Án Paipel Kewe Kapas Eis Ra Pélú
Ifa ewe popun án Kraist liwinsefál?
Me mwen án Jesus Kraist feitá láng lón 33 C.E., a pwonei pwe epwe liwinsefál. A aléllééi pwisin i ngeni emén mwán mi uputekia mi feiló ekis ren langattam fansoun nge epwe liwin fán manamanan le nemenem usun emén King. Ewe popun án Jesus liwinsefál, pwe epwe awora ngeni aramas eú mwú mi múrinné.—Álleani Lukas 19:11, 12.
Jesus epwe wato eú mwú mi múrinné fán iten aramas
Kraist epwe liwinsefál lón met sókkun inis? A manawsefál lón eú inis sise tongeni kúna. (1 Petrus 3:18) Mwirin, a feitá láng me mómmót lepeliefichin Kot. (Kölfel 110:1) Mwirin fitu fansoun, ra emmwenaato Jesus ren Jiowa Kot, “ewe mi nom seni me lomlom,” ewe mi ngeni Jesus manamanen nemenem wóón chón fénúfan. Ina minne, án Jesus liwinsefál, esap inisini inisin aramas, nge epwe liwinsefál usun emén King sise tongeni kúna.—Álleani Taniel 7:13, 14.
Met Jesus epwe féri atun epwe war?
Jesus epwe war fengen me néún kewe chónláng pwe epwe apwúngú chón fénúfan. Nge sisap tongeni kúna lón an liwinsefál. Epwe nieló aramas mi ngaw nge epwe liffang manaw esemuch ngeni chókkewe mi etiwa i usun emén King.—Álleani Mateus 25:31-33, 46.
Án Jesus nemenem usun emén King epwe ewili fénúfan ngeni eú paratis. Epwe amanawatá ekkewe mi máló pwe repwe pwapwaiti manawer lón ena Paratis wóón fénúfan.—Álleani Kölfel 37:29; Johannes 11:25.
