1-3. Ifa usun án Paulus lúkúlúk wóón Jiowa a péchékkúleló? (Ppii ewe sasing lepoputáán ei lesen.)

 LÓN fansoun ekkewe aposel, a mmen efeiengaw ika pwe en emén Chón Kraist mi manaw lón Rom. Ekkewe chón Rom ra eriáfféúmwááli ekkewe Chón Kraist. Ra tipimwáál ngeniir pwe iir ra efisi ewe watteen kkar mi fis lón Rom me erá pwe iir ra oputa aramas. Chómmóng chienom kewe Chón Kraist ra kalapus. Nge ekkóch ra achócheer ngeni ekkewe man. Ekkóch ra chúfélúúr ngeni ekkewe úr me keniir inaamwo ika ra chúen manaw pwe repwe eú minen saram lepwin. Iteiten rán ka silei pwe epwe pwal tongeni fis ngonuk eú me lein ekkena minen eriáfféú.

² Lón ena fansoun mi áweires, ewe aposel Paulus a kalapus. Neman a ekieki ika epwe wor chienan kewe Chón Kraist repwe álisi, pún a chemeni lón ewe eú fansoun mwen ena an ese wor emén a álisi. Iwe nge, Paulus a kúna álillis seni Jiowa me ren ewe Samol Jesus. A makkeei: “Ewe Samol a fen alisiei, o a apochokkulaeita.” Jesus a ngeni Paulus ewe péchékkúl mi lamot ngeni. Paulus a pwal  mwo nge makkeei: “A angasalo ngang seni auen ewe laion.”​—2 Tim. 4:16, 17, Testament Mi Fö. *

³ Paulus a chechchemeni ifa usun Jiowa a fen álisi. Iwe, a lúkúlúk pwe Jiowa epwe ngeni ewe péchékkúl mi lamot pwe epwe likiitú ngeni an kewe osukosuk me met epwe fis ngeni mwirin. I a kon lúkúlúk pún a makkeei: “Ach samol epwe pwal angasaei seni ekewe sokun angangingau meinisin.” (2 Tim. 4:18) Paulus a fen silei pwe pwal mwo lón ekkewe fansoun chienan kewe Chón Kraist rese tongeni álisi, i a tongeni lúkúlúk wóón Jiowa me Jesus pwe repwe álisi. Ese wor an tipemwaramwar usun ena.

4, 5. (a) Ié a tongeni awora ewe álillis mi lamot ngonuk iteitan? (b) Ifa usun ka tongeni apéchékkúla óm riri ngeni Jiowa?

⁴ Lón manawom, a fen toruk eú osukosuk mi áweires nge ka meefi pwe ka chék ákkáláemén me ese wor emén epwe álisuk? Áwewe chék, neman ka katowu seni óm angang are kúna sóssót lón sukul. Neman ka fókkun semmwen are a toruk pwal eú sókkun sóssót mi áweires. Neman ka tingor álillis seni aramas nge ka lichippúng pún rese awora ewe álillis mi lamot ngonuk. Pwúngún, ekkóch osukosuk ra kon weires, iwe ese ki ngeni aramas ar repwe pwákiniir. Met kopwe féri lón ekkena atun? Ewe Paipel a erenikich ach sipwe “lükü ewe Samol mi Lapalap.” (SalF. 3:5, 6) Nge ka tongeni lúkúlúk pwe epwe álisuk? Ewer! Sia tongeni álleani pwóróusen chómmóng aramas lón Paipel mi alúkúlúkú ngenikich pwe Jiowa a wesewesen álisi néún kewe aramas.

⁵ Kosap letipengaw lupwen aramas rese awora ngonuk ewe álillis mi lamot ngonuk. Nge kopwe fen usun Paulus, ekieki pwe ewe sóssót a suuki ngonuk óm kopwe tongeni unusen lúkúlúk wóón Jiowa. A pwal suuki óm kopwe kúna lón pwisin manawom pwe i a chúnguk. Óm lúkúlúk wóón Jiowa me óm riri ngeni epwe péchékkúleló.

