1, 2. Pwata Jiowa a erá pwe i a usun chék emén chón masen siip?

 JIOWA a erá pwe i a usun emén chón masen siip. (Is. 34:11-14) A lamot ena pún a álisikich le weweiti napanapan kewe. Emén chón masen siip mi tong a meefi pwe wisan an epwe fókkun túmúnúéchú néún kewe siip. A kan emmweniir ngeni ekkewe masies me ekkewe konik, me a ekii ekkewe appanen siip. (Kölf. 23:1, 2; Ais. 40:11) A mammaser lerán me lepwin me túmúnúúr seni ekkewe man mi efeiengaw. (1 Sam. 17:34, 35; Luk. 2:8) A kútta ekkewe siip mi mwálecheló me túmúnúéchú ekkewe mi kinás.​—Is. 34:16.

² Pokiten lap ngeni néún Jiowa kewe aramas lóóm, iir chón fol man are chón atake, iwe, ra mwittir weweiti weween án Jiowa erá pwe i a usun chék emén chón mas mi tong. Ra silei lamoten án emén epwe foleni me túmúnú ekkewe siip pwe repwe péchékkúl me manaw. A pwal ina chék usun ren aramas, me ar riri ngeni Kot. (Mark. 6:34) Ika Jiowa ese emmweni me álisi aramas, iwe repwe chék kúna weires. Resap silei minne mi pwúng me mwáál, me esap wor chón túmúnúúr, iwe repwe usun chék ekkewe “sip esap wor ar chon mas” ra chék toropasfeil. (1 King 22:17) Iwe nge, Jiowa a awora met mi lamot ngeni néún kewe aramas.

3. Met sipwe káé lón ei lesen?

³ Án Jiowa áweweei pwe i a usun emén chón masen siip, a pwal lamot lón ach ei fansoun. Jiowa a chúen túmúnú néún kewe aramas mi usun chék siip. Sipwe ppii ifa usun a emmweni me awora minne a lamot ngeni néún kewe siip ikenái. Sipwe pwal káé met ekkewe siip repwe itá féri pwe repwe kúna feiéch seni án Jiowa túmúnúúr me álisiir.

4. Ifa wisen Jesus lón an túmúnú néún Jiowa kewe siip?

⁴ Jiowa a fen filatá Jesus an epwe Mékúren án Chón  Kraist we mwichefel. (Ef. 1:22, 23) Pokiten Jesus emén “chon mas mi öch,” a áppirú Seman we ren an tongei me túmúnú ekkewe siip. Jesus a pwal mwo nge “fangala manauan fänäsengesin ekewe sip.” (Joh. 10:11, 15) A ifa me watteen feiéchún aramas meinisin ren án Kraist asorun méén kepich! (Mat. 20:28) Letipen Jiowa pwe “meinisin mi lükü i resap pöütmwälila, pwe repwe eäni manau esemüch.”​—Joh. 3:16.

5, 6. (a) Ié kewe Jesus a ewisa ngeniir ar repwe túmúnú néún kewe siip? Met a lamot ngeni ekkewe siip ar repwe féri pwe repwe kúna álillis seni án Jesus túmún? (b) Ifa ewe ákkáeúin popun sia mochen álleasochisi ekkewe mwán mi ásimaw lón mwichefel?

⁵ Ifa usun ekkewe siip ra pwáraatá pwe Jesus i néúr Chón Mas? Jesus a erá: “Nei kewe sip ra aüselinga mweliei, üa pwal sileer, nge ir ra tapweto müri.” (Joh. 10:27) Án emén aúseling ngeni mwelien ewe Chón Mas mi Múrinné, a wewe ngeni an álleasochisi an emmwen wóón mettóch meinisin. A pwal kapachelong an álleasochisi chókkewe Jesus a filiretá pwe repwe álisi le túmúnú ekkewe siip. Jesus a erá pwe néún kewe aposel me chón káé repwe sópweló ewe angang i a poputááni. Repwe wisen ‘afalafala’ me ‘amongöü nöün Jesus kewe sip.’ (Mat. 28:20; álleani Johannes 21:15-17.) Lupwen a chéúfetál ewe kapas allim, me a chómmóngóló chóchóón ekkewe Chón Kraist, iwe, Jesus a akkóta pwe ekkewe Chón Kraist mi ásimaw repwe wisen túmúnú ekkewe mwichefel.​—Ef. 4:11, 12.

