1, 2. Pwata Paipel a alélléfengeni ekkei me ach tufich le fós?

 LÓN ewe ier 1871, a poputá eú kkar lón eú wollap lón Wisconsin lón Merika. Ngeten ena ekkei a mwittir, me a unusen kenaló ruu billion som irá. Lap seni 1,200 aramas ra máló. Ese pwal wor eú kkar lón Merika epwe ina úkúkún chóchóón chón máló lón. Usun itá och kúkkún parasen ngeten ekkei seni mecháán taian ekkewe train mi ssá únúkkún ena wollap a poputááni ena watteen kkar. Ei mettóch a áchema ngenikich alon ewe Paipel, a erá: “Oupwe ekieki usun eu kükün ngeten ekkei a tongeni kenala eu wöllap mi watte.” (Jas. 3:5) Pwata James a apasa ena?

² A áweweei: “Chönawach a pwal usun chök eu ekkei.” (Jas. 3:6) Ewe chénaw a wewe ngeni ach tufich le fós. Sia tongeni apasa mettóch mi tongeni atoto feiengaw, usun chék eú ekkei. Ach kewe kapas ra tongeni kkúú ekkewe ekkóch. Ewe Paipel a pwal mwo nge erá pwe minne sia apasa a tongeni atoto manaw are máló. (SalF. 18:21, Kapasen God) Nge, weween sipwe chék fanafaneló pwe site apasa och mettóch mi eletipechowu emén? Aapw. Pún saminne sia kaúló le áeá ekkei pokiten sia niwokkus ren ach sipwe tongeni kkar ren. Nge sia fen chék túmúnúéchú ach áeá ekkei. Áwewe chék, sia tongeni áeá ekkei pwe sipwe kuk  anach mwéngé, sipwe epwichikich me asaramakich. Pwal ina chék usun, ika sia túmúnúéchú ach fós, sia tongeni áeá ei tufich le asamolu Jiowa me álisi ekkewe ekkóch.​—Kölf. 19:14.

3. Ikkefa ekkewe úlúngát mettóch epwe álisikich le apéchékkúla aramas lupwen sia fós ngeniir?

³ Jiowa a ngenikich ach tufich le ereni ekkewe ekkóch minne sia ekieki me meefi ren ach áeá awach le fós ngeniir are fós ren ach pwoomw ren péúch. Iwe, ifa usun sipwe áeá ei liffang mi amwarar le apéchékkúla aramas? (Álleani James 3:9, 10.) Mi lamot sipwe silei ineet sipwe fós, met sipwe apasa, me ifa usun sipwe fós.

4. Ineet atun mi fich ach sipwe chék fanafaneló?

⁴ Fán ekkóch a éch ach sipwe chék fanafaneló. Ewe Paipel a apasa pwe “a wor fansoun fanafanala.” (SalAf. 3:7) Áwewe chék, lupwen ekkóch ra fós sia kan fanafaneló pwe sipwe pwáraatá súfél. (Hiop 6:24) Pwal och, sise fós usun ekkewe mettóch mi monomon itá ekkóch aramas resap pwal silei usun. (SalF. 20:19) Lupwen emén a asongakich, sia tipachem ika sipwe achocho le mosonoson me sisap apasa och.​—Kölf. 4:4.

5. Ifa usun sipwe pwáraatá ach kilisou ren án Jiowa liffang ngenikich ach tufich le fós?

⁵ Nge mi pwal wor ekkóch fansoun a éch ach sipwe fós. (SalAf. 3:7) A wor fansoun ach sipwe mwareiti Jiowa, apéchékkúla ekkewe ekkóch, uwawu meefiach, me ereni ekkewe ekkóch met sia osupwangan. (Kölf. 51:15) Ika sia áeá ach tufich le fós lón ekkena napanap, sia pwáraatá ach kilisou ngeni Jiowa ren ei liffang a ngenikich. Pún lupwen emén chiechiach a liffang ngenikich och liffang mi múrinné, sia pwal mochen alamotaéchú.

6. Pwata a lamot ach sipwe filatá ewe fansoun mi fich ach sipwe fós?

⁶ Pwata a lamot ach sipwe filatá ewe fansoun mi fich ach sipwe fós? Än Salomon Fos 25:11 a apasa: “Eu kapas eman a apasa lon fansoun fich a usun chök ekewe föün ringo mi oleol usun kolt mi nom lon eu sepi seni silifer.” Ekkewe féún ringo mi oleol usun kolt ra lingéch, nge repwe fen kon lingéch ika ra nóm mwen och mettóch mi anúwen silifer. Pwal ina chék usun, eli mi wor och mettóch mi múrinné sia tongeni ereni emén. Nge ika sia filatá ewe fansoun mi fich ach sipwe fós lón, iwe, sia tongeni álisiéchú ena emén. Ifa usun sipwe féri ena?

