1. Pwata sia tongeni meefi pwe a weires ach sipwe chúen mosonottam?

 LUPWEN Jesus a wiliti King lón láng lón ewe 1914, iwe, sia tolong lón ránin lesópwólóón án Satan ei ótót. Mwirin ewe maun lón láng, Jesus a oturatiw Satan me néún kewe chónláng mi ngaw wóón fénúfan. (Álleani Pwärätä 12:7-9.) Satan a silei pwe “a mochomoch chök an fansoun.” (Pwär. 12:12) Iwe nge, ena “fansoun” a fen órun 100 ier iei, me eli ekkóch ra meefi pwe ena ránin lesópwólóón a fen langatattam. Sia chúen mosonottam le witiwiti án Jiowa epwe amóeló án Satan ei ótót?

2. Met sipwe káé lón ei lesen?

² Sia tongeni feiengaw ika sise chúen mosonottam pún sia tongeni féri ekkóch mettóch nge sise akkomw ekieki. Ifa usun sia tongeni wikkitiwit fán mosonottam? Ei lesen epwe álisikich le féri ei mettóch ren ach pwisin etittina pélúwen ekkeei kapas eis. (1) Met sia tongeni káé seni án ewe soufós Mika leenien áppirú ren an mosonottam? (2) Ikkefa ekkewe mettóch repwe fis epwe esissillatá muchúlóón ach fansoun witiwit? (3) Ifa usun sipwe pwáraatá ach kilisou ren án Jiowa mosonottam?

3. Ifa usun napanapen chón Israel lón fansoun Mika we?

³ Álleani Mika 7:2-6. Néún Jiowa we soufós itan Mika a kúna apwangapwangolóón ewe mwúún Israel lón ar riri ngeni Jiowa, tori ar ra unusen tokoló seni lupwen ra nóm fán nemenien King Ahas, ewe mi kirikiringaw. Mika a erá pwe ekkewe chón Israel rese tuppwél, ra usun chék “pötöwölingau” me “eu tit seni irafölüföl.” Ika emén epwe pwerelong lein pétéwélingaw are lón eú ttit mi ffér seni irá félúfél a tongeni kinás. Pwal ina chék usun ekkewe chón Israel mi pworoingaw, ra efeiengaw ren ar féfféringaw ngeni ekkewe ekkóch. A fókkun chéúló  ar féfféringaw pwe pwal mwo nge ekkewe riri lón famili ra tatakkisiló. Mika a silei pwe ese tongeni féri óch mettóch an epwe pwákini ekkena osukosuk, ina popun a iótek ngeni Jiowa seni unusen letipan. Mwirin, a mosonottam le witiwiti Kot. A lúkúlúk wóón Jiowa pwe epwe wisen pwákini ewe osukosuk lón ewe fansoun mi fich me ren.

4. Met sókkun weires sia kúna?

⁴ Usun chék Mika, sia nónnóm wóón ei fénúfan lein aramas mi ekieki chék pwisin iir. Chómmóng “resap sile kilisou, . . . resap eäni tong, . . . ra rawangauei aramas.” (2 Tim. 3:2-4) Sia fókkun meefi weires lupwen chienach chón angang, chienach chón sukul me chón oruch kewe ra pwáraatá pwe ra ekieki chék pwisin iir. Iwe nge, a fen watte weiresin ekkóch néún Kot kewe chón angang pún Jesus a erá pwe néún kewe chón káé repwe kúna koput seni ar famili, me a néúnéú ekkewe itiitin kapas sia álleani lón Mika 7:6. Jesus a erá: “Pun ngang üa feito ai üpwe atipefeseni aramas: Ekewe alüal repwe ü ngeni semer kewe, ekewe föpwül repwe ü ngeni iner kewe, pwülüen nöür alüal repwe ü ngeni inen pwülüer kewe, nge ekewe chon oputok repwe seni püsin chon om famili.” (Mat. 10:35, 36) A ifa me weiresin ach sipwe likiitú fán esiitach me koputach seni pwisin chón ach famili! Ika a torikich ena esin sóssót, sisap achanú nge sipwe fen akkamwéchú ach tuppwél me witiwit fán mosonottam ren án Jiowa epwe pwisin ataweei mettóch. Ika sia tittingor an álillis, i epwe apéchékkúlakich me etipachemakich pwe sipwe tongeni likiitú.

5, 6. Ifa usun Jiowa a efeiéchú Mika, iwe nge met Mika ese kúna pwénútáán?

