PWÓRÓUS LÚKÚNPÉÉN | MI WOR LAMOTEN IÓTEK?
Pwata Aramas Ra Iótek?
“Me lóóm ua kan soun ppet wóón moni. Ua iótek pwe upwe winneni watteen moni. Nge ese fókkun pwénútá.”—Samuel, * Kenya.
“Lón sukul, ra chék mochen aupwe apasa ekkewe iótek aua amwéchúnnúkú ra fen asukula ngenikem.”—Teresa, Philippines.
“Ua kan iótek atun ua nóm lón osukosuk. Ua iótek me tingor omusomusen ai tipis me tingor pwe upwe emén Chón Kraist mi múrinné.”—Magdalene, Ghana.
Meefien Samuel, Teresa, me Magdalene kana ra pwáraatá pwe mi sókkópat popun aramas ra iótek, ekkóch ekkena popun mi asúfél nge ekkóch rese. Ekkóch aramas ra iótek seni wenecharen letiper. Nge ekkóch ra chék iótek nge esap seni letiper. Ekkóch ra iótek fán iten ar repwe pass lón test lón sukul are an epwe win eú kúmiin urumwot ra kon sani, ekkóch fán iten án Kot epwe emmweniir lón ar famili, me a pwal wor sókkópaten popun. Ewer, fitepúkú million aramas ra meefi pwe a lamot repwe iótek. Pekin survey mi kútta ekiekin aramas ra pwáraatá pwe pwal mwo nge ekkóch aramas rese fiti lamalam ra pwal iótek iteitan.
Ka kan iótek? Ika ina, met ka kan iótek fán itan? Ikaamwo ka kan ikkiótek are kese kan ikkiótek nge neman kopwe ekieki: ‘Mi wesewesen wor lamoten iótek? Mi wor emén mi akkaúseling iótek?’ Emén soumak a meefi pwe iótek eú chék “minen sáfei.” A pwal ina usun ekiekin ekkóch mwicheich fán iten pekin pioing, ra meefi pwe iótek eú “sókkun sáfei.” Ekkewe aramas mi kan iótek ra chék féri och mettóch ese wor lamotan, are iótek och chék minen sáfei me ina chék úkúkún lamotan?
Minne Paipel a apasa a sókkóló seni ekkena memmeef pún a áiti ngenikich pwe iótek esap chék och minen sáfei. A erenikich pwe a wor emén mi wesewesen aúselinga ekkewe iótek aramas ra eáni lón napanap mi pwúng me weneiti mettóch mi pwúng. Met, mi enlet ena? Sipwe ppii ekkóch pisekin ánnet.
^ Ekkóch ekkeei it ra siwil.
