1. Pokiten Kot a férikich lón pwisin napanapan, menni tufich a nóm rech?

 “EWE át a chék mwiri seman,” ina eú mwitún aramas ra kan apasa. Pwúngún, chómmóng nau ra chék mwirifichi semer kewe me iner. Pún emén me emén nau a álemwiri napanapen seman me inan. Jiowa, Semach we lón láng, i ewe Chón Awora manaw. (Kölf. 36:9) Iwe pokiten kich néún, sia mwiri ekkóch napanapan. Pokiten a férikich aramas lón pwisin napanapan, a wor ach tufich le ekieki me apwúngaló mettóch, me ámááraatá ach riri ngeni ekkewe ekkóch.​—Ken. 1:26.

2. Án Jiowa wiliti Chiechiach a lóngólóng wóón met?

² Mi tufich án Jiowa epwe Chiechiach mi múrinné seni meinisin. Ena sókkun chiechi a lóngólóng wóón án Kot tong ngenikich me ach lúkúlúk wóón I me Néún we. Jesus a erá: “Iei usun Kot a echeni chon fanüfan, pwe a fangela Nöün Aleman, pwe meinisin mi lükü i resap pöütmwälila, pwe repwe eäni manau esemüch.” (Joh. 3:16) A wor chómmóng pwóróus usun chókkewe mi pacheéch ngeni Jiowa. Sipwe káé pwóróusen rúúemén leir.

3, 4. Ifa usun án Apraham chiechi ngeni Jiowa a sókko seni án mwirimwirin kewe?

³ Jiowa a kér ngeni Apraham, semelapen chón Israel, “chiechiei  we.” (Ais. 41:8) Lón 2 Kronika 20:7 a pwal erá pwe Apraham i chiechien Kot. Met a atufichi Apraham an epwe wiliti emén chiechien ewe Chón Féri i? A tufich pokiten án Apraham lúkú.​—Ken. 15:6; álleani James 2:21-23.

⁴ Jiowa, i pwal Semen me Chiechien mwirimwirin Apraham kewe, ekkewe ra wiliti ewe mwúún Israel lóóm. Iwe nge, a elichippúng pún a péút seniir ar chiechi me Kot. Pwata? Pokiten rese chúen eáni lúkúlúk wóón án Jiowa kewe pwon.

5, 6. (a) Ifa usun sia wiliti Chiechien Jiowa? (b) Ikkefa ekkewe kapas eis sipwe ekieki?

⁵ Óm alapaaló óm sissilei me kákkáé usun Jiowa, pwal ina péchékkúlelóón óm lúkú me alóllóólólóón óm tong ngeni. Ekieki usun ewe fansoun ka kerán silei pwe Kot, i wesewesen Emén ka tongeni chiechiéch ngeni. Ka pwal káé pwe kich meinisin sia uputiw lón tipis pokiten án Atam álleasolap. Ka weweiti pwe aramasen ei fénúfan ra towauoló seni Kot. (Kol. 1:21) Nge mwirin, ka mirititi pwe Semach mi tong lón láng esap i emén mi towau senikich me ese áfánnikich. Lupwen sia káé pwe Kot a awora ewe asorun méén kepich ren Jesus me eáni lúkúlúk wóón ena asor, sia poputá le ámááraatá ach riri ngeni Kot usun i chiechiach.

⁶ Atun sia nesékúriti ekkena mettóch, sipwe pwisin eisinikich: ‘Mi péppéchékúleló ai chiechi ngeni Kot? Mi kan lallapóló ai lúkú me tong ngeni Chiechiei we mi áchengicheng, Jiowa?’ Kition, pwal i emén a chiechiéch ngeni Jiowa lóóm. Sipwe káé pwóróusan pwe sipwe tongeni áppirú.

7-9. (a) Ifa ewe mettóch mi amwarar a fis ngeni Kition, me met mwirilóón? (Ppii ewe sasing lepoputáán ei lesen.) (b) Ifa usun sia tongeni apéchékkúlaló ach chiechiéch ngeni Jiowa?

⁷ Ewe soukapwúng Kition a angang ngeni Jiowa lón ewe fansoun a watte fitikoko lón Israel, mwirin án ena mwú tolong lón ewe Fénúen Pwon. Lón puken Soukapwüng sópwun 6 a pwóróus usun án néún Jiowa we chónláng chuuri Kition me lón Ofra. Lón ena atun, ekkewe chón Mitian mi nóm únúkkún fénúer ra fen mauner fán chómmóng. Iwe, ina ewe popun Kition ese wichiwich umwun wiich lón ewe leeni mi pwápwáló nge fen lón ewe leenien úchúch wain, ikewe ia a tongeni mwittir aopaaló ekkewe féún irá mi aúchea ie. Kition a máirú lupwen ewe chónláng a pwá ngeni me kér ngeni emén “sounfiu mi pwora.” Iwe, Kition a eisini ika Jiowa, ewe a angasaaló chón Israel seni Isip, epwe wesewesen álisiir lón ena atun. Ewe chónláng a aweni awen Jiowa, me a alúkúlúkú Kition pwe Jiowa epwe wesewesen álisi.

