Kot a fen pwár ngeni aramas minne a ekieki. A áeá an we manaman mi fel pwe epwe waalong minne a ekieki lón ekiekin ekkewe sou makken Paipel. (2 Petrus 1:21) Sia tongeni silei ewe enlet usun Kot ren ach ákkálleani ewe Paipel.​—Álleani Johannes 17:17; 2 Timoty 3:16.

Kot a pwáraatá chómmóng mettóch usun pwisin i me lón ewe Paipel. A pwáraaló popun an a fératá aramas, met epwe féri fán iten aramas, me minne a tipeni ren ifa usun aramas repwe manaweni manawer. (Föför 17:24-27) Jiowa Kot a mochen ach sipwe silei ewe enlet usun i.​—Álleani 1 Timoty 2:3, 4.

Jiowa, i emén Koten enlet, me a tiinaato Néún we, Jesus, an epwe áiti ngeni aramas ewe enlet. Ina minne, ekkewe mi tongei minne mi enlet ra tapweló mwirin Jesus. (Johannes 18:37) Kot a mochen án ekkena esin aramas repwe fel ngeni.​—Álleani Johannes 4:23, 24.

Satan a fen eppeti chómmóng aramas seni ar repwe silei Kot ren an achéúfetálei pwóróus mi chofona usun Kot. (2 Korint 4:3, 4) Chókkewe rese tongei minne mi múrinné ra fitaaló ekkena esin afalafal chofona. (Rom 1:25) Nge fite million aramas mi letipwenechar ra kúna ewe enlet usun Kot ren ar kákkáé ewe Paipel.​—Álleani Föför 17:11.