KATHERINE a mááritá lón Merika. Lupwen a 16 ierin, a papatais usun emén Chón Pwáraatá Jiowa. A achocho lón ewe angangen afalafal, nge ekkewe aramas lón leenian we rese kon lien pwapwaiti ewe pwóróus a afalafala usun án Kot we Mwú. A erá: “Ua fen álleani pwóróusen ekkewe aramas mi iótek ngeni Kot an epwe tiinaato emén epwe álisiir pwe repwe tongeni sileeló i. Ua kan áneánei ai upwe kúna emén mi ina usun, nge ese fis.”

Mwirin án Katherine afalafal lón ena leeni ren fite ier, a poputá le ekieki an epwe mwékút ngeni eú leeni ikewe aramas repwe pwapwaiti pwóróusen án Kot we Mwú. Iwe nge a pwal lólilen ika epwe weires ngeni. Mesemwan, fán eú chék lón manawan a towau seni an famili. Lón ena atun, úkúkún chék ruu wiik, nge a kan pwos iteiten rán. Iwe nge, a kon watte an mochen kúna pwapwaan an epwe álisi chókkewe mi kúkkútta Jiowa. Iwe, a ekieki usun ekkóch leeni ia a tongeni mwékút ngeni ie. Mwirin, a mak ngeni ewe keangen ofesilap lón Guam, iwe ra tiinaato ren ewe pwóróus mi lamot ngeni. Lón July 2007, lupwen a 26 ierin Katherine, a mwékút ngeni Saipan, eú fénúen lón Pacific Ocean, 6,000 mwail towauan seni leenian we. Iwe, met pwóróusan mwirin an mwékút?

Ekiseló chék mwirin án Katherine fiti an we mineféén mwichefel, i a chuuri emén fefin mi mochen káé Paipel itan Doris, ierin lap seni 40. Mwirin ar ra fen káé ekkewe úlúngát sópwun lón ewe puk Paipel A Apasa, Katherine a meefi lólilen. A apasa, “Doris i emén chón káé mi fókkun múrinné, iwe use mochen lipwákingawei epwe eppeti an feffeitá.” A pwal erá: “Epwe kerán iei ai káé ngeni emén nge mi chék fiffis ám káé iteitan. Ua meefi pwe a lamot emén mi lipwákéch seniei epwe wisen káé ngeni Doris, eli emén mi arapakkanfengen ieriir.” Katherine a tingorei Jiowa an epwe álisi le kúna ewe chón afalafal mi fich ngeni an epwe káé ngeni Doris. Iwe a apwúngaló an epwele ereni Doris usun ewe siwil.

Katherine a apasa: “Me mwen ai itá upwele ereni Doris ai we kókkót, i a ereniei pwe a mochen fós ngeniei usun eú an osukosuk. Mwirin ai aúseling ngeni, ua ereni ifa usun Jiowa a fen álisiei le ataweei ena sókkun osukosuk lón manawei. A apasa ngeniei an kilisou.” Mwirin, Doris a ereni Katherine: “Jiowa a néúnéú en le álisiei. Lón ewe áeúin atun ka etto rei, ua fen ákkálleani nei we Paipel ren fite awa. Ua kechiw me iótek ngeni Kot an epwe tiinaato emén epwe  álisiei le weweiti ewe Paipel. Mwirin, ka fichifich wóón asamei we. Jiowa a pélúweni ai iótek!” Epwele ssúr chénún mesen Katherine atun a apwóróusa pwóróusen ena rán. A erá: “Minne Doris a apasa ina pélúwen ai iótek. Jiowa a áiti ngeniei pwe ua tongeni sópweló le káé ngeni Doris.”

Doris a papatais lón ewe ier 2010, nge iei a pwisin káé Paipel ngeni fitemén aramas. Katherine a apasa: “A ifa me kilisoui pún a pwénútá ai we áneán seni lóóm pwe upwe álisi emén mi letip wenechar an epwe wiliti emén néún Jiowa chón angang!” Ikenái, Katherine a pwapwa lón an angangen special pioneer lón ewe fénú Kosrae.

