1, 2. Pwata a terú féfférún otuputup lón ach ei fansoun? Ifa usun a chéúfetál? (Ppii ewe sasing lepoputáán ei lesen.)

 EKKEWE sókkópaten minen otuputup me pwóróus mi chofona ra chéúfetál wóón ei fénúfan. Itá sisap máirú ren pún ewe Paipel a affata pwe Satan ewe Tefil, i a fókkun tipachem solá, me a nemeni unusen ei fénúfan. (1 Tim. 2:14; 1 Joh. 5:19) Lón ach sia arap ngeni sópwólóón ei ótót mi ngaw, a lallapóló án Satan ningeringer pokiten a silei pwe “a mochomoch chök an fansoun.” (Pwär. 12:12) Ina minne sipwe kúna pwe epwe lallapóló án ekkewe aramas mi nóm fán etipetipaen ewe Tefil angangen otuputup, ákkáeúin ngeni chókkewe ra achéúfetálei ewe fel mi enlet.

² Fán ekkóch a katowu lón simpung me reitio pwóróus mi otuputup me chofona usun néún Jiowa kewe aramas me minne ra lúkú. A wor ekkewe pwóróus lón simpung, prokram lón TV me lón Internet mi achéúfetálei pwóróus mi mwaken. Ina minne, ekkóch aramas ra osukosuk me mwittir lúkúoló ekkena pwóróus mi chofona.

3. Met a tongeni álisikich le akkufu ekkewe minen otuputup?

³ Ren ach sipwe akkufu ekkewe minen otuputup seni chón koputach mi tongeni apwangapwangaaló ach lúkú, sia kilisou pwe a nóm rech án Kot we Kapas, ewe a aúchea fán iten an epwe ‘apwüngü’ mettóch. (2 Tim. 3:16) A alólilen ach silei seni néún aposel Paulus kewe taropwe pwe ekkóch Chón Kraist lón Tesalonika lón an we fansoun ra fen tupuló me ra etiwa ekkewe pwóróus mi chofona. Paulus a éúréúrer ar resap ‘müttir rukola lon ar ekiek.’ (2 Tes. 2:1, 2) Ikkefa ekkewe lesen sia tongeni káé seni án Paulus kapasen éúréúr mi tong, me ifa usun sipwe apwénúetá lón manawach?

4. Ifa usun ekkewe Chón Kraist lón Tesalonika ra angei éúréúr usun warotoon ránin Jiowa we, me ifa usun sia angei éúréúr ikenái?

⁴ Lón néún Paulus we áechéén taropwe ngeni ewe mwichefelin Tesalonika, a menlapei usun warotoon ránin Jiowa we. A mochen pwe pwiin kewe repwe mmólnetá me resap nóm lón kiroch. Nge a peseer ar repwe “aramas mi nom lon saram” me repwe “nenela o mamasafichi.” (Álleani 1 Tesalonika 5:1-6.) Lón ei fansoun, sia witiwiti katalóón Papilon mi Lapalap, ewe mwicheichen lamalam chofona wóón unusen fénúfan. Epwe ina poputáán ránin Jiowa we mi lap. Sia kilisou pún a lapóló ach weweiti ifa usun Jiowa a akkapwénúetá minne a tipeni. Sia pwal akkangei seni ewe mwichefel ekkewe minen áchechchem mi lamot ren ach sipwe nenneló lón ach lúkú. Ach ekkekieki ekkewe kapasen éúréúr mi kakkatowu iteitan a tongeni apposa letipach ach sipwe angang ngeni Kot ‘ren unusen ekiekich.’—Mat. 22:37.

5, 6. (a) Met Paulus a menlapei lón néún we arúúachéén taropwe ngeni chón Tesalonika? (b) Ekiseló chék met Jesus epwe féri, iwe met mi lamot sipwe pwisin eisinikich?

⁵ Ekiseló mwirin án Paulus tinaló néún we áechéén taropwe ngeni chón Tesalonika, a pwal tinaló ewe arúúachéén. Lón ena taropwe a menlapei warotoon ewe fansoun riáfféú lupwen ewe Samol Jesus epwe apwúngú “chokewe mi pöütala Kot, resap pwal aleasochis ngeni ewe Pworausen Manau.” (2 Tes. 1:6-8) Lón sópwun ruu lón néún we taropwe a pwáraatá pwe ekkóch chón ena mwichefel ra “osukosuk” usun ránin Jiowa we pwe ra fen lúkú pwe ena rán epwele fis lón ar we fansoun. (Álleani 2 Tesalonika 2:1, 2.) Ese unus án ekkena popun Chón Kraist weweiti ifa usun Jiowa a akkapwénúetá minne a tipeni. Ewe aposel Paulus a pwal mwo nge pwáraatá pwúngún ena, atun a kapas usun oesini, a erá: “Pun ach silelap me ach kapasen osuni resap unus, nge lupwen epwe war met mi unus, mürin met esap unus epwe müchüla.” (1 Kor. 13:9, 10) Nge ekkewe kapasen éúréúr Paulus, Petrus me pwal ekkewe ekkóch mi kepit ra makkeei fán emmwenien Kot ra atufichi ekkena Chón Kraist ar repwe akkamwéchú ar tuppwél.

