1. Met ewe aposel Johannes a pesekich ach sipwe ekieki usun, me pwata?

 EWE aposel Johannes a pesekich ach sipwe ekiekifichi usun watteen án Jiowa tongekich. Iei met a apasa lón 1 Johannes 3:1: “Oupwe nengeni ükükün watten än ewe Sam echenikich!” Lupwen sia ekilonei ifa úkúkún án Jiowa tongekich me ifa usun a pwáraaló an tong ngenikich, sia akkarap ngeni me a lallapóló ach tongei.

2. Pwata a weires ngeni ekkóch ar repwe silei pwe Kot mi tongeer?

² Iwe nge, a mmen alólilen pún ekkóch aramas rese silei pwe Kot a tongeer. Ra ekieki pwe Kot ese chúngú aramas. Neman ra lúkú pwe Kot a chék ffér allúk me apwúngú chókkewe rese álleasochisi i. Pokiten ekkewe afalafal mi chofona, ekkóch ra pwal mwo nge ekieki pwe Kot i emén mi kirikiringaw me ese fókkun tufich án aramas repwe tongei. Ekkóch ra meefi pwe Kot a tongei aramas meinisin ese lifilifil ika mi fet féfférúr. Nge óm káé Paipel a álisuk óm kopwe silei ewe enlet usun Jiowa. Iwe, ka silei pwe tong ina napanapan we mi kon lap seni meinisin me a fangoto Néún we pwe eú méén kepich fán itom. (Joh. 3:16; 1 Joh. 4:8) Iwe nge, ren minne ka kúkkúna lón manawom, neman ina met a áweiresi óm  kopwe weweiti úkúkún án Jiowa tongeok.

3. Met epwe tongeni álisikich le silei pwe Jiowa a tongekich?

³ Ren ach sipwe silei pwe Jiowa a tongekich, mi lamot sipwe akkomw silei pwe i ewe a férikich. I a fang ngenikich manaw. (Álleani Kölfel 100:3-5.) Ina popun ewe Paipel a erá pwe ewe áeménún aramas i “nöün Kot.” (Luk. 3:38) Jesus a pwal áiti ngenikich ach sipwe kér ngeni Jiowa “Semem lon läng.” (Mat. 6:9) Iwe Jiowa i Semach, me i a tongekich usun emén sam mi múrinné mi tongei néún.

4. (a) Jiowa, i met sókkun Sam? (b) Met sipwe káé lón ei lesen me en lesen mwirin ei?

⁴ A weires ngeni ekkóch ar repwe ekieki pwe emén sam i mi tong. Neman ra chechchemeni weiresin manawer me lekúkkúnúr pokiten án semer kirikiringaw ngeniir. Jiowa esap fókkun tongeni ina usun ngeni néún kewe. I emén Sam mi fókkun múrinné. (Kölf. 27:10) A fókkun tongekich me túmúnúkich lón chómmóng napanap. Lapólóón ach meefi án Jiowa tongekich, pwal ina lapólóón ach tongei i. (Jas. 4:8) Lón ei lesen sipwe pwóróus wóón rúáánú mettóch mi pwáraaló án Jiowa tongekich. Nge lón en lesen mwirin ei sipwe káé usun rúáánú alen ach sipwe pwáraatá ach tong ngeni i.

5. Met Kot a fang ngeni aramas meinisin?

⁵ Lupwen ewe aposel Paulus a nóm Kriis lón Aten, a kúna pwe a chómmóng ululun me ekkewe aramas ra lúkú pwe ar kewe kot ra fang ngeniir manawer. Iwe a ereniir usun “ewe Kot mi föri fanüfan me meinisin mine a wor lon.” A ereniir pwe Kot “a ngeni aramas manau me ngasangas pwal mettoch meinisin,” iwe ren i “sia manau me mwökütüküt me nonom.” (Föf. 17:24, 25, 28) Jiowa a awora mettóch meinisin mi lamot ngenikich pwe sipwe manaw me pwapwaiti manaw. Ekieki usun ekkóch me lein ekkewe mettóch a fen fang ngenikich pokiten an tongekich.

