1, 2. Met a lamot án mwirimwirin ewe fefin epwe kúna túmún seni, me pwata?

 EWE áeúin oesini lón Paipel a fókkun watte lamotan lón pwénúetáán minne Jiowa a tipeni. Iei met ewe Kot mi enlet a erá lupwen a féri ewe pwon lón Eten: “Üpwe afiukemi [Satan] me ewe fefin, pwal mwirimwirum me mwirimwirin.” Ifa úkúkún watteen ena koput epwe fis lefiler? Jiowa a erá: “Men [mwirimwirin ewe fefin] epwe puri mökürom [Satan], nge en kopwe küw apilipilin pechen.” (Ken. 3:15) Ewe koput lefilen ewe serepenit me ewe fefin epwe fókkun watte pún Satan epwe achocho úkúkún an tufich le nieló mwirimwirin ewe fefin.

² Ina popun, esap eú minen ámáirú án ewe sou makken kélfel a sié ngeni Kot lón iótek fán iten Néún kewe aramas mi filitá, a erá: “Nengeni, chon ü ngonuk ra akürang, nge chokewe mi oputok ra achimwätä mökürer. Ra rawangauei noum aramas fän atuputup. Ra ekiekietä mine a ngau ngeni noum kewe ka tümwünüür. Ra apasa, ‘Ou etto, ousipwe aroserela pwe resap chüen eu mwü.’” (Kölf. 83:2-4) Mi lamot an epwe túmún ewe tettelin famili mwirimwirin ewe fefin epwe feito seni pwe esap rosoló me limengawoló. Ren an epwe túmún, Jiowa a fératiw pwal ekkóch pwonen etipeeú  mi núkúchar repwe annúkatiw pwénúetáán minne a tipeni.

3, 4. (a) Ineet a poputá le pwénútá ewe pwonen etipeeú fán iten ewe Allúk, me met ewe Mwúún Israel a tipeeú le féri? (b) Ewe Allúk a ffér pwe esap fis met?

³ Lupwen mwirimwirin Apraham, Isaak me Jakop ra chómmóngóló wóón fite million, Jiowa a féri eú mwú seniir, ina ewe Mwúún Israel lóóm. Jiowa a néúnéú Moses le féri eú pwonen etipeeú mi kkóló aúchean ren an awora ngeniir ewe Allúk. Iwe ewe Mwúún Israel a tipeeú ngeni ena pwonen etipeeú. Ewe Paipel a erá: “[Moses] a angei ewe puken pwon o aleani ngeni ekewe aramas. Iwe, ra apasa, ‘Meinisin mine ewe Samol mi Lapalap a apasa aipwe aleasochisi o föri.’ Iwe, Moses a angei ewe cha [chchaan ekkewe átemwánnin kou] lon ekewe sepi, a ütätä won ekewe aramas o apasa, ‘Iei chan ewe pwon ewe Samol mi Lapalap a föri ngenikemi pwe longolongun ekei kapas meinisin.’”​—Eks. 24:3-8.

⁴ Ewe pwonen etipeeú fán iten ewe Allúk a poputá pwénútá lón ewe ier 1513 mwen Kraist me wóón ewe chuuk Sinai. Ren ena pwonen etipeeú, ewe Mwúún Israel lóóm a káimuló pwe epwe eú mwú mi kefilitá me ren Kot. Iwe, Jiowa a wiliti ‘ar souapwüng, ar sounemenem, me ar king.’ (Ais. 33:22) Lón uruwoon Mwúún Israel a pwáraatá met a fis lupwen chón Israel ra álleasochisi án Kot kewe allúk mi pwúng me met a fis lupwen ra álleasolap ngeniir. Ewe Allúk a pinei ar repwe pwúpwúlú ngeni ekkewe chón fel ngeni kot chofona me fitiir lón ar fel. A ffér ewe Allúk pwe epwe túmúnú tettelin án Apraham we famili pwe esap limengawoló.​—Eks. 20:4-6; 34:12-16.

5. (a) Ewe pwonen etipeeú fán iten ewe Allúk a suuki alen án chón Israel repwe eáni met sókkun wis? (b) Pwata Kot a likitaló ewe Mwúún Israel?

⁵ Ewe pwonen etipeeú fán iten ewe Allúk a pwal awora eú kókkótun souasor mi liosuetá pwal eú kókkót mi kkóló lamotan epwe kawor lón mwachkkan. (Ipru 7:11; 10:1) Iwe, me ren ena pwonen etipeeú, a suuk ngeni chón Israel eú wis mi kkóló aúchean ar repwe wiliti “eu mwichen souasor,” ika repwe álleasochisi án Jiowa kewe allúk. (Álleani Ekistos 19:5, 6.) Iwe nge, chón Israel rese féri met Kot a kútta seniir. Rese aúcheani warotoon ewe Messaia, ewe ákkáeúin kinikinin mwirimwirin Apraham, nge ra fen oputa. Iwe, Kot a pwal likitiireló.