⁶ Lupwen ewe aposel Paulus a fós ngeni ekkewe mwán mi ásimaw lón ewe mwichefelin Efisos, a áiti ngeniir pwe ra fen kefilitá me ren án Kot we manaman pwe repwe “chon masen ewe mwichefelin Kot.” (Föf. 20:28) A pwal ina usun ren ekkewe Chón Kraist mwán mi ásimaw lón ei fansoun, iir ra pwal kefilitá pokiten ra fen eáni ekkewe napanap mi fich me ren ewe Paipel, ewe puk mi mak fán emmwenien án Kot we manaman mi fel. Ina minne, ach álleasochisi ekkewe Chón Kraist mwán mi ásimaw, a pwáraatá ach súféliti Jiowa me Jesus, ekkewe rúúemén Chón Mas mi lap seni meinisin. (Luk. 10:16) Iei ewe ákkáeúin popun sia mochen álleasochisi ekkewe mwán mi ásimaw. Iwe nge, a pwal wor ekkóch popun a lamot sipwe álleasochisiir.

7. Ifa usun ekkewe mwán mi ásimaw ra álisuk pwe kopwe akkamwéchú óm ririéch ngeni Jiowa?

⁷ Ekkewe mwán mi ásimaw ra awora kapasen apéchékkúl me éúréúr mi lóngólóng wóón Paipel. Rese awora ena emmwen ren ar repwe ereni pwiir kewe ifa usun repwe manaweni manawer. (2 Kor. 1:24) Nge ra chék mochen awora ngeniir ekkewe kapasen emmwen lón Paipel pwe epwe álisiir le féri ekkewe kefil mi múrinné me álisatá kókkótéchún me kinamween ewe mwichefel. (1 Kor. 14:33, 40) Án ekkewe mwán mi ásimaw “mamasa” chón ewe mwichefel, a wewe ngeni ar mochen álisi emén me emén pwe epwe akkamwéchú an ririéch ngeni Jiowa. Ina minne, ra mwittir awora álillis lupwen ra kúna pwe emén lón ewe mwichefel epwele are a fen “tur lon tipis.” (Kal. 6:1, 2; Jut. 22) A wor chómmóng popun sipwe ‘aleasochisi nöüch kewe souemwen.’​—Álleani Ipru 13:17.

8. Ifa usun ekkewe mwán mi ásimaw ra túmúnú chón ewe mwichefel?

⁸ Ewe aposel Paulus, i pwal emén chón mas mi tong, a mak ngeni pwiin kewe lón Kolose: “Öüpwe äffäli kemi ämi öüsap mwüüt ngeni emön epwe liäpenikemi lón tipächchemen aramas me emichimich mi pöön mi pop seni än aramas angangen öörüni me ekkana lóngólóngun kkäit minen fönüfan usun än ekkan re kärään poputä le käeö, nge resap pop seni Kraist.” (Kol. 2:8, Agapé) Ena kapasen éúréúr a pwal áiti ngenikich eú popun mi múrinné ach sipwe aúselingéch ngeni án ekkewe mwán mi ásimaw kapasen éúréúr seni Paipel. Ra túmúnú chón ewe mwichefel seni chókkewe mi mochen erikiireló seni Jiowa. Ewe aposel Petrus a éúréúrakich ach sipwe túmúnúkich seni ekkewe “soufos chofona” me “chon afalafal chofona,” iir kewe ra “atupu ekewe aramas mi apwangapwang lon  ar lükü pwe repwe tipis.” (2 Pet. 2:1, 14) A pwal lamot ngeni ekkewe mwán mi ásimaw lón ei fansoun ar repwe awora ena esin kapasen éúréúr ngeni chón ewe mwichefel ika mi fich. Ekkewe mwán mi ásimaw, a watte ar sile ren minne ra fen kúna lón manawer. Pwal och, me mwen ar kefilitá ngeni ena wis, ra pwáraatá pwe ra weweéchúti ewe Paipel me ra tufichin asukula aramas usun ewe enlet. (1 Tim. 3:2; Tit. 1:9) Pokiten ra ásimaw, ra eáni ekiek mi itepék me rúúepek, me ra mirit ren ar silei án Kot we Kapas, iwe ra tufich le emmweniéchú ewe mwichefel.

