1, 2. Ka sani óm kopwe féri kefil? Met meefiom ren ekkóch kefil ka fen féri?

 ITEITEN rán a wor chómmóng ach kefil. Met meefiom ren óm kopwe féri kefil? Ekkóch ra sani ar repwe pwisin filatá fán iten meinisin. Ra ekieki pwe a wor ar pwúúng le féri ena me rese mochen emén epwe pwal angolong lón ar kefil. Iwe nge, ekkóch ra niwokkus le féri kefil mi chou. Ekkóch ra kútta álillisin ekkewe puk are seni ekkewe soufén me pwal mwo nge, néúnéú watteen moni pwe repwe kútta álillis.

² Chómmóng me leich, sia mirititi pwe inaamwo ika mei wor chómmóng mettóch sia tongeni pwisin filatá nge mei wor ekkóch mettóch ese wor ach pwúúng le filatá. (Kal. 6:5) Iwe nge, sia silei pwe esap meinisin kefil sia féri ra álilliséch are tipachem.

3. Ifa ewe emmwen mi nóm rech ika sipwe féri kefil? Pwata ese mecheres fansoun meinisin ach sipwe silei minne sipwe filatá?

³ Pokiten kich chón angang ngeni Jiowa, sia tongeni pwapwa pwe a ngenikich emmwen mi ffataffatéch usun chómmóng mettóch mi aúchea lón manawach. Sia silei pwe ika sipwe apwénúetá an kewe emmwen, sia tongeni féri kefil mi apwapwaai Jiowa me efeiéchúkich. Iwe nge, ewe Paipel ese awora emmwen fán iten mettóch are osukosuk meinisin. Iwe, met sipwe féri ika a fis ena mettóch? Áwewe chék, sia silei pwe sisap solá. (Ef. 4:28) Nge ekkóch ra apasa pwe solá ese ngaw fansoun meinisin ika ese kon pwal aúchea ewe mettóch are ewe emén a solá mi wesewesen osupwang. Ifa usun sipwe filatá ika ekkóch ra apasa pwe ese wor kapasen fén mi tichik? Met epwe tongeni álisikich?

4. Ifa ewe kapasen fén fán ekkóch chienach kewe ra ngenikich atun sia féri kefil?

⁴ Lupwen sia ereni chienach Chón Kraist pwe sipwe féri eú kefil mi lamot, neman epwe erenikich pwe mi lamot ach sipwe eáni mirit. Ina, kapasen fén mi múrinné. Paipel a fénékich pwe sisap féri kefil fán atapwalapwal, iei met a apasa: “Chokewe mi chök müttir föri ar angang, nge resap akota me mwan, repwe wöüngau.” (SalF. 21:5) Nge met weween kefil fán mirit? Epwe chék wewe ngeni pwe sipwe awora naféchún fansoun, ekiekiéchú, me achocho le weweiti mettóch meinisin me mwen sipwe filatá? Ekkena mettóch meinisin mi lamot nge a pwal wor met mi lamot lap seni ekkena fán iten ach sipwe mirit.​—Rom 12:3, TF; 1 Pet. 4:7.

5. Pwata ach mirit ese unuséch?

⁵ Ese wor emén me leich mi uputiw nge mi unuséch an mirit. Met popun? Pokiten kich meinisin sia uputiw lón tipis, ekiekich me inisich rese unuséch. (Kölf. 51:5; Rom 3:23) Pwal eú, Satan a “achuna” chómmóng me leich me mwen sise mwo silei Jiowa me an kewe allúk mi pwúng. (2 Kor. 4:4; Tit. 3:3) Ina popun, ikaamwo sipwe ekiekiéchú me mwen ach féri kefil nge mi lóngólóng wóón met sia ekieki pwe mi pwúng, iwe, sia pwal tongeni mwáálliló lón ach kefil.​—SalF. 14:12.

6. Met a tongeni álisikich ach sipwe ámááraatá mirit?

⁶ Inaamwo ika sise unuséch, nge Jiowa, Semach mi nóm láng, i mi unuséch lón mettóch meinisin. (Tut. 32:4) Sia pwapwa pún a atufichikich pwe sipwe siwili ekiekich me ámááraatá mirit. (Álleani 2 Timoty 1:7, TF.) Pokiten kich Chón Kraist, sia mochen pwe sipwe ekiekéch, weweéch, me eáni féfféréch. Mi lamot sipwe nemeni ach kewe ekiek me memmeef, me áppirú ekiekin, meefien, me féfférún Jiowa.

