1. Pwata a lamot ach sipwe akkamwéchú péchékkúlen ach riri ngeni Jiowa?

 IKA en emén Chón Pwáraatá usun Jiowa mi fen papatais, iwe a wor reom och mettóch mi fókkun aúchea. A wor pwisin óm riri ngeni Jiowa. Nge án Satan ei ótót a achocho le atai ena riri, me a pwal tongeni ngawóló ren pwisin ach kewe apwangapwang. Ina minne a lamot kich meinisin sipwe akkamwéchú péchékkúlen ach riri ngeni Jiowa úkúkún ach tufich.

2. (a) Met weween eú riri? (Ppii ewe footnote.) (b) Ifa usun sia tongeni apéchékkúlaló ach riri ngeni Jiowa?

² Jiowa, i wesewesen Emén me reom? Ka meefi pwe i Chiechiom? En mi mochen an epwe péchékkúleló óm ririéch ngeni? James 4:8 a erenuk met a lamot kopwe féri: “Oupwe arap ngeni Kot, iwe, epwe arap ngenikemi.” Óm riri ngeni Jiowa a lóngólóng wóón pwisin en me Jiowa. * Ika ka arap ngeni Jiowa, i epwe pwal arap ngonuk. Lapólóón óm féri ei,  pwal ina lapólóón óm meefi pwe i wesewesen emén Chiechiom, iwe óm riri ngeni epwe péchékkúleló me kopwe meefieni meefien Jesus ewe atun a apasa: “Ewe mi tinieito a let [“wesewesan,” NW]” me, “ngang üa silei i.” (Joh. 7:28, 29) Nge ikkefa ekkóch mettóch ka tongeni féri pwe kopwe akkarap ngeni Jiowa?

3. Ifa usun sia tongeni pwóppwóróusfengen me Jiowa?

³ Ika ka mochen akkarap ngeni Jiowa, a fókkun lamot ámi oupwe pwóppwóróusfengen iteitan. Nge ifa usun? Ekieki ifa usun en me emén chiechiom mi nóm towau oua tongeni pwóppwóróusfengen. Oua tongeni mak fengen me fósfengen wóón phone fán chómmóng. Iwe, ka fós ngeni Jiowa atun ka iótek ngeni iteitan. (Álleani Kölfel 142:2.) Nge ifa usun ka tongeni mut ngeni Jiowa an epwe fós ngonuk? Ka féri ena atun ka ákkálleani an we kapas, ewe Paipel, me ekilonei. (Álleani Aisea 30:20, 21.) Sipwe ppii ifa usun ámi pwóppwóróusfengen me Jiowa a tongeni apéchékkúlaló óm riri ngeni me efisi óm kopwe meefi pwe i wesewesen emén Chiechiom.

4, 5. Ifa usun Jiowa a fós ngonuk atun ka káé ewe Paipel? Eáni eú kapas áwewe.

⁴ Sia silei pwe ewe Paipel, ina án Kot pwóróus ngeni aramas meinisin. Nge met, Paipel a tongeni álisuk le akkarap ngeni Jiowa? Ewer! Atun óm ákkálleani me kákkáé ewe Paipel, ekiekifichi meefiom ren met ka álleani. Pwal ekieki ifa usun ka tongeni apwénúetá met ka káé. Atun ka féri ena, ka mut ngeni Jiowa an epwe fós ngonuk. A wiliti emén wesewesen Chiechiom mi ákkálisuk me ka akkarap ngeni i.​—Ipru 4:12; Jas. 1:23-25.

⁵ Áwewe chék, met ka meefi atun ka álleani alon Jesus ei: “Ousap iseis wöümi fän püsin itemi won fanüfan”? Ika ka achocho úkúkún óm tufich le akkomwa Jiowa lón manawom, kopwe meefi pwe i a pwapwa reom. Nge neman ka álleani alon Jesus kana me ka mirititi pwe a lamot óm kopwe ámecheresaaló nónnómun manawom me alapaaló óm nefótófót wóón óm angang ngeni Kot. Ika ina, iwe Jiowa a álisuk le weweiti met ka tongeni féri pwe kopwe akkarap ngeni i.​—Mat. 6:19, 20.

6, 7. (a) Atun sia káé ewe Paipel, met epwe fis ngeni ach tong ngeni Jiowa me an tong ngenikich? (b) Itá epwe ifa populapen ach káé Paipel?

 ⁶ Pwúngún pwe atun sia káé ewe Paipel, sia káé usun ekkewe siwil sia tongeni féri pwe sipwe ámúrinnééló ach angang ngeni Jiowa. Nge sia pwal káé usun ekkewe mettóch a féri me napanapan kewe mi múrinné, ekkewe ra alapaaló ach tongei. Atun a mááritá ach tongei, a pwal lapóló an tongekich, iwe ach riri ngeni a péchékkúleló.​—Álleani 1 Korint 8:3.

