1. Ifa meefien Paulus ren chókkewe mi angang weires fán iten ewe kapas allim?

 EWE aposel Paulus a chechchemeni ekkewe Chón Kraist mi angang weires fán iten ewe kapas allim. A makkeei: “Aia chechemeni me mwen ach Kot i Samach usun ämi lükülük mi pwä lon ämi föför, usun ämi tong mi pwä lon ämi angang weires, pwal usun ämi apilükülüköch mi nüküchar lon ach Samol Jesus Kraist.” (1 Tes. 1:3) Pwal mwo nge pwisin Jiowa a chechchemeni ewe angang weires fán tong meinisin néún kewe chón angang mi tuppwél ra féri ren úkúkún en me an tufich.​—Ipru 6:10.

2. Met sipwe káé lón ei lesen?

² Chómmóng pwiich kewe Chón Kraist lóóm me ikenái ra pennúkúóló chómmóng mettóch lón manawer pwe repwe angang ngeni Jiowa full-time. Iei sipwele ppii ifa usun ekkóch leir ra angang ngeni Jiowa lón fansoun ekkewe popun Chón Kraist. Sipwe pwal káé ifa usun ekkóch Chón Kraist lón ach ei fansoun ra angang ngeni Jiowa full-time lón sókkópaten napanap me ppii ifa usun sia tongeni álisiir.

3, 4. (a) Ifa usun ekkóch ekkewe popun Chón Kraist ra angang ngeni Jiowa? (b) Ifa usun ra kúna álillis lón pekin aion?

³ Ekiseló chék mwirin án Jesus papatais, i a poputááni ewe  angang epwe chéúló wóón unusen fénúfan. (Luk. 3:21-23; 4:14, 15, 43) Mwirin an we a máló, néún kewe aposel ra wisen emmweni ewe angangen achéúfetálei ewe kapas allim. (Föf. 5:42; 6:7) Ekkóch Chón Kraist, usun chék Filip, ra eáni ewe wis chón afalafal me misineri lón Palestine. (Föf. 8:5, 40; 21:8) Paulus me pwal ekkewe ekkóch ra sái ngeni ekkewe fénú towau. (Föf. 13:2-4; 14:26; 2 Kor. 1:19) Ekkewe ekkóch, áwewe chék ren Silas (Silfenus), Markus, me Lukas ra makkeei ekkóch puk lón ewe Paipel are ra wisen seketeri fán iten ekkewe chón mak. (1 Pet. 5:12) Ekkewe Chón Kraist fefin ra angangfengen me ekkewe Chón Kraist mwán mi tuppwél. (Föf. 18:26; Rom 16:1, 2) A mmen ámmeseik ach álleani lón ewe Tesin Krik lón Paipel pwóróusen ar angang, me ra pwáraatá pwe Jiowa a chechchemeni me pwapwa ren néún kewe chón angang.

⁴ Ifa usun ekkewe popun Chón Kraist mi angang full-time ngeni Kot ra kúna álillis lón pekin aion? Fán ekkóch pwiir kewe Chón Kraist ra álisiir me awasélaéchúúr. Nge ekkeei chón angang rese eriáni pwiir kana ar repwe álisiir. (1 Kor. 9:11-15) Ekkóch aramas me ekkewe mwichefel ra pwapwa le awora álillis ngeniir. (Álleani Föför 16:14, 15; Filipi 4:15-18.) Paulus me chienan kewe lón an sái, ra pwal awora ekkóch fansoun fán iten angangen moni pwe repwe atufichi manawer.

