1. Met sókkun mettóch chómmóng aramas ra fangóló, me pwata?

 ARAMAS ra tipemecheres le fangóló mettóch fán iten met mi lamot me rer. Ekkewe sam me in ra fangóló néúr moni, ar fansoun me péchékkúl fán iten néúr kewe. Ren ekkewe sáráfé mi achocho le fiti Olympics pwe repwe tupuni fénúer kewe, iir ra fókkun angang weires le taiso me praktis fite fite awa iteiten rán, nge pilóór kewe neman ra chék pwapwa le kukkunoufetál. Jesus a pwal fangóló mettóch fán iten met mi lamot me ren. Ese ekiekin achómmóngaaló pisekin are ekiekin an epwe wor néún semirit. Nge a fen nefotofot wóón an álisatá angangen án Kot we Mwú. (Mat. 4:17; Luk. 9:58) Néún kewe chón káé ra pwal fangóló chómmóng mettóch fán iten kálisitáán ena angang. Feffeitáán angangen ena Mwú a fókkun lamot me rer, me ra fangóló chómmóng mettóch pwe repwe unusen álisatá. (Mat. 4:18-22; 19:27) Ina minne, sipwe pwisin eisinikich, ‘Met a lamot lón manawei?’

2. (a) Met Kot a kútta seni meinisin Chón Kraist mi enlet ar repwe fang ngeni? (b) Menni angang ekkóch Chón Kraist ra pwal tongeni pennúkúóló mettóch pwe repwe álisatá?

² Mi wor ekkóch mettóch Kot a kútta seni meinisin Chón Kraist mi enlet ar repwe fang ngeni pwe repwe ámááraatá me akkamwéchú ar ririéch ngeni i. A kapachelong ar repwe fangóló ar fansoun me péchékkúl pwe repwe iótek, álleani Paipel, féri famili fel, fiti mwich me angangen afalafal. * (Jos. 1:8; Mat. 28:19, 20; Ipru 10:24, 25) Pokiten ach achocho me án Jiowa efeiéchúkich, ei angangen afalafal a wakkatteló me a chómmóng ra  feffeitá ngeni ‘ewe chuk ia a nom ie imwenfelin Jiowa’ we. (Ais. 2:2) Chómmóng ra pennúkúóló mettóch ren ar repwe álisatá angangen ewe Mwú, ren kaútáán ekkewe Leenien Mwich me Leenien Mwichelap, akkóten ekkewe mwichelap, álisi aramas mi feiengaw lón ekkewe feiengaw watte me angang lón Bethel. Ekkeei angang Jiowa ese kútta senikich ach sipwe fiti pwe sipwe kúna manaw esemuch, nge ra pwal lamot pún ra álisatá angangen án Kot we Mwú.

3. (a) Ifa usun sia feiéch lupwen sia fangóló mettóch fán iten ewe Mwú? (b) Ikkefa ekkewe kapas eis sipwe ekieki?

³ Ákkáeúin lón ei fansoun, a fókkun lamot ach sipwe unusen álisatá angangen ewe Mwú. A ifa me chúngún letipach le kúna chómmóng mi pwapwa le fangóló ngeni Jiowa! (Álleani Kölfel 54:6.) Ena sókkun kisáseú a fókkun tongeni atoto ngenikich pwapwa lón ei atun sia witiwiti warotoon án Kot we Mwú. (Tut. 16:15; Föf. 20:35) Iwe nge, mi lamot kich meinisin sipwe etittinafichi pwisin kich. Sia pwal tongeni alapaaló ach álisatá angangen ewe Mwú? Ifa usun sia áeá ach fansoun, tufich, péchékkúl me néúnéú néúch moni? Lupwen sia eáni asor ngeni Kot met sisap túmúnúngaw ngeni? Sipwe ppii ekkóch pwóróus usun án aramas eáni asor seni pwisin mochenin letiper, me ifa usun sia tongeni áppirúúr me alapaaló ach pwapwa.

4. Ifa usun chón Israel ra feiéch seni ar eáni asor?

⁴ Án chón Israel lóóm eáni asor, ina lóngólóngun ar kúna omusomusen ar tipis. A lamot án ekkena aramas eáni asor pwe Jiowa epwe pwapwaitiir. Ekkóch lein ekkena sókkun asor Jiowa a allúk ngeniir ar repwe eáni, nge ekkewe ekkóch epwe pwisin filien emén me emén ika epwe eáni. (Lif. 23:37, 38) Ewe asoren kek aramas ra tongeni pwisin filatá ar repwe eáni asor, are liffang ngeni Jiowa. Áwewe chék, lón efinúnún ewe imwen fel lón fansoun Salomon we, iir ra eáni watteen asor ngeni Jiowa.​—2 Kron. 7:4-6.