7, 8. Apwóróusa pwóróusen emén mi pwáraatá pwe sia tongeni kefiliéch inaamwo ika sia weires are kúna osukosuk.

⁷ Ekieki ei kapas áwewe. Eérenien chómmóng mi nóm lón eú fénú nge esap wesetáán fénúer ar repwe tiinaaló néúr kewe upwufé ngeni aramaser kewe pwe repwe wisan túmúnúúr pwe repwe tongeni sópweló le angang fán iten epwe wor néúr moni. * Emén fefin mi nóm lón eú fénú nge esap fénúan a néúni emén át mi átéch. Lón ena fansoun, a poputá le káé ewe Paipel me a feffeitá lón an riri ngeni Kot. Chiechian kewe me aramasan kewe ra chék ekkereniir me pwúlúwan ar repwe tiinaaló néúr we ngeni semen me inen ewe mwán kewe. Iwe nge, ewe fefin a káé pwe Jiowa a ewisa ngeniir me pwúlúwan we ar repwe túmúnú néúr we. (Kölf. 127:3; Ef. 6:4) Iwe met, ewe fefin epwe itá fiti eérenier pokiten chómmóng ra apasa pwe ina met mi éch? Are, epwe apwénúetá met a káé seni Paipel inaamwo ika epwe kúna esiit seni ekkewe ekkóch me osupwang lón pekin moni? Met kopwe féri ika a pwal fis ngonuk ena esin?

⁸ Ena fefin a osukosuk me aúrek pokiten chómmóng ra aosukosuka. Iwe, a iótek ngeni Jiowa usun met a nónnóm lón letipan me tingor án Jiowa emmwen. Atun a ereni ewe a kákkáé ngeni me ekkewe ekkóch lón ewe mwichefel, a poputá le weweiti ekiekin Jiowa usun ena mettóch. A pwal mirititi pwe ika néúr we át epwe towau seniir atun a mámmááritá, iwe, a tongeni efeiengawa letipan néúr we. Mwirin an ekilonei alon ewe Paipel,  a filatá pwe ese pwúng ar repwe tiinaaló néúr we át. Lupwen pwúlúwan ewe fefin we a kúna ifa usun chón ewe mwichefel ra álilliséch ngeniir me kúna pwe néúr we a pwapwa me máréch, iwe, a poputá le káé Paipel me fiti pwúlúwan we le ló mwich.

9, 10. Met weween ach sipwe eáni mirit, me ifa usun sipwe tongeni eáni?

⁹ Iei chék eú me lein ekkewe pwóróus, nge a pwári pwe ach áeá mirit a wewe ngeni ach sisap chék fitaaló met sia ekieki pwe mi pwúng are alon ekkewe ekkóch pwe me rer mi fókkun éch. Ekiekich me letipach rese unuséch ra tongeni usun eú kulók mi kon mwittir are mi kon mmang. Ach fiti ena kulók epwe ngenikich watteen osukosuk. (Jer. 17:9) A lamot sipwe ekkesiwili ekiekich me letipach pwe repwe tipeeú ngeni án Kot kewe allúk.​—Álleani Aisea 55:8, 9.

¹⁰ Sia kúna ei sókkun kapasen fén me lón ewe Paipel: “Kopwe lükü ewe Samol mi Lapalap ren unusen lelukom, nge kosap lükülükü püsin om sile. Kopwe chechemeni i won meinisin mine ka föri, nge i epwe aiti ngonuk ewe al mi pwüng.” (SalF. 3:5, 6) Nengeni ekkeei kapas “kosap lükülükü püsin om sile” ra tapw mwirin ekkeei kapas “kopwe chechemeni” Jiowa. Ina i ewe Emén mi eáni mirit mi unuséch. Ina popun ika sipwe eáni eú kefil, mi lamot sipwe ppii met Paipel a apasa pwe sipwe silei ekiekin Kot. Iwe a lamot ach kefil epwe lóngólóng wóón. Ika sia mochen sipwe mirit a lamot sipwe eáni ekiekin Jiowa.