6. Met sókkun leeni Jiowa a fang ngenikich? (Ppii ewe sasing lepoputáán ei lesen.)

⁶ Áwewe chék, Jiowa a ammólnatá eú leeni mi lingéch fán itach. (Kölf. 115:15, 16) Ei fénúfan usun iei ewe mi kkóló aúchean me lein férian kewe planet meinisin. Ekkewe scientist ra káéfichi masouen fán láng me chómmóng planet, nge resaamwo kúna pwal eú planet mi masou ren mettóch meinisin mi lamot ngeni aramas pwe repwe manaw. Jiowa ese chék ngenikich meinisin minne mi lamot pwe sipwe manaw, nge a pwal féri fénúfan an epwe lingéch, kinamwe, me núkúnúkéch pwe sipwe tongeni pwapwaesini manaw. (Ais. 45:18) Lupwen sia ekieki usun ei fénúfan Semach we Jiowa a ngenikich, sia wesewesen meefi úkúkún watteen an tongekich.​—Álleani Hiop 38:4, 7; Kölfel 8:3-5.

7. Ifa usun napanapen án Jiowa férikich a pwári an enletin tongekich?

⁷ Pwal eú mettóch a pwáraaló án Jiowa tongekich, ina an férikichetá nge lón ewe napanap sipwe tongeni áppirú i. (Ken. 1:27) Weween sia tongeni meefi an tong ngenikich me pwár ngeni ach tongei. A silei pwe ina met a atoto ngenikich enletin pwapwa. Áwewe chék ren ekkewe nau, iir ra fókkun pwapwa atun ra meefi pwe semer kewe me iner ra tongeer. Sipwe pwal chechchemeni pwe Jesus a áiti ngenikich pwe sipwe pwapwa ika sia akkarap ngeni Semach we  Jiowa. (Mat. 5:3) I a ngenikich “mettoch meinisin pwe sipwe pwapwa.” A ffat pwe i mi fókkun fangafangéch me a wesewesen tongekich.​—1 Tim. 6:17, Testament Mi Fö; Kölf. 145:16.

8. Pwata sia mochen pwe Jiowa epwe asukulakich?

⁸ Ekkewe sam ra tongei néúr kewe me rese mochen repwe tupuló ren emén. Nge chómmóng sam me in lón ei fansoun ra tunaló met ewe Paipel a apasa usun minne mi pwúng me mwáál. Ina minne rese tongeni emmweniéchú néúr kewe, iwe fán chómmóng ar famili ese pwapwa nge a osukosuk. (SalF. 14:12) Iwe nge, Jiowa a ngeni néún kewe ewe sókkun emmwen mi múrinné seni meinisin pokiten i “ewe Koten enlet.” (Kölf. 31:5, NW) A pwapwa le áiti ngenikich ewe enlet usun pwisin i. A pwal asukulakich ifa usun sipwe fel ngeni me áiti ngenikich ewe sókkun manaw mi fókkun múrinné sipwe manaweni. (Álleani Kölfel 43:3.) Iwe, ifa ewe mettóch Jiowa a fen áiti ngenikich mi pwári úkúkún an tongekich?

9, 10. (a) Pwata Jiowa a áiti ngenikich usun i? (b) Met a affata usun minne a tipeni fán itach?

⁹ Jiowa a ákkáeúin áiti ngenikich usun pwisin i. A mochen sipwe silei i. (Jas. 4:8) Ina minne a áiti ngenikich itan we. Iwe, itan na a mak fán chómmóng lón Paipel lap seni pwal ekkóch it. Jiowa a pwal erenikich ika i met sókkun Kot. Lupwen sia nengeni ekkewe mettóch i a fératá, sia káé pwe i mi manaman me tipachem. (Rom 1:20) Pwal och, lupwen sia álleani Paipel, sia silei úkúkún an tongekich me silei pwe i emén mi pwúng. Atun sia silei napanapen Jiowa kewe mi múrinné, sia meefi ach akkarap ngeni i.

