Janet a apwóróusa: “Ekiseló mwirin málóón semei we, pwúlúwei we a ereniei pwe a sani pwal emén fefin. Ekiseló mwirin na, a angei pisekin kewe seni an kapet me likitikemiló me néúm kewe rúúemén nge ese chúen apasa och.” Janet a kúnékún an angang nge peioffun ese naf fán iten liwinimmangen imwan. Ese chék osukosuken moni. A apasa: “Ua fókkun aúreki meinisin ekkewe mineféén wis ua ákkáláemén le féri nge rese ki ngeniei. Ua mengiringir pwe use atufichi nei kewe usun chék án ekkóch sam me in atufichi néúr. Pwal mwo nge tori ikenái, ua lólilen ren met ekkóch ra ekieki usúm me nei kewe. Ra ekieki ika ngang mi fen féri úkúkún ai tufich le asopwéchú ai pwúpwúlú?”

Iótek a álisi Janet an epwe nemeni meefian me túmúnú an riri ngeni Kot. A erá: “Lepwin ina ewe fansoun a fókkun weires, atun a fókkun mosonoson me use tongeni úkútiw le aúrek. Ai ikkiótek me ákkálleani ewe Paipel a álisiei le annut. Ua fókkun sani alon Filipi 4:6, 7: ‘Ousap lolilenäsini och mettoch, nge lon ämi osupwang meinisin oupwe iotek o tüngor ngeni Kot pwe epwe alisikemi. Oupwe tüngor fansoun meinisin fän kilisou. Iwe, än Kot kinamwe mi tekia seni ach tongeni weweiti epwe tümwünü lelukemi me ekiekimi.’ Ua ikkiótek lepwin me meefi án Jiowa kinamwe pwe a oururuei.”

Án Jesus kewe kapas mi ekinamwe usun iótek lón an we Afalafal Wóón ewe Chuuk a weneiti sókkun aúrek meinisin: “Sememi a fen silei met oua osupwang ren, mwen ousamwo tüngor ngeni.” (Mateus 6:8) Nge mi lamot sipwe tingorei. Iótek ina ewe ákkáeúin mettóch sia tongeni “arap ngeni Kot” ren. Iwe, ‘epwe arap ngenikich.’​—James 4:8.

Ewer, iótek esap chék ekinamwekich pokiten sia apasawu minne sia aúreki. Jiowa, ewe Chón “Aüselinga iotek” epwe pwal mwékút fán iten chókkewe ra kútta i fán lúkú. (Kölfel 65:2) Ina popun Jesus a asukula néún kewe ar repwe “iotek fansoun  meinisin, nge resap achanü.” (Lukas 18:1) Sipwe ikkiótek fán iten án Kot emmwen me álillis, me lúkúlúk pwe epwe efeiéchú ach lúkú. Sisap fókkun tipemwaramwareiti án Kot mochen álisikich are an tufichin mwékút. Ach eáni ena sókkun ekiek me “iotek fansoun meinisin,” a pwáraatá pwe a nóm rech ewe lúkú mi enlet.​—1 Tesalonika 5:17.

Met weween lúkú? A wewe ngeni án emén “silei” Kot pwe I wesewesen emén. (Johannes 17:3) Sia féri ena ren ach kákkáé me ekilonei ekiekin Kot lón Paipel. Sa silei pwe a kúna emén me emén leich me a mochen álisikich. Nge lúkú mi enlet a pwal kapachelong ekkóch mettóch me lúkún ach silei chék ekis usun Kot. Nge a pwal wewe ngeni pwe sipwe ririéch ngeni Kot fán súfél. A usun chék ewe riri lefilen aramas, sise tongeni riri ngeni emén lón chék eú pwinin. Ach lúkú a “mämäritä” ren fetálin fansoun pún sia kan kákkáé usun i, “föri mine a pwapwa ren” me kúkkúna án Jiowa álillis ngenikich. (2 Korint 10:15; Johannes 8:29) Ina ewe sókkun lúkú a álisi Janet le likiitú fán aúrek.

Janet a erá: “Met a fókkun álisiei pwe ai lúkú epwe péchékkúleló ina ai kúkkúna án Jiowa álillis fansoun meinisin. Fán chómmóng aua kúna pwúngúngaw nge usun itá ese ki ngenikem. Use fókkun silei met upwe féri nge ren ai ikkiótek, Jiowa a suuki eú alen ngaseló fansoun meinisin. Atun ua apasa ai kilisou, a áchemaato úkúkún ewe álillis a awora ngeniei. A kan ákkálisikem lón fansoun fich, lap ngeni lón atun aua osupwangen álillis. Me a awora chiechi mi múrinné iir Chón Kraist mi enlet. Iteitan ra awora álillis ngeniei me iir leenien áppirú mi múrinné ngeni nei kewe.” *

“Ua silei pwata Jiowa a erá lón Malakai 2:16, “Üa oput mwüfesen.” Pokiten ina ewe mettóch mi fókkun pwáraatá kirikiringaw ngeni ewe emén ese tipis. A fitu ier ra luló seni ewe atun pwúlúwei we a sú senikem nge fán ekkóch ua chúen letipechou me meefi pwe ese wor lamotei. Ika ua ina usun, iwe ua achocho le álisi emén pwe ena a kan pwal álisiei.” Án Janet akkapwénúetá án Paipel kapasen emmwen pwe esap pwisin áimuoló, a ekisaaló an aúrek. *​—Än Salomon Fos 18:1.

Janet a apasa: “Ewe mettóch a fókkun oururuei ina ai silei pwe Kot i ‘semen ekewe mi mäsen me chon tümwünün ekewe fefin mi mä pwülüer.’ Esap fókkun likitikemiló usun pwúlúwei we.” (Kölfel 68:5) Janet a silei pwe Kot ese sótunikich “ren och mi ingaw.” Nge a “fangafangöch ngeni aramas meinisin” an tipachem me ngenikich “tufich mi somwola” pwe epwe álisikich le likiitú fán aúrek.​—James 1:5, 13, Agapé; 2 Korint 4:7.

Nge epwe ifa usun ika sia aúreki manawach pún epwe feiengaw?