7, 8. Ifa usun pwiich kewe lón Japan ra áppirú án Jesus leenien áppirú?

⁷ Ika sia fós lón ewe fansoun ese fich, neman ekkewe aramas resap weweiti are etiwa minne sia apasa. (Álleani Än Salomon Fos 15:23.) Áwewe chék, lón March 2011, eú chechchechin fénú me pwal lóó watte a ataieló chómmóng telinimw lón étiwen Japan. Lap seni 15,000 aramas ra máló. Inaamwo ika a péút seni chómmóng Chón Pwáraatá Jiowa ar famili me chiechier kewe, nge ra pwal mochen néúnéú Paipel le álisi ekkewe pwal ekkóch aramas mi pwal kúna feiengaw. Nge pwiich kana ra silei pwe chómmóng lein ekkena aramas iir chón ewe lamalamen Buddha me rese kon silei masouen Paipel. Iwe, pwiich kana rese afalafal ngeniir usun ewe manawsefál lón ena atun nge ra fen oururuur me áweweei ngeniir popun a fis watteen feiengaw ngeni aramas mi múrinné.

⁸ Pwiich kana ra áppirú Jesus. Jesus a silei ineet atun epwe fanafaneló me a pwal silei ineet atun epwe fós. (Joh. 18:33-37; 19:8-11) A witiwiti ewe fansoun mi fich an epwe áiti ngeni néún kewe chón káé ekkóch  mettóch. (Joh. 16:12) Pwiich kana lón Japan ra witiwiti ewe fansoun mi fich ar repwe afalafal ngeni aramas usun ewe manawsefál. Ruu esopw ier mwirin fisin ewe lóó watte, ra anéúnéú ngeni aramas ewe taropwe Ekkewe mi Máló Repwe Tongeni Wesewesen Manawsefál? Chómmóng aramas ra néúni ena taropwe me kúna oururun letiper seni minne ra álleani. Mi lamot kich sipwe pwal ekieki usun eérenien aramas me minne ra lúkú pwe sipwe tongeni silei ineet ewe fansoun mi fich ach sipwe fós ngeniir.

9. Ikkefa pwal ekkóch atun mi lamot sipwe witiwiti ewe fansoun mi fich ach sipwe fós?

⁹ Ikkefa ekkewe pwal ekkóch atun mi lamot sipwe witiwiti ewe fansoun mi fich ach sipwe fós? Neman emén a apasa och mettóch mi asongakich. Sise pwal mochen mwittir pélúweni me apasa och mettóch ese múrinné, nge sia tipachem ika sipwe fen akkomw mwo ekieki: ‘Eménnan a apasa enan fán iten an wesewesen mochen eletipengawaei? A wesewesen lamot ai upwe fós ngeni ren minne a apasa?’ Neman epwe éch ach sipwe chék fanafaneló. Nge ika mi wor och popun mi éch ach sipwe fós ngeni, mi lamot sipwe akkomw witiwit tori an a wes ach song. (Álleani Än Salomon Fos 15:28.) Are, a wor eú atun sia mochen pesei chón ach famili chón lúkún ar repwe káé usun Jiowa. Mi lamot sipwe mosonottam, ekiekifichi met sipwe apasa, me ppii ineet atun neman repwe tipemecheres le etiwa minne sipwe apasa.

10. (a) Pwata a lamot sipwe túmúnúfichi menni kapas sipwe apasa? (b) Met sókkun napanapen fós sisap eáni?

¹⁰ Minne sia apasa a tongeni apéchékkúla aramas are eletipechour. (Álleani Än Salomon Fos 12:18.) Chómmóng aramas lón án Satan ei ótót ra néúnéú ekkewe “kapas mi ngau” mi usun “föün esefich” are “ketilas” pwe ra mochen ekinása are eletipechou ekkewe ekkóch. (Kölf. 64:3) Chómmóng ra eáni ekkena esin fós pún ra káé seni lón kachito are TV. Nge ekkewe Chón Kraist resap eáni ekkena esin fós, pwal mwo nge fán iten ar minen atakirikir. A éch ach sipwe eáni ekkewe esin fós mi atakirikir pún a tongeni ámeseikaatá minne sia apasa. Nge mi lamot sisap eáni kapasen esiit, weween apasa och mettóch epwe ásáwa emén me pwal mwo nge turunufaseei fán iten chék án ekkewe ekkóch repwe takir. Ewe Paipel a éúréúra ngeni ekkewe Chón Kraist ar resap eáni kapasen turunufas. A pwal apasa: “Esap wor kapas mi ngau epwe towu seni lon awemi, pwe kapas mi mürina chök, sokun kapas mi afefetai aramas o alisiir lon ar osupwang, pwe chokewe mi rongorong ngeni repwe feiöch ren.”​—Ef. 4:29, 31.