6. Met ewe pwonen etipeeú fán iten ewe Allúk a apwénúetá?

⁶ Pokiten chón Israel rese amwéchú ar tuppwél ngeni Jiowa, iwe rese tongeni wiliti eú mwichen souasor, nge inaamwo ika a ina usun, esap weween pwe ewe pwonen etipeeú a sópwongaw. Ewe Allúk itá epwe túmúnú ewe mwirimwir me emmweni aramas ngeni ewe Messaia. Lupwen Kraist a war me a fen ffatoló pwe ina i, iwe a fen pwénútá angangen ewe Allúk. Ewe Paipel a erá: “Pun Kraist a fen aükätiu  manamanen ekewe Allük.” (Rom 10:4) Nge, mi chúen wor kapas eis ese pélú: Epwe ié kewe a suuk ngeniir ar repwe tongeni wiliti eú mwichen souasor? Jiowa a awora pwal eú pwonen etipeeú epwe fératá eú mineféén mwú.

7. Met Jiowa a oesini me ren Jeremaia usun ewe pwonen etipeeú mi fé?

⁷ Lóóm lóóm, me mwen wesilóón ewe pwonen etipeeú fán iten ewe Allúk, Jiowa a fen oesini me ren ewe soufós Jeremaia pwe I epwe féri “eu pwon mi fö” ngeni ewe Mwúún Israel. (Álleani Jeremaia 31:31-33.) Ena pwon mi fé epwe sókko seni ewe pwonen etipeeú fán iten ewe Allúk pún epwe atufichi omusomusen tipis nge ese pwal lamot kaworen asorun man. Ifa usun epwe tongeni fis ena?

8, 9. (a) Chchaan Jesus we mi niniló a atufichi met? (b) Met a suuk ngeni chókkewe mi nóm lón ewe pwonen etipeeú mi fé? (Ppii ewe sasing lepoputáán ei lesen.)

⁸ Fitepúkú ier mwirin, Jesus a poputááni ewe Fááfen Ach Samol lón ewe ier 33, Nisan 14. Lupwen Jesus a fós usun ewe kapen wain, a ereni néún kewe 11 aposel mi tuppwél: “Ei kap än Kot we pwon mi fö mi fis ren chai a ninnila fän itemi.” (Luk. 22:20) Mateus a pwal mak usun ena pwóróus nge a aloni alon Jesus we usun ewe wain, iei met a makkeei: “Iei chai a allükülükü än Kot we pwon mi fö ngenikemi, a ninnila fänäsengesin chomong aramas, pwe amusamusen ar tipis kana.”​—Mat. 26:27, 28.

⁹ Chchaan Jesus we mi niniló a apwénúetá ewe pwonen etipeeú mi fé. Ena chcha a atufichi omusomusen tipis fán eú chék tori feilfeiló. Jesus ese kapachelong lón ena pwonen etipeeú pokiten i mi unuséch me ese lamot ngeni omusomusen tipis. Nge Kot a tongeni áeá chchaan Jesus na mi niniló fán iten mwirimwirin Atam kewe. A pwal tongeni mwuuti ekkóch aramas mi tuppwél ar repwe wiliti “nöün” ren an epitiir an we manaman mi fel. (Álleani Rom 8:14-17.) Pokiten me ren Kot, usun itá ese chúen wor án ekkena aramas tipis, iwe, lón och itiitin iir ra usun chék Jesus, Néún Kot we mi unuséch. Ekkewe mi kepit repwe “eti Kraist le wöüni ekewe wöün Kot,” me a suuk ngeniir ewe feiéch ar repwe tufichin wiliti “eu mwichen souasor.” Itá ina ewe feiéch ewe Mwúún Israel mi nóm fán ewe Allúk epwe eáni. Aposel Petrus a fós usun chókkana repwe “eti Kraist le wöüni ekewe wöün Kot,” a erá: “Ämi eu ainang mi fil, eu mwichen souasor än ewe king, eu mwün aramas mi pin, nöün Kot kewe aramas, oua fil pwe oupwe arongafeili än Kot kewe föför mi manaman, i ewe mi körikemiiwu seni rochopwak, pwe oupwe tolong lon an saram mi amwarar.” (1 Pet. 2:9) A ifa me watteen lamoten ena pwonen etipeeú mi fé! A atufichi néún Jesus kewe chón káé ar repwe wiliti ewe oruuen kinikinin mwirimwirin Apraham.