6. Pwata fán ekkóch esap mecheres ach sipwe lúkúlúk wóón Jiowa lupwen a torikich eú osukosuk mi chou?

⁶ Neman a wor och óm osukosuk mi chou a áweiresuk. Ka fen sótun ataweei úkúkún óm tufich, me ka tingor álillis seni Jiowa lón iótek. Iwe met, iei ka tongeni meefi kinamwe pokiten ka lúkúlúk pwe epwe álisuk? Ewer, en mi tongeni! (Álleani Kölfel 62:8; 1 Petrus 5:7.) Ika ka mochen óm kopwe ririéch ngeni Jiowa, a lamot kopwe káé ifa usun kopwe lúkúlúk wóón i. Nge esap fansoun meinisin epwe mecheres óm féri ena. Pwata? Eú popun, pún esap iteitan Jiowa a mwittir pélúweni óm iótek.​—Kölf. 13:1, 2; 74:10; 89:46; 90:13; Ap. 1:2.

7. Pwata Jiowa ese chék mwittir pélúweni ach kewe iótek iteitan?

⁷ Pwata Jiowa ese chék mwittir pélúweni ach kewe iótek iteitan? Paipel a erá pwe Jiowa, i Semach nge kich néún kewe. (Kölf. 103:13) Emén sam ese ngeni néún we iteiten mettóch meinisin a tingor are mwittir chék awora ngeni. Emén sam a silei pwe a tongeni mwittir ppiitá och mochen lón letipen néún we, nge mwirin esap chúen mochen. Ewe sam a pwal silei met epwe enletin échiti ewe nau, me a weweiti ifa usun a tongeni kkúú pwal ekkóch aramas. A silei met mi lamot ngeni ewe nau, me ineet a lamot epwe angei. Ika ewe sam a chék mwittir ngeni néún we meinisin minne a tingorei, ewe sam epwe wiliti néún ewe nau chón angang. Jiowa, Semach we lón láng, a tongekich. I ewe Chón Férikich, me a silei met mi lamot ngenikich me a  filatá ineet atun epwe fich an epwe ngenikich minne sia tingor. Mi éch sipwe witiwit me ppii ifa usun Jiowa epwe pélúweni ach kewe iótek.​—Apépé ngeni Aisea 29:16; 45:9.

8. Met Jiowa a pwonei ren minne sia tongeni likiitú fan?

⁸ Pwal eú, chechchemeni pwe Jiowa a silei met emén me emén kich sia tongeni likiitú fan. (Kölf. 103:14) Iwe, a awora ewe péchékkúl mi lamot ngenikich. Pwúngún, fán ekkóch neman sia meefi pwe sise tongeni chúen likiitú. Nge Jiowa a pwon ngenikich pwe ika weiresin och sóssót a lu seni ach tufichin likiitú fan, iwe i epwe “föri efoch alen towu.” (Álleani 1 Korint 10:13.) Sia mmen meefi oururun letipach ach silei pwe sia tongeni lúkúlúk wóón Jiowa pwe a sileéchú ifa úkúkún sóssót sia tongeni likiitú fan.

9. Met itá sipwe féri ika sia tingor álillis seni Jiowa lón iótek nge ese mwittir pélúweni?

⁹ Ika sia iótek ngeni Jiowa nge ese mwittir pélúwenikich, sipwe mosonottam. Chechchemeni pwe Jiowa a mwétéres le álisikich, nge a witiwit fán mosonottam tori ewe fansoun mi fich an epwe awora minne mi lamot ngenikich. Ewe Paipel a erenikich: “Ewe Samol mi Lapalap a witiwiti chök an epwe kirikiröch ngenikemi, a pwal molotä pwe epwe ümöümöch ngenikemi. Pun ewe Samol mi Lapalap eman Kot mi unusen pwüng. Feiöchün chokewe meinisin ra anomu ar apilükülük won.”​—Ais. 30:18.