5. Ifa usun Jiowa a suuk ngeni pwal mwo nge ekkewe chón osupwang ar repwe eáni asor ngeni?

⁵ Jiowa a weweiti pwe esap léllé úkúkún ewe asor emén me emén epwe tufichin eáni. Ina minne a kútta seniir ar repwe eáni asor met chék ra tufich ngeni. Jiowa a allúkú pwe chchaan ewe man epwe niniló, nge ina “ngünüen ekewe mettoch mi mürina repwe feito” me ren Néún we Jesus. (Ipru 10:1-4) Iwe nge, Jiowa ese tichikietiw met sókkun man repwe eáni asor. Áwewe chék, Kot a etiwa án  emén eáni asorun apansúsúún lisom ika pwe ese tufich an epwe awora eú watteen asor usun emén siip are emén siike. Ina minne, pwal mwo nge ekkewe mi osupwang ra tongeni pwapwa le eáni asor ngeni Jiowa. (Lif. 1:3, 10, 14; 5:7) Inaamwo ika ekkewe asorun man ra tongeni sókkofesen, nge a wor ruu mettóch Jiowa a kútta seni meinisin chókkewe ra pwisin filatá ar repwe eáni asor.

6. Ikkefa ekkewe ruu mettóch Jiowa a kútta seni chókkewe repwe asor ngeni? Ifa lamoten ar repwe álleasochisi ekkena mettóch?

⁶ Áeúin, mi lamot emén epwe fang ngeni Jiowa ewe sókkun asor mi múrinné seni meinisin. Ika a eáni asor ekkewe man mi wor teriir, iwe Jiowa esap etiwa. (Lif. 22:18-20) Oruuan, mi lamot pwe ewe chón eáni asor epwe limeliméch me ren met a affatetiw lón ewe Allúkún Moses. Nge ika a limengaw, epwe akkomw eáni ewe asoren tipis are asoren pupungaw pwe epwe chásefál ngeni Jiowa me mwen epwe eáni ewe asor a pwisin filatá le féri. (Lif. 5:5, 6, 15) A fókkun lamot ei mettóch. Jiowa a allúkú pwe ika emén mi limengaw a ocheei futuken ewe man a eáni asorun kinamwe, kapachelong ekkewe asor a pwisin filatá le eáni, iwe, i epwe ninniiló. (Lif. 7:20, 21) Nge ika ewe chón eáni asor a limeliméch me úéch mwen mesen Jiowa me ese wor terin an we asor, iwe i epwe fókkun pwapwa.​—Álleani 1 Kronika 29:9.

7, 8. (a) Ifa usun chókkewe mi fangóló mettóch fán iten ewe Mwú ra pwapwa? (b) Ikkefa ekkewe mettóch a nóm rech sia tongeni asor ngeni Kot?

⁷ Ikenái, chómmóng ra pwal achocho úkúkún ar tufich le angang ngeni Jiowa me I a fókkun pwapwaiti. Sia pwapwa atun sia angang fán iten pwiich kewe. Emén pwiich mi fiti ewe angangen aúetá ekkewe Leenien Mwich me álisi ekkewe chón feiengaw atun feiengaw watte, a erá pwe ese tongeni áweweei úkúkún ewe pwapwa a tori ren an féri ena angang. Iei alon: “Ua meefi lamoten ai angang weires atun ua kúna án pwiich kewe pwapwa me aúcheani ar mineféén Leenien Mwich are ewe álillis ra kúna mwirin eú feiengaw watte.”

⁸ Án Jiowa we mwicheich lón ach ei fansoun a kan kúkkútta alen an epwe álisatá án Jiowa angang. Lón ewe ier 1904, pwiich we C. T. Russell a makkeei: “Emén me emén epwe meefi pwe i a fil me ren ewe Samol pwe epwe pwisin nemeni an fansoun, manaman, néún moni me metakkan, me epwe kútta alen an epwe áeá ekkeei mettóch lón úkúkún met  a tufich ngeni fán iten lingelóón ewe Masta.” Inaamwo ika sia pennúkúóló mettóch lón ach eáni asor ngeni Jiowa, nge a torikich chómmóng feiéch. (2 Sam. 24:21-24) Sia tongeni áeáéchú minne a nóm rech?