5. Met meefien eú pean pwúpwúlú usun manawer lón ar angang ngeni Kot full-time?

⁵ Lón ei fansoun, mi pwal wor chómmóng ra angang weires ngeni Kot full-time lón sókkópaten napanap. (Ppii ewe pwóór “ Ekkewe Sókkópaten Sókkun Angang Ngeni Kot Full-Time.”) Met meefier usun ewe angang ra fen filatá? Ka tongeni eisiniir ena kapas eis, me ese mwáál minne repwe erenuk epwe apéchékkúlok. Ekieki alon pwiich ei mwán mi fen angang usun emén regular pioneer, special pioneer, misineri me chón angangen Bethel lón eú fénúen ekis. Iei met a erá: “Ua meefi pwe ai filatá le angang ngeni Kot full-time, iei eú kefil mi fókkun múrinné ua féri lón ánein manawei. Lupwen a 18 ieri, ua osukosuk ika upwe fiti sukul tekia, are kútta eú angangen moni mi múrinné are pioneer. Ua kúna pwe Jiowa ese tongeni ménúki ekkewe mettóch sia pennúkúóló pwe sipwe tongeni angang ngeni full-time. Lón ai angang ngeni Kot full-time a suuk ngeniei ai upwe tongeni áeá ai kewe tufich a fang ngeniei, nge ika ua filatá le fiti angangen moni, iwe usap tongeni áeá tufichi kana lón sókkópaten napanap.” Pwúlúwan we a erá: “Iteiten ekkewe angang ua féri lón ai angang ngeni Jiowa a álisiei ai upwe ásimawóló. Aua meefi án Jiowa túmún me emmwen fán chómmóng. A pwal túmúnúkem lón ekkóch napanap eli ausap tongeni kúna ika aua chék menemenéch ren nónnómun manawem mi kinamwe. Ua kilisou ngeni Jiowa iteiten rán ren manawem lón ám angang ngeni I full-time.” Ka pwal mochen epwe ina usun meefiom usun manawom?

6. Met meefien Jiowa usun ach angang ngeni?

⁶ Pwúngún pwe ekkóch rese tongeni angang ngeni Jiowa full-time pokiten nónnómun manawer lón ei atun. Sia tongeni lúkúlúk pwe Jiowa mi pwal aúcheani ar angang ngeni úkúkún ar tufich. Ekieki usun chókkewe Paulus a pani iter lón Filimon 1, 2, kapachelong meinisin chón ewe mwichefel lón Kolose. (Álleani.) Paulus a aúcheaniir, me Jiowa a pwal aúcheaniir. Pwal ina chék usun, Semach we lón láng a pwal aúcheani óm angang ngeni. Iwe nge, ifa usun ka tongeni álisi chókkewe mi angang ngeni Jiowa full-time lón ei fansoun?

7, 8. Met a kapachelong lón wisen ekkewe pioneer, me ifa usun chón ewe mwichefel ra tongeni álisiir?

⁷ Ekkewe pioneer ikenái mi tinikken ra pwal usun chék ekkewe popun Chón Kraist chón afalafal, iir ra fókkun apéchékkúla ekkewe mwichefel.  Chómmóng leir ra achocho ar repwe néúni órun 70 awa iteiten maram lón ewe angangen afalafal. Ifa usun ka tongeni álisiir?

⁸ Iei meefien emén pioneer itan Shari: “Pokiten ekkewe pioneer ra kan akkafalafal iteiten rán, iwe me ren aramas iir ra fókkun péchékkúl. Iwe nge, a chúen lamot ngeniir kapasen apéchékkúl.” (Rom 1:11, 12) Pwal iei met emén Chón Kraist fefin mi piin pioneer ren fite ier a apasa usun ekkewe pioneer lón an we mwichefel: “Ra angang weires, rese sile asésé. Ra fókkun kilisou lupwen ekkewe ekkóch ra etiwer ar repwe fitiir wóón waar, fitiir le mwéngé, liffang ngeniir ekis méén káás are awora ngeniir pwal ekkóch monien álillis. Óm féri ekkena mettóch a pwár ngeniir pwe ka fókkun áfánniir.”

9, 10. Met ekkóch ra féri pwe repwe álisi ekkewe pioneer lón ar mwichefel?