⁸ Kition a ekieki ika ifa usun epwe tongeni “angasala chon Israel seni lepöün chon Mitian.” A ffataffatéch met Jiowa a pélúwen ngeni, a erá: “Ngang üpwe etuk, nge en kopwe akufu chon Mitian usun chök om kopwe akufu eman chök aramas.” (Souk. 6:11-16) Eli Kition a chúen ekieki ifa usun epwe fis ei mettóch, ina popun a tingorei Kot an epwe pwár ngeni eú esissil. Nengeni lón ei pwóróusfengen Kition ese tipemwaramwar ika Jiowa i wesewesen Emén.

⁹ Minne a fis mwirin a apéchékkúlaló án Kition lúkú me an chiechiéch ngeni Kot. Kition a ammólnatá och mwéngé me uweato ren ewe chónláng. Lupwen ewe chónláng a féri eú manaman me ewe mwéngé a kareló ren an tiki ngeni wokun we, iwe Kition a mirititi pwe Jiowa a tiinaato ren ewe chónláng. Kition a niwokkus me apasa: “Ai Samol me ai Kot, osupwangei, pun iei üa küna noum we chon läng ren mesei.” (Souk. 6:17-22) Nge minne a fis mi eppeti án Kition epwe ririéch ngeni Kot? Aapw! Kition a fen meefi kinamwe ren Kot. Sia silei ena pokiten Kition a ssenatá eú rongen asor lón ena leeni me eita ngeni Jiowa-shalom, weween ‘Jiowa i ewe Koten kinamwe.’ (Álleani Soukapwüng 6:23, 24.) Lupwen  sia ekilonei met Jiowa a féri fán itach iteiten rán, sia kúna pwe i wesewesen Chiechiach. Ach ikkiótek ngeni i iteitan, epwe alapaaló ach meefi kinamwe me apéchékkúla ach chiechiéch ngeni.

10. Met Jiowa a kútta seni chókkewe mi mochen wiliti chiechian me ren Kölfel 15:3, 5?

¹⁰ Iwe nge, Jiowa a mochen sipwe féri ekkóch mettóch ren ach sipwe wiliti chiechian. Usun met a mak lón Kölfel 15, Tafit a eáni kél usun met Kot a kútta senikich pwe sipwe ‘tongeni tolong lon imwan we mi pin,’ weween ach sipwe wiliti chiechien Kot. (Kölf. 15:1) Iei, sipwe káé ruu me lein ekkena mettóch, sipwe túmúnú pwe sisap pweni aramas, me sipwe wenechar lón féfférúch meinisin. Iei met Tafit a erá usun emén Jiowa a etiwa an epwe chiechian: “Esap aitengaua [“pweni,” NW] eman, . . . esap pwal angei lifangen amichimich pwe epwe aturu eman esap wor an tipis.”​—Kölf. 15:3, 5.

11. Pwata sipwe túmúnúkich seni ach pweni aramas?

¹¹ Lón pwal eú kél mi pin, Tafit a eáni ei éúréúr: “Oupwe tümwünükemi pwe ousap eäni kapas mi ngau.” (Kölf. 34:13) Ach tunaló ei kapasen fén epwe atowauakich seni Semach we lón láng. Ren enletin, ewe mettóch pweni, ina napanapen Satan, ewe ákkáeménún chón oputa Kot. Ewe kapas “Tefil” a feito seni ewe kapasen Krik mi wewe ngeni “chón pweni.” Lupwen sia túmúnúfichi met sia apasa usun aramas, iwe epwe álisikich le amwéchú ach pacheéch ngeni Jiowa. Sipwe ákkáeúin túmúnú napanapach ngeni chókkewe mi wisen emmweni ewe mwichefel.​—Álleani Ipru 13:17; 1 Tesalonika 5:12.

12, 13. (a) Pwata a lamot ach sipwe wenechar lón mettóch meinisin? (b) Ifa usun ach wenechar a tongeni kkúú ekkewe ekkóch?

