Anchangei pwe a lamot óm kopwe reirei pokiten och semmwen ka tongeni máló ren. Ese mwáál ka mochen lúkúlúk wóón noum we tokterin reirei, pún manawom a nónnóm lepéún. Esap pwe epwe éch óm kopwe akkomw etittina pwóróusen an angangen tokter?

Iwe, pwal ina chék usun, a lamot sipwe etittinaéchú ach lamalam. Ika ka fiti eú mwicheichen lamalam, ka anómu óm riri ngeni Kot fán túmúnúen ena lamalam. A pwal kapachelong óm tufichin kúna manaw esemuch.

Jesus a ngenikich eú kapasen emmwen mi lúkúchar sia tongeni áeá le etittina ach lamalam. A apasa: “Irä meinisin ra sil ren uar.” (Lukas 6:44) Áwewe chék, lupwen ka ekieki usun eú lamalam, met sókkun uwa a uwaani? Ekkewe néúwisin lón ra kon ekimongei moni? Ekkewe chón fiti ra álleasochisi án Paipel kewe kapasen emmwen usun maun me minne mi pwúng me mwáál? Mi wor eú lamalam mi fich ach sipwe lúkúlúk wóón? Aua etiwok óm kopwe etittina ekkeei pwóróus lón ekkewe lesen mwirin ei.