10-12. (a) Met a tongeni áweiresi ach sipwe túmúnú emén chón ach famili mi semmwen? (b) Ika ka lúkúlúk wóón Jiowa lón fansoun mi áweires, ifa usun óm féri ena epwe apéchékkúla óm riri ngeni? Apwóróusa eú pwóróus.

¹⁰ Neman nónnómum a fókkun áweires, iwe ka meefieni meefien Paulus pwe a lamot emén epwe angasok seni “auen ewe laion.” (2 Tim. 4:17) Lón ekkena esin fansoun, a fókkun lamot kopwe lúkúlúk wóón Jiowa. Áwewe chék, neman ka kan túttúmúnú emén chón óm famili mi semmwen. Ka fen iótek ngeni Jiowa an epwe álisuk pwe kopwe péchékkúl me féri kefil mi múrinné. * (Ppii ewe pwóróus fan.) Iei ka mwaren tongeni meefi kinamwe lupwen ka chechchemeni pwe Jiowa a kúnók me weweiti nónnómum. I epwe álisuk le likiitú me akkamwéchú óm tuppwél ngeni.​—Kölf. 32:8.

¹¹ Fán ekkóch neman ka meefi pwe Jiowa ese álisuk. Neman ekkewe tokter rese tipeeúfengen wóón met epwe álilliséch ngonuk. Are ka mochen pwe aramasom kewe repwe oururu letipom, nge usun ra fen áweiresuk. Kopwe lúkúlúk wóón Jiowa iteitan ren an epwe awora ngonuk péchékkúl. Kopwe akkarap ngeni i. (Álleani 1 Samuel 30:3, 6.) Mwirin, lupwen ka mirititi ifa usun Jiowa a fen álisuk, óm riri ngeni epwe péchékkúleló.

¹² A ina usun meefien Linda. * Ren fansoun langattam i a túttúmúnú seman kewe me inan mi semmwen me mwen ar máló. Iei met a erá usun ena fansoun: “Ám me pwúlúwei we me mongeei we, aua kan osukosuk usun met itá aupwe féri. Lón ekkóch atun, aua meefi pwe ese chúen wor met aua tongeni féri. Nge iei, lupwen aua nesékúriti ena fansoun, a ffat ngenikem ifa usun Jiowa a etikem. I a apéchékkúlakem me awora met mi enletin lamot ngenikem, pwal mwo nge lupwen usun itá ese chúen wor met aua tongeni féri.”

13. Ifa usun án Rhonda lúkúlúk wóón Jiowa a álisi le likiitú ngeni an kewe osukosuk mi akkatapw?

¹³ Ach unusen lúkúlúk wóón Jiowa epwe pwal álisikich le likiitú ngeni osukosuk mi fókkun chou. Ina met Rhonda a kúna lón manawan.  Pwúlúwan we, esap emén Chón Pwáraatá Jiowa, a angang wóón ar repwe mufesen. Lón pwal chék ena fansoun, tokter a ereni mwongean we pwe a úri eú semmwen mi chou itan lupus. Mwirin fitu maram, pwúlúwen mwongean na a máló. Lupwen Rhonda a meefi pwe a poputá le chikarsefál letipan, iwe a poputá le fiti angangen regular pioneer. Nge mwirin ena, inan we a máló. Ifa usun Rhonda a tongeni likiitú ngeni ekkena mettóch mi fókkun áweires? A erá: “Ua pwóppwóróus ngeni Jiowa iteiten rán, pwal mwo nge ren ekkewe kúkkúnún kefil upwe féri. Ai féri ena a apéchékkúla ngeniei pwe Jiowa i wesewesen Emén. A áiti ngeniei pwe upwe lúkúlúk wóón Jiowa nge esap fen wóón pwisin ngang are aramas. Me ewe álillis a ngeniei a wesewesen ataweei meinisin ai kewe osupwang. Iwe, ren ekkeei mettóch ua meefi pwe aua angangfengen me Jiowa.”

