Iei alon emén sam lón Brazil: “Aua fókkun meseikeiti ám pwóróusfengen atun ewe Famili Fel, iwe fán chómmóng aua tongeni káé tori an a fókkun pwinimaw ika use fen ereni ai famili pwe aupwele mwo wes.” Pwal emén sam lón Japan a erá pwe néún we át engol ierin a chék mochen sópweló ewe káé me usun ese áfánni ewe kulók. Pwata? Ewe sam a erá: “A mmen mwasangasang, me ina met a alapaaló an pwapwa.”

Pwúngún pwe esap meinisin nau ra mwasangasangeiti ewe famili fel, eli ekkóch rese fen pwapwaiti. Pwata? Iei meefien emén sam lón Togo, “Itá úrúrún ach fel ngeni Jiowa esap echchipwang.” Ika ina, eli epwe lamot epwe wor siwil lón napanapen án ewe famili féri ewe famili fel. Chómmóng famili ra kúna pwe ewe famili fel a tongeni eú “ränin pwapwa,” usun chék ewe Sapat me ren ekkóch chón Israel.​—Ais. 58:13, 14.

Ekkewe Chón Kraist sam ra mirititi lamoten án ewe famili epwe meefi kinamwe pwe repwe pwapwaiti ewe famili fel. Ralf a wor úlúmén néún nengngin me emén néún át. A erá pwe napanapen ar féri ar famili fel usun ra chék pwóppwóróusfengen meinisin nge esap napanapen káéfengen. Pwúngún pwe fán ekkóch a weires án meinisin chón ewe famili repwe pwapwaiti ewe lesen. Emén in a erá: “Fán ekkóch, ese wor ai péchékkúl le féri ewe famili fel an epwe kon ákkámmeseik.” Ka tongeni aéchúóló napanapen ámi famili fel pwe epwe kon apwapwa?

Emén sam seni Tois, mi wor rúúemén néún a erá: “Mi lamot aupwe tipemecheres le féfféri siwil lón ám famili fel.” Natalia, mei wor rúúemén néún a erá: ‘Ewe mettóch mi fókkun lamot ngeni ám famili, ina an epwe sóssókkópat masouen ám famili fel.’ Chómmóng famili ra féri pwe ewe fansoun famili fel epwe fitu kinikin lón. Cleiton, emén sam lón Brazil nge mei wor rúúemén néún teenage, a erá pwe lupwen ra féri ena, ewe káé a ámmeseik “me meinisin  lón ewe famili ra pwapwaiti.” Ika a watte sókkofesenin ierin ekkewe nau, ekkewe sam me in ra tongeni féri ewe fansoun famili fel pwe epwe fitu kinikin, ika ina, iwe repwe eáni ewe lesen mi weneiti emén me emén néúr kewe me álisiir. Pwal och ekkewe sam me in ra tongeni tipemecheres le ekkesiwili ekkewe puk ewe famili epwe káé me ifa usun repwe káé.

Ikkefa ekkewe mettóch ekkóch famili ra féri pwe epwe sókkópat masouen ar famili fel? Ekkóch ra poputááni ar famili fel ren ar kél ngeni Jiowa. Juan seni Mexico a erá: “A ammólnatá ám ekiek fán iten ewe lesen me a efisi ám aupwe pwapwafengen.” An we famili a filatá ekkewe kél mi weneiti ewe lesen repwe káé lón ena pwinin.

Chómmóng famili ra álleafengen ewe Paipel. Ren an epwe sókkópat napanapen ar állea, emén me emén epwe pwomweni ngingiin ekkewe sókkópaten aramas lón ewe álleaan Paipel. Emén sam lón Japan a erá pwe ese “kon lien eérenaaló ena sókkun napanapen állea me lepoputáán.” Nge néúr kewe rúúemén át ra pwapwa atun iir me semer kewe me iner ra pwapwafengen lón ar káé. Ekkóch famili ra pwal mwo nge sipaiini ekkewe pwóróus lón Paipel. Roger seni South Africa, mi wor néún rúúemén át a erá: “Fán chómmóng ekkewe semirit ra kúna och mettóch lón ewe pwóróus lón Paipel, nge ám ekkewe sam me in ause fen kúna.”