10. Ineet ewe pwonen etipeeú mi fé a poputá le pwénútá, nge pwata a kerán pwénútá lón ena atun?

¹⁰ Ineet ewe pwonen etipeeú mi fé a poputá le pwénútá? Esap lón ewe atun Jesus a fós usun lón ewe sáingoon pwinin a nónnóm wóón fénúfan. Ren an epwe tongeni pwénútá ena pwonen etipeeú, mi lamot chchaan Jesus we epwe niniló me i epwe mwei ngeni Jiowa lón láng aúchean chchaan na. Pwal och, mi lamot ewe manaman mi fel epwe ninitiw wóón chókkewe repwe “eti Kraist le wöüni ekewe wöün Kot.” Ina minne, ewe pwonen etipeeú mi fé a poputá le pwénútá lón ewe Pentikost ier 33 lupwen néún Jesus kewe chón káé mi tuppwél ra kepit ren ewe manaman mi fel.

11. Ifa usun ewe pwonen etipeeú mi fé a atufichi ekkewe chón Jus me ekkewe esap chón Jus ar repwe chóni ewe Israel lón pekin lúkú, nge epwe fitemén chón ena pwonen etipeeú mi fé?

¹¹ Lón och itiitin, ewe pwonen etipeeú fán iten ewe Allúk a fen “mesila” lupwen Jiowa a pwáraatá me ren Jeremaia pwe I epwe féri eú pwonen etipeeú mi fé ren Israel. Iwe nge, ese  wesewesen muchúló tori an a poputá le pwénútá ewe pwonen etipeeú mi fé. (Ipru 8:13) Lupwen a fis ena, me ren ekiekin Kot meinisin chón lúkú i iir mi chék léllé, ekkewe chón Jus me ekkewe esap chón Jus rese sirkumsais, pokiten ‘ra sirkomsais lon letiper. Iei angangen ewe Ngünün Kot, sap angangen ekewe Allük mi makketiu.’ (Rom 2:29) Ren án Kot féri ewe pwonen etipeeú mi fé ngeniir, iwe i a atolonga an kewe allúk “lon ekiekiir o makkeretiu lon letiper.” (Ipru 8:10) Chóchóón chón ewe pwonen etipeeú mi fé, iir 144,000, ina ewe mineféén mwú, “ewe Israelin Kot” are Israel lón pekin lúkú.​—Kal. 6:16, Testament Mi Fö; Pwär. 14:1, 4.

12. Met ewe pwonen etipeeú fán iten ewe Allúk me ewe pwonen etipeeú mi fé ra lélléfengen wóón me sókkofesen wóón?

¹² Met ewe pwonen etipeeú fán iten ewe Allúk me ewe pwonen etipeeú mi fé ra lélléfengen wóón me sókkofesen wóón? Ewe pwonen etipeeú fán iten ewe Allúk a fis lefilen Jiowa me ewe wesewesen Mwúún Israel, nge ewe pwonen etipeeú mi fé a fis lefilen Jiowa me ewe Israel lón pekin lúkú. Moses i ewe chón affér ren ewe pwonen etipeeú fán iten ewe Allúk, nge Jesus i ewe Chón Affér ren ewe pwonen etipeeú mi fé. Ewe pwonen etipeeú fán iten ewe Allúk a pwénútá ren chchaan man, nge ewe pwonen etipeeú mi fé ren chchaan Jesus we mi niniló. Moses i a wisen emmweni ewe Mwúún Israel fán ewe pwonen etipeeú fán iten ewe Allúk, nge Jesus, ewe Mékúren mwichefel, i a wisen emmweni chón ewe pwonen etipeeú mi fé.​—Ef. 1:22.

13, 14. (a) Ifa usun ewe pwonen etipeeú mi fé a weneiti ewe Mwú? (b) Met a lamot pwe ekkewe chón Israel lón pekin lúkú repwe tufichin eti Kraist le nemenem lón láng?

¹³ Ewe pwonen etipeeú mi fé a weneiti ewe Mwúún Messaia pún a fératá eú mwú mi pin, me a suuk ngeni chón ena mwú ar repwe wiliti king me souasor lón ena Mwú lón láng. Ena mwú ina oruuen kinikinin ewe mwirimwirin Apraham. (Kal. 3:29) Ina minne, ena pwonen etipeeú mi fé a alúkúlúkú ngenikich pwe ewe pwonen etipeeú ngeni Apraham epwe wesewesen pwénúetá.

