Tipetekison a mwáálfesen me lamalam tekia are sikesik. Emén aramas mi tipetekison ese ekieki pwe ekkewe ekkóch aramas ra tekison seni. A chechchemeni pwe i chón tipis me a silei aúkúkún an kewe tufich.

Lupwen Moses a wiseni och wis ese lamalam tekia. Fán chómmóng, án emén mwaren eáni och wis epwe mwittir pwá ika i mi tipetekison are lamalam tekia. Robert G. Ingersoll, emén sou mak puk rúúepúkú ier lóóm, a erá pwe sipwe tongeni wesewesen silei ika emén a tipetekison ren ifa usun a áeá an péchékkúlen nemenem. Lón ena mettóch, Moses a isetiw eú leenien áppirú mi múrinné usun tipetekison. Ifa usun?

Jiowa a ewisa ngeni Moses eú wis mi watte an epwe emmweni ekkewe chón Israel. Iwe nge, ena mettóch ese efisi an epwe lamalam tekia. Áwewe chék, nengeni án Moses tipetekison lupwen a piitá eú kapas eis usun án emén pwúúng le álemwir. (Numperis 27:1-11) A lamot ena kapas eis pún minne epwe kapwúngúló epwe kkúú ekkewe chón Israel me mwirimwiriir kewe meinisin.

Met Moses epwe féri? Epwe ekieki pwe pokiten i ewe sou emmwenin Israel, iwe, epwele le chék wisen apwúngaló? Epwe lúkúlúkú pwisin an tipachem, an lipwákéch ren minne a kúna lón manawan ren fite fite ier, are an silefichi ekiekin Jiowa?

Eli ina met emén mwán mi lamalam tekia epwe féri, nge esap ina met Moses a féri. Ewe Paipel a erá: “Moses a asile ngeni ewe Samol mi Lapalap [ewe] tüngor.” (Numperis 27:5) Mwa met! Inaamwo ika Moses a fen ekkemmweni Israel úkúkún 40 ier, nge a chúen lúkúlúk wóón Jiowa esap wóón pwisin i. A ffat pwe Moses emén mi fókkun tipetekison.

Moses ese pwal ekieki pwe i chék epwe eáni ewe péchékkúlen nemenem. A pwapwa lupwen Jiowa a mut ngeni ekkóch chón Israel ar repwe pwal wisen oesini. (Numperis 11:24-29) Lupwen semen pwúlúwen Moses we a ereni an epwe ewisa ngeni ekkewe ekkóch fitu an kewe angang, Moses a tipetekison le féri alon. (Ekistos 18:13-24) Atun Moses a chinnap, inaamwo ika a chúen péchékkúl, nge a tingorei Jiowa an epwe seikaatá emén siwilin. Lupwen Jiowa a filatá Josua, Moses a unusen álisatá ena mwán mi kúkkún ierin seni, me a pesei ekkewe aramas ar repwe álleasochisi Josua atun epwe emmweniirelong lón ewe Fénúen Pwon. (Numperis 27:15-18; Tuteronomi 31:3-6; 34:7) Iwe, inaamwo ika Moses a fókkun aúcheani wisan we le emmweni chón Israel lón ar fel ngeni Jiowa, nge a kon ekieki met epwe échiti aramas lap seni wisan.

Sise mochen sipwe lamalam tekia ren ach wiseni och wis are ren pwisin ach kewe tufich. Sipwe chechchemeni pwe ren ach sipwe apwénúetáéchú wisach ngeni Jiowa, a kon lamot ach tipetekison lap seni pwisin ach kewe tufich. (1 Samuel 15:17) Lupwen sia wesewesen emén mi tipetekison, sipwe achocho le apwénúetá án Paipel ei kapasen fén: “Kopwe lükü ewe Samol mi Lapalap ren unusen lelukom, nge kosap lükülükü püsin om sile.”—Än Salomon Fos 3:5, 6.

Án Moses leenien áppirú a pwal áiti ngenikich ach sisap kon alamota itéchúch are ach péchékkúlen nemenem.

Sia feiéch lupwen sia áppirú án Moses tipetekison? Fókkun ewer! Lupwen sia ámááraatá ewe napanap tipetekison, epwe mecheres án aramas repwe nónnóm rech me repwe echenikich. Nge ewe mi lamot seni ena, Jiowa Kot ewe mi pwal pwáraatá tipetekison, epwe echenikich. (Kölfel 18:35) “Kot a ü ngeni chon lamalamtekia kana, nge a ümöümöch ngeni chon tipetekison kana.” (1 Petrus 5:5) A ifa me échún ekkeei kapas mi amwékútúkich ach sipwe achocho le áppirú án Moses tipetekison!