1. Ifa úkúkún lamoten ewe angangen afalafal me ren Jesus? Áweweei.

 JESUS a fókkun pwapwaiti an epwe fós usun án Kot we Mwú. Lupwen a nóm wóón fénúfan, a fós fán chómmóng usun ena Mwú lap seni ekkewe pwal ekkóch pwóróus. A féúni ena Mwú lap seni fán 100 lón an angangen afalafal. Enlet, a fókkun lamot ewe Mwú me ren Jesus.​—Álleani Mateus 12:34.

2. Fitemén chókkewe mi rongorong ewe allúk lón Mateus 28:19, 20? Pwata sia erá ena? (Ppii ewe footnote.)

² Ekiseló mwirin án Jesus manawsefál, a chuuri eú mwichen aramas, iir lap seni 500. (1 Kor. 15:6) Neman ina ewe atun Jesus a ngeniir ewe allúk ar repwe afalafal ngeni “chon ekewe mwü meinisin.” Ena angang ese mecheres. * A ereniir pwe ewe angangen afalafal epwe sópwósópwóló lón fansoun langattam tori “lesopolan [ótóten ei] fanüfan.” Lupwen ka afalafala ewe kapas allim lón ei fansoun, ka álisatá pwénútáán ena oesini.​—Mat. 28:19, 20.

3. Ikkefa ekkewe úlúngát mettóch ra fen álisikich lón ach angangen afalafala ewe kapas allim?

 ³ Mwirin án Jesus ngeniir ewe allúk ar repwe afalafal, a alúkúlúkúúr ren an erá: “Ngang üpwe etikemi.” (Mat. 28:20) Iwe, Jesus a pwon ngeni néún kewe chón káé pwe epwe emmweni ewe angangen afalafal me álisiir le afalafal wóón unusen fénúfan. Jiowa a pwal ákkálisikich. A ngenikich “mettoch meinisin mi mürina” pwe epwe álisikich lón ach angangen afalafal. (Ipru 13:20, 21) Lón ei lesen, sipwe káé usun úlúngát me lein ekkena mettóch mi múrinné a ngenikich: (1) ekkewe pisekin afalafal a fen kawor ngenikich, (2) ekkewe sókkópaten alen afalafal ngeni aramas sia fen féfféri, me (3) ewe angangen káit a fen kawor ngenikich. Akkomw, sipwe ppii ekkóch ekkewe pisekin afalafal sia fen néúnéú lón ekkewe 100 ier ra ló.

4. Ifa usun ekkewe sókkópaten pisekin afalafal ra álisikich lón ach angangen afalafal?

⁴ Jesus a apasa pwe pwóróusen ewe Mwú a usun chék féún pwikil emén a fen fótuki lón sókkópaten sókkun pwúl. (Mat. 13:18, 19) Ewe chón atake a áeá sókkópaten pisekin atake pwe epwe ammólnatá ewe pwúl. Pwal ina chék usun, ach we King a fen awora ngenikich ekkewe pisek sia tongeni áeá le álisi aramas ar repwe etiwa ewe pwóróus sia uwei ngeniir. Ekkóch ekkena pisek ra álilliséch ren chék fitu ier, nge ekkóch leir sia chúen ákkáeá tori ikenái. Nge meinisin ekkena pisek ra elipwákéchúkich lón ach angangen afalafal.

5. Met ena testimony card, me ifa usun néúnéún?

⁵ Lón 1933, ekkewe chón afalafal ra poputá le néúnéú eché chékúkkúnún taropwe itan testimony card, ei mettóch a fen álisi chómmóng ar repwe poputá le afalafal. A mak lón ena taropwe eú pwóróus seni Paipel mi mwochomwoch me ffat. Fán ekkóch a pwal katowu mineféén testimony card mi masou ren mineféén pwóróus. Pwiich Erlenmeyer a 10 ierin lupwen a kerán néúnéú ewe testimony card. A áweweei: “Ám aua kan poputá le apasa: ‘Kese mochen kopwe álleani ei taropwe?’ Mwirin án ewe chón imw álleani minne a mak lón ewe taropwe, aua anéúnéú ngeni puk, mwirin aua ló seni.”

