni ra kan pworoingawóló. Ach chék mwo ekieki pwe emén mi kirikiringaw epwe nemeni unusen fénúfan, sia fen wesewesen niwokkus.​—Álleani Än Salomon Fos 29:2; Jeremaia 10:23.

Jiowa Kot a fen filatá néún we Jesus pwe epwe nemeni aramas tori feilfeiló. (Lukas 1:32, 33) Atun Jesus a nónnóm wóón fénúfan, a kúna chómmóng mettóch lón manawan. A pwal echikara mi samau, asukula mi tipetekison, me awora an fansoun ngeni ekkewe semirit. (Markus 1:40-42; 6:34; 10:13-16) Iwe Jesus, ewe sou nemenem mi múrinné seni meinisin.​—Álleani Johannes 1:14.

 3. Ika eú chék mwú a nemenem, a tongeni fisiéch nemeneman?

Kot a fen filatá Néún we pwe epwe sou nemenem wóón fénúfan seni láng. (Taniel 7:13, 14) Sap minne emén sou nemenem a nóm lón meinisin ekkewe sóópw a nemeni, iwe, pwal ina usun Jesus, ese pwal lamot epwe nóm wóón fénúfan fán iten an epwe nemeni aramas.​—Álleani Mateus 8:5-9, 13.

Itá aramas meinisin repwe tipeeú ngeni án Jesus epwe Sou Nemenem? Aapw. Iir kewe chék mi tongei minne mi pwúng. Jiowa epwe limeti ei fénúfan seni chókkewe mi ú ngeni ewe Sou Nemenem mi tong me pwúng ewe Jiowa a filatá.​—Álleani Mateus 25:31-33, 46.

4. Met ewe Sou Nemenemen fénúfan epwe féri?

Jesus a usun emén chón masen siip, a ioni ekkewe aramas mi tipetekison seni mwú meinisin me asukuler usun án Kot kewe allúk mi lóngólóng wóón tong. (Johannes 10:16; 13:34) Ekkeei aramas ra pwapwa le peni Jesus lón wisan we king. (Kölfel 72:8; Mateus 4:19, 20) Wóón unusen fénúfan, ekkewe aramas mi tuppwél fán nemenien Jesus, ra tipeeúfengen le esilefeili pwe Jesus a fen wiliti King.​—Álleani Mateus 24:14.

Arapakkan chék Jesus epwele áeá an péchékkúl le angasaaló aramas seni pworoingawen nemenem. A filatá ekkóch néún kewe chón tapweló mwirin mi tuppwél ar repwe fiti lón ewe wis king lón láng me nemeni ei fénúfan. (Taniel 2:44; 7:27) Án Jesus ei Mwú epwe ouraló ei fénúfan ren ewe sile seni Jiowa me epwe eliwinato ewe paratis a péútúló me lepoputáán uruwoon aramas.​—Álleani Aisea 11:3, 9; Mateus 19:28.

Ren pwal och pwóróus, ppii sópwun 8 lón ei puk, Met ewe Paipel A Wesewesen Apasa?, férien Chón Pwáraatá Jiowa.