1, 2. (a) Ikkefa ekkewe kapas áwewe Jesus a apwóróusa ngeni chiechian kewe? (Ppii ewe sasing lepoputáán ei lesen.) (b) Met a lamot sipwe silei usun ewe kapas áwewe usun ekkewe siip me siike?

 JESUS a fós ngeni chiechian kewe Petrus, Andru, James, me Johannes usun och mettóch mi fókkun amwasangasang. Mwirin án Jesus apwóróusa ngeniir ekkewe kapas áwewe usun ewe chón angang mi alúkúlúk me tipachem, ekkewe engol fépwúl, me ekkewe úlúmén chón angang, a pwal eáni eú kapas áwewe. Lón ei kapas áwewe, Jesus a fós usun ewe fansoun lupwen ewe “Nöün Aramas” epwe áimufeseni aramas lón ruu mwich, eú mwichen siip me eú mwichen kuuch, are siike. Me a pwal fós usun eú mwich mi aúchea, ekkewe a eita ngeniir ‘pwiin’ ewe King.​—Álleani Mateus 25:31-46.

² Néún Jiowa kewe aramas lón ach ei fansoun ra usun chék ekkewe aposel, iir ra pwal fókkun mochen weweiti ena kapas áwewe pún Jesus a áweweei pwata aramas repwe kúna manaw are máló. Jesus a apasa pwe ekkóch repwe kúna manaw esemuch nge ekkóch repwe kúna málófóchofóch. Ina pwata a kon  lamot ach sipwe silei weween ena kapas áwewe me met sipwe féri pwe sipwe kúna manaw esemuch. Iwe, lón ei lesen, sipwe pélúweni ekkeei kapas eis: Ifa usun Jiowa a fen álisikich le weweiti ei kapas áwewe? Ifa usun sia silei pwe ei kapas áwewe a menlapei lamoten ewe angangen afalafal? Ié kewe repwe wisen afalafal? Me pwata a lamot án aramas repwe tuppwél iei ngeni “ewe king” me ‘pwiin’ kewe?

3, 4. (a) Met a lamot sipwe silei pwe sipwe tongeni weweiti ei kapas áwewe? (b) Lón 1881, ifa usun ewe Watch Tower a áweweei ei kapas áwewe?

³ Ren ach sipwe weweiti ewe kapas áwewe usun ekkewe siip me siike, a lamot sipwe silei (1) ié ewe “Nöün Aramas” are ewe “king,” ié ekkewe siip me ekkewe siike, me ié kewe ‘pwiin’ ewe King? (2) ineet ewe “Nöün Aramas” epwe áimufeseni, are etittina ekkewe siip me ekkewe siike? me (3) pwata ekkóch ra iteni siip nge ekkóch siike?

⁴ Lón ewe ier 1881, ewe Watch Tower a erá pwe ewe “Nöün Aramas” are ewe “king,” ina i Jesus. A áweweei pwe ‘pwiin’ ewe King kewe esap chék chókkewe repwe fiti Jesus le nemenem seni láng, nge pwal ekkewe repwe manaw wóón fénúfan lupwen repwe unuséchúló. Ena Watch Tower a pwal erá pwe ewe angangen áimufeseni aramas epwe fis atun án Kraist Nemenem Úkúkún Engeréú Ier, nge ekkewe mi áppirú án Kot tong lón mettóch meinisin ra féri, repwe iteni siip.

5. Lón 1923, ifa usun néún Jiowa kewe aramas ra weweiti ewe kapas áwewe?

⁵ Mwirin och fansoun, Jiowa a álisi néún kewe aramas ar repwe alapaaló ar weweiti ei kapas áwewe. Lón 1923, ewe Watch Tower minen October 15 a erá pwe ewe “Nöün Aramas,” ina i Jesus. Nge a pwáraatá seni ekkóch wokisin lón Paipel pwe ‘pwiin’ ewe King kewe lón ewe kapas áwewe ra wewe ngeni chék ekkewe repwe fiti Jesus le nemenem, me iir meinisin repwe nóm lón láng atun Jesus epwe Nemenem Úkúkún Engeréú Ier. A pwal erá pwe ekkewe siip, iir chókkewe repwe manaw wóón fénúfan fán án Jesus me pwiin kewe nemenem. Pokiten ewe kapas áwewe a erá pwe ekkena aramas ra álisi pwiin ewe King kewe, iwe ewe angangen áimufeseni aramas, are ewe angangen kapwúng, esap fis atun ewe Nemenem Úkúkún Engeréú Ier, nge epwe fis me mwen ena, atun ekkewe mi kepit, pwiin Jesus kewe, ra chúen nóm wóón fénúfan. Ena lesen a pwal apasa pwe ekkewe siip repwe wewe ngeni ekkewe mi lúkú Jesus me lúkú pwe ewe Mwúún Kot epwe ámúrinnééló manawen aramas.