⁹ En mi mochen álisi ekkewe pioneer lón ewe angangen afalafal? Emén pioneer itan Bobbi a erá: “Aua osupwangen chienem le afalafal seni Sárinfál ngeni Enimu.” Pwal emén chienan pioneer lón ena chék mwichefel a erá: “A weires an epwe wor chón fitikem le afalafal atun mwirin leolowas.” Emén pwiich fefin, iei a angang lón Brooklyn Bethel a chechchemeni ewe fansoun a pioneer, a erá: “Emén pwii fefin mi wor waan tarakú a ereniei: ‘Ineet chék ese wor chienom le afalafal, ka chék kériei me upwe fituk.’ A fókkun álisiei le likiitú lón ai angangen pioneer.” Shari a pwal erá: “Wesin án ekkewe pioneer mi lipich afalafal, fán chómmóng ra chék áláemén. Neman fán ekkóch, ka tongeni etiwa ekkewe fefin are mwán mi lipich ar repwe fiti ámi famili fel. Ach etiwer ar repwe fitikich le féri pwal ekkóch mettóch epwe apéchékkúler.”

¹⁰ Emén pwiich fefin a fen angang full-time arapakkan 50 ier a chechchemeni ewe atun i me chienan kewe fefin mi lipich ra pioneer. Iei met a erá: “Ekkewe mwán mi ásimaw ra kan chuuri ekkewe pioneer iteiten mwirin fitu maram. Ra eisinikem ika aua péchékkúl, ifa usun ám angangen moni, me ika a wor mettóch aua lólilen ren. Ra wesewesen mochen silei nónnómum. Ra chuurikem lón leeniem pwe ra tongeni silei ika aua osupwangen och mettóch.” Neman ei pwóróus a áchema ngenikich án Paulus kilisou ren ewe álillis emén mwán mi famili lón Efisos a awora ngeni.​—2 Tim. 1:18.

11. Met a kapachelong lón wisen emén special pioneer?

 ¹¹ Lón ekkóch mwichefel a wor ekkewe special pioneer lón. Chómmóng leir ra achocho ar repwe néúni órun 130 awa iteiten maram lón ewe angangen afalafal. Pokiten a watte ewe fansoun ra áeá le afalafal me álisi ewe mwichefel lón pwal ekkóch mettóch, iwe a chék wor ekis are ese fen wor ar fansoun le angang fán iten tufichiir. Ewe keangen ofesilap a awora ngeniir monien álillis mi úkúkéch pwe ra tongeni unusen áeá ar fansoun lón ewe angangen afalafal.

12. Ifa usun ekkewe mwán mi ásimaw me pwal ekkóch ra tongeni álisi ekkewe special pioneer?

¹² Met sia tongeni féri pwe sipwe álisi ekkewe special pioneer? Emén mwán mi ásimaw lón eú keangen ofesilap mi kan fós ngeni chómmóng special pioneer, a erá: “A lamot ekkewe mwán mi ásimaw repwe fóffós ngeniir, ppii ika ifa usun nónnómur, mwirin, ekieki ifa usun ra tongeni álisiir. Ekkóch Chón Pwáraatá ra ekieki pwe ese wor osupwangen ekkewe special pioneer pokiten a kawor ngeniir monien álillis fán iten tufichiir. Iwe nge, chón ar kewe mwichefel ra chúen tongeni álisiir lón sókkópaten mettóch.” Usun chék ekkewe regular pioneer, ekkewe special pioneer ra pwal pwapwa ika a wor chiener lón ewe angangen afalafal. Ka tongeni fitiir le afalafal?

13, 14. (a) Met a lamot sipwe chechchemeni usun ekkewe chónemmwen mi wisen sáifetál? (b) Met ka tongeni féri pwe kopwe álisi chókkewe mi eáni ena angang?