⁵ Jiowa a efeiéchú Mika ren an mosonottam. Mika a kúna wesilóón án King Ahas nemenem mi ngaw. A kúna néún Ahas we, King Hiskia, an a nemenem me poputásefáli ewe fel mi enlet. Me a pwénútá minne Mika a oesini usun án Jiowa kapwúng ngeni Samaria lupwen ekkewe chón Asiria ra tééki ewe mwúún Israel mi nóm ennefen.​—Mik. 1:6.

⁶ Iwe nge, Mika ese kúna pwénútáán meinisin ekkewe oesini a makkeei fán án Jiowa emmwen. Áwewe chék, Mika a makkeei: “Lon ewe fansoun epwe feito, ewe chuk ia a nom ie imwen ewe Samol mi Lapalap epwe fefeitä o nükünük, epwe pwal tekia seni chuk meinisin, nge chon ekewe mwü won fanüfan repwe mwicheto ren. Iwe, chomong aramas seni ekewe mwü repwe feito o apasa, ‘Ousipwe feitä won chukun ewe Samol mi Lapalap.’” (Mik. 4:1, 2) Mika a fen máló fite fite ier me mwen an a pwénúetá ena oesini. Iwe nge a úppós le akkamwéchú an tuppwél ngeni Jiowa tori máló ese lifilifil ika met ekkewe aramas ra féfféri. Iei met a makkeei: “Chon ekewe mwu meinisin ra fel o aleasochis ngeni ar kewe kot, nge kich sipwe fel o aleasochis ngeni ewe Samol mi Lapalap ach we Kot tori feilfeilachok.” (Mik. 4:5) Mika a tongeni witiwit fán mosonottam lón ekkena fansoun mi áweires pokiten a unusen lúkúlúk pwe Jiowa epwe apwénúetá meinisin an kewe pwon. Ena soufós mi tuppwél a lúkúlúk wóón Jiowa.

7, 8. (a) Pwata a wor popun ach sipwe lúkúlúk wóón Jiowa? (b) Met epwe efisi ach sipwe meefi pwe usun itá a mwittiriló ei fansoun?

⁷ Kich mi pwal unusen lúkúlúk wóón Jiowa, usun chék Mika? Mei wor popun ach sipwe lúkúlúk. Sia fen pwisin kúna pwénúetáán met Mika a oesini. Lón ekkeei ránin lesópwólóón, fite fite million aramas seni sókkópaten mwú, einang me fós ra feitá wóón “ewe chuk ia a nom ie imwen ewe Samol mi Lapalap.” Inaamwo ika ekkóch leir ra feito seni ekkewe fénú ra kan maunfengen, nge ekkewe chón fel ngeni Kot ra fen “amani nöür ketilas o awiliir ngeni pisekin tu pwül,” me iir “resap pwal chüen kaiö maun.” (Mik. 4:3) A ifa me feiéchúch ach kapachelong lein néún Jiowa kewe aramas mi kinamwe!

⁸ Pwúngún, kich meinisin sia mochen pwe Jiowa epwe mwittir ataieló ei ótót mi  ngaw. Nge, ren ach sipwe mosonottam le witiwit, mi lamot sipwe eáni án Jiowa ekiek. A fen filatá eú rán an epwe apwúngú ei fénúfan ren “eman mwän i a awisa ngeni,” ina i Jesus Kraist. (Föf. 17:31) Nge me mwen ena, Kot a suuk ngeni aramas meinisin ar “repwe pwal silei ewe let,” apwénúetá met ra fen káé, me kúna manaw. Sipwe chechchemeni pwe manawen aramas a lóngólóng wóón ena. (Álleani 1 Timoty 2:3, 4.) Ika sia akkachocho le álisi aramas le angei ewe sile mi enlet usun Kot, sipwe meefi pwe usun itá a chék mwittiriló fansoun me mwen warotoon án Jiowa we kapwúng. Ekiseló chék a much ei fansoun. Iwe, sipwe fen pwapwa lón ena atun pún sia fen áeáéchú ach fansoun le afalafala usun ewe Mwúún Kot!

9-11. A fen pwénúetá 1 Tesalonika 5:3? Áweweei.

⁹ Álleani 1 Tesalonika 5:1-3. Ekiseló chék, epwe katowu ewe esilesil, “Mettoch meinisin a kinamwe o nükünüköch.” Ika sise mochen tupuló ren ei esilesil, mi lamot “sipwe nenela o mamasafichi.” (1 Tes. 5:6) Ren ach sipwe nenneló lón pekin lúkú, sipwe enniwili ekkewe mettóch ra fis me mwen án ekkewe mwú repwe eáni ena esilesil mi lamot.