6. Ifa usun a álilliséch ewe testimony card?

⁶ Ewe testimony card a fen álilliséch ngeni ekkewe chón afalafal. Áwewe chék, ekkóch chón afalafal ra nisássáw, me inaamwo ika ra wenewenen mochen afalafal nge rese silei met repwe apasa. Ekkóch chón afalafal ra fókkun pwora, iwe repwe apwóróusa ngeni chón imw mettóch meinisin ra silei lón chék fitu minich, nge fán ekkóch minne ra apasa ese pwáraatá fáiro. Ewe testimony card a álisi meinisin chón afalafal ar repwe afalafala eú pwóróus mi fataffatéch me mecheres le weweiti.

7. Ikkefa ekkóch weires ren néúnéún ewe testimony card?

⁷ A pwal wor áweiresin néúnéún ewe testimony card. Grace Estep a erá: “Fán ekkóch, repwe eisinikem, ‘Iwe, met masouen ena card? Kese chék tongeni ereniei?’” Pwal och, ekkóch chón imw rese tongeni álleani met a mak lón ena testimony card. Ekkóch ra chék angei, me éppúngaaló asamer. Ekkóch ra oput ewe pwóróus, iwe ra kamwekisietiw ewe testimony card. Inaamwo ika a wor weiresin néúnéún ewe testimony card, nge a fen álisi pwiich kewe le afalafal ngeni chón órur me ra silleló pwe iir chón afalafala pwóróusen ewe Mwú.

8. Ifa usun ra néúnéú ewe chikongki? (Ppii ewe sasing lepoputáán ei lesen.)

 ⁸ Pwal eú pisekin afalafal ra néúnéú mwirin ewe ier 1930, ina ewe chikongki. Ekkóch Chón Pwáraatá Jiowa ra eita ngeni Aaron pokiten a kan wisen fós fán iter. (Álleani Ekistos 4:14-16.) Ika ewe chón imw a tipeeú ngeni an epwe aúseling, iwe ewe chón afalafal epwe ettiki eú afalafal mi mwoch seni Paipel, mwirin epwe anéúnéú ngeni ekkóch puk. Fán ekkóch, unusen ekkewe famili ra motfengen me aúseling ngeni ewe afalafal! Lón 1934, ewe Watch Tower Society a poputá le féri ekkewe chikongki fán iten ewe angangen afalafal. Ló, ló, ló, a wor 92 sókkópaten afalafal ra rekotuni.

9. Ifa usun a álilliséch ewe chikongki?

⁹ Lupwen emén mwán itan Hillary Goslin a rongorong eú me lein ekkena afalafal, a paaro ewe chikongki úkúkún eú wiik pwe epwe aronga ngeni chón órun kewe ewe pwóróus lón Paipel. Mwirilóón, chómmóng aramas ra pwapwaiti ewe enlet me ra papatais. Ló, ló, ló, néún Pwiich Goslin kewe rúúemén nengngin ra fiti ewe Sukulen Gilead me wiliti misineri. Ewe chikongki a usun chék ewe testimony card, pún a pwal álisi chómmóng pwiich kewe ar repwe poputá le afalafal. Ló, ló, ló, ren ewe Sukulen Angangen Chón Kraist, ewe King epwe asukula néún kewe aramas ar repwe lipwákéch lón ar angangen asukul.

10, 11. Ifa usun ra néúnéú simpung me reitio lón ewe angangen afalafal, me pwata ra álilliséch?

¹⁰ Fán emmwenien ach we King, néún Kot aramas ra fen áeá sókkópaten alen afalafal pwe ewe kapas allim epwe tongeni tori chómmóng aramas. Ekkena mettóch ra ákkáeúin lamot lupwen mi chék chókúkkún ekkewe chón afalafal. (Álleani Mateus 9:37.) Áwewe chék, fite fite ier ra ló, sia néúnéú simpúng le esilefeili ewe kapas allim. Iteiten wiik Pwiich Russell a tiinaaló eú an afalafal seni Paipel lón eú ofesin news. Mwirin, ena ofes a tiinaaló ena afalafal ngeni ekkewe leenien ffér simpung lón Canada, Iurop me Merika. Lupwen a tori ewe ier 1913, án Pwiich Russell kana afalafal a fen peres lón 2,000 simpung, nge a wor 15,000,000 som chón álleaniir.

