1. Ifa napanapen Jiowa we mi lamot seni meinisin, me met meefiom usun Jiowa ren óm silei ena?

 EWE Paipel a áiti ngenikich pwe “Kot I tong.” (1 Joh. 4:8, Agapé) Nge met wesewesen weween ena? Tong esap chék ina eú me lein án Jiowa kewe chómmóng napanap mi amwarar, nge fen ina napanapan we mi lamot seni meinisin. Ese chék nóm ren ena napanap tong, nge fen Kot i tong. Mettóch meinisin i a féri ra lóngólóng wóón tong. A ifa me kilisouch pún tong a amwékútú Jiowa le fératá unuselapen láng me fénúfan, me ménúmanaw meinisin!

2. Met án Kot tong a alúkúlúkú ngenikich? (Ppii ewe sasing lepoputáán ei lesen.)

² Jiowa a fókkun áfánni férian kewe meinisin me a alóllóól an tongeer. An we tong a alúkúlúkú ngenikich pwe minne a tipeni fán iten aramas epwe pwénútá nge epwe atoto feiéch wachemwuk. Iwe chókkewe mi álleasochis repwe kúna pwapwa enlet. Áwewe chék, pokiten tong, Jiowa “a filätä eu rän epwe apwüngü unusen chon fanüfan meinisin fän pwüng ren eman mwän i a awisa ngeni,” ina i Jesus Kraist. (Föf. 17:31) Sia lúkú  pwe epwe fis ena kapwúng. Epwe wewe ngeni feiéch fóchófóch fán iten ekkewe aramas mi álleasochis.

3. Epwe ifa usun nónnómun aramas ika Kot ese tongeer?

³ Epwe ifa usun nónnómun aramas lón fansoun mwach ika pwe Kot ese tongeer? Aramas repwe chék sópweló le nemeni aramas fán etipetipaen Satan, ewe kot mi kirikiringaw me ese wor an tong. (2 Kor. 4:4; 1 Joh. 5:19; álleani Pwärätä 12:9, 12.) Ika Jiowa ese tongekich, nónnómuch lón mwach epwe fókkun attong!

4. Pwata Jiowa a mut ngeni an epwe fis ewe féfférún ú ngeni an nemenem?

⁴ Lupwen Satan a ú ngeni án Kot nemenem, a pwal etipetipa popuch kewe ar repwe pwal ú ngeni. Satan a appélúwa me ú ngeni án Kot pwúúng an epwe Sou Nemenemen unuselapen láng me fénúfan. A erá pwe an nemenem epwe múrinné seni án Kot nemenem. (Ken. 3:1-5) Fán tipachem, Jiowa a mut ngeni Satan och fansoun an epwe ánnetatá minne a apasa. Nge minne a fis mwirin a ánnetaéchú pwe án aramas, are Satan nemenem epwe chék sópwongaw.

5. Met uruwoon aramas a fókkun pwáraatá?

⁵ Lón ei fansoun, ei fénúfan a chék ngangngawoló. Lón ekkewe 100 ier ra ló, lap seni 100 million aramas ra ninniiló lón maun. Iei met Paipel a erá usun “ekewe ränin lesopolan.” “Ekewe aramasangau me soulängatuputup repwe chök fokun ngauala.” (2 Tim. 3:1, 13) Paipel a pwal apasa: “Ai Samol mi Lapalap, üa silei pwe aramas resap püsin nemeni manauer, resap pwal tongeni akota mine repwe föri.” (Jer. 10:23) Uruwoon aramas a fókkun pwáraatá pwúngún ena wokisin. Jiowa ese féri aramas ren ewe tufich are ewe pwúúng ar repwe nemeni pwisin iir me lúkún an emmwen.