¹⁰ Mwirin ekkewe ruu maunen fénúfan, aramas ra fókkun kútta alen an epwe wor kinamwe. Mwirin ewe áeúin maunen fénúfan, ra fératá ewe League of Nations me ra eáni ápilúkúlúk wóón an epwe atoto kinamwe. Iwe, mwirin ewe oruuen maunen fénúfan, chómmóng aramas ra lúkúlúk wóón ewe United Nations an epwe atoto kinamwe wóón fénúfan. Ekkewe mwú me néúwisin lamalam ra ápilúkúlúkú pwe ekkena mwicheich repwe efisi kinamwe. Áwewe chék, ewe United Nations a eáni eú esilesil pwe ewe ier 1986 epwe Ierin Kinamwe Wóón Unusen Fénúfan. Lón ena ier, chómmóng néúwisin mwú me néúwis lón lamalam ra fiti meilapen ewe lamalamen Katolik lón Assisi, Italy le iótek fán iten kinamwe.

¹¹ Iwe nge, ena esilesil fán iten kinamwe me ekkewe pwal ekkóch esilesil usun chék ena, esap ikkena pwénútáán ewe oesini mi  mak lón 1 Tesalonika 5:3. Pwata? Pokiten esaamwo fis ewe ‘feiengau epwe müttir tori’ ei ótót ena wokisin a kapas usun.

12. Met sia silei usun ewe esilesil “Mettoch meinisin a kinamwe o nükünüköch”?

¹² Ié epwe atowu ewe esilesil mi lamot usun “Mettoch meinisin a kinamwe o nükünüköch”? Lón ena atun, epwele met wisen néúwisin ekkewe tipitipin lamalamen Chón Kraist me pwal ekkewe ekkóch lamalam? Ifa usun néúwisin ekkewe sókkópaten mwú ra pachelong lón? Ewe Paipel ese affata. Nge sia silei pwe ese lifilifil ika ifa usun epwe esilesil, are ika chómmóng aramas repwe wesewesen lúkú, nge ena esilesil esap ina enletin kinamwe me núkúnúkéch. Ei ótót a chúen nóm fán án Satan nemenem. A fen unusen ngawóló me esap tongeni échúló. A ifa me elichippúngún ika sipwe lúkú án Satan we afalafal me penaatá mwékútúkútún fénúfan!

13. Pwata ekkewe chónláng ra amwéchú ekkewe ásepwálin kata?

¹³ Álleani Pwärätä 7:1-4. Atun sia witiwiti pwénútáán 1 Tesalonika 5:3, ekkewe chónláng mi manaman ra amwéchú ekkewe ásepwálin kata repwe atai án Satan ei ótót. Met ra witiwiti? Ewe aposel Johannes a erá pwe a lamot ekkewe mi kepit mi “angang ngeni ach we Kot” repwe angei ar we sáingolóón pwaau. * Iwe lupwen a wesiló ena angangen pwaau, ekkewe chónláng repwele epichaaló ekkewe ásepwálin kata. Met epwe fis mwirin ena?

14. Met a pwáraatá pwe katalóón Papilon mi Lapalap a arapoto?

¹⁴ Papilon mi Lapalap, ewe mwicheichen lamalam chofona wóón unusen fénúfan epwele tori met mi fich ngeni, weween epwele kataló. Lón ena atun, esap wor emén epwe tongeni álisi. Sia fen kúna iei pwe arapakkan chék epwele taló. (Pwär. 16:12; 17:15-18; 18:7, 8, 21) Lón mwo ei fansoun sia kúna seni ekkewe pwóróusen fénúfan án aramas ekkesiita ekkewe lamalam me néúwisin lón. Inaamwo ika a ina usun, nge ekkewe néúwisin Papilon mi Lapalap resap meefi pwe repwele feiengaw. A ifa me mwáállin ar ekiek! Mwirin ewe esilesil usun “Mettoch meinisin a kinamwe o nükünüköch,” ekkewe mwú lón án Satan ei ótót repwe mwittir kuliiti lamalam chofona me ataieló. Papilon mi Lapalap epwe unusen móló fóchófóch! Enlet a fókkun lamot ach sipwe mosonottam le witiwit ngeni fisitáán ekkena mettóch.​—Pwär. 18:8, 10.

15. Pwata Jiowa a mosonottam le witiwit?

¹⁵ Inaamwo ika aramas ra fen eitengawa Jiowa, nge a mosonottam le witiwiti ewe fansoun mi fich an epwe mwékút. Jiowa ese mochen emén mi letip wenechar epwe ninniiló. (2 Pet. 3:9, 10) A pwal ina usun meefiach? Me mwen an epwe war ránin Jiowa we, sia tongeni pwár ngeni ach kilisou lón sókkópaten napanap ren an mosonottam.

