Ua uputiw lón Santo Domingo, Dominican Republic, ám fémén nge ngang ewe setupwutur. Semei kewe me inei ra fiti sukul tekia me ra mochen ám aupwe mááritá lein ekkewe aramas mi múrinné. Rúáánú ier mwen ai uputiw, semei kewe me inei ra kúna ekkewe misineri lón ewe lamalamen Mormon. Ra fókkun ingeiti ekkewe alúwél pún ra napanapéch me pwáraatá súfél, iwe, ra filatá pwe ám famili epwe eú me lein ekkewe famili lón fénúem mi kerán fiti Ewe Mwichefenin Jises Kraist ren Aramas mi Pin non Fansoun Soponon, are ewe Mormon Church.

Atun ai ua mááritá, ua efich ekkewe minen apwapwa aua kan féri lón ám lamalam me ua sani án ám lamalamen Mormon menlapei famili me allúk usun minne mi pwúng me mwáál. Ua meefi aúcheai pún ngang emén Mormon me ua achocho ngeni ai upwe emén misineri.

Lupwen a 18 ieri, ai famili a mwékút ngeni Merika pwe upwe sópweló ai sukul tekia. Mwirin eú ier, pwiin inei we me pwúlúwan we, iir Chón Pwáraatá Jiowa, ra chuurikem lón Florida. Ra etiwakem pwe aupwe fitiir le ló fiti eú mwichelap usun ewe Paipel. Ua fókkun mwaar pún meinisin chón fiti ra suuki néúr Paipel atun ewe afalafal me ra makkeei ekkewe pwóróus ra aúcheani. Iwe, ua pwal tingor efóch pen me taropwe, ua pwal poputá le áppirúúr.

Mwirin ewe mwichelap, pwiin inei we me pwúlúwan we ra erá pwe pokiten ua achocho ai upwe emén misineri, ra tongeni álisiei le silei Paipel. Me rei a och ena ekiek pún ua kon silei ewe Puken Mormon lap seni ewe Paipel.

Atun ám pwóróusfengen usun ewe Paipel wóón phone, pwiin inei we me pwúlúwan we ra pesei ngeniei iteitan ai upwe alélléfengeni minne ua lúkú me áitien ewe Paipel. Ra mochen upwe pwisin ánnetatá ngeniei ifa ewe enlet.

 Ua lúkú chómmóng áitien ewe lamalamen Mormon, nge use chék silei ika ra wesewesen tipeeú ngeni ewe Paipel. Pwiin inei we a tinató rei ewe Awake! minen November 8, 1995, férien Chón Pwáraatá Jiowa, nge mi wor pwóróus lón usun ewe lamalamen Mormon. Ua máirú pwe use kon lien silei chómmóng áitien ewe lamalamen Mormon. Iwe, ua pwisin kútta lón án chón Mormon we Web site pwe upwe cheki ika mi pwúng ewe pwóróus lón ewe Awake! Iwe nge mi fen pwúng met ewe Awake! a erá, nge ua pwal kúna enletin ena pwóróus lupwen ua ló Utah me katol án chón Mormon kewe leenien isoisen pisekiir, are ar kewe museum.

Me rei, ewe Puken Mormon me ewe Paipel ra tipeeúfengen. Nge lupwen ua poputá le álleanifichi ewe Paipel, ua kúna pwe mi wor ekkóch áitien Mormon kewe mi ú ngeni ewe Paipel. Áwewe chék, lón Isikiel 18:4, ewe Paipel a pwáraatá pwe lupwen emén a máló ese wor och mettóch sise tongeni kúna mi chúen manaw mwirin. Nge ewe Puken Mormon a apasa lón Alma 42:9: “Ekkewe ngun rese tongeni mano.”

Me lúkún áitian kewe mi ú ngeni ewe Paipel, ua pwal osukosuk ren ar álisatá mwékútúkútún mwúún fénúfan. Áwewe chék, ekkewe Mormon ra káit pwe ewe tánipiin Eten a nóm lón ewe sóópw itan Jackson lón Missouri, Merika. Néúr kewe néúwis ra erá pwe lupwen ewe Mwúún Kot epwe nemenem, ewe filáiken Merika epwe úretá, ina liosun án aramas kúna ngaseló me ar pwúúng.

Ua osukosuk ika epwe ifa usun ren ekkewe pwal ekkóch fénú me lúkún Merika, usun chék fénúei we. Lón eú pwinin, aua fósfengen wóón phone me chienei we a sukul pwe epwe emén misineri. Ua eisini, ‘Ika eú fénú a maun ngeni fénúom we kopwe fiu ngeni ekkewe chón Mormon lón ena fénú?’ Ua máirú pún a apasa, Ewer! Ua kúttafichi pwal ekkóch pwóróus usun áitien ai lamalam me chuuri néúm kewe néúwis. Ra ereniei pwe mi monomon pélúwen ai kewe kapas eis, nge eú rán epwe ffatoló lupwen ewe saram epwe sasaramoló.

Ua lichippúng ren met ra eáni áwewe, iwe, ua etittinafichi pwisin meefiei me ewe popun ua mochen wiliti misineriin Mormon. Ua mirititi pwe upwe pwapwaiti ewe wis misineri usun chék ai upwe pwapwaiti ai álisi aramas lón pwal ekkóch napanap. Ua pwal sani pún ina eú wis mi asúfél. Iwe nge ren enletin, use kon lien silei usun Kot. Pwúngún pwe ua kan nennelong lón Paipel fán chómmóng me lóóm, nge use kon lien aúcheani. Use fókkun silei met Kot a tipeni seni lóóm fán iten fénúfan are aramas.

Lón ai káé Paipel ren Chón Pwáraatá Jiowa, ua silei ifa iten Kot, met a fis ngenikich atun sia máló, met wisen Jesus lón pwénúetáán minne Kot a tipeni, me pwal chómmóng pwóróus. Kilisou pún ua kerán sileeló masouen ena puk mi amwarar, me ua pwapwa le apwóróusa ngeni ekkewe ekkóch minne ua káé usun ewe enlet. Seni lóóm, ua silei pwe mi wor emén Kot, nge iei ua tongeni fós ngeni lón iótek usun emén wesewesen Chiechiei. Lón ewe July 12, 2004 ua papataiseló usun emén Chón Pwáraatá Jiowa, me mwirin wonu maram ua fiti ewe angangen afalafal full-time.

Lón úkúkún nimu ier, ua angang lón án Chón Pwáraatá Jiowa we ofesilap lón Brooklyn, New York. Ua wenewenen pwapwa ren ai álillis lón fférún ewe Paipel me ekkewe puk mi lóngólóng wóón Paipel mi álisi fite million aramas wóón unusen fénúfan. Ua pwal pwapwa ren ai ákkálisi aramas le káé usun Kot.