1, 2. Met eli ekkewe aposel ra ekieki usun me mwen án Jesus we sáingoon sái ngeni Jerusalem?

 EKKEWE chón mas lón Jerusalem ra kúna án ewe maram a kerán ling. Iwe lupwen ewe Sanhedrin a silei, a esilesil pwe a poputá ewe mineféén maram, Nisan. Mwirin ra akúú ekkei pwe minen esilesil are ekkewe pwisin chón kúné ra esilefetálei ena pwóróus. Ekkewe aposel ra silei pwe ewe fansoun Pasofer a arapoto. Ese mwáál ra fen silei pwe Jesus a mochen feiló ngeni Jerusalem pwe epwe nóm ie me mwen ewe Pasofer.

² Lón ena fansoun, Jesus me néún kewe aposel ra nóm Perea (epekin Jortan) lón an we sáingoon sái ngeni Jerusalem. (Mat. 19:1; 20:17, 29; Mark. 10:1, 32, 46) Lón chék ewe atun ekkewe chón Jus ra silei ineet áeúin ránin ewe Nisan, iwe mwirin 13 rán epwe fis ewe Pasofer mwirin tuputiwen ewe akkar lón Nisan 14.

3. Pwata ekkewe Chón Kraist ra mochen silei ewe rán ewe Pasofer epwe fis lón?

³ Ránin ewe Fááfen Ach Samol, ewe a fis lón pwal chék ewe rán ewe Pasofer a fis lón, epwe fis mwirin tuputiwen ewe akkar lón April 14, 2014. Ina ewe rán mi kkóló aúchean fán iten ekkewe Chón Kraist mi enlet me chókkewe mi mochen silei ewe enlet. Pwata? Pokiten met sia álleani lón 1 Korint 11:23-25: “Lon ewe pwinin Jutas epwe afangamä ach Samol Jesus, Jesus a angei ewe pilawa, a iotekin kilisou ngeni Kot won, a utu o apasa, ‘Oupwe angei o äni, pun iei inisi üa fangala fänäsengesimi. Iei met oupwe föri pwe oupwe chechemeniei.’” Pwal ina chék usun met a fér ngeni ewe kap.

4. (a) Ikkefa ekkewe kapas eis ra tongeni ppiitá usun ewe ránin Áchechchem? (b) Iteiten ier, ifa usun sia kan silei ewe rán ewe Áchechchem epwe fis lón? (Ppii ewe pwóór itelapan “Ránin Áchechchem 2014.”)

⁴ Ese mwáál kopwe fiti ewe ránin áchechchem, ewe chék rán Jesus a ereni néún kewe chón káé ar repwe féri iteiten ier. Nge kopwe pwisin eisinuk: ‘Itá epwe ifa usun upwe ammólnatá fán iten ena pwinin? Ikkefa  ekkewe minen lios repwe áeá? Epwe ifa usun kókkótun ena mwich? Nge met weween ngeniei ena rán me ekkewe minen lios repwe áeá?’

5. Met Jesus a ereni néún kewe aposel ar repwe ammólnatá fán iten ewe sáingoon Pasofer?

⁵ Lupwen Jesus a ereni néún kewe aposel ar repwe ammólnatá ewe ruumw fán iten ewe mwéngéén Pasofer, ese ereniir ar repwe kon elinga, nge a chék mochen pwe epwe éch, limeliméch me repwe kuchuéch lón me néún kewe aposel. (Álleani Markus 14:12-16.) Repwe pwal ammólnatá ekkewe mettóch mi lamot fán iten ewe mwéngé, kapachelong ewe pilawa ese wor iis lón me ewe wain mi par. Mwirin ar féri ewe Pasofer, Jesus a fós usun ewe wain me ewe pilawa, ekkewe ruu minen lios epwe áeá lón ewe Áchechchem.

6. (a) Mwirin ewe mwéngéén Pasofer, met Jesus a apasa usun ewe pilawa? (b) Met sókkun pilawa sia kan áeá atun ewe ránin Áchechchem?

⁶ Ewe aposel Mateus a nóm lón ena atun, nge iei met a makkeei mwirin: “Jesus a angei ewe pilawa, a iotekin kilisou won, iwe, a kinikisietiu. A ineti ngeni nöün kewe chon kaiö o apasa, ‘Oupwe angei o mongö.’” (Mat. 26:26) Ese wor iis lón ewe “pilawa,” usun chék met ra kan áeá fán iten ewe Pasofer. (Eks. 12:8; Tut. 16:3) Ewe pilawa a ffér seni pilawa ámás mi kúng me konik, ese wor iis lón are pwal och álelleen mwéngé áwewe chék ren salt. Pokiten ese wor iis lón ewe pilawa, iwe ese pwotá. Ina popun a pwas usun chék cracker, a mecheres ach sipwe kupi. Lón ei fansoun, me mwen ewe Áchechchem, ekkewe chónemmwen lón ewe mwichefel ra tongeni tingorei emén an epwe wisen féri ena esin pilawa mi ffér seni pilawa ámás mi kúng me konik, me kuk lón pan mi wor ekis kiris lón. (Ika ese wor ewe pilawa ámás mi kúng, ewe mi ffér seni wiit, ra pwal tongeni áeá ewe pilawa mi ámás mi ffér seni rice, parli, corn are pwal ekkóch.)

