PWÓRÓUS LÚKÚNPÉÉN: PWÓRÓUS MI CHOFONA MI EFISI ÁN ARAMAS RESAP TONGEI KOT
Pwóróus mi Chofona Pwe Kot A Kirikiringaw
MINNE CHÓMMÓNG RA LÚKÚ:
Iei alon Catechism of the Catholic Church: “Mwirin chék málóón chókkewe mi watte tipisiir, ngúnúr a feitiw lón hell, ikewe ie repwe riáfféú ren kapwúngún hell, ‘ekkei esekun.’” Ekkóch néúwisin lamalam ra erá pwe hell a wewe ngeni án emén epwe unusen towau me imu seni Kot.
EWE ENLET SENI PAIPEL:
Iei met Paipel a erá pwe ekkewe mi máló “resap silei och mettoch.” (Än Salomon Afalafal 9:5) Ika ekkewe mi máló rese silei och mettóch, iwe epwe ifa usun ar repwe riáfféú lón ewe “ekkei esekun” are pwal mwo nge riáfféú ren ar imu fóchófóch seni Kot?
Lón chómmóng Paipel, ewe fósun Ipru sheʼohlʹ me ewe fósun Krik haiʹdes * ra kan afféú ngeni ewe kapas “hell” nge a wesewesen wewe ngeni leenien sotup. Áweweei chék, atun Hiop a nóm lón riáfféún samau, iei met a eáni iótek: “Amwo kopwe aopaei lon ewe lenien sotup [“lón hell,” Douay-Rheims Version].” (Hiop 14:13) Hiop a mochen asésé lón ewe leenien sotup nge esap lón eú leenien riáfféú me towau seni Kot.
POPUN A LAMOT:
Ika Kot emén mi kirikiringaw sise tongeni arap ngeni nge sia mochen towau seni. Iei alon Rocío seni Mexico: “Seni lekúkkúni ua káé ewe afalafal usun hell. Ua fókkun niwokkus use tongeni ekieki pwe Kot a eáni napanap mi múrinné. Ua lúkú pwe a nisossong me ese mosonottam.”
Ffatéchún alon Paipel usun án Kot kapwúng me met a fis ngeni aramas atun máló, ina met a siwili ekiekin Rocío usun Kot. A erá: “Ua ngas. Ewe mettóch mi chou a fen turuseniei. Ua poputá le lúkúlúk pwe Kot a mochen minne epwe échitikich, pwe a tongekich me ua pwal tongeni tongei i. Kot a usun emén sam mi emmweni néún ren péún me a mochen met mi fókkun múrinné fán iter.”—Aisea 41:13.
Ekkóch ra achocho lón ar lamalam pokiten ra niweiti ewe ekkein hell nge Kot ese mochen óm kopwe angang ngeni pokiten chék ka niweiti. Nge iei met Jesus a apasa: “Kopwe tongei om Samol Kot.” (Markus 12:29, 30, TF) Pwal och, ika sia mirititi pwe féfférún Kot kewe lón ei fansoun ra pwúng, sia tongeni lúkúlúk pwe án kapwúng lón mwachkkan repwe pwal pwúng. Fán lúkúlúk sipwe tongeni aloni alon Elihu, chiechien Hiop we: “Ese fokun tufich ngeni Kot pwe epwe föri föför mi ngau, ese fokun tufich ngeni Ewe mi Unusen Manaman pwe epwe föri mine a mwäl.”—Hiop 34:10.
^ Pwal ewe fósun Krik Geʹen·na mi kan afféú ngeni “hell” lón ekkewe Paipelin Chuuk, a wesewesen wewe ngeni máfóchófóch are tafóchófóch nge esap ina eú leenien riáfféú lón ekkei.
