Paipel a apasa pwe ewe semelap Hiop i mi “pwüng o wenechar.” (Hiop 1:1) Lot a iteni “aramas mi pwüng.” (2 Petrus 2:8) A pwal erá pwe Tafit a féri “mine a pwüng” fán mesen Kot. (1 King 14:8) Iwe nge, ika sipwe etittina manawer, sipwe kúna pwe (1) ra mwáálliló (2) sia tongeni káé seni pwóróuseer me (3) aramas rese unuséch ra wesewesen tongeni apwapwaai Kot.

Hiop a kúna riáfféú mi akkatapw nge itá ese pwúng an epwe fis ngeni. A mwáál an ekiek pwe Kot ese áfánni ika a amwéchú an tuppwél are ese. (Hiop 9:20-22) Hiop a fókkun lúkú pwe i emén mi pwúng ina ren ekkóch ra ekieki pwe lón itiitin an kapas a apasa pwe i a pwúng seni Kot.​—Hiop 32:1, 2; 35:1, 2.

Lot a mmang le féri kefil mi ffat me mecheres. Nge a letipengaw pwal mwo “fókkun mefi riäfföün  lón manawan mi pwüng” ren announ féfféringawen chón Sotom me Komora. (2 Petrus 2:8, Agapé) Kot a esilei pwe epwe ataieló ekkena telinimw mi ngaw nge a suuki alen án Lot me an famili repwe manaw. Neman kopwe ekieki pwe pokiten Lot mi kon weires letipan ren met a fiffis, iwe fen i epwe akkomw le towu. Nge lón ei atun mi efeiengaw, a mmang. Ina pwata ekkewe chónláng mi etto pwe repwe selániir ra pwal mwo nge átekiniirewu lúkún ewe telinimw pwe repwe kúna túmún.​—Keneses 19:15, 16.

Tafit a pwáraatá nafangawen an nemeniéchú pwisin mochenin me lisowu ngeni pwúlúwen emén lón eú atun. A mmen eniwokkus pwe ren án Tafit sótun túkúmaaló an tipis a allúkú pwe pwúlúwen ewe fefin epwe ninniiló. (2 Samuel, sópwun 11) Iei met Paipel a erá: “Ewe Samol mi Lapalap a oput ewe föför Tafit a föri.”​—2 Samuel 11:27.

Hiop, Lot me Tafit, ra mwáálliló nge ekkóch ar tipis ra chou. Nge iir ra mochen angang ngeni Jiowa me álleasochis seni unusen letiper. Ina met sipwe káé. Ra pwáraatá pwe ra niamam me tipemecheres le siwili ar féffér atun mi fich. Ina popun Kot a pwapwaitiir me Paipel a apasa pwe iir aramas mi tuppwél.

Pokiten aramas ra tipis, sise tongeni sú seni ach sipwe mwámmwáálliló. (Rom 3:23) Nge ika sia tipis, mi lamot sipwe pwáraatá pwe sia niamam me féri minne epwe áwenechara ach féffér.

 Ifa usun Hiop, Lot me Tafit ra achocho le áwenechara ar féffér? Hiop i wesewesen emén mi tuppwél. Mwirin án Kot áweweéchú, Hiop a áwenechara an ekiek ese pwúng me a ekieksefál. (Hiop 42:6) Ekiekin Lot usun féfféringawen aramasen Sotom me Komora a fókkun tipeeú ngeni án Kot ekiek. Nge an mwékútúmmang lón ena atun ina met a mwáál. Nge mwirin a sú seni ekkewe telinimw repwele taló me a kúna manaw. Fán álleasochis ese nesefáliti ekkewe mettóch a likitaló. Nge Tafit, inaamwo ika a chou an tipis ren an atai án Kot allúk nge a pwáraatá met a wesewesen nóm lón letipan ren an enletin aier me tingorei Kot an úméúméch.​—Kölfel 51.

Án Kot pwapwaitiir a tipeeú ngeni minne a ekiekin kúna seni ekkewe aramas rese unuséch. Kot a “silei sokosokuch, a chemeni pwe kich pwül echök.” (Kölfel 103:14) Ina minne, ika Kot a silei pwe sise tongeni sú seni ach sipwe mwámmwáálliló, iwe met a ekiekin kútta senikich?

Án Tafit ei kapasen fén ngeni néún we Salomon ina ewe alen ach sipwe apwapwaai Kot. “En Salomon nei mwän, kopwe lükü än semom we Kot, kopwe pwal angang ngeni ren unusen lelukom.” (1 Kronika 28:9) Met weween ewe leluk mi unus? Ina ewe leluk mi tongei Kot me úppós le mochen silei me féri letipan. Esap ina eú leluk mi unuséch nge eú leluk mi meseik le angang ngeni Kot fán álleasochis me tipemecheres an epwe kúna apwúng. Ar tongei Kot me mochen le álleasochisi ina ewe popun me ren Kot, Hiop emén mi “wenechar,” Lot emén mi “pwüng” me Tafit emén mi féri “mine a pwüng” mwen mesan. Inaamwo ika ra mwáálliló nge ra tongeni apwapwaai Kot.

Ina popun ika sia ekieki och mettóch ese pwúng nge sise mochen ekieki, apasa och mettóch sia sáw ren are féri mettóch sia mirititi me mwirin pwe a mwáál, iwe ekkena pwóróus repwe apéchékkúlakich. Kot a silei pwe sise tongeni unuséch lón ei fansoun. Nge a mochen sipwe tongei i me achocho le álleasochis. Ika a unus lelukach lón ekkeei mettóch, sia tongeni lúkúlúk pwe sia pwal tongeni apwapwaai Kot.