A álilliséch án Paipel kapasen emmwen usun kalapólóón pwapwa lón famili pokiten a pop seni ewe Chón Poputááni kókkótun pwúpwúlú, Jiowa Kot. A asukulakich ach sipwe pwisin eáni lón manawach ekkewe napanap epwe tongeni efisi eú pwúpwúlú mi pwapwa me éúréúrakich usun ekkewe napanap epwe tongeni atai ewe kókkótun pwúpwúlú. A pwal áitingenikich ekkewe minen álillis lón pekin pwóppwóróusfengen mi alapaaló pwapwa lón pwúpwúlú.​—Álleani Kolose 3:8-10, 12-14.

Mwán pwúpwúlú me fin pwúpwúlú repwe asamolufengeniir me asúfélúfengeniir. Ika ekkewe rúúemén ra apwénúetá wiser kewe me ren Kot lón kókkótun pwúpwúlú, iwe ra tongeni pwapwa.​—Álleani Kolose 3:18, 19.

Ekkewe pean pwúpwúlú ra tongeni likiitúfengen ika pwe ra tongefengeniir. Kot a áiti ngenikich ifa usun sipwe eáni tong. Iir me Néún we Jesus, iir leenien áppirú mi kon múrinné seni meinisin ren ar pwáraatá tong mi pennúkúóló pwisin mocheniir.​—Álleani 1 Johannes 4:7, 8, 19.

Ika ekkewe mwán pwúpwúlú me fin pwúpwúlú ra súféliti ewe ririin pwúpwúlú pwe ina eú kókkót seni Kot, iwe repwe likiitúfengen. Kot a fératá ewe kókkótun pwúpwúlú pwe epwe nómoffóch lefilen emén mwán me emén fefin pwe famili epwe núkúchar. Pwúpwúlú epwe tongeni nómoffóch pokiten Kot a fératá mwán me fefin ar repwe pélúwéchfengen lón pekin inis me memmeef. A pwal fériir lón pwisin napanapan fengen me ar tufichin áppirú i le pwáraatá tong.​—Álleani Keneses 1:27; 2:18, 24.