¹³ Me ren aramas, ekkewe chónemmwen mi wisen sáifetál me pwúlúwer kewe iir aramas mi péchékkúl ar lúkú me ra likiitú. Mi pwúng ena, iwe nge a pwal lamot ngeniir kapasen apéchékkúl, án ekkewe ekkóch repwe fitiir le afalafal me ar repwe ketiw ngeni ekkewe minen apwapwa me kunou. Nge ifa usun ika ra lúing lón pioing, neman a lamot repwe reirei are repwele anganga inisiir pwe epwe péchékkúl sefál? Repwe fókkun kilisou lupwen pwiir kewe ra awora ngeniir minne ra osupwangan me áfánni nónnómur. Sia tongeni anchangei meefien ewe “sousafei mi achengicheng” itan Lukas ren an túmúnú Paulus me chienan kewe lón ar sái.​—Kol. 4:14; Föf. 20:5–21:18.

¹⁴ A lamot ngeni ekkewe chónemmwen mi wisen sáifetál me pwúlúwer kewe an epwe wor chiechier, me ra aúcheaniir. Iei meefien emén me leir: “Usun itá chiechiei kewe ra silei ineet a lamot ngeniei kapasen apéchékkúl. Ra kan eisiniei ekkóch kapas eis mi lukiei ai upwe pwáraawu met ua lólileniesini. Ar chék aúselingéch ngeniei, a fókkun álisiei.” Ekkewe chónemmwen mi wisen sáifetál me pwúlúwer kewe ra fókkun aúcheani án pwiich kewe pwáraatá ar enletin áfánniir.

15, 16. Pwata a lamot ewe angang ekkewe chón angang lón Bethel me lón ekkewe Leenien Mwichelap ra féri, iwe, ifa usun sipwe álisiir?

¹⁵ Wóón unusen fénúfan, chókkewe ra angang lón Bethel me lón ekkewe Leenien Mwichelap, ra álisatá angangen án Kot we Mwú lón ekkewe leeni mi nóm fán túmúnúen ar na keangen ofesilap. Ika mi wor chón Bethel lón óm mwichefel, ifa usun ka tongeni pwáraatá pwe ka chechchemeniir?

¹⁶ Lupwen ra kerán wareiti Bethel, eli repwe meefi ppos pún ra ló seni ar famili me chiener kewe iir mi tongeer. A ifa me kilisour lupwen chiener kewe chón Bethel me chón ar we mineféén mwichefel ra chiechiéch ngeniir! (Mark. 10:29, 30) Ar schedule le angang lón Bethel a mut ngeniir ar repwe pwal fiti ekkewe mwich me ewe angangen afalafal iteiten wiik. Iwe nge, fán ekkóch, mi pwal wor ekkóch angangen Bethel mi lamot repwe féri. A múrinné ika chón ewe mwichefel repwe weweiti ena mettóch me aúcheani chókkana me minne ra eáni angang.​—Álleani 1 Tesalonika 2:9.

17, 18. Ikkefa ekkewe sókkun angang chókkewe mi álillis lón fénúen ekis ra tongeni eáni?

¹⁷ Chókkewe ra etiwa ewe wis ar repwe álillis lón eú fénúen ekis, neman repwe kúna pwe mwéngéén, eérenien, fósun, me nónnómun ikena ie mi fókkun sókko seni met ra fen eérenaaló. Iwe, pwata ra filatá ar repwe etiwa ena angang mi tongeni áweires ngeniir?

¹⁸ Ekkóch leir, iir misineri, ra kan afalafal ikewe chómmóng mi tongeni káé me kúna feiéch seni lipwákéchúúr le afalafal me asukula aramas. Ewe keangen ofesilap a kan awora ngeni ekkewe misineri leenier me monien álillis mi úkúkéch epwe ataweei minne mi lamot ngeniir. Nge ekkóch lein chókkana mi angang lón fénúen ekis, ra angang lón ekkewe keangen ofesilap are álillis lón kaútáán ekkena ofes, angang lón leenien chiyakú, ekkewe Leenien Mwichelap, are ekkewe Leenien Mwich. Me ikkena ie, a kawor ngeniir leenier, ener mwéngé me pwal ekkóch álillis. Usun chék ekkewe chón Bethel, iir ra pwal fiti mwich iteitan me fiti ewe angangen afalafal lón ewe leeni ra angang ie. Ina popun, chókkana iir eú feiéch ngeni ekkewe mwichefel.

