1-3. Pwata emén Chón Kraist fefin a fókkun lúkú pwe Jiowa a silei an osupwang?

 LANA, emén regular pioneer, esap tongeni ménúki met a fis ngeni atun a ló Germany lón 2012. A meefi pwe Jiowa a pélúweni ekkewe ruu mettóch a tingor lón iótek. Lupwen a fiti train ngeni kassoro, a tingorei Jiowa an epwe álisi i le kúna emén epwe tongeni afalafal ngeni. Nge lupwen Lana a tori kassoro, a silei pwe ewe sepelin epwe fiti a mwet ngeni ewe rán mwirin. Lana a tingor án Jiowa álillis pún a fen iteló néún moni nge a lamot epwe kútta ia epwe nóm ie lón ena pwinin.

² Wesin chék án Lana iótek, a rongorong án emén apasa, “Hello, Lana, ke fet ikeei ie?” Ina met emén alúwél a apasa nge chienen Lana lón sukul lóóm. Inen ena át me inan we chinnap ra fiti pwe repwe asúoló, pwe i epwele ló South Africa. Lupwen Lana a apwóróusa ngeniir met a fis, ekkena fefin ra etiwa i an epwe nóm rer lón imwer. Ra eisini Lana chómmóng kapas eis usun an lúkú me an angangen pioneer.

 ³ Sorotáán ewe soran, mwirin ar mwéngéén lesossor, Lana a pélúweni pwal ekkóch ar kapas eis usun ewe Paipel. Lana a tingor ar address pwe emén epwe tongeni sópweló le pélúweni ar kapas eis. Lana a liwiniti leenian me a chúen emén regular pioneer iei. A meefi pwe Jiowa a rongorong an kana iótek, a silei met i a osupwangan, me a álisi i.​—Kölf. 65:2.

4. Met sipwele káé lón ei lesen?

⁴ Lupwen a mwittir ppiitá och osukosuk, a mecheres ach sipwe tingor án Jiowa álillis lón iótek, me a pwapwa le aúselinga ach kewe iótek. (Kölf. 34:15; SalF. 15:8) Nge lón ewe iótekin ach Samol, Jesus a áiti ngenikich pwe mei pwal wor ekkewe mettóch mi lamot sipwe iótek usun. Lón ei lesen, sipwe káé ifa usun ekkewe sáingolóón rúáánú tingor lón ena iótek ra tongeni álisikich ach sipwe tuppwél ngeni Jiowa.​—Álleani Mateus 6:11-13.

5, 6. Pwata Jesus a áiti ngenikich ach sipwe tingor ‘anach mongö’ inaamwo ika eli sise osupwangen mwéngé?

⁵ Jesus a áiti ngenikich ach sipwe tingor ‘anach’ mwéngé, nge esap chék “enei” mwéngé. Victor, emén chónemmwen mi wisen sáifetál lón Afrika a erá: “Ua enletin kilisou ngeni Jiowa pwe ngang me pwúlúwei we ause lólilen ika epwe wor enem mwéngé, are méén ám rent. Pwiich kewe ra kirekiréch le túmúnúkem iteiten rán. Nge ua iótek fán iten chókkana pwe repwe tongeni ataweei ar osukosuk ren ifa usun repwe atufichi manawer.”

⁶ Neman kich sise osupwangen anach mwéngé, nge chómmóng pwiich kewe ra wéúngaw. Ekkóch a pwal toriir ekkewe feiengaw watte. Sia tongeni iótek fán iter, nge mi lamot sipwe pwal féri och mettóch pwe sipwe álisiir. Áwewe chék, sia tongeni fang ngeniir met mi nóm rech. Sia tongeni féri och kókkót pwe sipwe awora monien álillis iteitan fán iten kálisitáán angangen néún Jiowa aramas wóón unusen fénúfan. Sia silei pwe ach monien asor a tongeni álisi pwiich kewe mi osupwang.​—1 Joh. 3:17.