¹⁰ Jiowa a pwal áiti ngenikich minne i a tipeni. A erenikich pwe kich mi kapachelong lón an we famili. A pwal áweweei met i a mochen sipwe féri pwe ousipwe tongeni angangfengen fán tipeeú me kinamwe lón an we famili. Ewe Paipel a affata pwe Kot ese férikich pwe sipwe pwisin filatá fán itach minne mi éch me ngaw. (Jer. 10:23) Jiowa a silei met mi échitikich. Sia chék tongeni meefi kinamwe me menemenéch lón manawach, ika sia onómukich fán an nemenem me álleasochisi i. Pokiten Jiowa a tongekich a áiti ngenikich ena pwóróus mi enlet.

11. Met Semach we mi tong a pwon ngenikich usun mwachkkan?

¹¹ Emén sam mi tong a kan ekiekiéchú met epwe échiti néún kewe lón fansoun mwer. A mochen repwe menemenéch lón manawer. Nge a solap pún lap ngeni aramas ikenái ra aúreki minne epwe fis mwer, me chómmóng ra asolapaaló manawer le angang fán iten ekkewe mettóch repwe móróló. (Kölf. 90:10) A ifan me kilisouch pún Semach we, Jiowa, ese chék áiti ngenikich ifa usun sipwe menemenéch lón manawach iei nge a pwal pwon ngenikich ewe esin manaw mi apwapwa lón mwachkkan!

12. Ifa usun Jiowa a álisi Kain me Paruk?

¹² Lupwen Jiowa a kúna pwe Kain epwele féri minne mi fókkun ngaw, a sótun álisi ren an eisini: “Pwota ka chou, nge met ka wowongau ren? Ifa usun, are ka föri mine a pwüng, üsap etiwa om asor?” (Ken. 4:6, 7) Kain ese etiwa án  Jiowa álillis, iwe a kúna sópwongawen an féffér. (Ken. 4:11-13) Lón pwal eú fansoun Jiowa a kúna pwe án Paruk eáni ekiek mwáál a efisi an epwe mélúlú me letipengaw. Iwe, Jiowa a ereni pwe mi mwáál an ekiek me a lamot epwe ekkesiwili. Paruk a aúseling ngeni án Jiowa kapasen fén me ina met a seláni manawan.​—Jer. 45:2-5.

13. Met néún Jiowa kewe aramas mi tuppwél ra káé seni ekkewe weires ra kúna?

¹³ Pokiten Jiowa a tongekich, iwe a emmwenikich me apwúngúkich. Ese chék apwúngúkich atun mi lamot ngenikich, nge i a pwal emiritikich. (Ipru 12:6) Lón Paipel, sia álleani pwóróusen néún Jiowa kewe chón angang mi tuppwél, iir kewe Jiowa a emiritiir pwe repwe wiliti aramas mi múrinné. Áwewe chék ren Josef, Moses, me Tafit, iir ra kúna watteen weires lón manawer. Jiowa a nónnóm rer lón ekkena fansoun. Ekkewe mettóch ra káé seni ekkena fansoun weires, a álisiir atun Jiowa a ewisa ngeniir watteen wis. Atun ach álleani seni Paipel ifa usun Jiowa a álisi me emiriti néún kewe aramas, sia meefi pwe Jiowa a enletin tongekich.​—Álleani Än Salomon Fos 3:11, 12.

14. Lupwen sia féri och mettóch mi mwáál, ifa usun Jiowa a pwári pwe a tongekich?

¹⁴ Ikaamwo sia féri och mettóch mi mwáál nge Jiowa mi chúen pwáraatá an tongekich. Ika sia etiwa an kapasen apwúng me aier, iwe i epwe unusen omusaaló ach tipis. (Ais. 55:7, NW) Met weween ena? Alon Tafit ei usun án Jiowa omusaaló tipis a pwár ngenikich úkúkún watteen kirekiréchún Semach na: “A amusala ai tipis meinisin o amoela  ai apwangapwang meinisin, a angasaei seni peias o ämwärämwära ngeniei tong ellet me ümöümöch. Pun usun meserän a toau seni epilen, iei usun a atoauala ach pupungau senikich.” (Kölf. 103:3, 4, 12) Jiowa a apwúngúkich me emmwenikich lón sókkópaten napanap. Ka kan mwittir féri siwil? Chechchemeni fansoun meinisin pwe Jiowa a kan apwúngúkich pokiten a tongekich.​—Kölf. 30:5.

