SIA manaw lón ei fansoun mi fókkun áweires seni meinisin. (2 Tim. 3:1-5) Iteiten rán sia kúna sóssótun ach akkamwéchú ach tong ngeni Jiowa me ach tuppwél le féri minne mi pwúng. Jesus a silei pwe ekkeei fansoun epwe fókkun áweires, iwe a alúkúlúkú ngeni néún kewe chón káé pwe epwe ngeniir péchékkúl pwe repwe tongeni likiitú tori sópwólóón. (Mat. 24:3, 13; 28:20) Ren an epwe apéchékkúler, a ewisa ngeni ewe chón angang mi alúkúlúk an epwe awora ewe “mongö lon fansoun fich” epwe apéchékkúla án aramas lúkú.​—Mat. 24:45, 46.

Lón ewe ier 1919, ewe chón angang mi alúkúlúk a kefilitá. Seni ena fansoun, ena chón angang a akkawora mwéngé lón pekin lúkú ngeni néún Kot kewe aramas mi eáni sókkópaten fósun fénúfan. (Mat. 24:14; Pwär. 22:17) Iwe nge, ese lélléfengen úkúkún ewe minen asukul lón Paipel mi kawor fán iten meinisin fósun fénúfan. Pwal och, esap aramas meinisin ra néúni ekkewe sókkópaten minen computer ren ar repwe tongeni angei ekkewe minen káit seni Paipel. Áwewe chék, chómmóng ese wor néúr video are ese tongeni toriir ekkewe pwóróus mi chék katowu lón jw.org. Iwe, itá weween pwe ekkóch ra osupwangen ekkóch mwéngé mi lamot ngeniir pwe epwe péchékkúl ar lúkú? Ren ach sipwe silei, sipwe ppii pélúwen ekkeei rúáánú kapas eis.

Lupwen Satan a sótuni Jesus pwe epwe ewilaaló ekkewe faú ngeni pilawa, Jesus a ereni: “Aramas resap manau ren mongö chök, pwe ra manau ren iteiten kapas Kot a apasa.” (Mat. 4:3, 4) Án Jiowa kewe kapas ra nóm lón ewe Paipel. (2 Pet. 1:20, 21) Ina minne, ewe Paipel, ina ewe áeúin mettóch mi lamot lón ewe mwéngé mi apéchékkúla ach lúkú.​—2 Tim. 3:16, 17.

Án Jiowa we mwicheich a fen awora unusen are ekkóch kinikinin ewe New World Translation of the Holy Scriptures lón lap seni 120 fósun fénúfan me iteiten ier a pwal kakapachetá ekkóch fósun fénúfan. Me lúkún ena afféún Paipel, fite fite billion kapiin pwal ekkóch afféún Paipel, unusan are kinikinin chék, ra fen kawor lón fite ngeréú fósun fénúfan. Ena mettóch mi amwarar a tipeeú ngeni letipen Kot pwe “aramas meinisin repwe küna manau, repwe pwal silei ewe let.” (1 Tim. 2:3, 4) Pwal och, pokiten “förian [Jiowa] kana meinisin ra säretä o pwäpwäla mwen mesan,” sia tongeni lúkú pwe epwe lukeato ngeni an we mwicheich chókkewe mi “silei pwe ra wöüngau lon pekin ngünür” me epwe awora ngeniir ewe mwéngé epwe apéchékkúla ar lúkú.—Ipru 4:13; Mat. 5:3, 6; Joh. 6:44; 10:14.

Ren án emén epwe péchékkúl lón an lúkú, esap chék álleani ewe Paipel nge mi lamot an epwe pwal weweiti minne a álleani me apwénúetá met a fen káé seni. (Jas. 1:22-25) Ewe re Itiopia lón fansoun ekkewe aposel a kúna pwúngún ena pwóróus. A álleani án Kot we Kapas lupwen ewe chón afalafal Filip a eisini: “Ka weweiti mine ka aleani?” Ena mwán a ereni Filip: “Epwe ifa usun ai üpwe tongeni weweiti nge esap wor eman a awewe ngeniei?” (Föf. 8:26-31) Iwe, Filip a álisi ena mwán an epwe silei ewe sile mi enlet lón án Kot we Kapas. Minne ena mwán a káé a achchúngú letipan, iwe a filatá an epwe papatais. (Föf. 8:32-38) Pwal ina chék usun, néúch kewe puk mi lóngólóng wóón ewe Paipel ra fen álisikich le silei ewe enlet. Ra fen achchúngú letipach me amwékútúkich le apwénúetá met sia fen káé.​—Kol. 1:9, 10.

Ren néúch kewe puk, a torikich néún Jiowa kewe chón angang ewe watteen mwéngé epwe apéchékkúla ach lúkú. (Ais. 65:13) Áwewe chék, The Watchtower, a kawor lón lap seni 210 fósun fénúfan, a áweweei ekkewe oesini lón Paipel, a alapaaló ach weweiti ekkewe pwóróus mi enlet mi alóllóól, me a amwékútúkich le apwénúetá lón manawach ekkewe kapasen emmwen lón Paipel. Ewe Awake!, a katowu lón órun 100 fósun fénúfan, a awatteeló ach silei usun férien Jiowa kewe me a áiti ngenikich ifa usun sipwe apwénúetá án Paipel kewe kapasen fén mi álilliséch lón manawach. (SalF. 3:21-23; Rom 1:20) Ewe chón angang mi alúkúlúk a awora ekkewe minen káit seni Paipel lón lap seni 680 fósun fénúfan! Ka awora fansoun iteiten rán pwe kopwe álleani ewe Paipel? Ka álleani iteiten ekkewe puk mi kerán katowu me meinisin ekkewe mineféén puk mi kan katowu iteiten ier lón pwisin óm fós?

