Emén a fen aapaap ngonuk? A fen fis ngonuk pwe aramas rese mochen álisuk are ra oputok pokiten élúwen únúchom, óm lewo, are nónnómun manawom? Ika ina, iwe a chómmóng aramas ra pwal kúna ena sókkun. Iwe nge, iei eú kapas allim. Inaamwo ika a chéú wóón fénúfan ena sókkun féffér mi asúfélúngaw, nge ei mettóch ese fis lón láng. Ewe aposel Petrus a fókkun lúkúlúk le apasa: “Kot esap lifilifil aramas.”​—Álleani Föför 10:34, 35.

Petrus a apasa ekkena kapas me lón imwen ewe mwán esap i chón Jus, itan Kornelius. Petrus, emén chón Jus, me a manaw lón ewe atun ekkewe chón Jus ra lúkú pwe ekkewe esap iir chón Jus, iir mi limengaw me a ngaw ar repwe chiechi ngeniir. Iwe, pwata Petrus a nóm lón imwen Kornelius we? Pún pwisin Jiowa Kot a akkóta ar repwe chufengen. Lón kúnaen Petrus, eú méngúngú seni láng a ereni: “Kosap apasa pwe a limengau och mettoch are Kot a apasa pwe a limöch.” Petrus ese silei pwe eú rán me mwen ena, a pwal wor kúnaen Kornelius me emén chónláng a éúréúra an epwe kútta Petrus pwe epwe feito ren. (Föför 10:1-15) Lupwen Petrus a mirititi pwe Jiowa a fen emmweni minne a fis, iwe a fókkun mwékút letipan an epwe kapas.

Petrus a apasa, “Iei üa fokun mefi pwe a let pwe Kot esap lifilifil aramas.” (Föför 10:34) Emén sou káé usun Paipel a áweweei ewe popun kapas “lifilifil” lón kapasen Krik, a erá: “A weneiti emén sou kapwúng mi nengeni wóón mesen emén aramas me apwúngaló pwúngún ewe kapwúng esap ren met a fen angang wóón lón ewe kapwúng, nge pokiten chék an sani are oput ewe aramas.” Kot ese chék echeni emén pokiten an lewo, fénúan, nónnómun manawan, me metakkan.

Iwe nge, Jiowa a nennengeni met masouen letipach. (1 Samuel 16:7; Än Salomon Fos 21:2) Petrus a pwal apasa pwe Jiowa “a etiwa aramas mi niuokusiti i o föri mine a pwüng seni ekewe mwü meinisin.” (Föför 10:35) Án emén niwokkusiti Kot a wewe ngeni an súféliti, elingaaló, lúkú i, me túmúnú an esap féri minne epwe eletipengawa I. Án emén féri minne mi pwúng, a kapachelong an tipemecheres le féri minne mi pwúng mwen mesen Kot. Jiowa a pwapwaiti emén, letipan mi fókkun menniniiti i me a amwékútú le féri minne mi pwúng.​—Tuteronomi 10:12, 13.

Ika ka fen kúna aapaap, iwe kopwe kúna ourur seni met Petrus a apasa usun Kot. Jiowa a luki aramas seni sókkópaten mwú meinisin ngeni ewe fel mi enlet. (Johannes 6:44; Föför 17:26, 27) A aúseling me pélúweni án néún kewe aramas iótek ese lifilifil ika met ar einang, fénúer are nónnómun manawer. (1 King 8:41-43) Sia tongeni lúkúlúk pwe lupwen Jiowa a nennetiw me láng, a kúna pwe aramas iir eú chék famili. Ka mochen alapaaló óm káé usun ei Kot, ewe ese lifilifil aramas?