7. Ifa usun Jesus a áiti ngenikich ach sisap “öürek usun ewe rän lesor”?

⁷ Mwirin án Jesus áiti ngeni néún kewe chón káé ewe iótekin ach Samol, a pwal eáni ewe lesen ach sisap kon ekieki mettóchun aion. A erá pwe ika Jiowa a túmúnú ekkewe péniráán leinfetilin lemal, iwe, “ifa usun, Kot esap fokun aüföüfakemi lap seniir? Ämi oua lükülük kisikis! Iei mine ousap öürek o apasa, . . . ‘Meta sipwe üföüf?’” Mwirin, Jesus a pwal apasa sefál: “Ousap öürek usun ewe rän lesor.” (Mat. 6:30-34) Ese wor popun ach sipwe aúreki met osupwangach lón ekkan rán mwach. Nge mi lamot sipwe chék menemenéch ren minne mi lamot ngenikich lón eú me eú rán. Áwewe chék, sia tongeni iótek fán iten leeniach sipwe nónnóm lón, eú angang epwe atufichi ach famili, me ach tipachem pwe sipwe kefiléch ren túmúnún péchékkúlen inisich. Nge mei pwal wor eú mettóch mi lamot lap seni ekkena sipwe iótek usun.

8. Alon Jesus we usun anach mwéngé a áchema ngenikich met? (Ppii ewe sasing lepoputáán ei lesen.)

⁸ Alon Jesus we usun anach mwéngé a áchema ngenikich pwal eú mettóch a kapas usun, a erá: “Aramas resap manau ren mongö chök, pwe ra manau ren iteiten kapas Kot a apasa.” (Mat. 4:4) Ina popun, mi lamot sipwe iótek pwe Jiowa epwe akkawora ngenikich káit me minne mi lamot ngenikich pwe sipwe ririéch ngeni i.

9. Pwata ach tipis a usun chék liwinimmang?

⁹ Jesus a erá: “Kopwe amusala äm tipis.” Lón pwal ekkóch afféún Paipel, alon Jesus na a iei itiitin: “Omusa senikem am liwinimang.”  (Mat. 6:12; Testament Mi Fö; Luk. 11:4) Ewer, ach kewe tipis ra usun chék liwinimmang. Lón 1951, Ewe Leenien Mas a áweweei pwe lupwen sia tipis, usun itá sia liwinimmang ngeni Jiowa. Sia liwinimmang ngeni Jiowa ach sipwe tongei me álleasochisi. Ina minne, lupwen sia tipis ngeni i, sise ngeni ach liwinimmang. Ewe Leenien Mas a erá pwe ika Jiowa a mochen, a tongeni aúkatiw an chiechiéch ngenikich. A pwal apasa pwe lupwen emén a tipis, ese pwáraatá an tong ngeni Kot.​—1 Joh. 5:3.

10. Pwata Jiowa a tongeni omusaaló ach kewe tipis, me itá epwe ifa meefiach usun?

¹⁰ A ifa me watteen ach kilisou ngeni Jiowa ren an awora án Jesus asorun méén kepich fán iten omusomusen ach tipis! A lamot ngenikich án Jiowa epwe omusaaló ach tipis iteiten rán. Jesus a máló fán itach arapakkan 2,000 ier ra ló, nge sia chúen kúna feiéchún ewe méén kepich tori ikenái. Mi lamot sipwe kan kilisou ngeni Jiowa iteitan ren ei liffang mi aúchea. Ese wor emén leich a tongeni awora ewe méén kepich mi lamot ngenikich pwe sipwe ngaseló seni tipis me máló. (Álleani Kölfel 49:7-9; 1 Petrus 1:18, 19.) Lón ewe iótekin ach Samol, ewe itiitin kapas “kopwe amusala äm tipis” a áchema ngenikich lamoten ewe méén kepich ngenikich me pwal ngeni pwiich kewe Chón Kraist. Jiowa a mochen sipwe pwal chechemeniir me ar riri ngeni i. A kapachelong ach sipwe mwittir omusaaló tipisiir lupwen ra tipis ngenikich. Fán chómmóng ekkena tipis mi chék kisikis nge lupwen sia omusereló, sia ánnetatá ach tongei pwiich kana. Sia pwal ánnetatá pwe sia kilisou ngeni Jiowa pwe a omusaaló tipisich.​—Kol. 3:13.