Án Jiowa we mwicheich a féri ekkewe puk, me a pwal ammólnatá ekkewe minen káit lón Paipel epwe katowu lón ekkewe afalafal atun ach kewe mwich me mwichelap. Ka pwapwaiti le rongorong ekkewe afalafal, sipai, ekkewe pwoomw me interview mi kan katowu atun ach kana mwich? Enlet, Jiowa a kan awora ngenikich eú watteen kametip lón pekin lúkú!​—Ais. 25:6.

Pélúwan, aapw. Me esap pwal eú minen ámáirú ngenikich an epwe tongeni tori ekkóch néún Jiowa chón angang chómmóng puk lap seni ekkewe pwal ekkóch. Pwata? Nengeni pwóróusen ekkewe aposel. Iir ra angei chómmóng káit lap seni ekkewe pwal ekkóch chón káé lón ena atun. (Mark. 4:10; 9:35-37) Inaamwo ika a ina usun, nge ekkena ekkóch chón káé rese osupwangen mwéngé lón pekin lúkú, ra angei met a lamot ngeniir pwe repwe péchékkúl.​—Ef. 4:20-24; 1 Pet. 1:8.

A pwal éch sipwe chechchemeni pwe lap ngeni met Jesus a apasa me féri lupwen a nóm wóón fénúfan ese mak lón Paipel. Aposel Johannes a makkeei: “Jesus a pwal föri chomong föför lükün ekei. Are iteiten eu me eu kewe föför repwe mak lon puk, üa ekieki pwe ekewe puk resap mwo nge fen kuch won unusen fanüfan.” (Joh. 21:25) Inaamwo ika lón ena fansoun néún Jesus kewe chón káé ra silei chómmóng mettóch usun ewe mwán mi unuséch Jesus, lap senikich, nge sise osupwang. Jiowa a túmúnú pwe epwe naf ach sile usun Jesus pwe sipwe tongeni tapweló lón ipwan.​—1 Pet. 2:21.

Pwal ekieki usun ekkewe taropwe ekkewe aposel ra tinaló ngeni ekkewe mwichefel lón ena fansoun. Áwewe chék, a wor eché taropwe Paulus a makkeei nge ese kapachelong lón Paipel. (Kol. 4:16) A itá wewe ngeni pwe sia osupwangen mwéngé lón pekin lúkú pokiten ese nóm rech ena taropwe? Aapw. Jiowa a silei met a lamot ngenikich me a fen awora naféchún mwéngé pwe epwe chék péchékkúl ach lúkú.​—Mat. 6:8.

Lón ei fansoun, a kawor ngeni ekkóch néún Jiowa kewe chón angang watteen mwéngé lón pekin lúkú lap seni ekkewe pwal ekkóch. Ka eáni ewe sókkun fósun fénúfan ese kan chómmóng néúch kewe puk mi kawor lón? Ika ina, kopwe lúkúlúk pwe Jiowa mi pwal tongeok. Káé ekkewe puk mi kawor ngonuk, me ika mi tufich, fiti ekkewe mwich mi eáni ewe fós ka weweiti. Me kopwe lúkúlúk pwe Jiowa epwe ákkálisuk pwe kopwe chék péchékkúl lón pekin lúkú.​—Kölf. 1:2; Ipru 10:24, 25.

Lón ach we Web site, a katowu kapiin néúch kewe puk me pwal ekkewe ekkóch minen káit mi lóngólóng wóón Paipel. A pwal kawor lón ewe Web site ekkewe pwóróus mi álisi pwúpwúlú, teenage me ekkewe kúkkún. Ekkewe famili ra kúna álillis seni ekkena pwóróus mi katowu ren ar káéfengen lón ar Famili Fel. Pwal och, a katowu wóón ach Web site pwóróusen ekkewe mwich mi kkóló aúchean, áwewe chék ren ekkewe sochungioon sukulen Gilead me ewe mwich a kan fiffis iteiten ier fán iten ach we mwicheich. A pwal katowu pwóróusen ekkewe mettóch mi kkúú néún Jiowa kewe aramas, áwewe chék ren feiengaw watte are ekkewe kapwúng. (1 Pet. 5:8, 9) Ewe Web site a fókkun watte álilliséchún lón ach angangen afalafal, a achéúfetálei ewe pwóróus allim, pwal mwo ngeni ekkewe fénú mi pinepin are aúkúk ach angang lón.

Iwe nge, ka chúen tongeni péchékkúl lón óm lúkú, ese lifilifil ika ka tongeni tétá wóón computer me ppii ach Web site are kese. Ewe chón angang mi alúkúlúk a kan angang weires le awora naféchún ekkewe puk mi peres pwe meinisin néún Kot kewe chón angang repwe angei ewe mwéngé lón pekin lúkú mi lamot ngeniir. Ina minne, ese wor popun óm kopwe meefi pwe a kon lamot óm kopwe mééni ekkewe minen computer pwe kopwe chék tongeni angei ekkewe pwóróus lón jw.org. Ekkóch ra féri pwisin ar kókkót le printinawu ekkóch pwóróus mi katowu lón ach we Web site me ngeni pwiich kewe rese tufichin tétá wóón Internet, nge esap ina eú allúk án ekkewe mwichefel repwe féri.

Sia kilisou ngeni Jesus ren an apwénúetá an we pwon pwe epwe túmúnúkich lón pekin lúkú. Lón ei fansoun mi áweires, a arapakkanoto ewe sópwólóón, sia tongeni lúkúlúk pwe Jiowa epwe sópweló le awora ewe “mongö lon fansoun fich” mi apéchékkúla ach lúkú.