19. Ifa usun ka tongeni álisi ekkewe chón angang full-time mi álillis lón fénúom we?

¹⁹ Ifa usun kopwe álisi ekkena chón angang full-time mi álillis lón fénúom we? Chechchemeni pwe lupwen ra kerán war, eli resap kon lien eéreni mwéngéén fénúom we. Kopwe chechchemeni ena lupwen ka etiwer ámi oupwe mwéngéfengen. Eli ka tongeni akkomw eisiniir ika met sókkun mwéngé ra mochen mwéngé are mochen sótuni. Kopwe mosonottam ngeniir lupwen ra káé fósun fénúom we me eérenian kewe. Neman resap mwo tongeni weweiti óm fós ngeniir, nge kopwe kirekiréch ngeniir me álisiir le ánewenewa ekkewe kapas. Iir ra mochen káé!

20. Ifa usun sia tongeni chechchemeni ekkewe chón angang full-time me semer kewe me iner?

²⁰ Ló, ló, ló, semen me inen chókkana mi angang lón fénúen ekis repwe chinnapeló me epwe lamot ngeniir álillis. Ika semer me iner iir Chón Pwáraatá Jiowa, ese mwáál repwe tipeni án néúr kewe repwe chék sópweló wiser we. (3 Joh. 4) Pwúngún, nge ika a lamot túmún ngeni semer kewe me iner, repwe achocho úkúkún ar tufich le álisiir me ló chuuriir lón pwisin fénúer úkúkún ar tongeni. Nge, chókkewe mi nónnóm lón ewe leeni mi arap ngeni leenien ekkewe chinnap ra tongeni álisi ekkewe chón angang full-time ren ar repwe mmólnetá le awora túmún me álillis ngeni ekkewe chinnap. Chechchemeni pwe ekkena chón angang full-time a watte wiser lón kálisitáán ewe angangen afalafal mi fókkun lamot seni meinisin wóón fénúfan. (Mat. 28:19, 20) En are óm mwichefel oua tongeni álisi semen me inen chókkana mi angang full-time ika mi lamot ngeniir álillis?

21. Met meefien chókkewe ra angang lón fénúen ekis usun ewe álillis me kapasen apéchékkúl ekkóch ra awora ngeniir?

²¹ Chókkewe mi angang ngeni Jiowa full-time ra eáni ei angang esap ren ar repwe wéúéchúló, nge ra mochen fang ngeni Jiowa unusen ar tufich me álisi aramas. Ra fókkun kilisou ren ekkewe álillis ka tongeni awora ngeniir. Iei meefien emén pwiich fefin mi álillis lón fénúen ekis: “Pwal mwo eché taropwe seni ekkewe ekkóch mi apasaatá ar kilisou, a pwáraatá pwe iir ra ekiekuk me ra pwapwa ren ewe angang ka féfféri.”

22. Met meefiom usun ei sókkun angang ngeni Kot full-time?

²² Án emén angang ngeni Jiowa full-time, ina ewe alen manaw mi fókkun atoto feiéch. Ina eú angang mi ámmeseik, mi asukulakich me atoto ngenikich pwapwa. Ena angang a ammólnatá chókkana ngeni ewe angang meinisin mi tuppwél ngeni Jiowa repwe pwapwaiti tori feilfeiló fán nemenien an we Mwú. Amwo kich meinisin sipwe sópweló le chechchemeni án ekkewe chón angang full-time ‘lükülük mi pwä lon ar föför’ me ‘ar tong mi pwä lon ar angang weires.’​—1 Tes. 1:3.