¹¹ Reitio a pwal álilliséch lón ewe angangen arongafeili ewe kapas allim. Lón April 16, 1922, Pwiich Rutherford a eáni eú me lein an kewe afalafal lón reitio, me órun 50,000 aramas ra aúseling. Ekiseló mwirin, sia poputááni pwisin ach we reitio station itan WBBR, me a katowu ewe áeúin prokram lón February 24, 1924. Iei alon ewe Watch Tower minen December 1, 1924: “Ám aua lúkú pwe me lein ekkewe pisek meinisin aua fen áeá, reitio ina ewe mi kon álilliséch me ese watte moni towu fán itan lón achéúfetállin pwóróusen ewe enlet.” Reitio a álisikich le tikeri chómmóng aramas lón ekkewe leeni ikewe ie mi chék chókúkkún chón afalafal ie, usun chék pwal álilliséchún ewe simpung.

12. (a) Ikkefa ekkewe sókkópaten alen afalafal lón ekkewe leeni ikewe aramas ra soun nóm ie ka kon pwapwaiti? (b) Met a tongeni álisikich le pworacho ngeni ach niwokkus le fiti ekkena sókkun alen afalafal?

¹² Ikenái a pwal álilliséch ewe sókkun afalafal lón ekkewe leeni ikewe aramas ra soun nóm ie. A lallapóló ewe angangen afalafal ngeni aramas lón ekkewe leenien sousou bus, train, me park tarakú, market me leenien kunou. Ka pireir le fiti ei sókkun angangen afalafal? Ika ina, tingor álillis seni Kot, me ekieki alon Pwiich Manera  ei, emén chónemmwen mi wisen sáifetál: “Sia ekieki pwe ekkena sókkópaten alen afalafal, iir pwal alen ach sipwe tongeni angang ngeni Jiowa me ach sipwe pwáraatá tuppwél ngeni, me pwal ina eú sóssótun ach tuppwél. Sia pwal mwétéres le ánneta ngeni Kot pwe sia tipemecheres le angang ngeni me féri ese lifilifil angang a tipeni.” Lupwen sia pworacho ngeni ach niwokkus me sótuni ekkewe mineféén alen afalafal, sia apéchékkúlaló ach lúkúlúk wóón Jiowa, me wiliti chón afalafal mi lipwákéch.​—Álleani 2 Korint 12:9, 10.

13. Pwata a mmen álilliséch ach we website lón ach angangen afalafal, me met ka fen kúna lón óm áeá ewe website?

¹³ Chómmóng chón afalafal ra pwapwa le apwóróusa ngeni aramas usun ach we website, jw.org, ikewe ie ra tongeni álleani me kapiinawu puk mi lóngólóng wóón Paipel lón lap seni 700 fósun fénúfan. Iteiten rán lap seni 1.6 million aramas ra tolong lón ach na website. Me lóóm, ewe kapas allim mi katowu lón reitio a tori ekkewe aramas mi nóm lón ekkewe leeni towau. Nge ikenái ewe website a pwal ina usun.

14. Ifa ewe káit mi lamot chón afalafal repwe angei, me menni sukul a fen álisiir le lipwákéchúló lón ar angangen asukula aramas?

¹⁴ Ekkewe pisek me alen afalafal sia fen pwóróus wóón ra fókkun álilliséch. Iwe nge, a lamot ngeni ekkewe chón afalafal lón ena fansoun lóóm ar repwe angei káit fán iten ena angang. Áwewe chék, fán ekkóch ekkewe chón imw rese tipeeú ngeni met ra rongorong seni ewe chikongki. Nge ekkóch ra pwapwaiti me ra pwal mochen alapaaló ar sile. Mi lamot ekkewe chón afalafal repwe silei ifa usun repwe pélúweni fán fáiro án aramas kapasen eppet me ifa usun repwe lipwákéch lón ar angangen asukul. Ese mwáál, fán emmwenien án Kot we manaman mi fel, Pwiich Knorr a kúna pwe a lamot ngeni chón afalafal ar repwe káé ifa usun repwe fós atun ra afalafal. Ina minne, seni 1943, ekkewe mwichefel ra poputá le akkóta ewe Sukulen Angangen Chón Kraist. Ei sukul a álisi meinisin ar repwe lipwákéchúló lón ar angangen asukula aramas.

15. (a) Met pwóróusen ekkóch lupwen ra eáni ar kinikin lón ewe Sukulen Angangen Chón Kraist? (b) Ifa usun ka pwisin kúna lón manawom pwénútáán án Jiowa we pwon lón Kölfel 32:8?