16, 17. (a) Pwata sipwe álisi chókkewe rese chúen akkapwénúetá wiser wisen Chón Kraist? (b) Pwata a lamot chókkewe mi úkútiw lón ar angang ngeni Jiowa repwe mwittir liwiniti i?

¹⁶ Álisi chókkewe rese chúen akkapwénúetá wiser wisen emén Chón Kraist. Jesus a erá pwe a watte pwapwa lón láng lupwen pwal mwo emén siip mi mwálecheló a liwinsefál. (Mat. 18:14; Luk. 15:3-7) A ffat pwe Jiowa a fókkun tongei meinisin chókkewe mi pwáraatá ar tong ngeni, inaamwo ika ren mwo iei rese akkangang ngeni i. Lupwen sia álisi chókkana ar repwe liwiniti ewe mwichefel, sia apwapwaai Jiowa me ekkewe chónláng.

¹⁷ En emén me lein chókkewe ra mwo úkútiw seni ar angang ngeni Kot? Neman ka mwo úkútiw le fiffiti án Jiowa mwicheich pokiten emén lón ewe mwichefel a eletipengawók. Iwe, ika pwe a fen ineeta a fis ena,  pwisin eisinuk: ‘Ngang mi pwapwa me meefi aúchean manawei iei lap seni ewe atun ua angang ngeni Kot? Jiowa, i ewe a elichippúngúei are fen emén aramas ese unuséch? Mi wor eú atun Jiowa Kot a féri och mettóch an epwe efeiengawaei?’ Ren enletin, i a fen féri mettóch mi múrinné ngenikich fansoun meinisin. Ikaamwo sise akkapwénúetá wisach wisen emén Chón Kraist, nge i a mut ngenikich ach sipwe pwapwaiti ekkewe mettóch mi múrinné a awora. (Jas. 1:16, 17) Arapakkan chék, epwe war ránin Jiowa we. Iei ewe atun sipwe liwiniti Jiowa, Semach we mi tongekich me ewe mwichefel pwe sipwe tongeni kúna túmún lón ei fansoun sópwólóón.​—Tut. 33:27; Ipru 10:24, 25.

18. Met popun sipwe álleasochisi chókkewe mi wisen emmwenikich?

¹⁸ Álleasochis me tuppwél ngeni chókkewe mi emmwenikich. Jiowa, i emén Chón Mas mi tongekich, a emmwenikich me túmúnúkich. A fen ewisa ngeni Néún we an epwe Meilapen Chón masen ekkewe siip. (1 Pet. 5:4) Ekkewe mwán mi ásimaw lón lap seni 100,000 mwichefel ra túmúnú emén me emén néún Kot kewe siip. (Föf. 20:28) Lupwen sia álleasochis me tuppwél ngeni chókkewe mi wisen emmwenikich, sia pwáraatá ach aúcheani mettóch meinisin Jiowa me Jesus ra féri fán itach.

19. Ifa usun sipwe pacheéchfengen?

¹⁹ Papacheéch ngeni pwiich kewe lón ewe mwichefel. Met weween ena? Lupwen chón koputen eú mwichen soufiu a maun ngeniir, meinisin chón ena mwich ra etieppachfengen pwe repwe usun eú ttit mi péchékkúl mi weires án chón koputer repwe atai. A pwal lallapóló án Satan maun ngeni néún Kot kewe aramas. Lón ei atun sisap fen fiu ngeni pwiich kewe chón lúkú, nge sipwe fen pacheéchfengen, tipemecheres le tunaló ar kewe apwangapwang me pwáraatá ach lúkúlúk wóón án Jiowa emmwen.

20. Met mi lamot sipwe féri iei?

²⁰ Amwo kich meinisin sipwe achocho le nenneló me mosonottam le witiwit. Sipwe mosonottam le witiwiti ewe esilesil usun “Mettoch meinisin a kinamwe o nükünüköch,” me ewe sáingolóón angangen pwaau fán iten ekkewe mi kepit. Mwirin ena, ekkewe fémén chónláng repwe epichaaló ekkewe ásepwálin kata, me ewe Papilon mi Lapalap epwe kataló. Atun sia witiwiti ekkeei mettóch ar repwe fis, sipwe álleasochisi chókkewe mi wisen emmweni án Jiowa we mwicheich. Sipwe etieppachfengen me pwiich kewe Chón Kraist pwe sipwe maun ngeni Satan me néún kewe chónláng mi ngaw! Iei ewe fansoun sipwe apwénúetá án ei soumakken Kölfel pesepes: “Oupwe pöchökül o tipepwora, ämi meinisin mi apilükülükü ewe Samol mi Lapalap.”​—Kölf. 31:24.