ÁN PAIPEL KEWE KAPAS EIS RA PÉLÚ

Mi tufich ach sipwe weweiti masouen Paipel?

Ewe Paipel, ina án Kot we Kapas. A usun chék eché taropwe seni emén sam mi tong. (2 Timoty 3:16) Lón ewe Paipel, Kot a áweweei ifa usun sipwe tongeni apwapwaai I, ewe popun a mutatá mettóch mi ngaw, me met epwe féri fán iten fénúfan lón mwachkkan. Nge ekkewe néúwisin lamalam ra ámwááli áweween áitien ewe Paipel, ina popun, chómmóng aramas ra lichippúng me meefi pwe ese fókkun tufich ar repwe weweéchúti masouen Paipel.​—Föför 20:29, 30.

Jiowa Kot a mochen ach sipwe silei ewe enlet usun I. Ina popun a awora ngenikich eú puk sia tongeni weweiti.​—Álleani 1 Timoty 2:3, 4.

Ifa usun ka tongeni weweiti ewe Paipel?

Me lúkún án Jiowa awora ngenikich ewe Paipel, a pwal awora ekkewe minen álillis pwe sipwe weweiti. A tinató Jesus pwe epwe asukulakich. (Lukas 4:16-21) Jesus a álisi ekkewe mi aúseling ngeni ar repwe weweiti áitien ewe Kapasen Kot ren an fós usun sókkópaten wokisin lón Paipel.​—Álleani Lukas 24:27, 32, 45.

Jesus a fératiw ewe mwichefelin Chón Kraist pwe epwe chék sópwósópwóló ewe angang a poputááni. (Mateus 28:19, 20) Lón ei fansoun, ekkewe mi enletin tapweló mwirin Jesus ra álisi aramas ar repwe weweiti met ewe Paipel a apasa usun Kot. Ika ka mochen weweiti masouen ewe Paipel, Chón Pwáraatá Jiowa repwe pwapwa le álisuk.​—Álleani Föför 8:30, 31.

Ren pwal ekkóch pwóróus, ppii sópwun 2 lón ei puk, Met Ewe Paipel A Wesewesen Apasa?, férien Chón Pwáraatá Jiowa

[Sasing lón pekin taropwe 32]