6. Pwata Kot a mutatá minne mi ngaw?

⁶ Ren án Jiowa mutatá minne mi ngaw an epwe sópwósópwóló lón och fansoun, a pwal ánnetatá pwe an we chék nemenem epwe tongeni sópwéch. Lón mwachkkan, Kot epwe amóeló minne mi ngaw meinisin. Mwirin ena, ika a pwal wor sefál chón ú ngeni an nemenem mi tong, i epwe mwittir pwákini. Jiowa a tongeni áeá minne a fis lón uruwoon aramas pwe epwe ánnetatá pwúngún an epwe chék mwittir nieló ekkewe chón ú ngeni i. Esap fókkun chúen wor minne mi ngaw.

7, 8. Ifa usun Jiowa a pwáraatá an tong?

⁷ Jiowa a fen pwáraatá watteen an tong lón chómmóng napanap. Ekieki usun úkúkún watteen me lingemwararen unuselapen láng me fénúfan. A masou ren fite fite billion galaxy, me lón eú me eú galaxy a wor fite billion fúú me planet. Lón ach we galaxy itan Milky Way, eú me lein ekkewe fúú, ina ewe akkar. Esap tongeni fis manaw wóón fénúfan ika ese wor akkar. Meinisin ekkena mettóch ra áiti ngenikich pwe Jiowa, i ewe Chón Férikichetá, ra pwal pwár ngenikich napanapan kewe, áwewe chék an manaman, tipachem, me tong. Ewer, “esap wor eman aramas a tongeni küna Kot. Nge aramas ra tongeni silei usun Kot ren ekewe mettoch i a föri. Pun seni ewe fansoun Kot a föri fanüfan ra fokun tongeni weweiti pwe an manaman a nom tori feilfeilachök, pwe i wesewesen Kot.”​—Rom 1:20.

⁸ Jiowa a anapanapa fénúfan ákkáeúin fán iten an epwe álisatá manaw. Meinisin  masouen lón fénúfan ra álisatá nónnómun man me aramas. Kot a eleenia aramas lón eú tánipi mi fókkun ling me a féri pwe inisiir me ekiekiir epwe unuséch me ra tufichin manaw tori feilfeiló chék. (Álleani Pwärätä 4:11.) Pwal och, “a amongöni mönümanau meinisin, an tong ellet a nonom tori feilfeilachök.”​—Kölf. 136:25.

9. Inaamwo ika Jiowa i emén Koten tong, nge met a oput?

⁹ Jiowa i Koten tong, nge a oput minne mi ngaw. Áwewe chék iei met Kölfel 5:4-6 a apasa usun Jiowa: “En sap eman Kot mi sani mine a ngau, . . . ka oput chokewe meinisin mi föföringau. . . . Ka oput chon niela aramas me chon atupu aramas.”

10, 11. (a) Met epwe fis ngeni ekkewe aramas mi ngaw? (b) Ifa usun Jiowa epwe efeiéchú ekkewe aramas mi álleasochis?

¹⁰ Lón ewe fansoun mi fich, Jiowa epwe amóeló minne mi ngaw seni láng me fénúfan pokiten i Koten tong me i a oput minne mi ngaw. Án Kot we Kapas a pwonei: “Ekewe aramasangau repwe käriwu, nge chokewe mi apilükülükü ewe Samol mi Lapalap repwe fanüeni ewe fanü. Lon fansoun mochomoch echök ekewe aramasangau resap chüen nom.” Chókkewe mi oputa Jiowa “repwe moropöküla usun och ötüöt.”​—Kölf. 37:9, 10, 20.

¹¹ Án Kot we Kapas a pwal pwonei: “Ekewe chon pwüng repwe fanüeni ewe fanü o nonom won tori feilfeilachök.” (Kölf. 37:29) Ekkewe aramas mi tuppwél repwe “pwapwaäsini ar feiöch me kinamwe mi somwola.” (Kölf. 37:11) Pwata? Pokiten fansoun meinisin ach we Kot mi tong a féri mettóch mi fókkun échiti néún kewe chón angang mi tuppwél. Ewe Paipel a apasa pwe Kot “epwe talüpwasei chönün mas seni won meser meinisin. Esap chüen wor mäla ika letipeta ika kechü ika cheuch, pun ekewe mettochun lom ra morola.” (Pwär. 21:4) A ifa me amwararen ewe ápilúkúlúk mi nóm mwen chókkewe mi álleasochis, iir kewe ra aúcheani án Kot tong!

