MET LAMOTEN AI UPWE CHÚEN MANAW?
2 Pokiten Mi Wor Álillis
“Oupwe likiti ngeni Kot ämi öürek meinisin, pún i a ekieki met oupwe feiöch ren.”—1 PETRUS 5:7.
Eli kopwe ekiekin máló atun ka meefi pwe ese wor met kopwe tongeni féri le ámúrinnééló nónnómum. Nge kopwe ekieki usun ekkóch alen álillis a kawor fán itom.
Iótek. Iótek esap itá chék eú alen óm kopwe meefi kinamwe are eú mettóch sia kan féri atun ese chúen wor ach ápilúkúlúk. Ina eú wesewesen pwóppwóróusfengen me Jiowa Kot, ewe mi tongeok. Jiowa a mochen kopwe ereni óm kewe aúrek. Ren enletin, ewe Paipel a pesekich le: “Monätä won ewe Samol mi Lapalap om weires, pwe i epwe tümwünük.”—Kölfel 55:22.
Pwata kese awora fansoun le iótek ngeni Kot ikenái? Néúnéú itan we, Jiowa, me kapas ngeni seni letipom. (Kölfel 62:8) Jiowa a mochen kopwe poputá le sissilei i usun emén chiechiom. (Aisea 55:6, James 2:23) Iótek eú alen pwóppwóróusfengen mi tongeni suuk ngonuk ese lifilifil kulók me leeni.
Me ren eú repot seni ewe Pekin Chón Eppeti Án Aramas Pwisin Nireló (American Foundation for Suicide Prevention), a erá pwe “lap ngeni meinisin ekkewe ra pwisin nireló ra semmwen lón tupwuer. Nge fán chómmóng ese wor a esilla, affata pwe a úriir ena semmwen me ngeniir sáfeian.”
Chókkewe mi tongeok. Manawom mi aúchea me ren ekkewe ekkóch, pachelong chón óm famili are chiechiom kewe ra fen eli apasa ar ekkekieki usum. Mi wor aramas mi chúnguk, pachelong ekkóch kese mwo chuuriir fán eú. Áwewe chék atun Chón Pwáraatá Jiowa ra afalafal, fán ekkóch ra chuuri aramas mi ápilúkúlúkúngaw, ekkóch me leir ra pwári pwe a wesewesen lamot ngeniir álillis me ra fen ekiekin pwisin nireló. Ewe angangen afalafal imw me imw a atufichi ekkewe Chón Pwáraatá Jiowa le álisi ekkena sókkun aramas. Ra áppirú Jesus ren ar tongei chón órur kewe. Ra tongeok.—Johannes 13:35.
Álillis seni pioing. Ekkewe ekiek emén a eáni ren an mochen pwisin nieló ra kan pwári pwe mi wor an semmwen lón tupwuan, áwewe chék ren och semmwen mi efisatá letipechou. Kosap sáw ika ka eáni ena esin semmwen pún a usun chék a uruk och semmwen lón inisum. Ekkóch sousile mwo ra aléllé ngeni moor are ngútúpwéét ewe semwenin letipechou. Usun chék án aramas ese lifilifil úri moor are ngútúpwéét, iwe semwenin letipechou a tongeni tori emén lón manawan fán ekkóch, nge a tongeni chikar seni. *
CHECHCHEMENI EI: Lap ngeni, ese tufich án emén epwe pwisin likiitú ngeni semwenin letipechou mi kon áweires. Iwe nge ka tongeni sópwéch ika emén a álisuk.
MET KA TONGENI FÉRI IEI: Kútta emén tokter mi kan ákkálisi aramas mi semmwen lón tupwuer, áwewe chék ren semwenin letipechou.
^ Ika pwe óm ekiekin pwisin niukóló a kon péchékkúl are fis iteitan, kútta met sókkun álillis a kawor fán itom, eli epwe wor ia kopwe kékkéri ie pwe repwe álisuk are ewe ofesin mental health. Ekkewe aramas ra nóm lón ekkeei leeni ra káit pwe repwe tufich le awora álillis.