14. Ifa usun Jiowa a tongeni álisuk lupwen emén chón óm famili a katowu?

¹⁴ Ekieki usun pwal eú sókkun osukosuk. Neman emén chón óm famili a katowu. Ka silei met Paipel a erá usun féfférúch ngeni ekkewe mi katowu. (1 Kor. 5:11; 2 Joh. 10) Nge pokiten óm tongei ena emén, neman kopwe meefi pwe a fókkun weires are ese fen ki ngonuk óm kopwe álleasochisi met a mak lón Paipel. * Kopwe lúkú pwe Semom we lón láng epwe ngonuk ewe péchékkúl pwe kopwe tongeni tuppwél le álleasochisi i? Kopwe ekieki pwe ena mettóch a suuki ngonuk óm kopwe tongeni arap ngeni Jiowa?

15. Pwata Atam a álleasolapa Jiowa?

¹⁵ Ifa usun ena mettóch a weneiti ewe áeménún mwán, Atam? Itá a lúkú pwe a tongeni  álleasolapa Jiowa nge epwe chék chúen manaw? Aapw. Saminne Atam a tupuló. (1 Tim. 2:14) Iwe, pwata a álleasolapa Jiowa? Atam a ocheei ewe féún irá pwúlúwan we a ngeni pokiten a tongei pwúlúwan lap seni Jiowa. A aúseling ngeni pwúlúwan we nge ese fen aúseling ngeni Jiowa.​—Ken. 3:6, 17.

16. Ié sipwe itá tongei lap seni meinisin, me pwata?

¹⁶ Án Atam na kefil a áiti ngenikich pwe ach tongei Jiowa epwe péchékkúl seni ach tongei aramas meinisin. (Álleani Mateus 22:37, 38.) Nge lupwen a ina usun péchékkúlen ach tongei I, sia tongeni enletin álisi aramasach kewe, ese lifilifil ika ra angang ngeni Jiowa are rese. Iwe, akkapéchékkúla óm tong ngeni Jiowa me óm lúkúlúk wóón i. Ika ka lólilen ren emén chón óm famili mi fen katowu, iótek ngeni Jiowa me ereni meinisin minne ka meefi. * (Rom 12:12; Fil. 4:6, 7) Inaamwo ika ka meefi watteen riáfféú, eáni ewe ekiek pwe ei mettóch a suuki ngonuk óm kopwe tongeni apéchékkúla óm riri ngeni Jiowa. Iwe, kopwe tongeni lúkúlúk wóón i me kopwe silei pwe óm álleasochisi i epwe atoto ngonuk ewe sókkun feiéch mi lap seni meinisin.

17. Ika sia akkachocho lón ach angangen afalafal, met sia tongeni lúkúlúk pwe Jiowa epwe féri?

¹⁷ Met popun Jiowa a angasaaló Paulus seni “auen ewe laion”? Paulus a erá: “Pwe üpwe tongeni arongafeili unusen ewe Kapasen Kot.” (2 Tim. 4:17) Jiowa a pwal ewisa ngenikich ewe angangen afalafala ewe kapas allim me a eita ngenikich chón “angangfengen” me i. (2 Kor. 6:1; 1 Tes. 2:4) Ika sia kan achocho úkúkún ach tufich lón ei angang, sia tongeni lúkúlúk wóón Jiowa pwe i epwe awora mettóch meinisin mi lamot ngenikich. (Mat. 6:33) Me epwe mecheresiló ach witiwiti án Jiowa epwe pélúweni ach kewe iótek.

18. Ifa usun ka tongeni apéchékkúla óm lúkúlúk wóón Jiowa me óm riri ngeni?

¹⁸ Iwe, alamota iteiten rán le akkapéchékkúla óm riri ngeni Jiowa. Lupwen a toruk eú sóssót me ka lólilen ren, alamota ena fansoun le arap ngeni Jiowa. Álleani, káé, me ekilonei ewe Kapasen Kot, ewe Paipel. Sópweló le ikkiótek ngeni Jiowa me akkachocho lón óm angang ngeni. Ren óm féri ekkena mettóch, ka tongeni lúkúlúk pwe Jiowa epwe álisuk le likiitú ngeni meinisin ekkewe sóssót mi toruk iei, me ekkewe ra tongeni toruk lón mwachkkan.