12. Ié ewe sia tongeni erá pwe i “ewe aramas esap wor an tipis”?

¹² Ewe Paipel a apasa: “Kopwe afota ewe aramas esap wor an tipis o nenengeni ätewe mi wenechar. A wor mwirimwirin ätewe mi afisätä kinamwe, nge ekewe chon tipis repwe rosola meinisin, pwal mwirimwirin ekewe aramasangau repwe kärila.” (Kölf. 37:37, 38) “Ewe aramas esap wor an tipis,” i ewe emén mi káé usun Jiowa me Néún we, me apwénúetá letipen Kot. (Álleani Johannes 17:3.) A fókkun lúkú pwe “fanüfan me mettochun lon aramas ra kon mochenia ngeni repwe morola, nge iö a föri letipen Kot epwe manau tori feilfeilachök.” (1 Joh. 2:17) Pokiten sópwólóón ei fénúfan a arapoto, a fókkun lamot ach sipwe ‘anomu ach apilükülük won ewe Samol mi Lapalap o aleasochisi an kewe allük.’​—Kölf. 37:34.

13. Ifa ewe mettóch Kot a féri mi pwáraatá an tong mi lap seni meinisin?

¹³ Inaamwo ika sise unuséch, nge sia tongeni álleasochisi Kot. Mi pwal tufich ach sipwe ririéch ngeni Jiowa pokiten án Jesus we asorun méén kepich, ina ewe mettóch Kot a féri mi pwáraatá an tong mi lap seni meinisin. Jiowa a awora ewe méén kepich pwe epwe suuk ngeni aramas mi álleasochis alen ar repwe ngaseló seni tipis me máló. (Álleani Rom 5:12; 6:23.) Jesus a  tuppwél ngeni Kot fansoun langattam lón láng, iwe Jiowa a lúkúlúk wóón Néún na an epwe pwal akkamwéchú an tuppwél wóón fénúfan. Pokiten Jiowa emén Sam mi tong, a fókkun chou letipan lupwen a kúna kirikiringawen aramas ngeni Néún we. Nge, Jesus a tuppwél me a penaatá án Kot pwúúng le nemenem, me pwáraatá pwe emén aramas mi unuséch a tongeni akkamwéchú an tuppwél ngeni Kot pwal mwo nge fán watteen weires.

14, 15. Met a suuk ngeni aramas pokiten án Jesus máló?

¹⁴ Fán watteen weires mi kkóló ssenúkún, Jesus a akkamwéchú an tuppwél me álisatá án Jiowa pwúúng le nemenem. Sia kilisou pún ren án Jesus máló a kawor ewe méén kepich mi suuki ngeni aramas ar repwe manaw tori feilfeiló chék lón án Kot we ótót sefé. Aposel Paulus a áweweei ewe tong Jiowa me Jesus ra pwáraatá ren ewe méén kepich. A apasa: “Lupwen sia chüen nom lon ach apwangapwang, lon ena fansoun Kraist a fen mäla fän iten chon föföringau. A men weires än eman epwe mäla fänäsengesin eman aramas mi pwüng. Eli epwe wor eman epwe tongeni mäla fänäsengesin eman aramas mi aramasöch. Nge Kot a pwäri ngenikich ükükün an echenikich, pwe lupwen sia chüen nonom lon tipis, Kraist a mäla fänäsengesich.” (Rom 5:6-8) Aposel Johannes a makkeei: “Kot a  pwäri an echenikich ren an tinato Nöün Aleman lon fanüfan, pwe kich sipwe manau ren. Iei wewen chen: Esap pwe kich sia echeni Kot, nge i a echenikich o tinato Nöün we pwe i popun pwe ach tipis kana ra musala.”​—1 Joh. 4:9, 10.