11. Met a lamot emén epwe féri pwe epwe kefiliéch?

¹¹ Ese mecheres ach sipwe káé le eáni kefil mi mirit me filatá met sipwe féri. Ei a ákkáeúin weires ngeni chókkewe ra kerán papatais are poputá le feffeitá ngeni ásimaw lón pekin lúkú. Iwe nge a tufich ngeniir ar repwe wesewesen feffeitá. Ewe Paipel a eita ngeniir kúkkún pokiten ra usun emén mi kerán káé fetál. Ewe kúkkún a káé fetál ren an ekis chék eipweipw me ekkenniwili an eipweipw. Pwal ina chék usun ren emén kúkkún lón pekin lúkú mi kákkáé an epwe kefiliéch. Chechchemeni  pwe ewe aposel Paulus a áweweei ekkewe mi mwukóló ngeni “chókewe ra achocho le aörüni ngeni ar kewe peekin memmef pwe repwe sipeöch le älefiila lefiilen met mi mwirinnö me met mi ingaw.” Ekkewe kapas “aörüni” me “sipeöch” ra wewe ngeni pwe repwe achocho le sópweló me ekkenniwili. Ina pwata ekkewe mi kerán poputá lón ewe enlet mi lamot ar repwe sópweló le káé ifa usun repwe kefiliéch.​—Álleani Ipru 5:13, 14, Agapé.

12. Ifa usun sipwe ámááraatá ach tufich pwe sipwe kefiliéch?

¹² Usun met sia fós usun me mwan, iteiten rán a wor chómmóng ach kefil mi watte me kúkkún. Alon ewe repot, arapakkan esopwun an chómmóng kefil a lóngólóng wóón met ra piin féfféri nge esap lóngólóng wóón ar ekiekiéchú. Áwewe chék, iteiten lesossor eli ka filatá ika met kopwe úféúf. Eli ka ekieki pwe mi chék mecheres ena kefil me ese pwal kon lamot óm kopwe ekiekiéchú. Nge mi lamot kopwe mwo ekieki are minne kopwe úféúf a fichiiti chón angang ngeni Jiowa. (2 Kor. 6:3, 4) Atun ka ló kamé úfom, eli ka ekieki usun ewe sókkun úf mi terú me style. Nge ka pwal ekieki usun liwinin me ika ewe úf mi fich? Óm kefiliéch wóón ekkeei sókkun mettóch epwe álisuk óm kopwe sipeéch le áeá óm tufichin ekiek. Ika sia féri iei usun epwe álisikich le kefiliéch wóón ekkewe mettóch mi chou.​—Luk. 16:10; 1 Kor. 10:31.

13. Met epwe álisikich le apwénúetá met sia fen filatá?

¹³ Ikaamwo sia kefiléch nge esap mecheres fansoun meinisin ach sipwe féri met sia filatá. Áwewe chék, ekkóch mi mochen péútaaló suupwa nge ese fis, pún ese kon péchékkúl ar mochen. A lamot tipeppós pwe epwe apwénúetá met a filatá. Ekkóch ra apasa pwe ach apéchékkúla ach mochen a usun ach apéchékkúla féúicho. Ewin sia taiso ewin féúichooch a péchékkúleló. Nge ika sise tattaiso epwe apwangapwangoló. Iwe met a tongeni álisikich le apéchékkúla ach mochen le féri ekkewe mettóch sia fen filatá? Ach seppiti Jiowa epwe álisikich.​—Álleani Filipi 2:13

14. Pwata Paulus a wor an péchékkúl le féri úrúrún met a silei pwe epwe féri?

¹⁴ Paulus a silei seni pwisin met a kúna lón manawan. Fán eú, a lichippúng: “A nom rei ewe mochenin föri mine a mürina, nge üsap tongeni föri.” A silei met a mochen féri are met úrúrún epwe féri nge fán ekkóch ese tongeni féri. A apasa: “Üa pwapwaiti än Kot allük. Nge üa küna pwal eu allük a angang lon inisi, eu allük mi fiu ngeni ewe allük letipei a tipeeu ngeni, o a fötekiniei fän ewe allükün tipis, ewe a angang lon inisi.” Nge mi wor popun an ápilúkúlúkéch. A apasa: “Kilisou ngeni Kot a angasaei ren ach Samol Jesus Kraist!” (Rom 7:18, 22-25) A pwal makkeei: “Ngang mi tufich ren mettoch meinisin lon ewe emon mi apochokkulaei.”​—Fil. 4:13, TF.