⁷ Ika sia mochen akkarap ngeni Jiowa, a lamot an epwe pwúng ewe popun sia káé Paipel. Jesus a apasa: “Iei manau esemüch: Ar repwe silei en, ewe eman chök Kot mi let, repwe pwal silei Jesus Kraist, ewe ka tinato.” (Joh. 17:3) Sia tongeni káé chómmóng mettóch mi apwapwa me minefé atun sia álleani ewe Paipel, nge populapen ach káé pwe sipwe silefichi Jiowa.​—Álleani Ekistos 33:13; Kölf. 25:4.

8. (a) Met neman ekkóch repwe ekieki usun féfférún Jiowa ngeni King Ussia? (b) Ika ka silei Jiowa, epwe ifa meefiom ren minne a féri?

⁸ Lupwen sia silei Jiowa usun emén wesewesen Chiechiach, sise kon osukosuk ika ewe Paipel ese áweweei ewe popun i a féri eú me eú mettóch. Áwewe chék, lupwen Ussia a kingen Juta, ekkewe aramas ra fel ngeni ekkewe kot chofona. Ussia ese fitiir lón ar kana féffér. A sópweló le “föri mine a pwüng me fän mesen ewe Samol mi Lapalap.” (2 King 15:1-5) Nge Jiowa a apwúngú ren rupun pwétúr. Pwata? Ena pwóróus ese affata. Iwe, met ka meefi ren minne Jiowa a féri? A aosukosukok me efisi óm kopwe meefi pwe ese pwúng ewe popun Jiowa a apwúngú Ussia ren rupun pwétúr? Aapw. Ika ka wesewesen sileéchú Jiowa, iwe ka silei pwe an angangen apwúng a chék pwúng iteitan. Fansoun meinisin i a eáni apwúng “fän aüküköch.” (Jer. 30:11) Iwe, inaamwo ika kese silei ewe popun Jiowa a apwúngú Ussia nge ka tongeni lúkúlúk pwe mi pwúng minne a féri.

9. Ikkefa ekkóch pwóróus mi álisikich le weweiti popun án Jiowa apwúngú Ussia ren rupun pwétúr?

⁹ Ewe Paipel a áiti ngenikich pwal ekkóch pwóróus mi tichik usun King Ussia. Pwóróusan we lón 2 Kronika 26:3-5, 16-21 a apasa pwe i “a föri mine a pwüng me fän mesen ewe Samol mi Lapalap.” Nge a pwal erá pwe mwirin “a lamalamtekia pwe a tolong lon feiengau.” Ena king a féri och mettóch mi mumu ngeni chék souasor ar repwe féri. Walik me emén souasor ra ereni pwe met a féri a mwáál me ra pwal sótun aúkatiw i. Iwe, ifa féfférún Ussia ngeniir? A fen kon lamalamtekia, iwe a song ngeniir! Ekkeei pwóróus mi tichik ra álisikich le weweiti ewe popun Jiowa a apwúngú ena king ren rupun pwétúr.

10. Pwata ese pwal lamot ach sipwe silei popun án Jiowa féri och mettóch? Ifa usun epwe lapóló ach lúkúlúk pwe minne Jiowa a féri a pwúng fansoun meinisin?

¹⁰ Ifa ewe lesen mi lamot sia káé? Lón pwóróusen King Ussia, a naf ekkewe pwóróus mi tongeni álisikich le weweiti popun án Jiowa apwúngú i. Nge ika Paipel ese affatatiw meinisin tichikin, met kopwe féri? Kopwe ekieki ika mi fen pwúng minne Jiowa a féri? Are kopwe meefi pwe a naf ekkewe pwóróus lón Paipel ren óm kopwe lúkú pwe minne Kot a féri a chék pwúng fansoun meinisin? (Tut. 32:4) Lapólóón óm silei napanapen Jiowa kewe, pwal ina lapólóón óm tongei  me lúkúlúk wóón i. Iwe ese pwal chúen wor lamoten óm kopwe silei meinisin popun an féri och mettóch. Atun óm káé Paipel, Jiowa epwe wesewesen Emén me reom me kopwe akkarap ngeni i.​—Kölf. 77:12, 13.

11-13. Ifa usun ka silei pwe Jiowa a aúselinga iótek? (Ppii ewe sasing lepoputáán ei lesen.)

¹¹ Atun sia iótek, sia arap ngeni Jiowa. Sia mwareiti i, kilisou ngeni, me tingorei an álillis. (Kölf. 32:8) Nge ika ka mochen kopwe pacheéch ngeni Jiowa, a lamot kopwe lúkúlúk pwe i a aúselinga iótek.