¹⁴ Mi lamot pwal eú mettóch epwe núkúcharetiw lón ena Mwú. Ewe pwonen etipeeú mi fé a fératá ewe Israel lón pekin lúkú me a anúkúnúkatiw pwe chókkana repwe wiliti chón “eti Kraist le wöüni ekewe wöün Kot.” Iwe nge, mi lamot epwe wor eú pwonen etipeeú mi núkúchar mi mut ngeniir ar repwe fiti Jesus lón an we Mwú lón láng usun king me souasor.

15. Ifa ewe pwonen etipeeú Jesus pwisin a féri ngeni néún kewe aposel mi tuppwél?

¹⁵ Mwirin án Jesus poputááni ewe Fááfen Ach Samol, a féri eú pwonen etipeeú ngeni néún kewe chón káé mi tuppwél, ina ewe pwonen etipeeú fán iten eú Mwú. (Álleani Lukas 22:28-30.) Ei pwonen etipeeú a sókko seni ekkewe ekkóch pwonen etipeeú pún Jiowa ese kapachelong lón, a chék fis lefilen Jesus me néún kewe chón káé mi kepit. Lupwen Jesus a erá, “usun Semei a ngeniei ai üpwe nemenem,” usun i a eriri ngeni án Jiowa we pwonen etipeeú ngeni pwe i epwe “eman souasor tori feilfeilachök lon tettelin Melkisetek.”​—Ipru 5:5, 6.

16. Ewe pwonen etipeeú fán iten eú Mwú a atufichi ekkewe Chón Kraist mi kepit ar repwe fet?

¹⁶ Ekkewe 11 aposel mi tuppwél ra ‘eti Jesus lon an kewe riaföü meinisin.’ Ewe pwonen etipeeú fán iten eú Mwú a alúkúlúkú ngeniir pwe repwe eti i lón láng me repwe mwot wóón leenien motun king pwe repwe nemenem usun king me souasor. Iwe nge, esap chék ekkena 11 aposel repwe wiseni ena wis. Jesus a pwá ngeni aposel Johannes lón eú lángipwi me apasa: “Iö mi pwora ngeni mine a ngau üpwe mwüt ngeni pwe epwe etiei le mot won ewe lenien motun king, usun pwal ngang üa pwora o mot ren Semei won an lenien motun king.” (Pwär. 3:21) Ina minne, ena pwonen etipeeú fán iten eú Mwú,  a fis lefilen Jesus me ekkewe 144,000 Chón Kraist mi kepit. (Pwär. 5:9, 10; 7:4) Ina ewe pwonen etipeeú mi núkúchar mi mut ngeniir ar repwe eti Jesus le nemenem lón láng. A usun chék emén fin apwúpwúlú mi apwúpwúlú ngeni emén king, mwirin ar apwúpwúlú a pwal tongeni eti pwúlúwan we lón wisan we wisen emén king. Ewe Paipel a fós usun ekkewe Chón Kraist mi kepit pwe iir ra usun emén “fin apwüpwülü” ngeni Kraist, “eman föpwül mi limelimöch” mi fen pwon pwe epwe apwúpwúlú ngeni Kraist.​—Pwär. 19:7, 8; 21:9; 2 Kor. 11:2.

17, 18. (a) Áweweei wonu pwonen etipeeú sia fen pwóróus wóón nge ra weneiti ewe Mwú. (b) Pwata sia tongeni fókkun lúkúlúk wóón ewe Mwú?

¹⁷ Meinisin ekkewe pwonen etipeeú sia pwóróus wóór lón ekkeei ruu lesen ra weneiti eú are fitu mettóch mi lamot lón ewe Mwú. (Ppii ewe chart “Ifa Usun Kot Epwe Apwénúetá Minne A Tipeni.”) Iwe, a ffat pwe ekkewe pwonen etipeeú ra fókkun anúkúcharatiw kókkótun ewe Mwú. Ina minne sia tongeni fókkun lúkúlúk pwe ewe Mwúún Messaia, ina met Kot epwe áeá le apwénúetá minne a tipeni fán iten aramas me fénúfan me lepoputáán.​—Pwär. 11:15.

¹⁸ Ese fókkun wor tipemwaramwar pwe ewe Mwú epwe atoto feiéch fóchófóch ngeni aramas. Fán ach lúkúlúk mi núkúchar, sia tongeni apasa pwe ewe Mwúún Kot, ina chék ewe mwú epwe pwákini meinisin án aramas osukosuk. Amwo sipwe tinikken le afalafala ngeni aramas ena pwóróus mi enlet!​—Mat. 24:14.