Máló a usun chék annut pún ekkewe mi máló rese tongeni meefi och me rese pwal tongeni féri och mettóch. Ina minne, ewe Chón Fératá manaw a tongeni amanawa ekkewe mi máló ren ewe manawsefál. Ren an epwe leteló pwúngún ena pwóróus, Kot a atufichi Jesus an epwe amanawatá chómmóng aramas mi fen máló.—Álleani Än Salomon Afalafal 9:5; Johannes 11:11, 43, 44.

Kot a fen pwonei pwe ekkewe mi máló mi nónnóm lón ekiekin, repwe manawsefál lón ewe fénúfan sefé mi pwúng. Kot chék a tongeni amanawasefáliir lón pwisin an fansoun. Ewe Kot mi Lapalap a fókkun mochen áeá an we manaman le amanawasefáli ekkewe mi máló.​—Álleani Hiop 14:14, 15.

Lupwen Kot epwe amanawasefáli aramas, repwe tufichin esilla ar kewe famili, chiechier kewe, me pwisin iir. Inaamwo ika a mwongoingoiló ewe inis, nge Kot a tongeni amanawatá eménna ren eú mineféén inis.​—Álleani 1 Korint 15:35, 38.

Chókúkkún chék ekkewe repwe manawetá lón láng. (Pwärätä 20:6) Nge lape ngeni ekkewe repwe manawsefál repwe manaw lón ewe paratis wóón fénúfan. Chókkana repwe poputásefáli manawer ren ewe ápilúkúlúkún ar repwe manaw tori feilfeiló.​—Álleani Kölfel 37:29; Mateus 5:5; Föför 24:15.