9. Ifa ewe kapasen emmwen sia káé seni Lukas 10:2-4 usun áeáán ach fansoun?

⁹ Ach fansoun. A lamot watteen fansoun me angang weires fán iten afféún me peresin néúch kewe puk, kaútáán ekkewe leenien mwich, akkoten ekkewe mwichelap, álisi ekkewe mi feiengaw lón feiengaw watte me pwal ekkewe ekkóch angang. A chék wor 24 awa lón eú me eú rán, ina minne án Jesus ei kapasen emmwen a tongeni álisikich le áeáéchú ach fansoun. Lupwen a tinaló néún kewe chón káé pwe repwe afalafal, a ereniir ar resap ‘üla pwe repwe kapong me won al.’ (Luk. 10:2-4) Pwata Jesus a ngeniir ena sókkun éúréúr? Iei alon emén sou káé usun Paipel usun eérenien ekkewe chón Israel me ekkewe fénú únúkkún atun ra kapong ngeni aramas: “Rese chék ekis pwórótiw are eitiewu péúr usun met sia kan féri, nge ra kan turufengen fán fite, apwóraatiw inisiir, me pwal mwo nge chapeló le pwúl. A lamot watteen fansoun ika ra féri ekkeei esin kapong.” Sap minne Jesus a áiti ngeni néún kewe chón káé ar resap pwáraatá fáiro, nge a álisiir ar repwe weweiti pwe mi chék aúkúk ar fansoun me repwe alamota fán iten ekkewe mettóch mi kon lamot. (Ef. 5:16) Sia tongeni apwénúetá ei kapasen emmwen pwe epwe lapóló ach fansoun le álisatá angangen án Kot we Mwú?

10, 11. (a) Met ach we mwicheich a kan néúnéú ngeni ach we asor sia awora fán iten ewe angang wóón unusen fénúfan? (b) Ifa ewe kapasen emmwen lón 1 Korint 16:1, 2 a tongeni álisikich?

¹⁰ Néúch moni. A lamot watteen moni lón kálisitáán angangen án Kot we Mwú. Iteiten ier, ra néúnéú fite fite million chala fán iten túmúnún ekkewe chónemmwen mi wisen sáifetál, ekkewe special pioneer me misineri. Seni ewe ier 1999, lap seni 24,500 Leenien Mwich a fen kaútá lón ekkewe fénú mi osupwang. Iwe nge a chúen lamot an epwe pwal kaútá arapakkan 6,400 Leenien Mwich. Iteiten maram, órun 100 million Watchtower me Awake! ra peres. Meinisin ekkeei angang ra fis ren ewe monien álillis oua awora.

¹¹ Aposel Paulus a awora eú kapasen emmwen sia tongeni apwénúetá lupwen sia awora ach monien asor. (Álleani 1 Korint 16:1, 2.) Fán án Kot emmwen, Paulus a éúréúra pwiin kewe lón Korint ar resap witiwit tori lesópwólóón ewe wiik ika mi wor lusun néúr moni, nge repwe fen áimuoló chék me lepoputáán ewe wiik ewe úkúkún moni ra ekiekin eáni asor. Pwiich kewe lón ach ei fansoun ra usun chék ekkewe popun Chón Kraist, ra akkóta me mwan ar repwe fang fán kisáseú úkúkún met ra tufich ngeni. (Luk. 21:1-4; Föf. 4:32-35) Jiowa a aúcheani ar kisáseú le fangóló.

12, 13. Met a tongeni pinei án ekkóch repwe fangóló ar péchékkúl me tufich ngeni Jiowa, nge ifa usun I epwe álisiir?

¹² Ach péchékkúl me ach tufich. Jiowa a álisikich lón ach achocho le áeá ach péchékkúl me tufich le álisatá angangen ewe Mwú. A pwonei pwe epwe álisikich lupwen sia mélúlúló. (Ais. 40:29-31) Sia ekieki pwe pokiten kich mi lipwákingaw lón ena angang, iwe mi fen éch sipwe likiti ngeni pwiich kewe mi lipwákéch repwe fiti? Chechchemeni pwe Jiowa a tongeni elipwákéchúkich usun an a elipwákéchú Pesalel me Oholiap.​—Eks. 31:1-6; ppii ewe sasing lepoputáán ei lesen.

¹³ Jiowa a pesekich ach sisap mut ngeni och mettóch epwe eppetikich le fang ngeni I úkúkún ach tufich. (SalF. 3:27) Lón fansoun kaúsefálliin ewe imwenfel, Jiowa a ereni ekkewe chón Jus lón Jerusalem ar repwe ekieki met ra féri fán iten ewe angangen kaú. (Ak. 1:2-5) A fen rikiló ar ekiek me rese chúen akkomwa án  Jiowa angang lón manawer. Sipwe pwal ekieki ika minne sia kan alamota lón manawach a tipeeú ngeni met a pwal lamot ngeni Jiowa. Sia tongeni ekieki minne a fiffis lón manawach me ifa usun sia tongeni alapaaló ach álisatá angangen án Kot we Mwú lón ekkeei ránin lesópwólóón?