7. Met sókkun wain Jesus a fós usun, me met sókkun wain sia tongeni áeá atun ewe Áchechchem?

⁷ Mateus a pwal apasa: “[Jesus] a angei eu kap, a iotekin kilisou won, iwe, a ngeniir o apasa, ‘Ämi meinisin oupwe ün seni.’” (Mat. 26:27, 28) Masouen án Jesus na kap, ina ewe wain mi par. (Esap tongeni an epwe juice seni kreip, pún a fen wes me ineet ewe rásin kreip.)  Ewe wain ese kapachelong lón ewe áeúin Pasofer a fis lón Isip, nge Jesus ese pwal apasa pwe mi mwáál ar repwe ún wain lón ewe Pasofer. A pwal mwo nge áeá och wain atun ewe Fááfen ach Samol. Ina minne, ekkewe Chón Kraist ikenái ra áeá wain atun ewe Áchechchem. A fen unus aúchean chchaan Jesus we, ese lamot och mettóch epwe pwal kapachelong lón. Iwe, ewe wain sia áeá atun ewe Áchechchem esap pwal wor nofitin, áwewe chék ren brandy are och álelleen mwéngé. Mi lamot sipwe áeá ewe chék wain mi par, ewe sia pwisin féri are ewe minen lón sitowa, ren choweán Cabernet, Burgundy, are Chianti.

8. Pwata ekkewe Chón Kraist ra mochen silei met weween ewe pilawa me ewe wain?

⁸ Ewe aposel Paulus a pwáraatá pwe me lúkún ekkewe aposel, ekkewe Chón Kraist repwe pwal féri ewe Fááfen Ach Samol. A makkeei ngeni chienan kewe chón lúkú lón Korint: “Üa angei seni ach Samol ekewe kapas üa aiti ngenikemi, pwe . . . Jesus a angei ewe pilawa, a iotekin kilisou ngeni Kot won, a utu o apasa, ‘Oupwe angei o äni, pun iei inisi üa fangala fänäsengesimi. Iei met oupwe föri pwe oupwe chechemeniei.’” (1 Kor. 11:23, 24) Ina minne, tori ikenái ekkewe Chón Kraist ra féri ei rán mi kkóló aúchean iteiten ier me ra fókkun mochen silei met weween ewe pilawa me ewe wain.

9. Ifa ewe ekiek mwáál ekkóch ra eáni usun ewe pilawa Jesus a áeá?

⁹ Ekkóch aramas mi fiti lamalam ra apasa pwe Jesus a fós usun wesewesen pwisin inisin we pún a erá: “Iei inisi.” Ina popun ra lúkú pwe ren och manaman, ewe pilawa a wesewesen wililó ngeni futuken Jesus lón ena atun. Nge esap ina met a fis. * Jesus me ewe pilawa ese wor iis lón ra nóm mwen mesen ekkewe aposel. A ffat pwe Jesus a chék eáni áwewe  pwe ewe pilawa a wewe ngeni inisin. Fán chómmóng a kan áeá ekkena esin kapas áwewe atun a asukula aramas.​—Joh. 2:19-21; 4:13, 14; 10:7; 15:1.

10. Ewe pilawa lón ewe Fááfen ach Samol a liosuetá met?

¹⁰ Ewe pilawa mi nóm mwen mesen ekkewe aposel me repwele áni, a wewe ngeni inisin Jesus we. Menni inis? A wor eú fansoun néún Kot kewe chón angang ra meefi pwe pokiten Jesus a kupikisietiw ewe pilawa nge esap mwo nge kup efóch chúún Jesus lupwen a máló, iwe ra ekieki pwe ewe pilawa a wewe ngeni “ewe inisin Kraist,” ewe mwichefelin chón kepit. (Ef. 4:12; Rom 12:4, 5; 1 Kor. 10:16, 17; 12:27) Iwe nge, mwirin ar ra káéfichi ewe Paipel, iwe ra mirititi pwe ewe pilawa a wewe ngeni inisin Jesus we inisin fituk ewe Kot a ngeni. Jesus a “riäföü lon inisin,” me a pwal mwo nge máló wóón ewe iráán ninni. Ina minne, lón ewe Fááfen ach Samol, ewe pilawa a wewe ngeni inisin Jesus we inisin fituk, ewe a “uwei ach kewe tipis.”​—1 Pet. 2:21-24; 4:1; Joh. 19:33-36; Ipru 10:5-7.