6. Lón 1995, met a siwil lón ach weweiti ewe kapas áwewe?

⁶ Ren fite fite ier, sia ekieki pwe ewe angangen kapwúng a fiffis lón ei fansoun lesópwólóón nge a lóngólóng wóón ewe angangen afalafal. Ika aramas ra etiwa, iwe, iir siip, nge ika ra oput, iir siike. Nge lón Ewe Leenien Mas minen October 15, 1995 lón fósun Merika, ach weweiti weween ei kapas áwewe a siwil. Lón ena Leenien Mas a apépééi Mateus 24:29-31 (álleani) ngeni Mateus 25:31, 32 (álleani), me a áweweei pwe Jesus epwe apwúngú aramas atun ewe riáfféú mi lapalap lupwen ewe Néún aramas epwe “war lon lingan.” *

7. Met weween ewe kapas áwewe?

⁷ Iei a fataffatéch ach weweiti ewe kapas  áwewe usun ekkewe siip me siike. Sia silei pwe ewe “Nöün Aramas” are ewe “king,” ina i Jesus. ‘Pwiin’ ewe King kewe, iir ekkewe mi kepit ren ewe manaman mi fel, chókkewe repwe fiti Jesus le nemenem lón láng. (Rom 8:16, 17) Ekkewe “sip” me “kuuch,” are siike, iir aramas seni fénú meinisin. Epwe pwúngúló ika iir siip are siike lesópwólóón ewe riáfféú mi lapalap, ewe mettóch epwele fis ekiseló chék. Me sia silei pwe Jesus epwe apwúngú aramas me ren féfférúr ngeni ekkewe mi kepit ra chúen nóm wóón fénúfan. Sia fókkun kilisou pún Jiowa a álisikich le alapaaló ach weweiti ei kapas áwewe me ekkewe pwal ekkóch mi mak lón Mateus sópwun 24 me 25!

8, 9. Pwata Jesus a erá pwe ekkewe siip, iir “chon pwüng”?

⁸ Lón ewe kapas áwewe usun ekkewe siip me siike, Jesus ese néúnéú ekkewe kapas “afalafal” are “angangen afalafal.” Iwe, ifa usun sia silei pwe ena kapas áwewe a áiti ngenikich pwe a fókkun lamot ewe angangen afalafal?

⁹ Ren ach sipwe silei pélúwen ena kapas eis, a lamot sipwe chechchemeni pwe Jesus a eáni ewe kapas áwewe pwe epwe áiti ngeni aramas eú pwóróus. I ese fós usun wesewesen siip me siike. Pwal ina chék usun, ewe kapas áwewe ese wewe ngeni pwe aramas meinisin epwe pwúngúló pwe iir siip, itá repwe liffang ngeni ekkewe mi kepit mwéngé me úf, túmúnúúr ika ra semmwen, are áámweer ika ra kalapus. Nge Jesus a áweweei pwe ekkewe siip, iir “chon pwüng” pokiten ra lúkú pwe ekkewe mi kepit, iir pwiin kewe me pokiten ra tuppwél ngeni ekkewe mi kepit lón ekkeei ránin lesópwólóón mi áweires.—Mat. 10:40-42; 25:40, 46; 2 Tim. 3:1-5.

