Kopwe itá ekieki pwe án Kot Kapas epwe kkóló seni meinisin, nge fen ina ewe Paipel. Billion kapiin a fen peres lón fite púkú fós. Ewe tipachem lón Paipel a wor manamanan le siwili napanapen aramas pwe epwe múrinné.​—Álleani 1 Tesalonika 2:13; 2 Timoty 3:16.

Sia silei pwe ewe Paipel a pop seni Kot pokiten a ffat me tichik an oesini usun mwachkkan. Ese wor emén aramas a tongeni féri ena wóón pwisin an. Áwewe chék, ekieki ewe puken Aisea. Eú kapi a ffér lap seni ipúkú ier me mwen án Jesus uputiw, ra kúna me lón eú pwang arap ngeni ewe Setin Máló. Ena kapi a apasa pwe ewe telinimw Papilon epwe péénnúló. A pwénúetá ena, chómmóng ier mwirin án Jesus angangen afalafal wóón fénúfan.​—Álleani Aisea 13:19, 20; 2 Petrus 1:20, 21.

Úkúkún ttamen an a mak ewe Paipel 1,600 ier. A wor orun 40 chón makkeei Paipel me ra tipeeúfengen fán eú chék itelap nge minne ra makkeei rese ú fengen. Ifa usun a tongeni fis ena? Kot a wisen emmweni minne ra makkeei.​—Álleani 2 Samuel 23:2.

Fán ekkóch Kot a kapas ngeni ekkewe chón makkeei Paipel me ren ekkewe chónláng, lángipwi, are ttan. Nge lap ngeni, Kot a waalong an ekiek lón ekiekin ewe chón makkeei Paipel me mut ngeni an epwe filatá ekkewe kapas epwe néúnéú pwe epwe apasa án Kot pwóróus.​—Álleani Pwärätä 1:1; 21:3-5.