11. Met epwe álisikich le néúnéú ekkewe sókkun kapas mi fich?

¹¹ Jesus a apasa: “Ekewe kapas ra towu seni awemi iei somwen lelukemi.” (Mat. 12:34) Weween pwe minne sia apasa a tongeni pwáraaló met wesewesen meefiach. Ina minne, ika sia enletin tongei aramas, sipwe néúnéú ekkewe kapas mi fich ach sipwe apasa ngeniir. Ikkena ekkewe esin kapas mi éch me apéchékkúl.

12. Met epwe pwal álisikich le néúnéú ekkewe sókkun kapas mi fich?

¹² Ren ach sipwe silei ekkewe kapas mi fich sipwe néúnéú, a lamot sipwe ekiekiéchúúr. Inaamwo ika King Salomon a tipachem, nge a “ekiekifichi” minne epwe makkeetiw me “kütta wewer” pwe epwe pwúng me apwapwa ngeni chón állea. (SalAf. 12:9, 10) Met a tongeni álisikich le silei met sipwe apasa? Sia tongeni kútta me lón ewe Paipel me néúch kewe puk ekkóch mwuten kapas sipwe tongeni néúnéú lón ach  fós ngeni aramas. Sia tongeni káé weween ekkewe mwuten kapas sise weweiti. Sia pwal tongeni káé seni án Jesus leenien áppirú ren napanapen an fós ngeni aramas mi apéchékkúler. Jesus a fókkun silei met epwe apasa, pún Jiowa a ‘atufichi le kapas pwe epwe silei met sokun kapas epwe achipa ngeni chon riaföü.’ (Ais. 50:4) A pwal lamot ach sipwe ekieki ifa usun ach kapas epwe kkúú ekkewe ekkóch. (Jas. 1:19) Sia tongeni pwisin eisinikich: ‘Ika ua apasa ei, eménnan epwe weweiti met itá ua mochen ereni? Epwe ifa usun meefian?’

13. Pwata mi lamot ach fós epwe fataffatéch me mecheres le weweiti?

¹³ Ekkewe chón Israel ra áeá ttikin rappwa fán iten ar minen esilesil. Eú ttikin rappwa a wewe ngeni án aramas repwe chufengen. Nge pwal eú sókkun ttikin rappwa a wewe ngeni án ekkewe soufiu repwe ló maun. Anchangei met epwe tongeni fis ika ese ffat ngeni ekkewe soufiu ttikin ewe rappwa! Ewe Paipel a alélléfengeni ewe ttikin rappwa mi fataffatéch weween ngeni ekkewe kapas mi mecheres án aramas repwe weweiti. Ika sise áweweéchú ngeni aramas weween ekkewe mettóch, iwe repwe tongeni osukosuk are fen lúkú och mettóch ese pwúng. Ikaamwo sia mochen an epwe ffat ach áwewe, nge mi lamot sipwe pwal túmúnúéchú ach kapas pwe epwe asúfél.​—Álleani 1 Korint 14:8, 9.

14. Apwóróusa ifa usun Jesus a eáni ewe sókkun fós mi mecheres án aramas repwe weweiti.

¹⁴ A mmen fókkun éch minne a mak lón Mateus sópwun 5 tori 7. A áiti ngenikich ifa usun Jesus a néúnéú ekkewe sókkun fós mi mecheres án aramas repwe weweiti. Lón án Jesus afalafal, ese néúnéú ekkewe esin kapas mi weires are ese pwal achommonga an kapas pwe aramas repwe ingeiti i. Ese pwal apasa mettóch epwe ekinása letipen ekkewe ekkóch. I a áiti ngeni aramas ekkewe lesen mi lamot me alóllóól weween, nge minne a apasa mi mecheres án aramas repwe weweiti. Áwewe chék, Jesus a mochen alúkúlúkú ngeni néún kewe chón káé pwe ese wor lamoten ar repwe aúreki ener mwéngé iteiten rán. Iwe a áweweei pwe Jiowa a awora ngeni ekkewe machchang ener mwéngé. Mwirin, a eisiniir: “Ifa usun, ämi ousap kon aüchea seniir?” (Mat. 6:26) Ren ekkena kapas mi mecheres, Jesus a álisiir ar repwe weweiti eú lesen mi lamot me meefi núkúnúkéch.