10. Ifa usun ekkewe siip ra tongeni álisi pwiin Kraist kewe?

¹⁰ Lupwen Jesus a eáni ewe kapas áwewe usun ekkewe siip me siike, a fen pwal fóffós usun met epwe fis lón ewe fansoun lesópwólóón. (Mat. 24:3) Áwewe chék, a erá: “Aramas repwe afalafalafeili ewe Pworausen Manau usun ewe Mwün Kot won unusen fanüfan.” (Mat. 24:14) Pwal eú, me mwen án Jesus fós usun ekkewe siip me siike, a kerán chék wes le eáni ewe kapas áwewe usun ekkewe úlúmén chón angang. Jesus a eáni ei kapas áwewe pwe epwe áiti ngeni ekkewe mi kepit pwe a lamot repwe angang weires lón ewe angangen afalafal. Nge iir ra chék chókúkkún me a kon watte ewe angang! A ewisa ngeniir ar repwe afalafal ngeni “aramas meinisin” me mwen warotoon ewe sópwólóón. Lón ewe kapas áwewe usun ekkewe siip me ekkewe siike, sia kúna pwe ekkewe “sip” ra kan álisi pwiin Jesus kewe. Me ar álisiir ren ewe angangen afalafal, ina eú álillis mi fókkun lamot. Nge met, mi naf ar repwe chék awora asor moni fán itan, are apéchékkúla ngeniir ar repwe féri ena angang?

11. Ifa ewe kapas eis neman ekkóch repwe eppiietá, me pwata?

¹¹ Ikenái, mi wor walu million néún Jesus chón káé, me lap ngeniir rese kepit ren ewe manaman mi fel. Jesus ese ngeni chókkana rese kepit ekkewe “föün moni silifer.” Nge a fen ngeni pwiin kewe mi kepit. (Mat. 25:14-18) Iwe, neman ekkóch repwe eis, ‘Ika Jesus ese ngeniir ekkewe féún moni silifer, iwe, itá mi pwal lamot repwe afalafal?’ Ewer. Sipwe ppii ika pwata.

12. Met sia káé seni minne Jesus a apasa lón Mateus 28:19, 20?

 ¹² Jesus a allúkú ngeni meinisin néún chón káé ar repwe afalafal. Mwirin án Jesus manawsefál, a ereni ekkewe chón tapweló mwirin ar repwe álisi aramas pwe repwe pwal wiliti néún chón káé me áiti ngeniir ‘meinisin mine a allük ngeniir.’ Iwe, ekkena mineféén chón káé repwe pwal álleasochisi án Jesus na allúk ar repwe afalafal. (Álleani Mateus 28:19, 20.) A ffat pwe ikaamwo sia eáni ewe ápilúkúlúkún manaw lón láng are wóón fénúfan, nge a lamot oukich meinisin sipwe afalafal.​—Föf. 10:42.

13. Met sia káé seni ewe lángipwi Johannes a kúna?

¹³ Sia káé seni ewe puken Pwärätä pwe ekkewe mi kepit me pwal ekkóch repwe féri ewe angangen afalafal. Jesus a ngeni aposel Johannes ewe lángipwi usun emén “Fin apwüpwülü söfö” mi etiwa aramas ar repwe etto ún ewe konik mi atoto manaw. Ewe fin apwúpwúlú sefé a wewe ngeni ekkewe 144,000 mi kepit repwe eti Jesus le nemenem lón láng. (Pwär. 14:1, 3; 22:17) Ewe konik a wewe ngeni mettóch meinisin Jiowa a awora pwe aramas repwe ngaseló seni tipis me máló ren manamanen án Kraist we asoren méén kepich. (Mat. 20:28; Joh. 3:16; 1 Joh. 4:9, 10) Ekkewe mi kepit ra tinikken le asukula aramas usun ewe méén kepich me ifa usun ra tongeni kúna feiéch seni. (1 Kor. 1:23) Nge lón ewe lángipwi, a pwal wor eú mwichen aramas rese kepit ra ápilúkúlúkún kúna manaw wóón fénúfan. A pwal allúk ngeniir ar repwe ereni aramas: “Etto!” Ra álleasochisi ena allúk ren ar asukula aramas usun ewe kapas allim. Iwe, ei lángipwi a áiti ngenikich pwe meinisin chókkewe mi etiwa ewe kapas allim repwe afalafala ngeni ekkewe ekkóch.