9. Ifa usun Jesus a emmweni me amwéngééni án Chón Kraist mwichefel lón ei fansoun?

⁹ Me ren an we mwicheich, Jiowa a asukula me emmweni ekkewe Chón Kraist meinisin wóón unusen fénúfan. Chómmóng kapasen emmwen seni Paipel a kawor me ren néúch kewe puk. Fán ekkóch, ach we mwicheich a pwal emmweni ekkewe mwichefel me ren ekkewe taropwe mi titiito ngeni ekkewe mwán mi ásimaw are me ren ekkewe kapasen éúréúr seni ekkewe chónemmwen mi wisen sáifetál. Ren ekkeei mettóch, a tori ekkewe siip emmwen mi ffataffatéch.

10. Met wisen ekkewe mwán mi ásimaw ngeni chókkewe ra fen mwálecheló seni ewe mwichefel?

¹⁰ Ekkewe mwán mi ásimaw ra wisen túmúnú emén me emén chón ewe mwichefel, ákkáeúin chókkewe mi fen apwangapwangoló lón ar lúkú are féri tipis mi chou. (Álleani James 5:14, 15.) Ekkóch leir eli ra fen mwálecheló seni ewe mwichefel are fen úkútiw  le féri wiser wisen Chón Kraist. Iwe ika ina, met emén mwán mi ásimaw mi tongei néún Kot kewe siip epwe féri? Epwe achocho úkúkún an tufich le kútta ewe siip mi mwálecheló me pesei an epwe liwiniti ewe mwichefel. Jesus a erá: “Iei usun Semei lon läng esap mochen pwe eman lein ekei kükün epwe mwalechela.”​—Mat. 18:12-14.

11. Met popun a weires án ekkóch repwe álleasochisi án ekkewe mwán mi ásimaw emmwen?

¹¹ Jiowa me Jesus, iir Chón Mas mi unuséch. Iwe nge ekkewe chón masen siip ra néúnéú le túmúnú ekkewe mwichefel rese unuséch. Pokiten ei mettóch, eli epwe weires án ekkóch repwe álleasochisi án ekkewe mwán mi ásimaw emmwen. Eli ekkóch repwe ekieki: ‘Iir aramas rese unuséch usun chék kich. Iwe, pwata upwe aúselinga ar éúréúr?’ Pwúngún pwe ekkewe mwán mi ásimaw, iir rese unuséch. Iwe nge, mi lamot sipwe eáni ekiek mi pwúng usun ar kewe apwangapwang are ar féffér mi mwáál.

12, 13. (a) Ikkefa pwóróusen ekkóch mi wor wiser me ren Kot nge ra mwáálliló? (b) Pwata a mak lón Paipel mwáállilóón ekkóch mi wor wiser me ren Kot?

¹² Ewe Paipel ese aopaaló pwóróusen mwáállilóón chókkewe Jiowa a néúnéú le emmweni néún kewe aramas lóóm. Áwewe chék, Tafit a filitá pwe epwe king me a wisen emmweni chón Israel. Nge a ttur lón sóssót, iwe a lisowu ngeni emén lúkún pwúlúwan me a nimanaw. (2 Sam. 12:7-9) Pwal nengeni pwóróusen ewe aposel Petrus. Inaamwo ika Kot a fen ewisa ngeni eú watteen angang lón án Chón Kraist we mwichefel, nge a fókkun mwáálliló. (Mat. 16:18, 19; Joh. 13:38; 18:27; Kal. 2:11-14) Me lúkún Jesus, meinisin aramas seni lón fansoun Atam me Efa iir rese unuséch.

¹³ Pwata Jiowa a mochen ekkewe chón mak Paipel repwe makkeei pwóróusen mwáállilóón ekkóch mi wor wiser me ren Kot? Eú popun, Kot a féri ena pwe epwe áitingenikich pwe a tongeni néúnéú aramas rese unuséch le emmweni néún kewe aramas. Ren enletin, seni me lóóm a fen ina usun. Ina minne, pokiten ekkewe mwán mi ásimaw ra kan mwáálliló, sisap kúnetipingen le erá pwe sia tongeni ngúnúngúnúngawer are tunaló ar emmwen. Jiowa a mochen sipwe súféliti ekkena mwán me álleasochis ngeniir.​—Álleani Ekistos 16:2, 8.

14, 15. Met sia tongeni káé seni napanapen án Jiowa éúréúra néún kewe aramas lóóm?

