POPUN EKKÓCH RA TIPEMWARAMWAR: Eú repot mi kerán katowu seni ekkewe scientist, a erá pwe lón chék ach ei galaxy a tongeni wor 100 billion planet are fen lap seni. Ren úkúkún watteen unuselapen láng me fénúfan, chómmóng aramas ra eis, ‘Itá met popun ewe Chón Fératá mi unusen manaman epwe nennengeni mwékútúkútún ekkewe aramas mi fókkun tekisosson wóón ei féúkúkkúnún planet?’

MET ÁN KOT WE KAPAS A APASA: Kot ese chék awora ngenikich ewe Paipel, mwirin ese chúen áfánnikich. Nge Jiowa * a fen alúkúlúkú ngenikich me erá: “Üpwe öüröürok o mamasok.”​—Kölfel 32:8.

Nengeni pwóróusen Hakar, emén fin Isip mi manaw órun 1,900 ier mwen Kraist. Hakar a súfélúngaw ngeni néún we masta, Sarai, ina popun Sarai a apwúngú, iwe Hakar a sú ngeni ewe fénúpéén. Iwe iei, pokiten Hakar a féri och mwáál, itá Kot esap chúen áfánni? Ewe Paipel a erá: “Nöün ewe Samol mi Lapalap chon läng a küna Hakar.” Ena chónláng a alúkúlúkú Hakar me apasa: “Ewe Samol mi Lapalap a rongorong om siön riaföü.” Iwe, Hakar a ereni Jiowa: “En eman Kot mi nenengeniei.”​—Keneses 16:4-13.

Ewe ‘Kot mi nenengeni’ aramas a pwal nennengonuk. Áwewe chék: Emén inelap mi tong a kan awora watteen túmún ngeni néún kewe kúkkún semirit pún iir ra osupwangen túmún lap seni ekkewe ra watte. Ika ewe semirit emén mi fókkun kúkkún, epwe fen ina watteelóón lamoten án ekkewe sam me in repwe túmúnú. Pwal ina chék usun ren Kot, lón ewe atun sia apwangapwang are osupwangen álillis, fen ina atun a kon nennengenikich. Jiowa a apasa, “Ngang üa imweimw lon eu leni mi pin o tekia, pwal ren eman mi luketatakis o tipetekison, pwe üpwe amanaua ngüngün chon tipetekison o apöchöküla leluken chon liamam.”​—Aisea 57:15.

Iwe nge, neman kopwe ekieki: ‘Ifa usun Kot a nennengeniei? A kan chék nennengeni napanapei me lúkún, are a nennengeni alóllóólun letipei me wesewesen silei ika ngang met sókkun aramas?’