¹² Ekkóch aramas ra erá pwe Kot ese aúselinga iótek me iótek ina chék och mettóch epwe ekinamweeló meefiom. Ra lúkú pwe iótek a chék álisuk le ekiekiéchú óm kewe osukosuk me pwisin kúna pélúwen óm kewe kapas eis. Mi pwúng, iótek neman a tongeni álisuk lón ekkena napanap. Nge lupwen ka fós ngeni Jiowa lón iótek, i a wesewesen akkaúseling ngonuk. Ifa usun kopwe tongeni lúkú ena?

¹³ Ekieki ei: Me mwen án Jesus manaw wóón fénúfan, a kúna pwe Jiowa a pélúweni án néún kewe aramas iótek ngeni. Iwe, lupwen a nóm wóón fénúfan a iótek ngeni Seman we lón láng usun an ekiek me memmeef. Fán eú, a pwal mwo nge iótek unusen eú pwin. (Luk. 6:12; 22:40-46) Itá Jesus epwe féri ena ika a meefi pwe Jiowa ese wesewesen aúseling? Jesus a pwal áiti ngeni néún kewe chón káé ifa usun repwe iótek ngeni Jiowa. Itá epwe féri ena ika pwe a meefi pwe Jiowa ese aúselinga iótek? A ffat pwe Jesus a silei pwe Jiowa a wesewesen aúselinga iótek. Fán eú, Jesus a apasa: “Semei, üa kilisou ngonuk pwe ka aüselingaei. Ngang üa silei pwe ka aüselingaei fansoun meinisin.” Kich sia pwal tongeni lúkúlúk pwe Jiowa a aúseling ngeni ach iótek.​—Joh. 11:41, 42; Kölf. 65:2.

14, 15. (a) Ifa usun ach tichiki minne sia iótek usun a álisikich? (b) Ifa usun án Kathy iótek a álisi an epwe ririéch ngeni Jiowa?

¹⁴ Esap fansoun meinisin neman pélúwen óm iótek epwe kon pwápwáló. Nge lupwen kopwe tichiki ekkewe mettóch  ka tingor lón óm iótek, a tongeni ffatéch ngonuk met Jiowa a pélúwen ngeni, me kopwe meefi pwe i wesewesen Emén. Ika ka ereni Jiowa mettóch meinisin ka lólileniesini, iwe, i epwe akkarap ngonuk.

¹⁵ Áwewe chék ren Kathy, i a kan soun fiti ewe angangen afalafal, nge ese pwapwaiti. * Iei met a apasa: “Use sani ewe angangen afalafal. Weween, use fókkun sani.” Lupwen a retire seni an angang, emén mwán mi ásimaw a pesei an epwe fiti ewe angangen regular pioneer. Kathy a apasa: “A pwal mwo nge eitingeniei ewe application. Ua filatá ai upwe pioneer, nge ua pwal poputá iótek iteiten rán pwe Jiowa epwe álisiei ai upwe sani ewe angangen afalafal.” Jiowa mi pélúweni an iótek? Mwirin úlúngát ier lón an angangen pioneer, iei met a apasa: “Ai áeá watteen fansoun lón ewe angangen afalafal me káé seni pwii kewe Chón Kraist fefin, a alapaaló ai lipwákéch le afalafal. Ikenái, esap chék ekis ai sani ewe angangen afalafal, nge ua fen wesewesen sani. Nge lap seni ena, ai riri ngeni Jiowa a péchékkúleló seni lóóm.” Án Kathy iótek a enletin álisi an epwe ririéch ngeni Jiowa.

16, 17. (a) Met a lamot sipwe féri pwe sipwe apéchékkúlaló ach riri ngeni Jiowa? (b) Met sipwe káé usun lón ewe lesen mwirin ei?

¹⁶ Sia tongeni ákkámááraatá ach riri ngeni Jiowa tori feilfeiló. Iwe mi lamot sipwe akkaúseling ngeni ren ach kákkáé ewe Paipel iteiten rán me fóffós ngeni lón iótek. Ika sia féri ekkeei mettóch, ach riri ngeni Jiowa epwe péppéchékúleló, me ren an álillis sipwe tufichin likiitú fán ekkewe sóssót.

¹⁷ Iwe nge, fán ekkóch pwisin ach kewe osukosuk ra chék sópwósópwóló, inaamwo ika sia kan ikkiótek ngeni Jiowa. Lón ei esin fansoun a tongeni poputá ákkáimuló ach lúkúlúk wóón Jiowa. Neman sipwe meefi pwe Jiowa ese chúen aúselinga ach iótek me tipemwaramwar ika i mi fen meefi pwe kich wesewesen chiechian. Ika a iei usun meefiom, met kopwe féri? Ewe lesen mwirin ei epwe álisuk.