Satan usun chék carbon monoxide. Sise kúna ren mesach, a fókkun weires le esilla me a wesewesen efeiengaw. Nge a wor álillis seni Kot. Esap wor óm niwokkusiti Satan ika pwe kopwe alamota ekkeei liffang seni Kot.

Manamanen óm kefil. James 4:7 a erá “Oupwe ü ngeni Tefil, iwe, epwe sü senikemi.” Ewer Satan mi manaman nge ese tongeni aumwesuk le féri met kese mochen féri. Mi wor óm kefil. Áeúin Petrus 5:9 a erá “I [ewe Tefil] ewe oupwe ü ngeni, oupwe nüküchar lon ämi lükülük.” Chemeni pún mwirin án Jesus unusen ttii seni ekkewe úlúngát sóssót, Satan a likitaló. (Mateus 4:11) Ka pwal tongeni filatá le ú ngeni án Satan sóssót.

Ririéch ngeni Kot. James 4:8 a pesekich le “arap ngeni Kot.” Jiowa pwisin a etiwok le ámááraatá eú ririéch ngeni. Kopwe ifa? Poputá ren óm alapaaló óm káé usun i seni ewe Paipel, ina met a múrinné seni meinisin. (Johannes 17:3) Met ka káé usun Jiowa epwe amwékútuk le tongei i, iwe ena tong epwe amwékútuk le féri letipan. (1 Johannes 5:3) Lón an a lapóló óm arap ngeni Semom we lón láng, met i epwe pwal féri? James a sópweló le apasa pwe Kot “epwe arap ngenikemi.”

Ewe pwonen túmún. Än Salomon Fos 18:10 a erá: “Iten ewe Samol mi Lapalap a usun chök eu imw tekia mi pöchökül, ewe chon pwüng a sälong lon o küna manau.” Esap itá weween pwe pwisin iten Jiowa na epwe túmúnuk seni feiengaw. Nge fen weween pún chón enletin súféliti itan na ra tongeni kékkéri me tingor an túmún fansoun meinisin.

 Eú leenien áppirú. Föför 19:19 lón ewe Paipel Kapasen God a erenikich usun eú minen káit seni ekkewe mineféén Chón Kraist lón Efisos: “Chómmóng me neir ra angangen pout ra ionfengeni nour kewe puk, iwe ra kenireno me mwen mesen ekkewe aramas. Ra apacha fengeni niwinin ekkewe puk, iwe niwinin meinisin mi tori nime ngöröu foun moni silver.” * Chókkana ra kenaló meinisin met mi eriri ngeni angangen roong, inaamwo ika ra mémmong. Ar leenien áppirú a tongeni álisikich. A chéúfetál angangen roong me magic. Ekkewe mwo mettóch usun itá ese wor efeiengawer nge mi eriri ngeni angangen roong ra tongeni wáási leenien ekkewe chónláng mi ngaw lón manawom. Mi wesewesen watte aúchean óm kopwe féri ese lifilifil met le túmúnuk seni ekkena pisekin are féfférún angangen roong.​—Tuteronomi 18:10-12.

Lón ekkewe fansoun mwen an tori 50 ierin Rogelio, ewe sia fen pwóróus usun me mwan, ese lúkú pwe mi wor ewe Tefil. Nge a ekkesiwili an na ekiek. Pwata? A erá: “Epwe kerán iwe áeúin lón manawei ai upwe néúni eú Paipel. Ai sile seni Paipel a ánneta ngeniei pún mi wor ewe Tefil. Ai na sile a kan túmúnúei iei ai usap tupuló ren án Satan kewe minen otuputup.”

Ka mochen kúna atun esap chúen wor Satan? Ka tongeni. Paipel a oesini eú fansoun lupwen ewe Tefil, ewe mi otupu chómmóng, epwe “koturulong lon ewe nomun ekkei me primston.” (Pwärätä 20:10) Wesewesen ekkei me primston rese tongeni efeiengawa emén ngún sise tongeni kúna. Ina popun ewe nóómun ekkei a esissillatá máló fóchófóch. Satan esap chúen nóm tori feilfeiló. A ifan me watteen apwapwaan na fansoun fán iten chón tongei Kot!

Nge iei, achocho chék le káé usun Jiowa me an féffér. * Anchangei pún ka manaw lón ena atun sia kerán tongeni enletin erá, “Ese wor Satan!”