11, 12. (a) Met Jesus a apasa usun ewe wain? (b) Met ewe wain lón ewe Fááfen ach Samol a liosuetá?

¹¹ Ena mettóch a álisikich le weweiti met Jesus a apasa mwirin usun ewe wain. Sia álleani: “Pwal ina chök usun mürin ar mongö, a angei ewe kap o apasa, ‘Ei kap iei än Kot we pwon mi fö lon chai.’” (1 Kor. 11:25) Jesus a itá apasa pwe wesewesen ewe kap ina ewe pwon mi fé? Aapw. Jesus a fós usun minne a nóm lón ewe kap, ina ewe wain. Me ren Jesus, met ewe wain a wewe ngeni? Chchaan we a fen niniló.

¹² Lón ewe puken Markus sia álleani alon Jesus keei: “Iei chai mi ninnila fänäsengesin chomong aramas, ei cha a anükünükü än Kot pwon ngenikich.” (Mark. 14:24) Ewer, chchaan Jesus we epwe “nninnila fänäsengesin chomong aramas, pwe amusamusen ar tipis kana.” (Mat. 26:28) Ina minne ewe wain mi par a wewe ngeni wesewesen chchaan Jesus we. Ren chchaan na, sia tongeni kúna ngaseló ren ewe méén kepich, “pwe ach kewe tipis ra musala.”​—Álleani Efisos 1:7.

13. Met a kan fis atun Áchechchemenien án Jesus Kraist we máló mi fis iteiten ier?

¹³ Ika kopwe kerán fiti ewe Áchechchem ren Chón Pwáraatá Jiowa, met kopwe kúna? Ewe mwich epwe fis lón eú leeni mi múrinné me limeliméch, ikewe meinisin chón fiti repwe kinamwe me pwapwaiti ewe Fááf. Eli epwe wor och minen eling lón, nge esap kon tokorárá, me esap usun leenien eú pari. Emén chónemmwen mi lipwákéch epwe eáni eú afalafal mi fataffatéch usun met Paipel a apasa usun ewe Fááfen ach Samol lón ewe napanap mi asúfél. Epwe álisi meinisin pwe repwe aúcheani met Jesus a féri fán itach. A fangóló manawan usun eú méén kepich pwe sipwe tongeni kúna manaw.​—Álleani Rom 5:8-10.

14. Ikkefa ekkewe ruu ápilúkúlúk ewe afalafal atun ewe Áchechchem epwe pwóróus usun?

¹⁴ Ewe chón afalafal epwe pwal áweweei ekkewe ruu ápilúkúlúk mi mak lón ewe Paipel. Ekkóch Chón Kraist ra ápilúkúlúkún eti Kraist le nemenem lón láng. Nge chókúkkún chék ra eáni ei ápilúkúlúk, áwewe chék ren ekkewe aposel. (Luk. 12:32; 22:19, 20; Pwär. 14:1) Lap ngeni Chón Kraist mi tuppwél le akkangang ngeni Kot ikenái ra eáni ewe pwal eú ápilúkúlúk. Ina ewe ápilúkúlúkún kúna manaw esemuch lón eú paratis wóón fénúfan. Iwe, letipen Kot epwe pwénútá wóón fénúfan usun chék lón láng, ewe mettóch ekkewe Chón Kraist ra ikkiótek usun ren fansoun langattam. (Mat. 6:10) Ewe Paipel a fen áweweei ngenikich usun amwararen ewe sókkun manaw sipwe tongeni pwapwaiti feilfeiló.​—Ais. 11:6-9; 35:5, 6; 65:21-23.

15, 16. Atun ewe Áchechchem, met ra féri ngeni ewe pilawa?

¹⁵ Mwirin an a áweweei ekkewe ruu ápilúkúlúk, ewe chón afalafal epwe apasa pwe a tori ewe fansoun sipwe féri minne Jesus a éúréúra  ngeni ekkewe aposel ar repwe féri. Usun met a fen mak asan, epwe wor ewe pilawa ese wor iis lón me ewe wain mi par. Ekkeei mettóch repwe nóm wóón eú cheepel mi kan ngeni ewe chón afalafal. Epwe fós usun met Jesus a apasa me féri lupwen a poputááni ei áchechchem. Áwewe chék, lón puken Mateus a apasa: “Jesus a angei ewe pilawa, a iotekin kilisou won, iwe, a kinikisietiu. A ineti ngeni nöün kewe chon kaiö o apasa, ‘Oupwe angei o mongö, iei inisi.’” (Mat. 26:26) Jesus a kinikisietiw ewe pilawa ese wor iis lón pwe a tongeni pásini ngeni néún kewe aposel mi mómmót lepekin me rúúepek. Lón April 14 kopwe kúna ekkóch pilawa ese wor iis lón mi fen kinikinitiw me ra nóm lón ekkewe sepi.