Lap seni ipúkú pwiich kewe mwán me fefin (seni ier 19 ngeni 79) ra mwékút ngeni Micronesia pwe repwe álillis ikewe ia mi osupwangen chón afalafal ie. Chókkana ra tipeeú ngeni meefien Erica, ewe a mwékút ngeni Guam lón 2006 lupwen a 19 ierin. A erá: “Ai fiti ewe angangen pioneer ia aramas ra fókkun mochen silei ewe enlet ie a mmen apwapwa. Ua kilisou ngeni Jiowa ren an álisiei le fiti ei angang ikeei. Iei ewe sókkun manaw mi múrinné seni meinisin!” Ikenái, Erica a pwapwaiti an angangen special pioneer lón Ebeye lón Marshall. Pwúngún, lupwen emén a mwékút ngeni eú fénú esap wesetáán leenian, epwe kúna ekkóch osukosuk. Sipwe fós usun úlúngát me leir me ppii ifa usun chókkewe mi fen mwékút ngeni Micronesia ra pwákiniir.

Nónnóméchún. Mwirin án Simon tori ewe fénú Palau lón ewe ier 2007, atun a 22 ierin, a mwittir mirititi pwe peioffun epwe kúkkún seni peioffun me lóóm lón fénúan we England. A apasa, “Ua káé ai usap mééni met chék ua mochen. Iei ua filiéchú met sókkun mwéngé upwe mééni me cheki ekkewe sitowa ika menni leir a mékúkkún. Lupwen a ta och piseki ua kútta spean me wóón ekkewe pisek aramas ra fen ppiin áeá me ua kútta emén epwe álisiei le féri.” Ifa usun an siwil nónnómun me ámecheresaaló manawan a kkúú meefian? Simon a erá: “A álisiei ai upwe mirititi met mi wesewesen lamot lón manawach me ifa usun ua tongeni menemenéch ren minne mi nóm rei inaamwo ika mi chék kúkkún. Ua wesewesen meefi án Jiowa tong me álillis ngeniei fán chómmóng. Lón ekkewe fisu ier ai nónnóm ikeei, use osupwangen leeniei me enei.” Ewer, Jiowa a álisi chókkewe mi ámecheresaaló nónnómun manawer pokiten ar mochen akkomwa angangen an we Mwú.—Mat. 6:32, 33.

Ppos. Erica a apasa: “Ua fókkun pach ngeni ai famili, me ua lólilen ika ai ppositiir epwe angawaló ai angangen afalafal.” Met a féri pwe epwe mmólnetá ngeni? “Me mwen ai mwékút, ua álleani ekkewe lesen lón Watchtower mi weneiti ewe mettóch ppos. Ina met a wesen ammólnatá letipei pwe upwe tongeni pworacho ngeni ena memmeef. Lón eú me lein ekkewe lesen, emén inelap a oururu néún we usun án Jiowa túmún, a ereni, ‘Án Jiowa túmún ngonuk epwe múrinné seni ai túmún.’ Iei met a wesewesen apéchékkúla letipei.” Hannah me pwúlúwan we itan  Patrick, ra álillis Majuro lón Marshall. Án Hannah nefotofot wóón chón an we mwichefel ina met a álisi an esap kon meefi ppos. A erá: “Iteitan ua kan kilisou ngeni Jiowa ren ach ei mwichen pwipwi wóón unusen fénúfan pún iir pwal ai famili. Ika esap pwúlún ar álisiei fán tong usap tufichin álillis ikewe ia mi osupwangen chón afalafal ie.”

