Án Paipel Kewe Kapas Eis Ra Pélú
Ié kewe repwe feitá láng me pwata?
Chómmóng aramas ra mochen nóm láng. Jesus a apasa pwe néún kewe aposel mi tuppwél repwe nóm láng. Mwen an máló, a pwonei pwe epwe ammolnatá leenier ren Seman we lón láng.—Álleani Johannes 14:2.
Pwata aramas wóón fénúfan repwe manawsefál me feitá láng? Met repwe féri ikkena ie? Jesus a ereni néún kewe aposel pwe repwe king. Repwe nemeni fénúfan.—Álleani Lukas 22:28-30; Pwärätä 5:10.
Itá aramas meinisin mi múrinné repwe feitá láng?
Lón chómmóng fénú, ekkóch chék aramas ra kan wisen sou nemenem. Pokiten Jesus a amanawata aramas pwe repwe nóm lón láng ren ar repwe nemeni unusen fénúfan, iwe sipwe ekieki pwe iir mi chék chókisikis chókkana mi kefilitá. (Lukas 12:32) Ewe Paipel a affataéchú fitemén repwe fiti Jesus le nemenem.—Álleani Pwärätä 14:1.
Jesus a fen ammolnatá lón láng leenien ekkóch néún kewe chón áppirú. En mi silei met repwe féri ikkena ie?
Esap chék chókkewe repwe feitá láng iir repwe kúna feiéch. Chókkewe mi tuppwél iir mi nóm fán nemenien Mwúún Jesus repwe pwapwaiti manaw esemuch lón ewe paratis mi fissefál wóón fénúfan. (Johannes 3:16) Ekkóch repwe nóm lón ewe Paratis ren ar manawewu seni talóón ei ótóten fénúfan mi ngaw, nge ekkóch repwe nóm lón Paratis ren ar manawsefál.—Álleani Kölfel 37:29; Johannes 5:28, 29.