Ra pwal tongeni angangfengen wóón och project, áwewe chék, ra tongeni féri liosun ewe waimw Noa a féri, are ewe imwenfel lón fansoun Salomon we. Ren ar repwe féri ena mi lamot repwe kútta ekkewe pwóróus mi weneiti, iwe a tongeni ámmeseik. Áwewe chék, lón Asia emén nengngin nimu ierin, seman me inan me inan we chinnap ra angangfengen le féri eú minen urumwot lón taropwe mi lóngólóng wóón án aposel Paulus sái usun emén misineri. Ekkóch famili ra féri ekkewe minen urumwot lón taropwe fán iten ekkewe pwóróus lón puken Ekistos. Emén sáráfé 19 ierin itan Donald seni Togo a erá ‘ám féri sókkópaten mettóch lón ám famili fel a amwasangasanga ám famili fel me pwal pwisin ám.’ Ka tongeni ekieki pwal ekkóch project oua tongeni féri pwe epwe ámmeseik ámi famili fel?

Inaamwo ika epwe ámmeseik ewe famili fel ren ach sissiwili me asókkópata masouan, nge mi lamot meinisin chón ewe famili repwe ammólnatá pwe repwe tongeni angei káit seni. Fán ekkóch ekkewe semirit ra tongeni mélúlú, iwe mi lamot ekkewe sam repwe awora fansoun le ammólnatáéchú me ekieki ewe lesen repwe káé. Iei alon emén sam: “Lupwen ua ammólnatá, a watteeló aúchean ewe káé ngeni ewe famili.” Emén sam seni Tois a ereni chón an famili me mwan met repwe káé lón ekkewe wiik repwe feito. Lupwen emén sam lón Benin a akkóta pwe repwe katol eché néúch DVD lón ar famili fel, a ngeni néún kewe wonomén ekkewe kapas eis pwe repwe ammólnatá. Ewer, ach ammólnatá epwe aéchúóló ach famili fel.

Ika chón ewe famili ra silei me mwan met repwe káé, ra tongeni fósfengen wóón lón unusen ewe wiik, iwe repwe mwasangasangeiti ewe famili fel. Pwal och, ika emén me emén lón ewe famili a wor wisan, iwe emén me emén leir epwe meefi pwe ina an famili fel.

Chómmóng famili ra kúna pwe a weires ar repwe féri ar famili fel iteitan. Pwata?

Chómmóng sam ra angang fite fite awa pwe repwe atufichi ar famili. Áwewe chék, emén sam lón Mexico a ló seni imwan kulók wonu lesossor me ese liwin tori kulók walu lepwin. Pwal och, neman fán ekkóch a lamot epwe siwil ránin ewe Famili Fel pokiten mi pwal wor eú án ewe mwichefel mwich epwe fis lón ena rán.

Inaamwo ika a tongeni weires, nge mi chúen lamot sipwe tipeppós le féri ach famili fel iteitan. Iei met Loïs, engol me eú ierin seni Togo, a erá usun tipeppósun an we famili: “Inaamwo ika fán ekkóch aua mmang le poputááni ám famili fel pokiten a ppiitá och mettóch lón ena rán, nge iteitan aua chék féri ám famili fel.” Sia tongeni weweiti pwata ekkóch famili ra akkóta ar famili fel me lepoputáán ewe wiik. Ika och mettóch mi weiweitá a ppiitá, iwe ra tongeni siwili ngeni pwal eú rán lón chék ena wiik.

Pwata sia eita ngeni ei kókkót famili fel? Pún ina kinikinin ach fel ngeni Jiowa. Meinisin chón óm we famili ra tongeni ‘mwareiti’ Jiowa iteiten wiik. (Os. 14:2) Amwo, ewe famili fel epwe eú fansoun mi apwapwa ngeni emén me emén lón ewe famili pokiten “ewe pwapwa seni ewe Samol mi Lapalap epwe apöchökülakemi.”​—Ne. 8:9, 10.