⁶ Ren án Paulus epwe áwena minne ra ekieki, fán emmwenien Kot a áweweei lón néún we taropwe pwe epwe fis watteen angangen chón rikiló me “ewe Aramas mi Tipis” epwe akkomw pwá me mwen epwe war ránin Jiowa  we. * Iwe, lón ewe fansoun mi filitá me ren Kot, ach Samol Jesus “epwe niela” meinisin chókkewe ra fen tupuló. Ena aposel a erá pwe ra kúna ena kapwúng pokiten rese “fakkun mochen etiwa o aücheani ewe kapas mi let.” (2 Tes. 2:3, 8-10) Iwe, a éch sipwe pwisin etittinakich me eis: ‘Ifa úkúkún ai aúcheani ewe enlet? Ua kan túmúnú pwe upwe kákkáé me silei ekkewe mineféén áwewe mi katowu lón néúch kewe puk mi lóngólóng wóón Paipel mi kawor fán iten néún Kot kewe aramas wóón unusen fénúfan?’

7, 8. (a) Ikkefa ekkewe minen efeiengaw ekkewe popun Chón Kraist repwe túmúnúúr seni? (b) Met a kon efeiengaw ngeni Chón Kraist mi enlet lón ei fansoun?

⁷ Pwúngún pwe ekkewe Chón Kraist repwe kúna feiengaw esap chék seni ekkewe chón rikiló me minne ra afalafala. Paulus a mak ngeni Timoty pwe “mochenian moni iei popun sokopaten ngau meinisin.” A pwal apasa pwe pokiten ekkóch ra “ekieki ar repwe pisekisek ra mwalech seni ar lükülük o ra püsin aworato wor chomong riaföü mi fokun aweires.” (1 Tim. 6:10) Pwal och, fansoun meinisin sia pwal kúkkúna sóssótun ach sipwe féri “ekewe angangen fituk” mi tongeni efeiengawa ach lúkú.​—Kal. 5:19-21.

⁸ Iwe nge, ka tongeni weweiti pwata Paulus a fókkun éúréúra ekkewe chón Tesalonika usun watteen efeiengawen ekkena esin aramas, a pwal eita ngeniir “soukünö mi chofona.” Ekkóch leir ra “eäni kapas chofona ar repwe atokala ekewe chon lükü Jesus pwe repwe etiir.” (2 Kor. 11:4, 13; Föf. 20:30) Jesus a apúnga ewe mwichefelin Efisos ren ar rese “etiwa ekewe aramasangau.” Iir ra “sotuni” ekkena aramas mi erá pwe iir aposel, nge ra kúna pwe esap iir aposel nge fen iir chón chofona. (Pwär. 2:2) Lón néún Paulus we arúúachéén taropwe ngeni chón Tesalonika, iei an éúréúr ngeniir: “Sipwe fonoukemi, pwii kena, fan iten ach Samol Jises Kraist, pwe oupwe pwisin aimu seni iteiten pwimi Soulang mi chok fefetal-mwal lon manauan.” Mwirin a tichiki le fós usun ekkewe Chón Kraist resap “mochen angang.” (2 Tes. 3:6, 10, Testament Mi Fö) Iwe ika ena wokisin a erá pwe a lamot ar repwe áimuroló seni chókkewe rese mochen angang, epwele fen ifan me watteen lamoten ar repwe áimuroló seni chókkewe ra poputá le tokoló seni ewe enlet! Ewer, ar chiechiéch ngeni ekkena esin aramas lón ena fansoun a fókkun efeiengaw ngeniir me a lamot repwe túmúnúúr seni. Ena éúréúr a pwal lamot ngenikich lón ei fansoun.​—SalF. 13:20.

9. Pwata a lamot sipwe túmúnúkich seni emén mi poputá le esiita ewe mwicheich are apasa pwisin an ekiek usun och mettóch?