¹⁵ Jesus a apasa: “Pun iei usun Kot a echeni chon fanüfan, pwe a fangala Nöün Aleman, pwe meinisin mi lükü i resap pöütmwälila, pwe repwe eäni manau esemüch.” (Joh. 3:16) Inaamwo ika a fókkun riáfféú letipen Jiowa, nge a awora Néún we pwe epwe eú méén kepich. Ei mettóch a pwáraatá úkúkún watteen án Kot tongei aramas, me epwe nóm tori feilfeiló chék. Paulus a makkeei: “Üa fokun lükü pwe . . . sap mäla are manau, sap chon läng are ekewe anün rochopwak, sap mettochun ikenai are mettochun mürin are och manaman, esap pwal ekewe mettochun pekitä are ekewe mettochun pekitiu, esap fokun wor och lein förian kewe meinisin epwe tongeni aimwüfesenikich seni än Kot we chen mi torikich lon Kraist Jesus ach Samol.”​—Rom 8:38, 39.

16. Ifa ewe Mwúún Messaia, me Jiowa a filatá ié an epwe Sou Nemenemen ena Mwú?

¹⁶ Án Kot we mwú, ewe Mwúún Messaia, a pwal ánnetatá án Jiowa tong fán iten aramas. Ifa usun? Jiowa a fen ewisa emén Sou Nemenem mi tongei aramas me fichiiti ena wis, ina i Jesus Kraist. (SalF. 8:31) Kot a filatá 144,000 aramas ar repwe eti Kraist le nemenem lón láng. Lupwen ra manawsefál, repwe chechchemeni minne ra kúna lón manawer atun ra chúen manaw wóón fénúfan usun aramas. Ar chechchemeni ena epwe álisiir le álisi aramas. (Pwär. 14:1) Lupwen Jesus a nóm wóón fénúfan, ewe Mwú ina menlapen an afalafal, me a áiti ngeni néún kewe chón káé ar repwe iótek: “Semem lon läng. Itom epwe pin, Mwum epwe war, letipom epwe fis won fanüfan usun chök lon läng.” (Mat. 6:9, 10) Sia ápilúkúlúkú pwénúetáán ekkewe iótek mi usun ena lupwen án Kot we Mwú epwe atoto ngeni aramas chómmóng feiéch!

17. Apépéfengeni án Jesus nemenem me án aramas nemenem.

¹⁷ A mmen watte sókkofesenin án Jesus nemenem fán tong me án aramas nemenem. Án aramas nemenem a efisatá maun mi nieló fite million aramas. Nge ach we Sou Nemenem Jesus, a enletin tongekich me áppirú án Kot kewe napanap mi amwarar, ákkáeúin an we tong. (Pwär. 7:10, 16, 17) Jesus a erá: “Oupwe feito rei ämi meinisin mi weiresikis o uwochou, ngang üpwe asösökemi. Oupwe ämwäralong womi ai we waas o kaiö seniei, pun ngang üa lukpwetete o tipetekison, iwe, oupwe küna söön ngünümi. Pun ai we waas üpwe anomu womi a mecheres, nge wosemi we üpwe ngenikemi a pän.” (Mat. 11:28-30) A ifa me alúkúlúkún án Kot na pwon mi pwári tong!

18. (a) Met a fiffis seni ewe ier 1914? (b) Met sipwe káé lón en lesen mwirin ei?

¹⁸ Ewe Paipel a áiti ngenikich pwe án Kot we Mwú a poputá le nemenem lón láng lón 1914. Seni ena fansoun, a fis ioifengenin ekkewe lusun mi kepit repwe eti Jesus le nemenem seni láng, me pwal ioifengenin chón ewe “mwich mi fokun chocho,” chókkewe repwe manaw seni katalóón ei ótót me tolong lón án Kot we ótót sefé. (Pwär. 7:9, 13, 14) Ifa úkúkún chóchóón ena mwich mi fókkun chóchó lón ei fansoun? Met Kot a mochen ar repwe féri? Ewe lesen mwirin ei epwe pélúweni ekkena kapas eis.