Me mwen óm poputá le féri och mettóch, neman kopwe ekieki, ‘Met feiéchún ei mettóch ngeniei?’ Nge met, mi ngaw ach sipwe eáni ena esin kapas eis usun iótek? Neman ese. Pún sia mochen silei ika mi wor lamotan. Fán eú, pwal mwo ewe mwán mi múrinné itan Hiop a eáni ei esin kapas eis: “Ika upwe kékkéri, i epwe pélúweniei?”​—Hiop 9:16, NW.

Lón ekkewe lesen akkomw mwen ei, sia kúna ekkewe pisekin ánnet mi pwáraatá pwe ewe mettóch iótek esap chék och kinikinin mwékútúkútún lamalam are och sókkun sáfei fán iten ekiek. Ewe Kot mi enlet a wesewesen aúselinga iótek. Ika sia iótek lón ewe napanap mi pwúng me ach iótek a weneiti mettóch mi pwúng, i epwe aúselinga. Pún i a etiwakich ach sipwe arap ngeni. (James 4:8) Iwe, met sia tongeni ápilúkúlúkún kúna ika pwe sia ikkiótek iteitan? Sipwe ppii ekkóch me leir.

Atun ka nóm lón osukosuk, ka meefi pwe ka kokotiw lón óm aúrek? Ika sia nóm lón ekkena esin fansoun, ewe Paipel a pesekich ach sipwe “iotek fansoun meinisin” me ‘tüngor ngeni Kot pwe epwe alisikich.’ (1 Tesalonika 5:17; Filipi 4:6) Ewe Paipel a alúkúlúkú ngenikich pwe ika sia kuliiti Kot lón iótek, iwe ‘än Kot kinamwe mi tekia seni ach tongeni weweiti epwe tümwünü lelukach me ekiekich.’ (Filipi 4:7) Sia tongeni meefi kinamwe ika sia inaawu meinisin ach lólilen ngeni Semach we lón láng. Pún i a pesekich ach sipwe féri ena. Lón Kölfel 55:22 a apasa: “Kopwe monätä won ewe Samol mi Lapalap om weires, pwe i epwe tümwünuk.”

Chómmóng aramas wóón unusen fénúfan ra fen kúna ena esin kinamwe. Hee Ran seni South Korea a  erá: “Inaamwo ika mi watte ai kewe osukosuk, nge lupwen ua iótek fán iter, ua meefi ngaseló me meefi pwe ua tongeni likiitú.” Cecilia seni Philippines a erá: “Pokiten ngang emén inelap, ua kan lólileniesini nei kewe nengngin me inei we. Inei na ese chúen esillaei. Nge pokiten iótek, ua tongeni sópweló le féri ekkewe mettóch ua féfféri iteiten rán nge use kon chúen aúrek. Ua silei pwe Jiowa epwe álisiei le túmúnúúr.”

Ka nóm lón watteen aúrek, áwewe chék ren óm nóm lón ewe esin efeiengaw en mi tongeni máló ren, are ren och mettóch mi échúpwúl? Óm iótek ngeni “ewe Kot mi echipakich lon mettoch meinisin” a tongeni atoto watteen ngaselóón letipom. Paipel a erá pwe i a “akachipakich lon ach riaföü meinisin.” (2 Korint 1: 3, 4) Áwewe chék, lón eú atun lupwen Jesus a fókkun weires, a “fotopwäsuketiu o iotek.” Iwe, met a fis mwirin? “Eman chon läng a pwä ngeni o apöchöküla.” (Lukas 22:41, 43) Pwal emén mwán mi tuppwél itan Nehemia a weires ren ekkewe aramas mi ngaw mi ammésékú i me sótun aúkaló an féri án Kot angang. Iei met a apasa lón an iótek: “Ai Kot, kopwe apöchökülaei.” Minne a fis mwirin, a pwáraatá pwe Kot a wesewesen álisi an epwe pworacho ngeni an niwokkus me sópwéch lón an angang. (Nehemia 6:9-16) Reginald seni Ghana a áweweei minne a meefi lupwen a iótek, a erá: “Lupwen ua iótek, ákkáeúin lón ekkewe fansoun mi luló áweiresin, ua meefi pwe ua ereni emén ai osukosuk, nge ena emén a wor an tufich le álisiei me a alúkúlúkú ngeniei pwe ese wor popun upwe lólilen.” Ewer, Kot a tongeni echipakich lupwen sia iótek ngeni.

Ekkóch kefil sia féri ra tongeni wesewesen kkúú manawach me manawen chókkewe sia tongeer. Ifa usun sia tongeni féri kefil mi múrinné? Paipel a erá: “Are eman leimi a osun tipachem [ákkáeúin ren an epwe pwákini an osukosuk], epwe tüngor ngeni Kot, iwe, i epwe fang ngeni, pun Kot a fangafangöch ngeni aramas meinisin, nge esap laleiti eman.” (James 1:5) Ika sia tingor ach tipachem, Kot a tongeni áeá an we manaman mi fel le emmwenikich me etipachemakich pwe sipwe kefiléch. Pwúngún, sia tongeni tichikin tingor manaman mi fel, pún Jesus a alúkúlúkú ngenikich pwe Semach we lón láng epwe “fangela . . . ngeni chokewe mi tüngorei!”​—Lukas 11:13.

Pwal mwo nge Jesus a meefi lamoten an epwe tingor álillis seni Seman we atun a féri kefil mi lamot. Ewe Paipel a erenikich pwe atun a mochen filatá ekkewe 12 mwán repwe wiseni ewe wis aposel, i a “iotek ngeni Kot lon unusen ewe pwin.”​—Lukas 6:12.

Chómmóng aramas ikenái ra pwal usun Jesus, ra meefi núkúnúkéch lupwen ra kúna án Kot pélúweni ar tingoren álillis pwe repwe féri kefil mi múrinné. Regina, seni Philippines, a áweweei usun ekkewe sókkópaten osukosuk a kúna, áwewe chék an pwisin atufichi manawer me chón an we famili mwirin málóón pwúlúwan we, péútúlóón an angangen moni, me ekkewe weires a kúna atun a ámááraatá néún kewe. Met a álisi le féri kefil mi múrinné? Iei met a apasa: “Ua lúkúlúk wóón án Jiowa álillis ren iótek.” Kwabena, a nóm Ghana, a fós usun ewe popun a tingor álillis seni Kot, a erá, “Ua katowu seni ai we angangen ffér imw mi watte peioffun.” Iei met a apasa usun an ekiekiéchú minne epwe filatá: “Ua iótek ngeni Jiowa iteitan pwe epwe emmweniei ai upwe féri kefil mi pwúng.” A pwal apasa, “Ua fókkun meefi pwe Jiowa a álisiei ai upwe filatá ewe esin angang mi atufichiei ai upwe ataweei osupwangei lón pekin lúkú me aion.” Iwe pwal en, Kot a tongeni emmwenuk ika ka ereni lón iótek óm kewe osukosuk mi tongeni kkúú óm riri ngeni.

Sia pwóróus wóón ekkóch chék me lein ekkewe feiéch a tongeni toto rech pokiten iótek. (Ren pwal ekkóch feiéch, ppii ewe pwóór “ Feiéchún Iótek.”) Nge ren óm kopwe kúna ekkeei feiéch, a lamot kopwe akkomw silleló Kot me met letipan. Ika ina met ka mochen, aua peseok óm kopwe tingorei Chón Pwáraatá Jiowa ar repwe álisuk le káé Paipel. * Ika ka féri ena ka tongeni poputá le arap ngeni ewe Emén mi “aüselinga iotek.”​—Kölfel 65:2.