14, 15. (a) Ifa usun pwóróusen pwiich kewe mi wéúngaw a apéchékkúlakich? (b) Met itá sipwe mochen féri?

¹⁴ Chómmóng ra nónnóm lón ekkewe fénú mi osupwang me a weires nónnómun manawer. Ach we mwicheich a achocho le álisi pwiich kewe lón ekkena fénú. (2 Kor. 8:14) Iwe nge pwal mwo pwiich kewe mi osupwang ra aúcheani wiser le fang ngeni Kot. Jiowa a pwapwa lupwen ekkewe mi osupwang ra pwapwaiti ar fangóló seni letiper.​—2 Kor. 9:7.

¹⁵ Lón eú fénú mi fókkun osupwang lón Afrika, ekkóch pwiich kewe ra kinieló och leenien ar we atake me ewe moni ra angei seni ar améméló uwaan ena kinikin ra eáni asor fán iten kálisitáán angangen ewe Mwú. Lón pwal ena fénú, epwele kaútá eú Leenien Mwich pwiich kewe ra fókkun osupwangan. Pwiich kana lón ena leeni ra fókkun mochen álillis lón ena angang, nge ewe angangen kaú a sereni lukanapen ar we fansoun fótuki masouen ar atake. Pwiich kana ra chúen mochen álillis, iwe ra álillis lerán, nge lepwin ra atake. A ifa me échún ar pwapwaiti ar fangóló ngeni Kot! Ei mettóch a áchema ngenikich pwóróusen ekkewe popun Chón Kraist lón Masetonia. Ra “fokun wöüngau” nge ra tittingor pwe repwe pachelong lón ewe angangen álillis a fiffis lón ena atun. (2 Kor. 8:1-4) Amwo sipwe pwal ina usun me ‘fang usun ach tufich ükükün mine ewe Samol mi Lapalap ach we Kot a afeiöchü ngenikich.’​—Álleani Tuteronomi 16:17.

16. Ifa usun sipwe túmúnú pwe Jiowa epwe etiwa ach kewe asor?

¹⁶ Iwe nge, lupwen sia eáni asor mi wor met mi lamot sisap túmúnúngaw ngeni. Usun chék lón Israel lóóm, mi lamot sipwe túmúnú pwe Kot epwe etiwa ekkewe asor sia pwisin filatá le eáni. Mi lamot sipwe itepék me rúúepek me sipwe akkomw apwénúetá wisach ngeni ach famili me ach fel ngeni Jiowa. Ach fangóló ach fansoun me minne mi nóm rech fán iten ekkewe ekkóch itá esap efisi ach sipwe túmúnúngaw ngeni met ach famili a osupwangan lón pekin lúkú me aion. Ese tufich ach sipwe fang ngeni Jiowa ewe mettóch ese fen nóm rech. (Álleani 2 Korint 8:12.) Pwal och, mi lamot sipwe túmúnú pwisin ach riri ngeni Kot. (1 Kor. 9:26, 27, Kapasen God) Nge sipwe pwal lúkúlúk pwe lupwen sia manaweni ewe manaw mi tipeeú ngeni ewe Paipel, ach kewe asor ra tongeni atoto rech pwapwa wachemwuk, me Jiowa “epwe etiwa.”

17, 18. Met meefiom ren chókkewe ra pennúkúóló mettóch fán iten angangen ewe Mwú? Met mi lamot kich meinisin sipwe ekieki usun?

¹⁷ Chómmóng pwiich kewe ra unusen fangóló ar fansoun, péchékkúl me néúr moni fán iten kálisitáán angangen án Kot we Mwú. (Fil. 2:17, Testament Mi Fö) Sia fókkun aúcheani chókkewe ra kisáseú le fangóló. Sia pwal apúnga pwúlúwen me néún chókkewe mi wisen emmweni angangen ewe Mwú ren ar tipemecheres le pennúkúóló pwisin mocheniir.

¹⁸ A lamot angang weires ren ach sipwe álisatá angangen án Kot we Mwú. Amwo kich meinisin sipwe iótek me ekieki ifa usun sipwe álisatá ei angang ren úkúkún ach tufich. Ka tongeni lúkúlúk pwe iei epwe toruk chómmóng feiéch, me “lon ewe fansoun epwe feito” epwe fen chómmóngóló seni ena.​—Mark. 10:28-30.