11. Pwata a lamot ach sipwe omusaaló tipisin ekkewe ekkóch?

¹¹ Pokiten sise unuséch, fán ekkóch epwe tongeni weires ach sipwe omusaaló chókkewe ra tipis ngenikich. (Lif. 19:18) Ika sia poputá le apwóróusa ngeni ekkóch chón ewe mwichefel met ra féri ngenikich, iwe ra pwal tongeni pachelong lón, me ei mettóch a tongeni atai án ewe mwichefel tipeeúfengen. Ika sise úkútiw le féri ena, epwe pwáraatá pwe sise aúcheani án Kot we liffang, ewe méén kepich, iwe sisap tongeni kúna feiéch seni. (Mat. 18:35) Lupwen sise omusaaló tipisin ekkewe ekkóch, Jiowa esap pwal tongeni omusaaló ach tipis. (Álleani  Mateus 6:14, 15.) Pwal och, mi lamot sisap féfféri ekkewe mettóch Jiowa a oput ika sia mochen an epwe omusaaló tipisich.​—1 Joh. 3:4, 6.

12, 13. (a) Met a fis ngeni Jesus mwirin an papatais? (b) Pwata sisap tipi ngeni ekkóch ach kkuf lón sóssót? (c) Met Jesus a ánnetatá lupwen a amwéchú an tuppwél tori máló?

¹² Lón ewe iótekin ach Samol, ewe itiitin kapas “kosap atolongakem lon sosot,” a áchema ngenikich met a fis ngeni Jesus ekiseló mwirin an papatais. Án Kot we manaman mi fel a emmweni Jesus ngeni ewe fénúpéén pwe “epwe küna sosot me ren Tefil.” (Mat. 4:1; 6:13) Met popun Jiowa a mutatá an epwe fis ena mettóch? Jiowa a tiinaato Jesus ngeni fénúfan pwe epwe ataweei ewe osukosuk mi ppiitá ewe atun Atam me Efa ra ú ngeni án Jiowa nemenem. Ar féfférún ú ngeni a eppiietá ekkewe kapas eis epwe chék tongeni pélú mwirin och fansoun. Áwewe chék, mi wor och osupwangen lón án Jiowa fératá aramas? Itá emén aramas mi unuséch a tongeni amwéchú an tuppwél ngeni Jiowa lupwen emén “mi ngau” a sótuni i? Itá epwe fen éch án aramas repwe pwisin nemenem wor? (Ken. 3:4, 5) Lón mwachkkan, lupwen Jiowa a meefi pwe a fen unusen ffatoló pélúwen meinisin ekkena kapas eis, meinisin chókkewe lón láng me wóón fénúfan repwe silei pwe án Jiowa nemenem ina ewe nemenem mi éch seni meinisin.

¹³ Jiowa i emén mi pin, ina popun esap tongeni sótuni emén ren mettóch mi ngaw. Satan, i ewe “chón otupwutupw.” (Mat. 4:3, Agapé) Satan a sótun otupukicheló lón sokopaten napanap. Nge emén me emén leich a tongeni pwisin filatá ika epwe etiwa ena sóssót are péénaaló. (Álleani James 1:13-15.) Lupwen Satan a sótuni Jesus, Jesus a mwittir ú ngeni ren an aloni alon ewe Kapasen Kot. Jesus a tuppwél ngeni Kot. Iwe nge, Satan ese fangetá. A witiwit “tori pwal eu fansoun” mi fich an epwe pwal sótuni Jesus. (Luk. 4:13, TF) Nge ese lifilifil met Satan a eáni sóssót, Jesus a álleasochisi Kot usun an Sou Nemenem fansoun meinisin. A ánnetatá pwe emén aramas mi unuséch a tongeni amwéchú an tuppwél ngeni Jiowa pwal mwo nge atun a nóm fán watteen weires. Nge, Satan a pwal achocho le sótuni meinisin chón tapweló mwirin Jesus pwe repwe álleasolapa Kot, kapachelong en.

14. Met a lamot sipwe féri pwe sipwe ttii senikich sóssót?

¹⁴ A chúen lamot an epwe pélú ekkewe kapas eis mi ppiitá usun án Jiowa nemenem. Ina popun, iei mwo Jiowa a mut ngeni Satan an epwe sótunikich. Jiowa ese ‘atolongakich lon sosot.’ Nge i a fen lúkúlúk pwe sia tongeni akkamwéchú ach tuppwél ngeni, me i a mochen álisikich. Nge ese eriánikich ach sipwe féri minne mi pwúng. A súféliti ach pwúúng le pwisin filatá. Ina minne, a mut ngenikich ach sipwe filatá ika sipwe tuppwél are sisap. Ren ach sipwe túmúnú pwe sisap kkuf lón sóssót, a lamot ngenikich ruu mettóch: akkarap ngeni Jiowa me ikkiótek fán iten an álillis. Ifa usun Jiowa a pélúweni ach kewe iótek pwe sipwe ttii senikich sóssót?