¹² Néún Jiowa kewe chón angang ra pwal silleló ren ar wenechar. Aposel Paulus a makkeei: “Oupwe sopwela le iotek fän item. Sia silei, pwe mwelien letipem a limelimöch, pun sia fokun mochen föri mine a pwüng fansoun meinisin.” (Ipru 13:18) Pokiten sia úppós le “föri mine a pwüng fansoun meinisin,” sia túmúnú pwe sisap chúri ngeni pwiich kewe chón lúkú. Áwewe chék, ika ra angang ngenikich, sipwe túmúnú pwe ach féffér ngeniir epwe pwúng, me sipwe ngeniir peioffur me ren met sia fen etipeeúfengen wóón. Kich Chón Kraist sia wenechar ngeni chókkewe ra angang fán itach me pwal ngeni ekkewe ekkóch. Ika sia angang ngeni emén pwiich, sisap ekieki pwe mi fich ngenikich pwal och feiéch lap seni ekkewe ekkóch chón angang.

¹³ Fán chómmóng sia rongorong án aramas mwareiti Chón Pwáraatá Jiowa pokiten ar wenechar. Áwewe chék, emén meilapen eú watteen kompeni a kúna pwe Chón Pwáraatá Jiowa ra kan apwénúetá met ra eáni pwon. A erá: “Iteitan oua chék féri met oua fen erá oupwe féri.” (Kölf. 15:4) Ach wenechar a álisikich ach sipwe akkamwéchú ach riri ngeni Jiowa me a elingaaló Semach we mi tong lón láng.

14, 15. Lón ach angangen afalafal, ifa usun sipwe álisi aramas le wiliti chiechien Jiowa?

¹⁴ Inaamwo ika aramas lón ach leenien afalafal ra lúkú pwe mi wor Kot, nge chómmóng rese ekieki pwe i Chiechier mi múrinné seni meinisin. Ifa usun sia tongeni álisiir? Nengeni án Jesus éúréúr ngeni ekkóch néún kewe chón káé lupwen a tiiniireló akkarúúemén ar repwe afalafal. A erá: “Lupwen oupwe tolong lon eu imw, oupwe akomwen apasa, ‘Kinamwe epwe tori chon ei imw.’ Iwe, are eman aramas mi efich kinamwe a nom ikenan, ämi kinamwe epwe nonom won. Nge are eman esap efich kinamwe, ämi tüngorun kinamwe epwe liwinsefälitikemi.” (Luk. 10:5, 6) Sia tongeni  luki aramas ngeni ewe enlet ika sia chiechiéch ngeniir. Ika sia kirekiréch ngeni chókkewe mi oput ach afalafal ngeniir, eli repwe tipemecheres le aúseling lón pwal eú fansoun.

¹⁵ Lupwen sia chuuri chókkewe mi fókkun achocho lón ar lamalam are fitaaló eérenien ar kewe lamalam mi chofona, sipwe chúen mosonoson me chiechiéch ngeniir. Lón ach kewe mwich sia etiwaéchú meinisin, ákkáeúin chókkewe mi mochen alapaaló ar silei ach we Kot pokiten ra lichippúng ren met a fiffis wóón fénúfan. A wor chómmóng pwóróusen ekkena esin aramas lón The Watchtower fán ewe itelap “Ewe Paipel A Siwili Manawen Aramas.”

16. Ifa usun sia chiechien Jiowa me pwal “akkangangfengen” me i?

¹⁶ Fán chómmóng ekkewe aramas mi angangfengen ra chiechiéchfengen. Meinisin mi fen fangóló manawer ngeni Jiowa, esap chék iir chiechien Kot, nge ra pwal “akkangangfengen me Kot.” Iei met Paipel a apasa: “Kich sia akkangangfengen me Kot. Nge ámi aramas án Kot leenien atake, pwal imwen Kot.” (1 Korint 3:9, NW) Atun sia afalafal me álisi aramas le wiliti chón áppirú Kraist, a lallapóló ach silei napanapen Jiowa kewe mi amwarar. Sia kúna ifa usun an we manaman mi fel a álisikich le apwénúetá wisach le afalafala ewe kapas allim.