¹⁴ A fókkun lamot ach sipwe álleasochisi chókkewe ra wisen emmwenikich. Ekieki ifa usun Jiowa a éúréúra néún kewe aramas lón fansoun lóóm pwe repwe kúna manaw. Lupwen ekkewe chón Israel ra towu seni Isip, Kot a emmweniir me ren Moses me Aaron. Ren ar repwe kúna manaw seni ewe áengolun riáfféú, mi lamot repwe álleasochisi ewe éúréúr ar repwe féri eú fááf mi kkóló aúchean, me repwe angei ekis chchaan ewe lam ra nieló me toofi ngeni penkasamen imwer lepekin me rúúepek pwal asan. Ekkena aramas rese rongorong ena kapasen éúréúr seni och méngúngú seni láng. Nge mi lamot repwe aúseling ngeni ekkewe mwán mi ásimaw, me chókkana ra angei ena éúréúr seni Moses. (Eks. 12:1-7, 21-23, 29) Lón ekkena atun, Moses me ekkewe mwán mi ásimaw ra wisen uwei án Jiowa kapasen éúréúr ngeni néún kewe aramas. Lón ach ei fansoun ekkewe Chón Kraist mwán mi ásimaw ra pwal eáni ena esin wis mi lamot.

¹⁵ Ese mwáál ka tongeni chechchemeni pwal chómmóng pwóróus lón Paipel usun án Jiowa awora kapasen éúréúr fán iten amanawen aramas, nge a néúnéú aramas are chónláng le atoura. Lón meinisin ekkeei pwóróus, Kot a ewisa ngeni ekkewe chón kúné ar repwe wisen fós fán itan me ra ereni néún kewe aramas met a lamot repwe féri pwe repwe kúna manaw. A pwúng  ach sipwe ekieki pwe Jiowa epwe pwal tongeni féri ena ngeni néún kewe aramas lón Armaketon. Pwúngún pwe ekkewe mwán mi ásimaw mi wisen tupuni Jiowa are an we mwicheich ikenái, mi lamot repwe fókkun túmúnúéch ar resap áeámwáálli ena wis Kot a fen ewisa ngeniir.

16. Met mi lamot sipwe aúselingéch ngeni?

¹⁶ Néún Jiowa kewe aramas ra “eu chök mwichen sip” fán emmwenien ewe “eman chon mas,” Jesus Kraist. (Joh. 10:16) Jesus a erá pwe epwe nónnóm ren néún kewe chón káé “fansoun meinisin tori lesopolan” ei ótót. (Mat. 28:20) Usun emén King lón láng, a wor án Jesus manaman le féri mettóch epwe emmwen ngeni katalóón án Satan ei ótót. Ifa usun sipwe akkamwéchú ach tipeeúfengen me kúna túmún lón án Kot we mwicheich? Ewe Paipel a pélúweni, a apasa: “Selingemi repwe rongorong me lükün sökürümi, ‘Iei ewe al oupwe aleni.’” Met a kapachelong lón minne sipwe rongorong ngeni? Minne Kot a áiti ngenikich lón Paipel me met I me Jesus ra apasa me ren chókkewe ra filiretá pwe repwe chón masen néúr kewe siip.​—Álleani Aisea 30:21; Pwärätä 3:22.

17, 18. (a) Ifa usun ekkewe siip ra tongeni feiengaw, nge pwata sia tongeni lúkúlúk pwe sipwe kúna túmún seni? (b) Met sipwe káé lón ewe lesen mwirin ei?

¹⁷ Ewe Paipel a apasa pwe Satan a usun “eman laion mi wörüwör, nge a kütta iö epwe oromala.” (1 Pet. 5:8) Usun chék emén manmwacho mi mochen ochoch aramas, a nennengeni ekkewe pwiin siip, me witiwiti ewe atun a tongeni mweteri ekkewe siip mi túmúnúngaw are fen mwálecheló. Ina popun a fókkun lamot ach sipwe fitipach ngeni ewe mwichefel me ngeni ‘ewe Chon Fol me Chon Mas,’ ina i Jiowa. (1 Pet. 2:25) Iei met Pwärätä 7:17 a apasa usun chókkewe repwe manawewu seni ewe riáfféú mi lapalap: “Ewe Lam [Jesus] . . . epwe nöür chon mas o emweniir ngeni ekewe puächen kolukun manau. Iwe, Kot epwe talüpwasei chönün mas seni won meser meinisin.” A ifa me anúkúnúkún ei kapasen pwon!

¹⁸ Mwirin ach káé usun ei wis mi fókkun lamot, wisen ekkewe mwán mi ásimaw lón túmúnún néún Kot kewe siip, mi lamot emén me emén chókkana repwe pwisin eisiniir, ‘Ifa usun upwe apwénúetáéchú wisei me túmúnúéchú néún Jesus kewe siip?’ Sipwe káé pélúwen ei kapas eis lón ewe lesen mwirin ei.