15. Pwata a lamot sipwe fós fán kirekiréch?

¹⁵ Napanapen ach fós ngeni ekkewe ekkóch a tongeni pwal lamot usun chék met sia apasa. Aramas ra pwapwaiti le aúseling ngeni Jesus pokiten a néúnéú ekkewe “kapas mi fiti ümöümöch,” are fós fán kirekiréch. (Luk. 4:22, Agapé) Lupwen sia fós fán kirekiréch, aramas repwe pwapwa le aúseling ngenikich me etiwa minne sia apasa. (SalF. 25:15) Sipwe tongeni kapas fán kirekiréch ika sia súféliti aramas me áfánni meefier. Ina met Jesus a féri. Áwewe chék, lupwen a kúna ekkewe aramas mi fókkun achocho ar repwe tongeni aúseling ngeni, i a fókkun pwapwa le awora fansoun fán iter me asukuler. (Mark. 6:34) Ikaamwo aramas ra kapasingaw ngeni, nge i ese eliwini ngeniir.​—1 Pet. 2:23.

16, 17. (a) Ifa usun sia tongeni áppirú Jesus lupwen sipwe fós ngeni chón ach famili are chiechiach kewe? (Ppii ewe sasing lepoputáán ei lesen.) (b) Ifa usun án emén inelap pélúweni emén fán kirekiréch a sópwéch?

¹⁶ Inaamwo ika sia tongei chón ach famili me chiechiach kewe, nge eli sia kapas ngeniir fán péchékkúl pokiten sia sissilefichiir. Eli sia ekieki pwe ese wor lamoten ach sipwe túmúnúéchú ach fós ngeniir. Nge  Jesus ese kapas péchékkúl ngeni chiechian kewe. Lupwen ekkóch leir ra áninifengen ika ié leir mi lapalap, fán kirekiréch i a áwena ar ekiek me a néúnéú emén kúkkún át an epwe álisiir le áwenechara ekiekiir. (Mark. 9:33-37) Ekkewe mwán mi ásimaw ra tongeni áppirú Jesus le fénéú ekkewe ekkóch fán kirekiréch.​—Kal. 6:1.

¹⁷ Ikaamwo emén a apasa och mettóch mi asongakich, epwe éch ika sipwe pélúweni fán kirekiréch. (SalF. 15:1) Áwewe chék, emén pwiich fefin ese wor pwúlúwan a wor emén néún át teenage. Néún na a chék tipin angang ngeni Jiowa nge a pwal pwapwaiti le féri mettóch mi ngaw. Nge lón án neminna we mwichefel mi wor emén pwiich fefin a tongei me a ereni: “A solap pwe a sópwongaw óm emiriti noum we.” Ewe inelap a chék fanafaneló me ekiek, mwirin a erá: “Pwúngún pwe ren mwo iei ese fisiéch, nge ai emiriti nei we, iei eú angang mi chék sópwósópwóló. Sipwap fós mwirin Armaketon, iwe epwe ffat ika mi sópwéch are sópwongaw.” Pokiten án ewe inelap mosonoson me kirekiréch ngeni pwiin na fefin Chón Kraist, iwe ra chúen chiechiéchfengen. Pwal och, ewe át a rongorong minne inan na a apasa me mirititi pwe inan na a chúen lúkúlúk pwe a tongeni siwil. Iwe, a úkútiw le chiechi ngeni chienan kewe mi ngaw, a papataiseló, me mwirin och fansoun a angang lón Bethel. Ese lifilifil ika sia fós ngeni pwiich kewe, chón ach famili, me aramas sise sissilei, nge mi lamot pwe fansoun meinisin ach kapas epwe “pwetete o apwapwai aramas.”​—Kol. 4:6.

18. Ifa usun sia tongeni áppirú Jesus lón ach fós ngeni aramas?

¹⁸ Ach tufichin ereni ekkewe ekkóch minne sia ekieki me meefi, ina eú liffang seni Jiowa mi enletin amwarar. Ika sia áppirú án Jesus leenien áppirú, sipwe filatá ewe fansoun mi fich ach sipwe fós, túmúnúéchú minne sipwe apasa, me achocho ach sipwe kirekiréch. Ina minne sipwe fós lón ewe napanap epwe apéchékkúla ekkewe ekkóch me apwapwaai Jiowa.