⁹ Ekiseló chék epwele fis ewe riáfféú mi lapalap me sópwólóón ei ótót mi ngaw, ina popun ekkewe kapasen éúréúr mi katowu lón fansoun ekkewe aposel a fen kon lamot ngenikich ikenái. Sise fókkun mochen ‘alomotongaua’ án Jiowa chen me an epwe péút senikich ewe liffang manaw esemuch, lón láng are fénúfan. (2 Kor. 6:1) A lamot sipwe fókkun túmúnú ika mei wor emén chón fiffiti ach kewe mwich nge epwe sótun pesekich ach sipwe pwóróusfengen wóón ekkewe mettóch ese fen affatetiw lón Paipel are fen esiita ewe mwicheich.​—2 Tes. 3:13-15.

10. Menni kapas Paulus a pesei ekkewe Chón Kraist lón Tesalonika ar repwe amwéchúnnúkú?

¹⁰ Paulus a pesei pwiin kewe Chón Kraist  lón Tesalonika ar repwe “üppos” me kamwéchúnnúk wóón minne ra káé. (Álleani 2 Tesalonika 2:15.) Ikkefa ekkena “kapas” Paulus a fós usun? Ikkena áitien Jesus kewe me met i me ekkewe ekkóch ra fen makkeei fán án Kot emmwen. Nge ese fósun ekkewe afalafal lamalam chofona ra asukula. Paulus a apúnga pwiin kewe lón ewe mwichefelin Korint, a erá: “Oua chechemeniei fansoun meinisin, oua pwal aleasochisi ekewe afalafal üa ngenikemi.” (1 Kor. 11:2) Pokiten ekkena afalafal ra wesewesen feito seni Jiowa me Néún we, iwe ra tongeni lúkúlúk woor.

11. Áweweei ifa usun ekkóch ra fen tupuló.

¹¹ Lupwen Paulus a mak ngeni ekkewe chón Ipru, a áiti ngeniir ruu alen an epwe tongeni péút seni emén Chón Kraist an lúkú me esap chúen ú péchékkúl lón ewe enlet. (Álleani Ipru 2:1, TF; 3:12.) A fós usun án emén “pase seni,” me án emén “tokola.” Án emén pase seni Jiowa, a usun efóch mwoota a pase seni ewe oroor nge sise fen tepereni. Nge ló, ló, ló, a towauoló seni ewe oroor. Nge án emén “tokola” a usun án emén mwán pwisin tiinaaló waan mwoota seni ewe oroor pwe epwe towauoló. Iir me ruu ekkeei kapas áwewe ra áitingenikich met a tongeni fis ika emén a tupuló me apwangapwangoló lón an lúkúlúk wóón ewe enlet.

12. Met a tongeni efeiengawa ach ririéch ngeni Kot?

¹² Neman ina met a fis ngeni ekkóch chón Tesalonika. Nge ifa usun kich ikenái? A chómmóng mettóch ra tongeni asolapaaló ach fansoun. Ekieki úkúkún ewe awa aramas ra áeá le tétá wóón Internet me pwóróus ngeni aramas, álleani me pélúweni e-mail, me féri ekkewe minen apwapwa are kakkatol ekkewe urumwot. Eú me lein ekkena mettóch a tongeni aosukosuka emén Chón Kraist me akúkkúnaló an tinikken. Iwe met mwirilóón? A tongeni kúkkúnúló an fansoun le káé án Kot we Kapas, an fiffiti mwich me afalafala ewe kapas allim me an ikkiótek seni letipan. Met sia tongeni féri pwe sipwe túmúnú ach sisap mwittir rukoló lón ach ekiek?

13. Usun met Paipel a fen oesini, epwe ifa ekiekin chómmóng aramas usun ei fansoun, iwe, met a tongeni túmúnú ach lúkú pwe esap apwangapwangoló?

¹³ A fókkun lamot ach sipwe chechchemeni pwe sópwólóón án Satan ei ótót a arapoto me a mmen efeiengaw ach sipwe chiechi ngeni chókkewe rese lúkú pwe kich sia nóm lón ekkewe “ränin lesopolan.” Iei met ewe aposel Petrus a makkeei usun ei fansoun: “Ekoch aramas repwe pwä, manauer a nonom fän nemenien püsin ar mocheniangau. Repwe takirikemi o apasa, ‘A pwon pwe epwe liwinsefälito. Iwe, met, ia a nom ie? Semelapach kewe ra fen mäla, nge ekewe mettoch meinisin ra ususur we chök seni ewe fansoun Kot a föri fanüfan.’” (2 Pet. 3:3, 4) Ach ákkálleani Paipel iteiten rán me kákkáé án Kot we Kapas iteitan, epwe ákkáchema ngenikich pwe sia nónnóm lón ekkewe “ränin lesopolan.” Ewe angangen rikiló Paipel a fen oesini usun a fen poputá seni lóóm me a chúen fiffis lón ei fansoun. “Ewe Aramas mi Tipis” a chúen nóm me a chúen ú ngeni néún Kot kewe chón angang. Ina minne, a lamot sipwe mammasafichi usun warotoon ránin Jiowa we a chék arapoto.​—Sef. 1:7.