17. Ifa usun ewe mwéngé lón pekin lúkú mi kawor lón ach kewe mwichelap a pwáraatá pwe Jiowa i Chiechiach?

¹⁷ Lapólóón ach álisi aramas le wiliti chón áppirú Kraist, pwal ina péchékkúlelóón ach pacheéch ngeni Jiowa. Áwewe chék, sia kúna ifa usun Jiowa a eppeti án ekkewe chón oputakich angangen aúkatiw ach angang. Sia pwal kúna ifa usun Kot a wesewesen emmwenikich. Sia mwaar ren watteen ekkewe mwéngé lón pekin lúkú mi kakkawor. Ekkewe prokram lón ach mwichelap ra pwáraatá pwe Jiowa a tongekich me weweiti ach weires me osupwang. Mwirin eú ach mwichelap, iei met eú famili a makkeei: “Ewe prokram a wesewesen kkúú letipem. Aua meefi úkúkún án Jiowa tongei emén me emén leim me a mochen aupwe sópwéch.” Mwirin eú mwichelap mi kkóló aúchean lón Ireland, eú pwúpwúlú seni Tois ra apasa ar kilisou ren án pwiich kewe awasélaéchúúr me túmúnúúr, ra pwal erá: “Nge lap seni meinisin aua kilisou ngeni Jiowa me néún we, King Jesus Kraist. Ra etiwakem le chóni ei mwichen aramas mi tipeeúfengen. Kich néún Jiowa aramas sise chék fós usun tipeeúfengen nge sia wesewesen pwapwaiti ach tipeeúfengen iteiten rán. Minne aua kúna lón ewe mwichelap mi kkóló aúchean lón Dublin epwe ákkáchema ngenikem ewe watteen feiéch pwe kich meinisin sia angangeppék ngeni ach we Kot mi lapalap.”

18. Met sia tongeni pwisin eisinikich ren napanapen ach pwóróusfengen me Jiowa?

¹⁸ Ewe ririin chiechi a kan péchékkúleló lupwen a sussuuk ewe alen pwóróusfengen. Lón ei fansoun a chéú ewe Internet, chómmóng ra pwóróusfengen wóón computer are text fengen wóón phone. Nge, ifa usun ach pwóróusfengen me Jiowa, Chiechiach we mi múrinné seni meinisin? Enlet, i ewe Chón “aüselinga iotek.” (Kölf. 65:2) Nge sia kan awora fansoun le fós ngeni iteitan?

19. Met a tongeni álisikich ika a weires ach sipwe uwawu masouen letipach ngeni Semach we lón láng?

¹⁹ Mi weires ngeni ekkóch néún Jiowa chón angang ar repwe uwawu alóllóólun masouen letiper. Nge, ina met Jiowa a mochen sipwe féri lupwen sia iótek ngeni. (Kölf. 119:145; KölK. 3:41) Inaamwo ika mi weires ach sipwe áweweei meefiach lón kapas, nge mi wor met a tongeni álisikich. Iei met Paulus a makkeei ngeni ekkewe Chón Kraist lón Rom: “Pun sisap silei mine sipwe eäni iotek, nge püsin Ngünmifel a tüngor ngeni Kot fän itach ren sokun ngüngü esap wor eman a tongeni apasatä lon kapas. Nge Kot, ewe mi küna lon letipach, a silei ekiekin ewe Ngünmifel. Pun ewe Ngünmifel a tüngor ngeni Kot fän iten ekewe chon pin lon met mi fich ngeni letipan.” (Rom 8:26, 27) Lupwen sia ekilonei kapasen ekkewe puk lón Paipel, áwewe chék ren Hiop, Kölfel me Än Salomon Fos, epwe tongeni álisikich le silei ifa usun sipwe pwal áweweei alóllóólun meefiach ngeni Jiowa lón kapas.

20, 21. Ifa usun alon Paulus lón Filipi 4:6, 7 a oururukich?

²⁰ Lupwen a torikich watteen osukosuk, sipwe chechchemeni alon Paulus keei ngeni chón Filipi, a erá: “Ousap lolilenäsini och mettoch, nge lon ämi osupwang meinisin oupwe iotek o tüngor ngeni Kot pwe epwe alisikemi. Oupwe tüngor fansoun meinisin fän kilisou.” Ena sókkun pwóróusfengen lefilach me Chiechiach we mi múrinné seni meinisin epwe fókkun oururukich me ekinamwei letipach. Paulus a pwal erá: “Än Kot kinamwe mi tekia seni ach tongeni weweiti epwe tümwünü lelukemi me ekiekimi lon Kraist Jesus.” (Fil. 4:6, 7) Amwo sipwe akkaúcheani “än Kot kinamwe” mi tekia, ewe epwe wesewesen túmúnú letipach me ekiekich.

²¹ Iótek a álisikich le ámááraatá ach chiechiéch ngeni Jiowa. Ina minne, sipwe “iotek fansoun meinisin.” (1 Tes. 5:17) Amwo ei lesen epwe apéchékkúla ach riri mi aúchea ngeni Kot me sipwe úppós le álleasochisi an kewe allúk mi pwúng. Sipwe awora fansoun le ekilonei ekkewe feiéch sia pwapwaiti pokiten Jiowa, i wesewesen Semach, ach Kot, me Chiechiach.