¹⁶ Emén pwiich epwe eáni eú iótek mi chék mwoch me mwen epwe pás ekkewe sepi. Epwe naféch ekkewe sepi pwe repwe tongeni pásini ngeni meinisin chón fiti fán kókkótéch me esap kon mmang. Epwe fis ei lón och napanap mi fich ngeni ewe leeni, nge esap lón och sókkun mwékútúkút mi kon ssenúk. Mi chék wor ákkáemén are ese fen wor epwe mwéngé ewe pilawa, usun chék met a fis lón lap ngeni ekkewe mwichefel lón ewe ier 2013 atun ewe Áchechchem.

17. Atun ewe Áchechchem, ifa usun repwe féri minne Jesus a eáni éúréúr usun ewe wain?

¹⁷ Iwe mwirin, ewe chón afalafal epwe fós usun met Mateus a áweweei, a erá: “[Jesus] a angei eu kap, a iotekin kilisou won, iwe, a ngeniir o apasa, ‘Ämi meinisin oupwe ün seni. Pun iei chai a allükülükü än Kot we pwon mi fö ngenikemi, a nninnila fänäsengesin chomong aramas, pwe amusamusen ar tipis kana.’” (Mat. 26:27, 28) Iwe me ren án Jesus na éúréúr, epwe pwal wor eú iótek, mwirin repwe pásini ekkewe ‘kapen’ wain ngeni meinisin chón fiti.

18. Pwata a chúen lamot ach sipwe fiti ewe Áchechchem inaamwo ika ákkáemén chék are ese fen wor epwe áni ewe pilawa me únúmi ewe wain?

¹⁸ Lap ngeni chón fiti ewe Áchechchem ra pwáraatá súfél ren ar rese áni ewe pilawa are únúmi ewe wain pokiten Jesus a erá pwe chókkewe chék repwe eti i le nemenem lón an we Mwú lón láng, iir chék repwe mwéngé me ún. (Álleani Lukas 22:28-30; 2 Tim. 4:18) Ina minne lap ngeni ekkewe chón fiti repwe chék katol mwékútúkútún fán súfél. Nge a chúen lamot ach fiti ewe Fááfen Ach Samol pún a pwáraatá ach aúcheani án Jesus we asor. Atun ewe Áchechchem, ekkewe chón fiti ra tongeni ekieki ekkewe feiéch repwe tongeni kúna pokiten án Jesus awora ewe asorun méén kepich. Ra tongeni chóni ewe “mwich mi fokun chocho” ekkewe repwe manawewu seni ewe “riaföü mi lapalap.” Iir ekkewe chón fel ngeni Kot ra “limeti üfer o apwecher lon chaan ewe Lam.”​—Pwär. 7:9, 14-17.

19. Met ka tongeni féri pwe kopwe ammólnatá me kúna feiéch seni ewe Fááfen Ach Samol?

¹⁹ Chón Pwáraatá Jiowa wóón unusen fénúfan ra ammólnatá fán iten ei rán mi kkóló aúchean. Fite wiik me mwen ena rán, sipwe fiti ewe angangen etiwa aramas ar repwe fiti. Pwal och, lón ekkewe rán mwen ewe Áchechchem, lap ngeni kich meinisin sipwe álleani ekkewe pwóróus lón Paipel ren met Jesus a féri me met a fis lón ekkewe rán me mwen ewe Fááfen ach Samol lón ewe ier 33. Sipwe féri ach kókkót pwe sipwe tongeni fiti ena rán. Mi éch ika sipwe warekkái me mwen ewe kélún me iótekin lepoputáán pwe sipwe tongeni etiwa ekkewe chón fiti me pwapwaiti unusen ewe prokram. Kich meinisin chón ewe mwichefel me ekkewe waséla ousipwe feiéch ika sia aúseling me suuki néúch Paipel atun ewe chón afalafal a álleani me áweweei ekkewe wokisin. Nge ewe a lamot seni meinisin, ach fiti ewe Áchechchem epwe pwáraatá ach enletin aúcheani án Jesus asor me pwáraatá ach álleasochisi an ei allúk: “Iei met oupwe föri pwe oupwe chechemeniei.”​—1 Kor. 11:24.