PWÓRÓUS LÚKÚNPÉÉN | MANAW MWIRIN MÁLÓ—EPWE TUFICH?
Met A Fis Lupwen Aramas Ra Máló?
Lionel a erá: “Ua lúkú pwe a wor úlúngát leeni emén a tongeni ló ngeni atun a máló: láng, ell are purkatorio. Ua silei pwe use kon múrinné pwe upwe feitá láng nge use pwal kon ngaw pwe upwe ló lón ell. Use weweiti met weween ena leeni itan purkatorio. Use kúna fán eú pwóróusan lón Paipel. Ua chék rongorong seni aramas.”
Iei alon Fernando: “Ua káé pwe meinisin aramas repwe feitá láng atun máló nge use lúkú. Ua ekieki pwe máló a áwesi mettóch meinisin, ese wor ápilúkúlúk.”
Ka fen mwo ekieki ika ‘Met a wesewesen fis ngeni emén atun a máló? Attongeach kewe ra kúkkúna riáfféú? Epwe tufich ach sipwe kúnasefáliir? Pwata sipwe lúkú?’ Kese mochen kopwe ekieki met Paipel a wesewesen apasa. Akkomw, sipwe pwóróus wóón minne a erá usun met a fis lupwen aramas ra máló. Mwirin sipwe pwóróus wóón ewe ápilúkúlúk án Kot we Kapas ewe Paipel a fósun.
Met a fis lupwen aramas ra máló?
PAIPEL A PÉLÚWENI: “Ekewe chon manau ra silei pwe repwe mäla. Nge ekewe sotup resap silei och mettoch, resap pwal chüen angei liwinin ar angang, esap pwal wor eman a chechemeniir. Kopwe achocho le angang lon mettoch meinisin ka föri, pun esap wor och angang, ekiek, silelap ika tipachem lon lenien sotup ewe ia kopwe feila ie.” *—Än Salomon Afalafal 9:5, 10.
Ewe leenien sotup, ina ewe leeni aramas ra nóm ie atun ra máló, a liosuetá eú leeni are a liosuetá napanapen ekkewe sotup ikewe ese chúen wor tufichin ekiek me angang. Ifa ekiekin ewe mwán mi tuppwél Hiop usun ena leeni? A péút seni néún kewe me pisekin meinisin lón eú chék rán nge mwirin inisin a kuuló ren mmach mi fókkun eriáfféú. A sié ngeni Kot: “Amwo kopwe aopaei lon ewe lenien sotup, [“lón ell,” Catholic Douay Version] amwo kopwe aopaei.” (Hiop 1:13-19; 2:7; 14:13) A ffat pwe Hiop a weweiti pwe ewe leenien sotup esap leenien riáfféú lón ekkei are eú leeni epwe pwal lapóló an riáfféú ie. Nge a ekieki pwe eú leenien ngaseló seni riáfféú.
A pwal wor eú alen ach sipwe silei usun met a fis lupwen emén a máló. Sia tongeni etittina met ewe Kapasen Kot a erá usun ekkewe walimén ra manawsefál.—Ppii ewe pwóór “ Walu Manawsefál Paipel A Fósun.”
Ese wor emén me lein ekkewe walimén a erá pwe a nóm lón eú leeni mi apwapwa are eriáfféú. Ika ekkeei aramas mi manawsefál ra fen nóm lón ekkena leeni, esap pwe repwe apwóróusa usun? Me esap pwal mak lón Paipel pwe meinisin repwe silei? Nge ese mak lón Paipel ena sókkun pwóróus. A ffat pwe ekkena walimén rese fós usun. Pwata? Pún rese silei och mettóch usun nge ra méúrúchou. Ren enletin, fán ekkóch Paipel a áeá kapas áwewe usun méúr le áweweei máló. Áwewe chék, ekkewe mi tuppwél Tafit me Stefanus ra “mourulo” lón máló.—Föför 7:60; 13:36, Testament Mi Fö.
Nge ifa ewe ápilúkúlúk fán iten ekkewe mi máló? Ra tongeni pwáátá seni ar méúr?
^ Ewe kapas “lenien sotup” a afféú seni ewe fósun Ipru “Sheol” nge lón fósun Krik “Hades.” Ekkóch afféún Paipel ra néúnéú ewe kapas “ell” nge ewe lúkú pwe a wor leenien ekkei mi eriáfféwú ekkewe mi máló esap áitien Paipel.