14. Ifa usun sia álleasochisi “än Kraist allük”?

 ¹⁴ Wisen meinisin chókkewe mi álleasochisi “än Kraist allük” ar repwe afalafal. (Kal. 6:2) A chék léllé ekkewe allúk Jiowa a ngeni meinisin chón fel ngeni i. Áwewe chék, a ereni ekkewe chón Israel: “Epwe eu chök allük fän iten ekewe re wilipos me re ekis mi nom remi.” (Eks. 12:49; Lif. 24:22) Pwúngún, ikenái sise chúen nóm fán nemenien meinisin ekkewe allúk Kot a ngeni ekkewe chón Israel. Nge sia nóm fán nemenien “än Kraist allük” inaamwo ika kich mi kepit are sise. Eú me lein ekkewe mettóch mi fókkun lamot Jesus a áiti ngenikich, ina ach sipwe pwáraatá tong. (Joh. 13:35; Jas. 2:8) A lamot sipwe tongei Jiowa, Jesus, me aramas. Nge eú mettóch mi fókkun lamot sipwe féri pwe sipwe pwáraatá ena tong, sipwe ereni aramas ewe kapas allim usun ewe Mwú.—Joh. 15:10; Föf. 1:8.

15. Pwata sia tongeni erá pwe Jesus a ereni meinisin néún chón káé ar repwe afalafal?

¹⁵ Minne Jesus a ereni néún kewe fitemén chón káé a pwal tongeni weneiti chómmóng chón káé. Áwewe chék, Jesus a féri eú pwonen etipeeú ngeni 11 chék me lein néún kewe chón káé me a pwon ngeniir pwe repwe eti le nemenem lón Mwúún we. Nge ren enletin, meinisin ekkewe 144,000 repwe eti i le nemenem. (Luk. 22:29, 30; Pwär. 5:10; 7:4-8) Pwal eú, mwirin án Jesus manawsefál, fitemén chék me lein néún kewe chón káé ra rongorong an allúk pwe repwe afalafal. (Föf. 10:40-42; 1 Kor. 15:6) Nge meinisin néún Jesus kewe chón káé lón fansoun ekkewe aposel ra álleasochisi ena allúk. (Föf. 8:4; 1 Pet. 1:8) A pwal ina usun ikenái, sia silei pwe a lamot sipwe afalafal, inaamwo ika sise rongorong méngúngúún Jesus an erenikich ach sipwe féri ei angang. Iei arapakkan walu million chóchóón kich mi féri ei angangen afalafal. Sia silei pwe ren ach afalafal, sia pwáraatá pwe sia enletin lúkú Jesus.—Jas. 2:18.

16-18. Ifa usun sipwe álisi pwiin Kraist kewe fán tuppwél, me pwata a lamot sipwe féri ena iei?

¹⁶ A lallapóló án Satan maunei pwiin Kraist kewe mi kepit mi chúen nóm wóón fénúfan, me a silei pwe “a mochomoch chök an fansoun.” (Pwär. 12:9, 12, 17) Inaamwo ika Satan a maunei ekkewe mi kepit, nge iir ra sópweló le emmweni ewe angangen afalafal, me lón uruwoon aramas a kerán iei ewe úkúkún chómmóngun chóchóón aramas mi rongorong ewe kapas allim. A ffat pwe Jesus a eti ekkewe mi kepit, me a ekkemmweniir.​—Mat. 28:20.

¹⁷ Sia meefi watteen aúchean wisach we le álisi pwiin Kraist kewe le afalafal. Sia pwal akkawora álillis ren ach eáni asor néúch moni me sia kan angang weires le aúetá ekkewe Leenien Mwich, Leenien Mwichelap, me ekkewe keangen ofesilap. Lupwen sia álleasochisi ekkewe mwán mi ásimaw me pwal ekkewe ekkóch mwán mi filitá me ren ewe “chon angang mi allükülük o tipachem,” iwe, sia pwáraatá pwe sia mochen álisi pwiin Kraist kewe.—Mat. 24:45-47; Ipru 13:17.

¹⁸ Ekiseló chék ekkewe mi kepit mi chúen nóm wóón fénúfan repwele angei ar sáingolóón pwaau. Mwirin ena, ekkewe chónláng repwe ásechaló ekkewe “rüanü asepwäl,” me ewe riáfféú mi lapalap epwe poputá. (Pwär. 7:1-3) Nge me mwen an epwe poputá ewe maunen Armaketon, Jesus epwe angei ekkewe mi kepit pwe repwe nóm lón láng. (Mat. 13:41-43) Iwe ika sia mochen sipwe emén me lein ekkewe siip lupwen Jesus epwe feito, iei ewe fansoun sipwe tuppwél ngeni pwiin Kraist kewe mi kepit.