Anchangei óm kerán ló ngeni eú fénúen ekis. Ka kúna ekkewe aramas, ar eéreni, ener mwéngé, me néúr kewe moni kese kan sissilei. Ese mwáál kopwe meefi lichippúng.

Neman epwe pwal ina usun meefiom atun ka kerán álleani ewe Paipel. Lupwen ka álleani, usun itá ka ló ngeni eú fénúen lóóm lóóm kese sissilei. Me ikena ie, ka kúna ekkewe chón Filistia, ka pwal kúna ekkewe esin eéreni mi och sókkun, áwewe chék ar ‘kamwei üfer,’ kúna ewe sókkun mwéngé itan mana me ewe féún moni itan talent. (Ekistos 16:31; Josua 13:2; 2 Samuel 3:31; Mateus 18:24) Ese mwáál meinisin ekkena mettóch ra osukosukok. Nge usun chék óm ló ngeni eú fénúen ekis, ese mwáál kopwe pwal kilisou ika emén a tongeni áweweei ngonuk minne ka kúna.

Seni ewe fansoun a poputá mak án Kot kapas lón ewe ier 1513 mwen Kraist, a fen kawor ngeni aramas álillis pwe repwe tongeni weweiti. Áwewe chék, Moses, ewe áeménún sou emmwenin ewe mwúún Israel, a “popuetä le awewei ngeniir” minne a mak.​—Tuteronomi 1:5.

Engeréú som ier mwirin ena, mi chúen wor ekkewe chón asukula án Kot we Kapas. Lón ewe ier 455 mwen Kraist, eú watteen kúmiin chón Jus, kapachelong chómmóng semirit ra mwichfengen lón eú leenien emwicheich lón ewe telinimwen Jerusalem. Iwe ekkewe chón asukula masouen Paipel ra pwal nóm ikena me ra ‘aleaniöchü ewe puk,’ pwal chék ina ewe puk mi pin. Nge esap chék ina met ra féri, ra pwal “aföüü o aweweni, pwe ekewe aramas ra tongeni weweiti.”​—Nehemia 8:1-8.

Nimepúkú ier mwirin, Jesus Kraist a pwal féri ena esin angangen asukula aramas. Jesus a fókkun silleló me ren aramas pwe i emén sense. (Johannes 13:13) A afalafal ngeni mwichemmongun aramas, me pwal ngeni emén me emén. Lón eú atun a fós ngeni eú watteen mwichen aramas, me a eáni ewe afalafal mi iteféúló, ewe Afalafal Wóón ewe Chuuk, iwe “ewe mwichen aramas a fokun weitifengeni usun an afalafal.” (Mateus 5:1, 2; 7:28) Lón ewe ier 33, Jesus a fós ngeni rúúemén néún chón káé atun ar fetál ngeni eú sóópw mi kkan ngeni Jerusalem, me a ‘afata ngeniir wewen ekewe Toropwe mi Pin.’​—Lukas 24:13-15, 27, 32.

Néún Jesus kewe chón káé, iir pwal chón asukula aramas ewe Kapasen Kot. Lón eú atun, emén néúwis seni Itiopia a álleani eú wokisin lón Paipel. Néún Jesus we chón káé itan Filip a ló ren me eisini: “Ka weweiti mine ka aleani?” Ewe re Itiopia a pélúweni: “Epwe ifa usun ai üpwe tongeni weweiti nge esap wor eman a awewe ngeniei?” Iwe, Filip a poputá le áweweei ngeni ewe wokisin.​—Föför 8:27-35.

Chón Pwáraatá Jiowa lón ei fansoun ra fiti eú angangen asukula aramas ewe Paipel lón 239 fénú wóón unusen fénúfan, usun chék ekkewe sou káit me chón asukul lón fansoun lóóm. (Mateus 28:19, 20) Iteiten wiik, ra álisi lap seni tiu million aramas ar repwe weweiti ewe Paipel. Chómmóng lein chókkana iir seni ekkewe fénú aramasen lón rese kan lúkú Kraist. Ekkena kókkótun káé ese kamé me ra tongeni fis lón pwisin imwen ekkewe chón káé are ia chék a mecheres ngeniir ar repwe káé ie. Ekkóch ra mwo nge pwapwaiti ar káé wóón phone, are video, néúnéú computer are cellphone mi Internet.

Kese mochen eisini Chón Pwáraatá Jiowa ifa usun ka tongeni kúna álillis seni ena kókkót. Kopwe kúna pwe ewe Paipel, esap ina eú puk mi weires óm kopwe weweiti, nge fen ina eú puk mi ‘aüchea fän iten afalafala ewe kapas mi let, a amiritikich, a apwüngükich o aiti ngenikich usun ach sipwe manau fän pwüng,’ pwe sipwe “fokun tufich o lipwäköch ngeni sokun angang mürina meinisin.”​—2 Timoty 3:16, 17.