15. Ifa pwal och mettóch mi pwáraaló án Jiowa tongekich?

¹⁵ Emén sam mi tong a túttúmúnú an famili seni feiengaw. Ina met Semach we Jiowa a féfféri fán itach. Iei alon ewe soumakken kélfel usun Jiowa: “A tümwünü manauen nöün kewe chon pin o angaseer seni ekewe aramasangau.” (Kölf. 97:10) Ekieki ei: En ka kan mwittir túmúnú mesom pún ra aúchea ngonuk, pwal ina chék usun Jiowa, i a mwittir túmúnú néún aramas pokiten ra aúchea me ren.​—Álleani Sekaraia 2:8.

16, 17. Ifa usun Jiowa a túmúnú néún kewe aramas lóóm me ikenái?

¹⁶ Eú mettóch Jiowa a féri pwe epwe túmúnú néún kewe aramas lóóm me ikenái, ina an awora néún kewe chónláng. (Kölf. 91:11) Lón chék eú pwiin, emén chónláng a nieló 185,000 soufiun Asiria me amanawa néún Kot kewe aramas. (2 King 19:35) Lón fansoun ekkewe aposel, ekkewe chónláng ra angasaaló Petrus, Paulus me pwal ekkewe ekkóch seni lón imwen fétek. (Föf. 5:18-20; 12:6-11) Kukkuto chék a fis eú watteen maun lón eú fénú lón Afrika. Ena fénú a fókkun fitikoko pokiten fiu, solá, achomanaw, me nimanaw. Ikaamwo ese wor emén me lein pwiich kewe a máló, nge chómmóng me leir a péút seniir meinisin pisekiir. Iir meinisin ra meefi pwe Jiowa a tongeer me túttúmúnúúr. Inaamwo ika ra riáfféú nge ra chúen pwapwa. Lupwen emén seni ewe ofesilap a ló chuuriir me eisiniir ika ifa usur, ra erá, “Kilisou ngeni Jiowa pún mettóch meinisin a múrinné!”

¹⁷ Pwúngún, ekkóch néún Jiowa aramas ra ninniiló pokiten ar tuppwél usun chék ewe chón káé Stefanus. Jiowa esap eppeti an epwe fis ena fansoun meinisin. Nge a túmúnú néún aramas usun eú mwich ren an éúréúrer usun ekkewe sokopaten mettóch Satan a áeá le sótuniir. (Ef. 6:10-12) Sia kúna ekkena kapasen éúréúr seni lón Paipel me ekkewe puk me video mi kawor seni án Jiowa we mwicheich. Áwewe chék, a kawor éúréúr usun efeiengawen Internet, tongei moni, me ekkewe kachito, puk, me video game mi masou ren féfférún akkachofesá me lisowumwáál. A ffat pwe Jiowa a tongekich me mochen túmúnúkich.

18. Met ka meefi ren án Jiowa tongeok?

¹⁸ Lupwen Moses a ekieki meinisin ekkewe ier a angang ngeni Jiowa lón, i a lúkúlúk pwe Jiowa a tongei. Moses a apasa: “Kopwe aurakem ren om tong ellet iteiten lesosor, pwe aipwe köl o pwapwa lon ränin manauem meinisin.” (Kölf. 90:14) Sia fókkun pwapwa pwe sia tufichin weweiti me meefi án Jiowa tongekich. A ifa me watteen feiéchúch pún Jiowa a tongekich! Sia meefi meefien ewe aposel Johannes ei, a apasa: “Oupwe nengeni ükükün watten än ewe Sam echenikich!”​—1 Joh. 3:1.