14. Ifa usun ach akkachocho lón ach angang ngeni Kot epwe eú minen túmún ngenikich?

¹⁴ Pwal eú mettóch a álisikich pwe sisap mwittir rukoló, ina ach fiffiti ewe angangen afalafala ewe kapas allim usun ewe Mwú. Ina minne, lupwen Kraist Jesus a allúk ngeni néún kewe chón káé ar repwe álisi aramas seni sókkópaten fénú pwe repwe tapweló mwirin me asukuler le apwénúetá áitian kewe, a eú minen túmún ngeni néún kewe chón káé. (Mat. 28:19, 20) Ren ach sipwe apwénúetá an na éúréúr a lamot sipwe tinikken lón ewe angangen afalafal. Ka ekieki pwe ekkewe Chón Kraist  lón Tesalonika ra tongeni asopwisek le féri ewe angangen afalafal pokiten chék ina wiser? Chechchemeni alon Paulus ei ngeniir, a erá: “Ousap kunuela ewe Ngünmifel, ousap turunufasei ekewe kapasen osuni.” (1 Tes. 5:19, 20) A ifa me ámmeseiken ekkewe oesini sia káé usun me afalafala ngeni aramas!

15. Met sia tongeni pwóróusfengen wóón atun ach famili fel mi tongeni álisikich?

¹⁵ Pwúngún pwe sia mochen álisi ach kewe famili ar repwe lipwákéchúló lón ewe angangen afalafal. Chómmóng pwiich kewe ra kúna pwe a mmen álilliséch ngeniir ika ra áeá och fansoun lón ar famili fel le pwóróus usun ar angangen afalafal. Eli epwe pwal álilliséch ngeni óm famili ika oupwe pwóróus wóón ifa usun oupwe álisi ekkewe aramas oua fen chuuriir. Met oupwe pwóróusfengen wóón lupwen oua chuuriirsefál? Met sókkun pwóróus repwe pwapwaiti? Ineet atun epwe éch oupwe chuuriirsefál? Chómmóng ra pwal awora och fansoun atun ar famili fel le pwóróusfengen usun met repwe káé lón ekkewe mwich. Ka pwal tongeni achocho le ammólnatáéchú fán iten ekkewe mwich pwe kopwe uwawu meefiom? Óm uwawu meefiom epwe apéchékkúla óm lúkú me álisuk pwe kosap mwittir rukoló lón óm ekiek. (Kölf. 35:18) Ewer, ewe kókkótun famili fel a tongeni túmúnúkich seni tipemwaramwar me ach sisap ekiekietá mettóch ese fen affatetiw lón Paipel.

16. Met a álisi ekkewe Chón Kraist mi kepit pwe resap rukoló lón ar ekiek?

¹⁶ Ika sia ekilonei ifa usun Jiowa a kan efeiéchú néún kewe aramas ren lapólóón ar weweiti ekkewe oesini lón Paipel, sia tongeni lúkúlúkú watteen amwararen ewe feiéch mi nóm mwach. Ekkewe mi kepit ra ápilúkúlúkú pwe repwe eti Kraist lón láng. Ena ápilúkúlúk a álisiir ar resap rukoló lón ar ekiek! Alon Paulus we ngeni chón Tesalonika a fókkun weneitiir, a erá: “Äm aipwe fokun kilisou ngeni Kot fansoun meinisin fänäsengesimi pwiim kana mi chen me ren ach Samol. . . . Kot a afilikemi pwe oupwe küna manau ren än Ngünmifel apinikemi, pwal ren ämi lükü ewe kapas mi let.”​—2 Tes. 2:13.

17. Ifa usun 2 Tesalonika 3:1-5 a apéchékkúlok?

¹⁷ Chókkewe ra ápilúkúlúkún kúna manaw esemuch wóón fénúfan repwe pwal achocho le túmúnúúr pwe resap mwittir rukoló lón ar ekiek. Ika ka eáni ena ápilúkúlúk, kopwe lefareni án aposel Paulus we pesepes ngeni chienan kewe mi kepit lón Tesalonika. (Álleani 2 Tesalonika 3:1-5.) Itá emén me emén leich epwe aúcheani ekkena kapas. Ewer, néún Paulus kewe taropwe ngeni chón Tesalonika ra éúréúrakich ach sisap ekiekietá mettóch ese fen affatetiw lón Paipel, are lúkúoló ekkewe pwóróus ese wor lóngólóngun. Pokiten sia nónnóm lesopwuchikin ekkeei ránin lesópwólóón, sia fókkun kilisou ren ekkeei kapasen éúréúr.