¹⁵ Chómmóng pwiich kewe rese kon lien eéreni ar repwe fós mwen aramas. Pwiich Ramu a chechchemeni ewe áeúin afalafal a eáni lón 1944. A afalafal usun Toek, emén aramas lón Paipel. A erá: “Pwásukui kewe ra chechchech, pwal pei kewe ra chchech me awei a pwal chchech.” A pwal  sópweló: “Epwe kerán ina áeúin fansoun ai upwe afalafal wóón stage, nge use fangetá.” Inaamwo ika ese mecheres ena sukul nge pwal ekkewe kúkkún ra fiti. Pwiich Manera a chechchemeni lupwen emén kúkkún át a eáni an áeúin afalafal, a apwóróusa: “Lupwen a poputá le fós, a pwal poputá le kechiw pún a fókkun niwokkus. Nge a chék mochen eáni an we afalafal, iwe a chék sópweló le fós fán kechiw lón unusen an afalafal.” Neman kese kan mochen uwawu meefiom lón mwich are eáni kinikin pokiten ka sáw are meefi pwe ka tufichingaw. Ika ina, tingorei Jiowa an epwe álisuk le pworacho ngeni óm niwokkus. Epwe álisuk usun an a fen álisi ekkewe chón sukul lóóm lón ewe Sukulen Angangen Chón Kraist.​—Álleani Kölfel 32:8.

16. (a) Me lóóm met popun a kawor ewe Sukulen Gilead? (b) Nge seni 2011 feito ewe Sukulen Gilead a kawor fán iten ié?

¹⁶ Án Kot we mwicheich a pwal awora minen káit me ren ewe Sukulen Gilead. Ena sukul a kawor pwe epwe álisi ekkewe chón sukul le apéchékkúlaló ar mochen afalafala ewe kapas allim. Ena Sukulen Gilead a poputá lón 1943, me seni ena ier a wor 8,500 ra fen fiti, iwe mwirin ra titiiló ngeni 170 fénú pwe repwe misineri. Nge seni 2011, chókkewe chék ra ketiw lón ei sukul, ikkena iir ekkewe ra fiti angangen special pioneer, chónemmwen mi wisen sáifetál, chón angangen Bethel, are ekkewe misineri resaamwo fiti.

17. Ifa álilliséchún ewe káit lón ewe Sukulen Gilead ?

¹⁷ Mi álilliséch ewe Sukulen Gilead? Ewer. Nengeni met a fis lón Japan. Lón August 1949, mi wor kis seni engol chón afalafal lón ena fénú. Nge lesópwólóón ena ier, 13 misineri ra pwal fiti ekkewe chón afalafal lón ena leeni le afalafal. Lón ei fansoun, mi wor 216,000 som chón afalafal lón Japan, me arapakkan esopwun iir ra fiti angangen pioneer!

18. Ikkefa pwal ekkóch ach sukul?

¹⁸ Mi pwal wor chómmóng ach sukul, áwewe chék ewe Sukul fán Iten Mwán mi Ásimaw me Chónálillisin Mwichefel, Sukulen Pioneer, Sukulen Chón Afalafala ewe Mwú, Sukul fán Iten Chónemmwen mi Wisen Sáifetál me Pwúlúwer Kewe, me Sukul fán Iten Ekkewe Chón Túmúnú Keangen Ofesilap me Pwúlúwer Kewe. Ekkena sukul ra asukulaéchú pwiich kewe me apéchékkúlaló ar lúkú. A ffat pwe Jesus a kan sópweló le asukula chómmóng aramas.

19. Met Pwiich Russell a apasa usun ewe angangen afalafal, me ifa usun a pwénútá minne a apasa?

¹⁹ Án Kot we Mwú a fen nennemenem lap seni 100 ier. Lón ekkena atun, ach we King, Jesus Kraist a fen ekkemmweni ewe angangen afalafal. Lón 1916, Pwiich Russell a lúkú pwe ewe angangen afalafala ewe kapas allim epwe tori unusen fénúfan. A erá: “Ewe angang a mwittir lallapóló, me epwe chék pwal wakkatteló pún ei angangen afalafala ewe ‘kapas allimen ewe mwú’ itá epwe fis wóón unusen fénúfan.” (Faith on the March, me ren A. H. Macmillan, p. 69) Ena angang a pwéppwénútá lón ei fansoun! Sia kilisou ngeni Jiowa, ewe Koten kinamwe, pwe a awora mettóch meinisin mi lamot ngenikich pwe sipwe tongeni apwénúetá letipan!