Kútta chiechi. Simon a apasa, “Lupwen ka ló ngeni eú mineféén fénú lap ngeni mettóch meinisin epwe sókkóló.” A pwal erá, “Fán ekkóch ua pwosiiti ai tongeni eáni kapasen urumwot me án aramas wesewesen weweitiei.” Erica a apasa: “Me lepoputáán ua meefi pwe usun itá rese áfánniei, iwe nge ena mettóch a álisiei ai upwe etittinafichi ewe popun ua etto ikeei. Ai mwékút ngeni ikeei esap ren pwisin ai feiéch nge fán iten ai upwe alapaaló ai angang ngeni Jiowa.” A pwal erá: “Mwirin och fansoun a wor chiechiei kewe mi múrinné ua fókkun aúcheaniir.” Simon a achocho le káé fósun Palau, pwe epwe álisi le ‘suki letipan ngeni’ chón ewe mwichefel. (2 Kor. 6:13) An tinikken le káé fósun ena fénú a achchúngú letiper ar repwe tongei. Ewer lupwen ekkewe mineféto me chón ewe leeni ra angangfengen, repwe kúna feiéchún ar chiechiéchfengen lón ewe mwichefel. Ikkefa pwal ekkóch feiéch a tori chókkewe mi tipemecheres le fangóló pwisin iir pwe repwe álillis ikewe ia mi osupwangen chón afalafal ie?

Ewe aposel Paulus a apasa: “Are fotan eman a somwosomwöch, kinian epwe pwal somwosomwöch.” (2 Kor. 9:6) Ewe kapasen emmwen lón ei wokisin a fókkun weneiti chókkewe mi alapaaló ar fiti ewe angangen afalafal. Ikkefa ekkewe feiéch mi “somwosomwöch” ra kúna lón Micronesia?

Lón Micronesia a chúen chómmóng mi mochen káé Paipel, iwe chón afalafal ra tongeni pwisin kúna án aramas káé me apwénúetá ewe enlet seni án Kot Kapas me feffeitá. Patrick me Hannah ra pwal afalafal wóón ewe kúkkún fénú itan Angaur, a chék wor 320 aramas wóón. Mwirin ar afalafal ikena ie úkúkún ruu maram, ra chuuri emén in ese wor pwúlúwan. A mwittir etiwa ar repwe káé ngeni Paipel, mwasangasang le etiwa ewe enlet, me féri watteen siwil lón manawan. Iei alon Hannah: “Iteiten mwirin ám káé ngeni, atun aua liwiniti imwem wóón wáám kewe pasiken, aua nefengen me erá: ‘Kilisou Jiowa!’” Hannah a pwal erá: “Ua silei pwe Jiowa epwe chék lukeato ei fefin ese lifilifil ika ié a álisi. Iwe nge, pokiten ám álillis ikewe ia mi osupwangen chón afalafal ie, a suuk ngenikem ám aupwe tongeni kúna ei siip me álisi an epwe sileeló Jiowa. Ina eú me lein ekkewe mettóch mi fókkun apwapwa lón ánein manawem!” Usun chék met Erica a apasa: “Lupwen ka álisi emén an epwe sileeló Jiowa, kopwe kúna pwapwa wachemwuk!”

Lón chómmóng fénú, a wor osupwangen chón afalafala pwóróusen ewe Mwú. Ka pwal tongeni mwékút ngeni ikewe mi wor osupwangen chón afalafal ie? Tingorei Jiowa an epwe apéchékkúlaló óm mochen alapaaló óm angangen afalafal. Fós ngeni ekkewe mwán mi ásimaw lón óm we mwichefel, ekkewe chónemmwen mi wisen sáifetál, are chókkewe ra álillis ikewe ia mi osupwangen chón afalafal ie. Lupwen ka poputá le akkóta óm kókkót, mak ngeni ewe keangen ofesilap fán iten pwóróusen ewe fénú mi nóm fán túmúnúan ka ekiekin ló álillis ie. * Neman pwal en ka tongeni fiti ekkewe fite ngeréú Chón Kraist, iir sáráfé me mi mwukóló, lipich me mi pwúpwúlú, iir kewe mi tipemecheres le fangóló pwisin iir me kúna pwapwa pokiten ewe feiéch mi “somwosomwöch” ra kini.