15. Pwata a lamot sipwe úppós atun sia féri minne mi pwúng?

¹⁵ Ren ach sipwe apwapwaai Kot, a lamot sipwe filatá le féri minne mi pwúng me tipeppós. Chechchemeni mwo met Elias a ereni ekkewe chón fel ngeni Paal me ekkewe chón Israel mi tokoló me wóón ewe chukun Karmel, a apasa: “Epwe ifa nangatamen ami oupwe finata met oua mochen? Ika ewe SAMOL i God, oupwe pin ngeni. Nge ika Baal i God, oupwe pin ngeni!” (1 King 18:21, Kapasen God) Ekkewe chón Israel ra silei pwe úrúrún repwe chék fel ngeni Jiowa  nge ra tipemwaramwar. Josua a sókkóló seniir. Fitu ier me mwan, a ereni ekkewe chón Israel ei: “Ika ousap mochen angang ngeni ewe Samol mi Lapalap, ikenai oupwe filätä iö oupwe angang ngeni. . . . Nge ngang me chon leimwei, äm aipwe angang ngeni ewe Samol mi Lapalap.” (Jos. 24:15) Iwe met feiéch a tori me chókkewe ra fiti? A mumu ngeniir le tolong lón ewe Fénúen Pwon, ina “ewe fanü mi pwülüöch o fanüeräs.”​—Jos. 5:6.

16, 17. Ikkefa ekkewe feiéch epwe torikich ika sia filatá le féri met Jiowa a mochen sipwe féri?

¹⁶ Emén mwán mi kerán papatais a pwúpwúlú me a wor úlúmén néúr kewe kúkkún. An we angang ese watte peioffun nge a filatá ena angang pún a tongeni afalafal, fiti mwich fengen me an we famili lón weekend. Nge eú rán chienan we chón angang a ereni pwe iir me rúúemén repwe mwékút ngeni pwal eú kompeni mi watte peioffun me watte álillis. Chienach we a ekieki me iótek usun met epwe filatá. A mirititi pwe ika epwe eáni ena minefé angang esap asésé lón weekend. Iwe ika en ena, met kopwe féri?

¹⁷ Mwirin an ekieki ifa usun filian a tongeni kkúú an riri ngeni Jiowa, iwe, ese etiwa ewe angang mi watte peioffun. Ka ekieki pwe a niamam mwirin an féri ena kefil? Aapw ese fókkun. A meefi pwe ekkewe feiéch seni an riri ngeni Jiowa mi kon álilliséch ngeni me an we famili lap seni watteen peiof. I me pwúlúwan we ra fókkun pwapwa lupwen néúr we finichi, engol ierin a ereniir pwe a tonger, tongeei chiechier kewe lón mwichefel me fókkun tongei Jiowa. Ewe nengngin a apasa pwe a mochen fangóló manawan ngeni Jiowa me papatais. Ewe nengngin a feiéch seni án seman we leenien áppirú mi múrinné pwe a akkomwa an fel ngeni Jiowa lón manawan.

18. Pwata a lamot sipwe kefiliéch iteiten rán?

¹⁸ Ewe Moses mi Lapalap Jesus Kraist, a emmweni ren fite fite ier ekkewe chón fel mi enlet ngeni Jiowa lón ewe fénúpéén mi wewe ngeni án Satan we ótót. Iei Jesus ewe Josua mi Lapalap epwele atai ena ótót me emmweni néún kewe chón áppirú ngeni ewe fénú mi pwonetiw mi fé me uren pwúng. (2 Pet. 3:13) Ina minne esap iei ewe fansoun ach sipwe liwiniti ekiekich kewe me lóóm, eéreniach me lóóm, met sia fen aúcheani me met sia mochen tikeri. Nge iei ewe fansoun mi lamot sipwe weweiti ifa usun Kot a mochen sipwe manaweni manawach. (Rom 12:2; 2 Kor. 13:5) Kopwe tipachem lón óm kefil, me wiliti ewe sókkun aramas Jiowa epwe efeiéchú feilfeiló chék.​—Álleani Ipru 10:38, 39, KG.