15, 16. (a) Ikkefa ekkewe pwal ekkóch sóssót mi lamot sipwe ú ngeni? (b) Epwe tipisin ié ika sia kkuf ren eú sóssót?

¹⁵ Jiowa a kan ngenikich an we manaman mi fel pwe epwe álisikich le ú ngeni án Satan kewe otuputup. Jiowa a pwal awora ewe Paipel me ewe mwichefel pwe epwe éúréúrakich usun ekkewe feiengaw. Áwewe chék, a éúréúrakich ach sisap asolapaaló watteen ach fansoun, péchékkúl, me néúch moni ngeni ekkewe mettóch ese kon lien lamot ngenikich.  Espen me Janne iir chón eú fénú mi wéúéch lón Iurop. Ren fite ier, iir regular pioneer lón eú leeni lón fénúer we mi osupwangen chón afalafal ie. Lupwen a wor néúr ménúkol, ra kaúló le pioneer, me iei mei wor rúúemén néúr. Espen a erá: “Fán chómmóng aua kan iótek ngeni Jiowa pwe ausap kkuf lón sóssót pokiten iei ause tongeni awora watteen fansoun le féri angangen Kot epwe usun me lóóm. Aua tingorei Jiowa an epwe álisikem le túmúnú ám ririéch ngeni me achocho lón ewe angangen afalafal.”

¹⁶ Pwal eú mettóch mi lamot sipwe ttii senikich, ach katol sasingin me kachitoon kapasingaw. Ika sia kkuf lón ei sóssót, sisap tongeni tipi ngeni Satan. Pwata? Pokiten Satan me an ei ótót resap tongeni eriánikich ach sipwe féri och mettóch mi mwáál. Ekkóch ra katol sasingin me kachitoon kapasingaw pokiten rese péénaaló ekiek mi ngaw. Nge chómmóng lein pwiich kewe ra fen ú ngeni ei sóssót, me kich sia pwal tongeni.​—1 Kor. 10:12, 13.

17. (a) Ifa usun sipwe pwáraatá pwe sia mochen Jiowa epwe ‘angasakich seni ewe mi ngau’? (b) Met epwele fis ekiseló epwe atoto ngenikich kinamwe?

¹⁷ Ifa usun sia tongeni pwáraatá pwe sia mochen Jiowa epwe ‘angasakich seni ewe mi ngau’? Mi lamot sisap chón “ei fanüfan” me sisap “echeni fanüfan are mettochun lon fanüfan.” (Joh. 15:19; 1 Joh. 2:15-17) A ifa me watteen ngaselóóch lupwen Jiowa epwe ataieló ei ótót mi ngaw me Satan esap chúen nóm! Nge iei mwo, mi lamot sipwe chechchemeni pwe Satan “a fokun lingeringer pokiten an silei pwe a mochomoch chök an fansoun.” Epwe achocho úkúkún an tufich pwe epwe eppeti ach angang ngeni Jiowa. Ina popun mi lamot sipwe ikkiótek pwe Jiowa epwe túmúnúkich seni Satan.​—Pwär. 12:12, 17.

18. Ika sia mochen manawewu seni katalóón án Satan ei ótót, met mi lamot sipwe féri?

¹⁸ Ka mochen manaw wóón eú fénúfan, ikewe esap wor Satan ie? Iwe, kopwe ikkiótek pwe án Kot we Mwú epwe feito, itan we epwe piniló, me letipan epwe fis wóón fénúfan. Fansoun meinisin kopwe lúkúlúk pwe Jiowa epwe túmúnuk me awora minne mi lamot ngonuk pwe kopwe tongeni amwéchú óm tuppwél ngeni i. Ewer, kopwe achocho úkúkún óm tufich pwe kopwe manaweni ewe manaw mi tipeeú ngeni masouen ewe iótekin ach Samol.