Itá mi pwúng án Tafit ekieki pwe Kot a áfánni i? Itá Kot a pwal áfánnuk? A weires ngeni chómmóng aramas ar repwe lúkú pwe ewe Kot mi unusen manaman a áfánniir. Pwata?

Eú popun, pún Kot, i emén mi fókkun tekia seni aramas. Seni an nennetiw me wóón leenian we mi tekia, ekkewe mwúún fénúfan “ra usun chök eu chiin koluk lon eu pwekit, ra pwal wewe ngeni pwül moromor won eu kilo.” (Aisea 40:15) Emén soumak pwóróus ikenái ese lúkú Kot a pwal mwo nge erá pwe “óm lúkú pwe mi wor emén Kot mi áfánni me nennengeni minne ka kan féfféri, ina eú ekiek mi fókkun lamalam tekia.”

Nge ren ekkóch aramas, ra meefi pwe ese fich ngeniir án Kot epwe áfánniir pokiten minne ra féfféri. Áwewe chék, emén mwán itan Jim a apasa: “Ua kan tittingor lón iótek pwe epwe wor ai kinamwe me upwe tongeni pwisin nemeniei, nge ekiseló chék are mwirin och fansoun, ua pwal song sefál. Iwe, ua fen apwungalo pwe ngang emén mi fókkun ngaw me Kot esap tongeni álisiei.”

Itá Kot a kon towau senikich aramas pwe ese tongeni áfánnikich? Ifa enletin meefien Kot ngeni férian kewe rese unuséch? Ika Kot ese pwári pwisin I ngeni aramas, ese wor emén epwe tongeni pwáraatá meefien Kot me pélúweni ekkena kapas eis. Iwe nge, án Kot pwóróus ngeni aramas mi mak lón ewe Paipel, a alúkúlúkú ngenikich pwe I esap emén Kot mi towau seni emén me emén aramas me ese tongeer. Ren enletin, ewe Paipel a apasa: “Kot esap wesewesen toau seni eman me eman leich.” (Föför 17:27) Lón ekkewe rúáánú pwóróus repwe tapwoto mwirin ei, sipwe káé usun án Kot áfánni emén me emén aramas me ifa usun a fen pwáraatá ena esin tong ngeni wesewesen aramas usun chék en.